របបក្រុងភ្នំពេញ មិនបារម្ភពីការព្យួរ ឬដកហូតការអនុគ្រោះពន្ធ ឈ្មោះថា អ្វីៗទាំងអស់លើកលែងតែអាវុធ ឬ អ៊ីប៊ីអេ (EBA) របស់សហភាពអឺរ៉ុបទេ។ អ្នកនាំពាក្យរបបក្រុងភ្នំពេញ អះអាងថា របបក្រុងភ្នំពេញ គ្មានគម្រោងទប់ស្កាត់ ឬស្ដារវិធានការរបស់សហភាពអឺរ៉ុបទេ បើទោះជាដក ឬ យ៉ាងណា គឺស្រេចតែចិត្ត។
អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ពន្យល់ថា ការដកហូតអនុគ្រោះពន្ធ ឈ្មោះថា អ្វីទាំងអស់លើកលែងតែអាវុធ កម្ពុជាមិនមានអ្វីចម្លែកនោះទេ ដោយសារតែ កម្ពុជាក៏នឹងត្រូវប្រឈមមុខចំពោះការលើកលែងនៅពេលខាងមុខដ៏ខ្លីដែរដោយសារតែតាមកំណើនសេដ្ឋកិច្ចសរុបប្រចាំឆ្នាំដូច្នោះកម្ពុជានឹងត្រូវចូលក្នុងលក្ខខណ្ឌជាប្រទេសគ្មានការលើកលែងការអនុគ្រោះពន្ធជាក់ជាមិនខាន។
លោក ផៃ ស៊ីផាន បញ្ជាក់ថា របបក្រុងភ្នំពេញ មិនមានគម្រោងដើម្បីចរចា សុំឲ្យសហភាពអឺរ៉ុបស្ដារឡើងវិញនូវវិធានការរបស់ពួកគេទេ ហើយរបបមួយនេះ ធានាថា អាចរស់បានដោយគ្មានការពឹងផ្អែកលើសេដ្ឋកិច្ចប្រទេសដទៃ។ លោក ផៃ ស៊ីផាន ហៅភាសា ផ្ដាច់ការអនុគ្រោះពន្ធ ឬការដាក់សម្ពាធ ជាភាសាម៉ាកងាយលើរបបក្រុងភ្នំពេញ៖ «ចំពោះកម្ពុជាអាចរស់ខ្លួនឯងបានដែរតើ ដោយឈរលើកម្លាំងសេដ្ឋកិច្ច ដូច្នេះការប្រើប្រាស់ពាក្យថា ដាក់ទណ្ឌកម្ម ការប្រើប្រាស់ពាក្យថា ផលប៉ះពាល់ដល់កម្ពុជា អានេះជាភាសាម៉ាក់ងាយដល់កម្ពុជា ពីព្រោះកម្ពុជា ជាសមាជិកអង្គការពាណិជ្ជកម្មពិភពលោក។ ផលិតផល សម្រាប់លក់លើទីផ្សារទូទាំងពិភពលោក មិនមែនសម្រាប់តែទីផ្សារអឺរ៉ុបទេ»។
សហភាពអឺរ៉ុប កាលពីថ្ងៃទី៥ តុលា អះអាងថា បានជូនដំណឹងទៅរបបលោក ហ៊ុន សែន រួចរាល់ហើយ អំពីចំណាត់ការឈានទៅរកការលុបចោលប្រព័ន្ធអនុគ្រោះពន្ធឈ្មោះ «អ្វីៗទាំងអស់លើកលែងតែអាវុធ» ហៅកាត់ថា EBA ។ សហភាពអឺរ៉ុបគូសបញ្ជាក់ថា ចំណាត់ការនេះ គឺដោយសារតែ ពុំមានការកែប្រែស្ថានភាពវិបត្តិប្រជាធិបតេយ្យ និងការរំលោភសិទ្ធិមនុស្សធ្ងន់ធ្ងរនៅកម្ពុជា ក្នុងរយៈកាលកន្លងមកនេះ។
អ្នកសិក្សាស្រាវជ្រាវការអភិវឌ្ឍន៍សង្គម លោកបណ្ឌិត មាស នី មើលឃើញថា ការដែលនាំឲ្យកម្ពុជាឈានដល់ដំណាក់កាលបែបនេះ ដោយសារតែវិបត្តិនយោបាយដណ្ដើមអំណាចគ្នានៅកម្ពុជា មិនមែនបណ្តាលពីកំណើនសេដ្ឋកិច្ចកម្ពុជានោះទេ។ លោកបណ្ឌិត យល់ថា របបក្រុងភ្នំពេញ គ្មានជម្រើសអ្វី ក្រៅពីបន្តប្រឹងទៅមុខ ដោយពឹងពាក់លើសេដ្ឋកិច្ចមហាយក្សចិន ដើម្បីរក្សាអំណាចឲ្យដល់ឆ្នាំ២០២៣ទេ។ ប៉ុន្ដែ ទោះយ៉ាងណា លោកបណ្ឌិតបញ្ជាក់ថា ចិនមិនអាចជួយរក្សាសេដ្ឋកិច្ចឲ្យពលរដ្ឋ១៥លាននាក់ទេ។
បន្ថែមពីនេះ លោកបណ្ឌិត មាស នី បារម្ភថា សហគមន៍អឺរ៉ុបនឹងមិនព្រមបញ្ឈប់ត្រឹមនេះទេ ហើយបន្ទាប់ពីEBA របស់សហភាពអឺរ៉ុប អាចនឹងមានសម្ពាធបន្ថែមលើរបបក្រុងភ្នំពេញ ជាបន្តបន្ទាប់ទៀត៖ «យើងចាំមើល ទាក់ទងនឹងដំណើរវិវត្តន៍នឹងសេដ្ឋកិច្ចកម្ពុជា បន្ដទៅទៀត ថាតើក្រោយពីសហភាពអឺរ៉ុប គេបានដកហូតការអនុគ្រោះពន្ធហ្នឹង តើនឹងមានវិធានការអ្វីផ្សេងទៀត ? ខ្ញុំគិតថា វាមិនមែនមានតែមួយហ្នឹងទេ វាអាចនឹងមានអ្វីបន្ថែមផ្ទូនៗ ទៀតទៅណា។ អ៊ីចឹង អាប្រតិកម្មថ្មីនេះ ខ្ញុំគិតថា អ្នកនាំពាក្យរដ្ឋាភិបាលគាត់ក៏មិនមានអ្វីឆ្លើយតបភ្លាមៗទេបាន។ យើងចាំមើលថាតើ នឹងមានអ្វីផ្លាស់ប្ដូរទៀត នៅពេលខាងមុខ»។
ប្រធានសហភាពសហជីពកម្ពុជា លោក រ៉ុង ឈុន ក៏យល់ថា ការគ្មានគម្រោងស្ដារប្រព័ន្ធអនុគ្រោះពន្ធឡើងវិញ ជាភាសារបស់អ្នកនាំពាក្យដែរ ប៉ុន្តែយ៉ាងណា លោកមានជំនឿថា អ្នកនយោបាយខ្មែរទាំង២ក្រុម គឺ ក្រុមមេដឹកនាំគណបក្សកាន់អំណាច និងក្រុមមេដឹកនាំគណបក្សប្រឆាំង នឹងអាចចូលតុជជែកគ្នាបាន ក្នុងនាមជាខ្មែរដូចគ្នា ដើម្បីរកចំណុចរួមមួយ ជាប្រយោជន៍ជាតិ។
លោក រ៉ុង ឈុន អះអាងថា សហជីពលោក នៅតែរក្សាជំហរដដែល គឺ ក្រោយភ្ជុំបិណ្ឌ លោកនឹងដាក់លិខិតជូនរបបក្រុងភ្នំពេញ ដើម្បីសម្ដែងមតិ ទាមទារឲ្យមានការសម្របសម្រួលគ្នារវាងអ្នកនយោបាយខ្មែរទាំង២ក្រុម ដើម្បីប្រយោជន៍កម្មករ និងប្រយោជន៍ជាតិទាំងមូល៖ «ចំពោះជំហរ សហភាពសហជីពកម្ពុជា យើងមិនមានអ្វីផ្លាស់ប្ដូរទេ។ កំណត់ដូចដែលខ្ញុំបានប្រកាសថា បន្ទាប់ពីបុណ្យភ្ជុំបិណ្ឌរួចរាល់ ខ្ញុំនឹងជូនដំណឹងធ្វើបាតុកម្ម ដើម្បីសម្ដែងមតិ ហើយទាមទារឲ្យរដ្ឋាភិបាលកម្ពុជាសម្របសម្រួល ជាមួយសហគមន៍អឺរ៉ុបក៏ដូចជាបណ្ដាប្រទេស លោកខាងលិច ធ្វើម៉េចដើម្បីរក្សាការងារជូនបងប្អូនកម្មករ កម្មការិនី»។
ផ្អែកតាមបទបទបញ្ញត្តិ របស់សភា និងក្រុមប្រឹក្សាអឺរ៉ុប ក្រោយស្នងការអឺរ៉ុប ជូនដំណឹងទៅប្រទេសទទួលបានអត្ថប្រយោជន៍ពីប្រព័ន្ធអនុគ្រោះពន្ធ EBA អំពីការអនុវត្តនីតិវិធីលុបចោលប្រព័ន្ធអនុគ្រោះពន្ធនេះ ស្នងការអឺរ៉ុបនឹងធ្វើការតាមដាន និងវាយតម្លៃស្ថានភាពក្នុងប្រទេសទទួលអត្ថប្រយោជន៍រយៈពេល ៦ខែទៀត ចាប់ពីពេលជូនដំណឹងនេះ។ ក្នុងរយៈពេល ៦ខែបន្ទាប់ពីចប់រយៈពេលខាងដើមនេះ ស្នងការអឺរ៉ុប នឹងធ្វើសេចក្ដីសម្រេចចិត្ត ថាតើគួរបញ្ឈប់នីតិវិធីលុបចោលប្រព័ន្ធអនុគ្រោះពន្ធជាបណ្ដោះអាសន្ននេះ ឬ ធ្វើការលុបចោលប្រព័ន្ធអនុគ្រោះពន្ធជាបណ្ដោះអាសន្ន នេះតែម្ដង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។