មេដឹកនាំរបបក្រុងភ្នំពេញ លោក ហ៊ុន សែន នៅល្ងាចថ្ងៃសុក្រ ទី២៦ កក្កដា បានជូនដំណើរចៅស្រីច្បង ត្រឡប់ទៅសិក្សានៅប្រទេសក្រៅវិញ ដោយសុខចិត្តលើកពេលកិច្ចប្រជុំគណៈរដ្ឋមន្ត្រីប្រចាំសប្ដាហ៍ទៅពេលក្រោយទៀត។
លោក ហ៊ុន សែន បានបង្ហោះសារក្នុងទំព័រហ្វេសប៊ុក (Facebook) លោកនៅថ្ងៃទី២៦ ខែកក្កដាថា ការជូនដំណើរផ្ទាល់របស់ចៅស្រីនេះ ដោយសារជីដូន និងម្ដាយបង្កើត គឺអ្នកស្រី ហ៊ុន ម៉ាណា ជាប់រវល់ការងារ។ លោកបន្តថា ដើម្បីផ្ដល់ភាពកក់ក្តៅ និងលើកទឹកចិត្តចៅស្រីឱ្យខំរៀនបន្ត និងជៀសវាងមានអារម្មណ៍ឯកោ ទើបជីតាឆ្លៀតពេលជូនដំណើរចៅស្រី។
លោក ហ៊ុន សែន បានបង្ហាញមុខជាសាធារណៈជាលើកដំបូង ក្រោយពេលលោកបានបាត់ខ្លួនពីកិច្ចប្រជុំរដ្ឋ និងគណៈរដ្ឋមន្ត្រីមួយសប្ដាហ៍ហើយ។ អវត្តមានលោក ហ៊ុន សែន ដោយគ្មានបញ្ជាក់ប្រាប់សាធារណជននោះ បណ្ដាលឱ្យពលរដ្ឋប្រើប្រាស់បណ្ដាញសង្គមហ្វេសប៊ុក បង្ហោះសារព្រោងព្រាតថា លោក ហ៊ុន សែន មានជំងឺជាទម្ងន់ ហើយត្រូវគេបញ្ជូនទៅព្យាបាល នៅប្រទេសសិង្ហបុរី កាលពីរាត្រីថ្ងៃទី២៣ ខែកក្កដា។ ក៏ប៉ុន្តែអ្នកនាំពាក្យរដ្ឋាភិបាល លោក ផៃ ស៊ីផាន ប្រាប់អាស៊ីសេរីថា ការលើកពេលប្រជុំគណៈរដ្ឋមន្ត្រី ដែលគ្រោងប្រជុំនៅថ្ងៃទី២៦ ខែកក្កដា គឺមិនពាក់ព័ន្ធនឹងសុខភាពរបស់លោក ហ៊ុន សែន នោះទេ។ លោក ផៃ ស៊ីផាន បានឱ្យដឹងទៀតថា ការលើកពេលនេះ ដោយសារ គ្មានរបៀបវារៈចាំបាច់ត្រូវប្រជុំ បន្ថែមទៅនឹងការចុះមូលដ្ឋានរបស់រដ្ឋមន្ត្រីមួយចំនួនផង។
លោកហ៊ុន សែន មិនបានបញ្ជាក់ ប្រទេសណាដែលចៅស្រីទៅរៀននោះទេ ហើយរៀនយកមុខវិជ្ជាអ្វី។ កន្លងមកលោក ហ៊ុន សែន ក៏បាននាំចៅស្រី ជាកូនស្រីអ្នកស្រី ហ៊ុន ម៉ាណា នេះ ទៅចូលរួមកិច្ចប្រជុំនៅអឺរ៉ុបដែរ។ ការណ៍នេះបណ្ដាលឱ្យមានការរិះគន់ថា លោក ហ៊ុន សែន ជាបុគ្គលគ្រួសារនិយម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។