រដ្ឋមន្ត្រីក្រសួងមហាផ្ទៃ លោក ស ខេង បានផ្ញើលិខិតពីរច្បាប់ដាច់ដោយឡែកពីគ្នាទៅអង្គការខុមហ្វ្រែល (COMFREL) និងអង្គការនិកហ្វិច (NICFEC) នៅយប់ថ្ងៃទី៤ ខែកក្កដា ឲ្យបញ្ឈប់សកម្មភាពនៃបន្ទប់ស្ថានការណ៍ ដោយអះអាងថា ផ្ទុយទៅនឹងបទបញ្ញត្តិនៃច្បាប់ស្ដីពីសមាគម និងអង្គការមិនមែនរដ្ឋាភិបាល។ ប៉ុន្តែ សង្គមស៊ីវិលនៅតែអះអាងថា ខ្លួនមិនបានធ្វើសកម្មភាពខុសច្បាប់ទេ ហើយលិខិតរបស់ក្រសួងមហាផ្ទៃ ដូចនេះ ជាការបិទផ្លូវមិនឲ្យបន្ទប់ស្ថានការណ៍អាចបង្កើតដើម្បីតាមដានដំណើរការបោះឆ្នោតឆ្នាំ២០១៨ បាន។
ប្រាំពីរថ្ងៃក្រោយពីការបញ្ជារបស់លោកនាយករដ្ឋមន្ត្រី ហ៊ុន សែន ឲ្យក្រសួងមហាផ្ទៃ ពិនិត្យតាមផ្លូវច្បាប់លើបណ្ដុំអង្គការសង្គមស៊ីវិលធ្វើការងារទាក់ទងការបោះឆ្នោត ឬហៅថា បន្ទប់ស្ថានការណ៍ រដ្ឋមន្ត្រីក្រសួងមហាផ្ទៃ លោក ស ខេង បានចេញលិខិតផ្លូវការផ្ញើទៅអង្គការខុមហ្វ្រែល និងអង្គការនិកហ្វិច ដែលជាអ្នកសម្របសម្រួលបន្ទប់ស្ថានការណ៍ថា បន្ទប់ស្ថានការណ៍ជាសកម្មភាពផ្ទុយទៅនឹងបទបញ្ញត្តិនៃច្បាប់ស្ដីពីសមាគម និងអង្គការមិនមែនរដ្ឋាភិបាល។ លិខិតដដែល ប្រាប់ទៅអង្គការទាំងពីរ ត្រូវបញ្ឈប់សកម្មភាពខុសច្បាប់នៃបន្ទប់ស្ថានការណ៍ និងត្រូវអនុវត្តការងាររបស់ខ្លួនឲ្យបានត្រឹមត្រូវតាមច្បាប់ស្ដីពីសមាគម និងអង្គការមិនមែនរដ្ឋាភិបាល។
លោក ស ខេង លើកឡើងក្នុងលិខិតនោះទៀតថា សេចក្ដីថ្លែងការណ៍របស់បន្ទប់ស្ថានការណ៍ មិនមានតម្លៃគតិយុត្តិ និងមិនបានឆ្លុះបញ្ចាំងពីអព្យាក្រឹតភាព ដូចមានចែងក្នុងមាត្រា២៤ នៃសមាគម និងអង្គការមិនមែនរដ្ឋាភិបាលទេ។ លិខិតរបស់លោក ស ខេង នៅពេលនេះ ជាការឆ្លើយតបទៅនឹងសេចក្ដីប្រកាសព័ត៌មានរបស់អង្គការសង្គមស៊ីវិលពីរ គឺអង្គការខុមហ្វ្រែល និងអង្គការនិកហ្វិច កាលចុងខែមិថុនា ដែលអះអាងថា បន្ទប់ស្ថានការណ៍ គឺជាវេទិកាអព្យាក្រឹត្យឥតលម្អៀង។
ទាក់ទងរឿងនេះ អតីតសមាជិកបន្ទប់ស្ថានការណ៍ និងជាមន្ត្រីជាន់ខ្ពស់នៃអង្គការសិទ្ធិមនុស្សលីកាដូ (LICADHO) លោក អំ សំអាត នៅតែយល់ថា បន្ទប់ស្ថានការណ៍បង្កើតឡើងមិនខុសច្បាប់ទេ។ លោក អំ សំអាត យល់ថា លិខិតរបស់រដ្ឋាភិបាលនេះ ដើម្បីរារាំងមិនឲ្យក្រុមអង្គការសង្គមស៊ីវិលតាមដានដំណើរការនៃការបោះឆ្នោតឆ្នាំ២០១៨ ខាងមុខ៖ «ខ្ញុំគិតថា លិខិតនេះចេញហើយ បន្ទប់ស្ថានការណ៍គឺលែងមានទៀតហើយ បើមានទៀតគឺអាចប្រឆាំងបទបញ្ជារបស់រដ្ឋាភិបាល»។
ទោះយ៉ាងនេះក្ដី លោក អំ សំអាត នៅតែយល់ថា អង្គការសង្គមស៊ីវិលនៅតែអាចតាមដាន និងវាយតម្លៃការបោះឆ្នោតឆ្នាំ២០១៨ បានដដែល ទោះពួកគេមិនបានបង្កើតបន្ទប់ស្ថានការណ៍ក្ដី។
សេចក្ដីថ្លែងការណ៍រួមរបស់អង្គការអន្តរជាតិចំនួន៤ កាលពីចុងខែមិថុនា បានលើកឡើងថា ពួកគេមានការព្រួយបារម្ភចំពោះការគំរាមកំហែងលើអង្គការសង្គមស៊ីវិលនៃបន្ទប់ស្ថានការណ៍ ត្បិតវាធ្វើអោយប៉ះពាល់ដល់សកម្មភាពស្របច្បាប់របស់សង្គមស៊ីវិល ជាពិសេសចំណាត់ការរបស់រដ្ឋាភិបាលគឺជាការគំរាមកំហែងសង្គមស៊ីវិលដទៃទៀត អោយបានមុនការបោះឆ្នោតជាតិ ឆ្នាំ២០១៨។
ទោះលិខិតរបស់លោក ស ខេង ដែលចុះផ្សាយកាលពីយប់ថ្ងៃទី៤ ខែកក្កដា ឲ្យអង្គការសង្គមស៊ីវិលបញ្ឈប់សកម្មភាពនៃបន្ទប់ស្ថានការណ៍ក្ដី។ ក្រុមអង្គការសង្គមបានរំសាយសកម្មភាពនៃវេទិកាបន្ទប់ស្ថានការណ៍ ក្រោយការបោះឆ្នោតជ្រើសរើសក្រុមប្រឹក្សាឃុំ-សង្កាត់ ចប់រួចរាល់ កាលពីថ្ងៃទី២៤ ខែមិថុនា កន្លងទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។