ព្រះសង្ឃ ហេង គឹមឡាយ ដែលត្រូវបានមន្ត្រីសង្ឃខេត្តសៀមរាបបណ្តេញចេញមិនឱ្យគង់នៅក្នុងវត្តប្រាសាទរង្ស៊ីទាំងកណ្តាលយប់ដោយសារគាំទ្រគណបក្សភ្លើងទៀន មានថេរដីកាថា គិតមកទល់ពេលនេះ វត្តអារាមដទៃទៀតនៅតែបន្តបដិសេធមិនឱ្យព្រះអង្គគង់អាស្រ័យនៅដដែល។ ព្រះអង្គបានត្រាច់ចរអស់រយៈពេលពីរថ្ងៃ និងបានសម្រេចសឹងនៅក្នុងខ្ទមចម្ការដំឡូងមួយកន្លែងរបស់អ្នកស្រុក នៅឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ កាលពីយប់ថ្ងៃទី៣០ ខែឧសភា។
ព្រះអង្គមានថេរដីកាថា ការធ្វើទុក្ខបុកម្នេញពីសំណាក់អាជ្ញាធរមកលើព្រះអង្គនេះ គឺដោយសារតែព្រះអង្គគាំទ្រគណបក្សភ្លើងទៀន និងតែងតែឈឺឆ្អាលក្នុងបញ្ហាសង្គម ជាពិសេសរឿងរ៉ាវដីធ្លីរបស់អ្នកស្រុកដែលរងនូវការច្បាមយកទាំងអយុត្តិធម៌ពីសំណាក់អាជ្ញាធររបស់រដ្ឋាភិបាលលោកនាយករដ្ឋមន្ត្រី ហ៊ុន សែន។ ព្រះអង្គអំពាវនាវដល់ព្រះសង្ឃនៅទូទាំងប្រទេស គួរតែហ៊ានក្រោកឈរឡើង បញ្ចេញមតិ និងនាំគ្នាទៅបោះឆ្នោតជ្រើសរើសតំណាងឃុំសង្កាត់មកពីគណបក្សប្រឆាំងដើម្បីឱ្យពួកគេជួយការពារផលប្រយោជន៍ជូនពលរដ្ឋ កុំឱ្យគណបក្សកាន់អំណាចអាចធ្វើអ្វីបានស្រេចតែអំពើចិត្ត។
សូមស្តាប់បទសម្ភាសន៍មួយរវាងអ្នករាយការណ៍ព័ត៌មានវិទ្យុអាស៊ីសេរី លោក មាន ឫទ្ធិ ជាមួយនឹងព្រះសង្ឃ ហេង គឹមឡាយ ជុំវិញរឿងរ៉ាវដែលព្រះអង្គត្រូវមន្ត្រីសង្ឃខេត្តសៀមរាបបណ្តេញចេញពីវត្តប្រាសាទរង្ស៊ីដោយសារតែមាននិន្នាការគាំទ្រគណបក្សភ្លើងទៀន ដូចតទៅ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។