មេដឹកនាំរបបក្រុងភ្នំពេញ លោក ហ៊ុន សែន ប្រាប់ដោយផ្ទាល់មាត់ទៅមេដឹកនាំវៀតណាមថា កម្ពុជាមិនអនុញ្ញាតឲ្យមានកងទ័ពបរទេសនៅក្នុងទឹកដីរបស់ខ្លួនឡើយ។ លោកបន្ទោសថា ព័ត៌មានស្ដីពីមូលដ្ឋានកងទ័ពបរទេសនៅកម្ពុជា ជាព័ត៌មានក្លែងក្លាយ។
លោក ហ៊ុន សែន ថ្លែងដោយប្រយ័ត្នប្រយែង ក្នុងសន្និសីទកាសែតរួមគ្នាមួយ ធ្វើឡើងកាលពីថ្ងៃ សុក្រ ទី៧ ធ្នូ ក្រោយបិទបញ្ចប់ការចចាររវាងលោក និងសមភាគីវៀតណាម ថា លោកបានប្រាប់ទៅលោក ង្វៀន សួនហ្វ៊ុក (Nguyen Xuan Phuc) ថា កម្ពុជាគ្មានវត្តមានមូលដ្ឋានទ័ពបរទេសនោះទេ។ លោក ហ៊ុន សែន ចាត់ទុកព័ត៌មាននៃវត្តមានកងទ័ពបរទេសនៅកម្ពុជាថា ជាការឃោសនាបែបភូតកុហក និងមានចេតនាបំផ្លិចបំផ្លាញកម្ពុជា៖ «ខ្ញុំក៏បានជម្រាបជូនបញ្ហានេះ ជូនឯកឧត្ដម ង្វៀន សួនហ្វ៊ុក និងគណៈប្រតិភូវៀតណាមឲ្យបានជ្រាបអំពីព័ត៌មានមិនពិត ហើយជាការកុហក និងបំផ្លិចបំផ្លាញ។ ខ្ញុំសូមបញ្ជាក់ជូននៅទីនេះបន្ថែមថា រដ្ឋធម្មនុញ្ញរបស់កម្ពុជា មិនអនុញ្ញាតឲ្យមានមូលដ្ឋានកងទ័ពបរទេសនៅកម្ពុជានោះទេ ហើយក៏មិនអនុញ្ញាតឲ្យកងទ័ពកម្ពុជាចេញទៅក្រៅប្រទេសក្រៅក្របខ័ណ្ឌអង្គការសហប្រជាជាតិនោះដែរ»។
លោក ហ៊ុន សែន ក៏បានទទួលស្គាល់ដែរថា ព័ត៌មាននេះមិនត្រឹមតែបង្កើតបញ្ហាដាច់ដោយឡែកសម្រាប់កម្ពុជាប៉ុណ្ណោះទេ តែក៏បានធ្វើឲ្យភាគីវៀតណាម និងប្រទេសជិតខាងកម្ពុជា ព្រមទាំងប្រទេសដទៃទៀតក្នុងតំបន់ មានការព្រួយបារម្ភ ហើយលោកចាំបាច់ត្រូវបញ្ចប់ពាក្យចចាមអារ៉ាមនេះ។
ក្រៅពីបដិសេធរឿងមូលដ្ឋានកងទ័ពចិននៅកម្ពុជានេះ លោក ហ៊ុន សែន អះអាងថា ភាគីទាំងពីរបានរកឃើញនូវចំណុចដើម្បីជំរុញការដោះស្រាយបញ្ហាព្រំដែនបន្ត ដើម្បីបញ្ចប់ការងារបោះបង្គោលព្រំដែននេះឲ្យបានឆាប់រហ័ស។ បច្ចុប្បន្ន កម្ពុជា និងវៀតណាម សម្រេចបានការកំណត់ខណ្ឌសីមា និងការបោះបង្គោលព្រំដែន គោកប្រវែង ១.២៧០ គីឡូម៉ែត្រ បានប្រមាណ ៨៤ភាគរយ ហើយនៅសល់ ១៦ភាគរយទៀត មិនទាន់ដោះស្រាយរួច។
យ៉ាងណាក៏ដោយ លោក ហ៊ុន សែន មិនបានលើកឡើងឡើយ ថាតើភាគីវៀតណាមបានលើកឡើងពីកង្វល់ និងចង់ឃើញរបបលោក ដោះស្រាយឲ្យបានដិតដល់ រឿងចម្រូងចម្រាសនៃការបំឡាស់ទីលំនៅឋានផ្ទះបណ្ដែតទឹករបស់ជនអន្តោប្រវេសន៍វៀតណាមជាងមួយម៉ឺននាក់ ស្មើនឹង ២.៣៩៧ គ្រួសារ នៅលើបឹងទន្លេសាប ដែរឬយ៉ាងណានោះទេ។ ជារឿយៗ មេដឹកនាំវៀតណាម គ្រប់ជាន់ថ្នាក់ មិនដែលភ្លេចឡើយ តែងតែបានផ្ដាំផ្ញើក្រើនរំឮក និងពេលខ្លះក្នុងបង្គាប់បញ្ជា ក្រុមមេដឹកនាំរបបក្រុងភ្នំពេញ រួមទាំងលោក ហ៊ុន សែន ផងនោះ ឲ្យជួយផ្តល់ការគាំទ្រ និងផ្តល់នូវលក្ខខណ្ឌសមស្របដល់ជនជាតិរបស់ខ្លួនទាំងនោះ ឲ្យមករស់នៅលើដីគោកវិញ ព្រមទាំងជនជាតិរបស់ខ្លួនដទៃទៀតដែលកំពុងរស់នៅក្នុងប្រទេសកម្ពុជា។ ក៏ប៉ុន្តែ ព័ត៌មានទាំងនេះ ត្រូវរបបលោក ហ៊ុន សែន ព្យាយាមបិទបាំងដើម្បីបញ្ចៀសការរិះគន់ថាវៀតណាមជាចៅហ្វាយនាយរបស់ខ្លួន និងថារបបរបស់លោក ហ៊ុន សែន ផ្ដល់ការអនុគ្រោះពិសេសដល់ជនជាតិវៀតណាមទាំងនោះ ដែលភាគច្រើនកំពុងរស់នៅខុសច្បាប់ក្នុងប្រទេសកម្ពុជា ចៀសជាងគិតគូរដល់ផលប្រយោជន៍ពលរដ្ឋខ្មែរខ្លួនឯងពិតប្រាកដ។
ទស្សនកិច្ចផ្លូវការរបស់លោក ហ៊ុន សែន ទៅកាន់ប្រទេសវៀតណាមនៅពេលនេះ កើតមានឡើងស្របពេលដែលទំនាក់ទំនងផ្អែមល្ហែមចាក់ទឹកមិនលិចរវាងកម្ពុជា និងវៀតណាម កំពុងស្ថិតក្នុងស្ថានភាពស្រពិចស្រពិល និងសង្ស័យថា អាចនឹងរងការប្រេះឆា ខណៈដែលរបបក្រុងភ្នំពេញ កំពុងតែបង្កើនទំនោរផ្អៀងកាន់តែខ្លាំងឡើងៗ ទៅរកមហាអំណាចចិន ដែលកំពុងមានជម្លោះស្រាប់ជាមួយប្រទេសវៀតណាម។ ទស្សនកិច្ចនេះ ធ្វើឡើងនៅមិនដល់មួយខែផង ក្រោយពេលដែលមានព័ត៌មានអំពីលទ្ធភាពដែលកម្ពុជាអាចអនុញ្ញាតឲ្យចិនសាងសង់មូលដ្ឋានកងទ័ពជើងទឹកនៅខេត្តកោះកុងចេញផ្សាយដោយសារព័ត៌មាន Asia Times ។ បើទោះជារបបនេះ បានព្យាយាមបដិសេធព័ត៌មាននេះ ប្រាប់ទៅមេដឹកនាំអាមេរិក និងវៀតណាម និងជាព័ត៌មានក្លែងក្លាយយ៉ាងណាក៏ដោយ របបនេះ មិនបានធ្វើការប្ដឹងផ្ដល់តាមផ្លូវច្បាប់ជាផ្លូវការណាមួយទៅកាន់កាសែតមានមូលដ្ឋាននៅទីក្រុងហុងកុងនេះឡើយ។ អ្នកវិភាគបានព្រមានរួចជាស្រេចថា បើហេតុការណ៍នេះពិតជាកើតមានឡើងមែន នោះប្រៀបដូចជាការធ្វើអត្តឃាតនយោបាយរបស់របបក្រុងភ្នំពេញ ទាំងនយោបាយក្នុងស្រុក ដែលនាំឲ្យមានការបែកបាក់សាមគ្គីជាតិ និងនយោបាយការបរទេសដូច្នោះដែរ។
កាលពីពេលកន្លងទៅ ក្រសួងការបរទេសកម្ពុជា ធ្លាប់សរសេរក្នុងសេចក្ដីថ្លែងការណ៍របស់ខ្លួន ដោយអះអាងអំពីឆន្ទៈនយោបាយរបស់ប្រទេសទាំងពីរ ថាមិនអនុញ្ញាតឲ្យមាន «កម្លាំងអមិត្រ» ណាមួយ ប្រើប្រាស់ទឹកដីរបស់ខ្លួនដើម្បីប្រឆាំង ឬជ្រៀតជ្រែកចូលកិច្ចការផ្ទៃក្នុងរបស់ប្រទេសមួយទៀតនោះឡើយ។ ក្រសួងមិនបានបញ្ជាក់ទេថា តើកម្លាំងអមិត្តនេះ ជាប្រទេសណាមួយឲ្យពិតប្រាកដ ឬមួយក៏វៀតណាម ចង់សំដៅទៅវត្តមានកាន់តែច្រើន និងឥទ្ធិពលរបស់ចិនកាន់តែខ្លាំងនៅកម្ពុជានោះ ដែរឬយ៉ាងណា។
ទំនាក់ទំនងជិតស្និទ្ធ និងស្អិតល្មួតរវាងកម្ពុជា និងមហាអំណាចចិន នារយៈពេលចុងក្រោយ ទទួលរងនូវការឃ្លាំមើលក្រោមក្រសែភ្នែកយ៉ាងយកចិត្តទុកដាក់បំផុត ពីប្រទេសវៀតណាម ហើយជារឿយៗភាគីវៀតណាម មិនញញើតនឹងលើកឡើងប្រាប់ក្រុមមេដឹកនាំខ្មែរ ពីកង្វល់នានារបស់ខ្លួនជុំវិញបញ្ហានេះ និងបញ្ហានានាពាក់ព័ន្ធនឹងអត្ថប្រយោជន៍របស់ខ្លួននោះឡើយ ដែលហេតុការណ៍នេះធ្វើឲ្យមេដឹកនាំរបបក្រុងភ្នំពេញ គ្រប់ជាន់ថ្នាក់ ចាំបាច់ត្រូវបញ្ជាក់ ធានាអះអាងម្ដងហើយម្ដងទៀតទៅមេដឹកនាំវៀតណាម និងត្រូវធ្វើដំណើរទស្សនកិច្ច ទាំងឯកជន និងទាំងផ្លូវរដ្ឋទៅកាន់ប្រទេសវៀតណាម មិនតិចលើកមិនតិចសារនោះទេក្នុងមួយឆ្នាំៗ។ ផ្ទុយទៅវិញ ក្រុមមេដឹកនាំរបបក្រុងភ្នំពេញ មិនដែលហ៊ានលើកឡើងពីក្តីកង្វល់ ឬការគិតគូររបស់ខ្លួនប្រាប់ទៅភាគីវៀតណាមវិញម្ដងណាឡើយ តួយ៉ាងដូចករណីពលរដ្ឋខ្មែរកម្ពុជាក្រោម ដែលរងការធ្វើទុក្ខបុកម្នេញគ្រប់បែបយ៉ាងពីអាជ្ញាធរវៀតណាម ករណីវៀតណាមជួលដីធ្លីខ្មែរតាមព្រំដែន ឬរំលោភចូលទឹកដីកម្ពុជា ឬករណីវៀតណាមចងសម្ព័ន្ធភាពយោធា ជាមួយសហរដ្ឋអាមេរិកនោះជាដើម។ ក្រុមអ្នកឃ្លាំមើលស្ថានការណ៍នយោបាយកម្ពុជា ហៅហេតុការណ៍នេះ ថាគឺដោយសារតែក្រុមមេដឹកនាំខ្មែរ រណបជាមួយវៀតណាម និងតែងធ្វើតាមអ្វីដែលវៀតណាមចង់បាន ដោយសារតែជំពាក់គុណវៀតណាមកាលពីពេលអតីតកាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។