អ្នកជាប់ឃុំបក្សប្រឆាំងបានផ្ញើលិខិតចេញពីពន្ធនាគារអបអរឆ្នាំថ្មី និងទូលថ្វាយស្នើសុំព្រះមហាក្សត្រជួយឲ្យមានដំណោះស្រាយនយោបាយ។ ទោះយ៉ាងណាមន្រ្តីរដ្ឋាភិបាល នៅតែអះអាងថា កម្ពុជាគ្មានវិបត្តិនយោបាយឡើយ មានតែអ្នកនយោបាយប្រព្រឹត្តល្មើស។
លិខិតអ្នកជាប់ឃុំបក្សប្រឆាំង ថ្វាយបង្គំស្នើសុំព្រះមហាក្សត្រ ព្រះបាទ នរោត្ដម សីហមុនី មេត្តាព្រះរាជតម្រិះជួយផ្សះផ្សាបង្រួបបង្រួមអ្នកនយោបាយគ្រប់ភាគី ចូលតុចរចាដើម្បីដោះស្រាយបញ្ហាជាតិ។ លិខិតចុះកាលពីថ្ងៃទី១១ ខែមេសា ដោយមានហត្ថលេខា មន្រ្តី និងសកម្មជនគណបក្សសង្គ្រោះជាតិដែលកំពុងជាប់នៅពន្ធនាគារព្រៃស រួមមាន លោក កែវ ថៃ លោក ហេង ច័ន្ទសុទ្ធី លោក ឃឹម ភាណា និងលោក ស៊ុន ធន់ ចង់ឃើញ ខ្មែរគ្រប់ភាគីមានឱកាសចូលរួមបោះឆ្នោតឆ្នាំ២០២២ និងឆ្នាំ២០២៣ ដោយសេរីត្រឹមត្រូវ និងយុត្តិធម៌ ស្របតាមស្មារតីកិច្ចព្រមព្រៀងសន្តិភាពទីក្រុងប៉ារីសដើម្បីកម្ពុជាមានលទ្ធិប្រជាធិបតេយ្យ និងសន្តិភាពពិតប្រាកដ។
កូនប្រុសមន្ត្រីបក្សប្រឆាំងដែលកំពុងជាប់ឃុំលោក កែវ ថៃ គឺលោក កែវ សួរ ថ្លែងឲ្យវិទ្យុអាស៊ីសេរីដឹងនៅថ្ងៃទី១៦ ខែមេសា លិខិតនេះពិតជាលិខិតឪពុករបស់លោក និងសកម្មជនបក្សផ្សេងទៀតផ្ញើចេញពីពន្ធនាគារ ពិតប្រាកដមែន។ កូនប្រុសលោក កែវ ថៃ យល់ថា ឪពុករបស់លោកដែលកំពុងជាប់ឃុំនេះ ព្រោះរឿងនយោបាយ ដូច្នេះលោកចង់ឃើញមានដំណោះស្រាយនយោបាយដើម្បីឪពុកលោកអាចមានសេរីភាពឡើងវិញ៖ «ស្ដែងពីឆន្ទៈរបស់ដែលសម្ដែងមតិតែងសេចក្ដីថ្លែងការណ៍ឬថ្វាយពរ ព្រះមហាក្សត្រហ្នឹងព្រោះពួកគាត់រងគ្រោះដោយសារនយោបាយ»។
ខណៈវិបត្តិនយោបាយមិនទាន់រកច្រកចេញ ហើយរដ្ឋាភិបាលបន្តចោទប្រកាន់ និងចាប់ខ្លួន សកម្មជនបក្សប្រឆាំងដាក់ពន្ធនាគារជាបន្តបន្ទាប់នោះ ក្រុមអ្នកទោសនយោបាយ តែងផ្ញើសំបុត្រតាមសាច់ញាតិរបស់ពួកគេ ទាមទារឲ្យរដ្ឋាភិបាល លោក ហ៊ុន សែន គោរពសិទ្ធិមនុស្ស ប្រជាធិបតេយ្យ និងត្រូវដោះស្រាយវិបត្តិនយោបាយ ជាដើម។ សកម្មជនបក្សប្រឆាំង ស្នើសុំទៅព្រះមហាក្សត្រជួយអន្តរាគមន៍វិបត្តិនយោបាយបែបនេះ ស្របដែលរដ្ឋធម្មនុញ្ញចែងថា ព្រះមហាក្សត្រជានិមិត្តរូបនៃឯកភាពជាតិ និងនិរន្តភាពជាតិ។ ទ្រង់ជាអ្នកធានាឯករាជ្យជាតិ អធិបតេយ្យ បូរណភាពទឹកដី និងជាអ្នកធានាការគោរពសិទ្ធិសេរីភាពរបស់ប្រជាពលរដ្ឋ និងការគោរពសិទ្ធិសញ្ញាអន្តរជាតិ។ លើសពីនេះ ព្រះមហាក្សត្រមានតួនាទីខ្ពង់ខ្ពស់ជាអាជ្ញាកណ្ដាល ដើម្បីធានាការប្រព្រឹត្តទៅនៃអំណាចសាធារណៈឱ្យមានភាពទៀងទាត់។
ទាក់ទងបញ្ហានេះ អ្នកនាំពាក្យរដ្ឋាភិបាលលោក ផៃ ស៊ីផាន និយាយថា ការចរចានយោបាយជាសមត្ថកិច្ចមេដឹកនាំរដ្ឋាភិបាល ដូច្នេះ លោកមិនអាចដឹងបានទេ។ ទោះយ៉ាងណាលោកថា ករណីរបស់អ្នកជាប់ឃុំបក្សប្រឆាំង គឺជារឿងរបស់ តុលាការ។ លោកបន្តថាក្រុមអ្នកជាប់ឃុំគួររកមេធាវីដើម្បីតតាំងផ្លូវច្បាប់ ទើបមានប្រយោជន៍ជាង៖ «អត់មានពាក់ព័ន្ធរឿងរាជរដ្ឋាភិបាល អត់មានពាក់ព័ន្ធរឿងអ្នកនយោបាយទេ ជាកាតព្វកិច្ចរបស់តុលាការ គេត្រូវស្វែងរកលទ្ធភាពណាមួយដើម្បីនិយាយជាមួយតុលាការ»។
ទោះយ៉ាងណា នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត លើកឡើងថា ករណីនេះជារឿងនយោបាយ ច្រើនជាងការអនុវត្តច្បាប់។ មន្រ្តីសង្គមស៊ីវិលរូបនេះក៏ឃើញអ្នកនយោបាយប្រើប្រាស់វប្បធម៌សន្ទនាចរចាគ្នាឡើងវិញ ដើម្បីឲ្យអ្នកនោបាយគ្រប់ភាគីអាចរួមគ្នាដោះស្រាយបញ្ហាជាតិ៖ « ខ្ញុំយល់ថាមានតែមួយទេ ព្រោះបើសិនជាអ្នកគាត់មានការចរចាគ្នានោះអ្នកទាំងអស់នឹងអាចត្រូវបានដោះលែង ឬក៏នៅក្រៅឃុំបណ្ដោះអាសន្ន ឬក៏ការលើកលែងទោសក្នុងការជួបជុំគ្រួសារដូចបទពិសោធន៍កន្លងមកបាទ »។
បច្ចុប្បន្នមានសកម្មជនបក្សប្រឆាំង និងអ្នកបញ្ចេញមតិរិះគន់រដ្ឋាភិបាលប្រមាណ ៦០នាក់កំពុងជាប់ឃុំនៅពន្ធនាគារព្រៃស។ ក្នុងនោះសកម្មជនមួយចំនួនត្រូវបានតុលាការក្រុងភ្នំពេញកាត់ក្ដីដាក់ពន្ធនាគារ ៥ឆ្នាំ ប៉ុន្តែឱ្យអនុវត្តទោស ៣ឆ្នាំ ៨ខែ ហើយទោសនៅសល់ព្យួរ។ អ្នកទាំងនោះសុទ្ធតែមានមេធាវីជួយការពារក្ដី ប៉ុន្តែ ក្រុមអ្នកទោសនយោបាយទាំងនោះមិនដែលឈ្នះក្ដីម្ដងណាឡើយ ទោះបីតុលាការគ្មានភស្តុតាងរឹងមាំក្នុងការចោទប្រកាន់អ្នកទាំងនោះក្ដី។ ប្រធានស្ដីទីគណបក្សសង្គ្រោះជាតិ លោក សម រង្ស៊ី បានប្រកាសថា លោកនឹងចូលស្រុកជាថ្មី ទៀតក្រោយការបោះឆ្នោតឃុំសង្កាត់ ដើម្បីចូលរួមស្ដារសិទ្ធិមនុស្ស និងប្រជាធិបតេយ្យឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។