លោកនាយករដ្ឋមន្ត្រី ហ៊ុន សែន ប្រកាសនៅថ្ងៃទី៨ មីនា ឲ្យមានការដោះលែងស្ត្រីជាប់ពន្ធនាគារ ២២នាក់ ដែលមានផ្ទៃពោះ និងមានកូនតូចរស់នៅជាប់ជាមួយតាមការលើកលែងទោសរបស់ព្រះមហាក្សត្រ។
ការប្រកាសរបស់លោក ហ៊ុន សែន ចំថ្ងៃខួបលើកទី១០៤ ទិវានារីអន្តរជាតិ ក្នុងពេលជួបសំណេះសំណាលជាមួយស្ត្រីជាមន្ត្រីរាជការនៅវិមានសន្តិភាព រាជធានីភ្នំពេញ។ លោកមានប្រសាសន៍ថា បើទោះបីជាទារកកើតហើយ អាយុ ១ឆ្នាំ ២ឆ្នាំ ៣ឆ្នាំ នៅក្នុងពន្ធនាគារ គឺមានភាពវេទនាណាស់ ខ្វះចំណី ជីវជាតិ។
លោក ហ៊ុន សែន អំពាវនាវសូមឲ្យស្ត្រីទាំងឡាយ កុំប្រព្រឹត្តរឿងខុសច្បាប់ ហើយគេចវេះការមានទោស។ លោកថា ក្រសួងមហាផ្ទៃ និងក្រសួងយុត្តិធម៌ ត្រូវសិក្សា បើសិនជាកើតមានករណីនេះ និងវិធានការទៅមុខទៀតត្រូវដោះស្រាយយ៉ាងម៉េច ហើយត្រូវធ្វើយ៉ាងណាកុំឲ្យពួកឧក្រិដ្ឋជនឆ្លៀតប្រើប្រាស់ស្រ្តីទាំងនោះដើម្បីប្រព្រឹត្តរឿងខុសច្បាប់។
ក្រៅពីការប្រកាសឲ្យដោះលែងអ្នកទោសស្ត្រី លោក ហ៊ុន សែន បានថ្លែងអំណរគុណចំពោះអង្គការការពារសិទ្ធិមនុស្សលីកាដូ (LICADHO) ដែលជាអ្នកផ្ដួចផ្ដើមសិក្សាអំពីករណីស្ត្រីមានផ្ទៃពោះ និងមានកូនតូចជាប់ឃុំក្នុងពន្ធនាគារ ហើយបង្កជាគំនិតឲ្យរដ្ឋាភិបាលពិចារណាអំពីការសុំលើកលែងទោសនេះទៅព្រះមហាក្សត្រ។
តួលេខដែលផ្ដល់ដោយក្រសួងយុត្តិធម៌បង្ហាញថា ស្ត្រីដែលកំពុងជាប់ឃុំក្នុងពន្ធនាគារដោយមានកូនតូចរស់នៅជាមួយ និងស្ត្រីកំពុងមានផ្ទៃពោះ សរុបទូទាំងប្រទេសមានចំនួនជាង ៤០នាក់។ ក្នុងចំណោមនោះមានស្ត្រីចំនួន ១៦នាក់ មានសាលក្រមស្ថាពរពីតុលាការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។