អាជ្ញាធរខេត្តកណ្ដាល បានចាប់ខ្លួនសកម្មជនបក្សប្រឆាំងម្នាក់ទៀត ដាក់ពន្ធនាគារ កាលពីថ្មីៗ នេះ ដោយមិនបង្ហាញដីកាពីតុលាការ និងមូលហេតុនៃការចាប់ខ្លួនឡើយ។ មន្ត្រីសង្គមស៊ីវិលយល់ថា នេះជាការធ្វើទុក្ខបុកម្នេញផ្នែកនយោបាយលើសកម្មជនបក្សប្រឆាំង ។
សកម្មជនគណបក្សសង្គ្រោះជាតិ ដែលអាជ្ញាធរចាប់ខ្លួននោះ គឺ លោក ប៉ាវ រ៉ាវី ដែលជាសកម្មជនប្រឆាំងនៅឃុំស៊ីធរ ស្រុកខ្សាច់កណ្ដាល ខេត្តកណ្ដាល។ តុលាការខេត្តកណ្ដាលបាទចោទប្រកាន់សកម្មជនរូបនេះពីបទ ញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម។
ប្រពន្ធលោក ប៉ាវ រ៉ាវី គឺលោកស្រី ខាត់ សឿន ប្រាប់អាស៊ីសេរីនៅថ្ងៃទី១៨ សីហាថា ប៉ូលិសឃុំស៊ីធរ ៤នាក់បានចាប់ប្ដីរបស់លោកស្រីនៅមុខផ្ទះ កាលពីថ្ងៃទី៦ សីហា ដោយពុំបង្ហាញដីកា និងមិនបញ្ជាក់មូលហេតុអ្វីឡើយ ហើយបានបញ្ជូនគាត់ ទៅតុលាការខេត្តកណ្ដាលដោយមិនឱ្យគ្រួសារដឹងឡើយ។ លោកស្រីបញ្ជាក់ថា តុលាការបានចោទប្ដីលោកស្រីពីបទញុះញង់ឱ្យមានភាពវឹកវរ និងធ្ងន់ធ្ងរដល់សន្តិសុខសង្គម និងបន្តបញ្ជូនគាត់ទៅឃុំខ្លួននៅពន្ធនាគារខេត្តនេះ។ លោកស្រីបញ្ជាក់ថា ការចាប់ខ្លួនប្ដីលោកស្រីនេះ គឺដោយសារគាត់បានសរសេរអត្ថបទនយោបាយមួយសន្លឹកដែលរិះគន់រដ្ឋាភិបាល និងគាំទ្រថ្នាក់ដឹកនាំគណបក្សសង្គ្រោះជាតិលោក សម រង្ស៊ី វិលចូលស្រុកវិញ។ ស្ត្រីវ័យ ៤៧ឆ្នាំរូបនេះចាត់ទុក ការចាប់និងឃុំខ្លួនប្ដីលោកស្រីនេះថា ជារឿងអយុត្តិធម៌បំផុត។ លោកស្រីស្នើតុលាការដោះលែងប្តីលោកស្រីមកវិញ ដើម្បីជួបជុំគ្រួសារព្រោះគាត់ មានជំងឺខ្សោយសតិស្មារតីដែលត្រូវលេបថ្នាំ និងពិនិត្យព្យាបាលពីគ្រូពេទ្យប្រចាំខែទៀតផង៖ «ចង់ឱ្យដោះលែងហ្នឹងណា ខ្ញុំមិនដឹងទៅពឹងពាក់ខាងណាខ្ញុំអត់ដឹង និយាយរួមទៅខ្ញុំតែឯង ខ្ញុំរស់នឹងខ្ញុំអត់ណាស់ពឹងគាត់រកស៊ីចិញ្ចឹម ប៉ុន្តែខ្ញុំទៅហើយអង្វរករគេស្រែកយំយ៉ាងណាក៏គេអត់ដោះលែងហើយខ្ញុំយកសំបុត្រសរសៃប្រសាទហើយថ្នាំបើកហ្នឹងក៏គេអត់ព្រមដែរ»។
លោកស្រី ខាន់ សឿន ឱ្យដឹងទៀតថា លោកស្រីមិនទាន់បានជួបសួរសុខទុក្ខប្ដីនៅពន្ធនាគារនៅឡើយទេ ចាប់តាំងពីអាជ្ញាធរចាប់ខ្លួនគាត់មក។ លោកស្រីបានដាក់លិខិត ស្នើសុំមេធាវីការពារក្ដីទៅមជ្ឈមណ្ឌលសិទ្ធិមនុស្សកម្ពុជា (CCHR) ដើម្បីជួយការពារផ្លូវច្បាប់ជុំវិញរឿងនេះ ដោយសារគ្រួសារលោកស្រីក្រីក្រ។
អាស៊ីសេរីមិនអាចទាក់ទង ស្នងការប៉ូលិសខេត្តកណ្ដាល លោក ឈឿន សុចិត្ត និងអធិការនគរបាលស្រុកខ្សាច់កណ្ដាល លោក ម៉ែន សុឃឿន ដើម្បីសាកសួរព័ត៌មានអំពីការចាប់ខ្លួននេះបានទេ នៅថ្ងៃទី១៨ សីហា។ ចំណែកអ្នកនាំពាក្យតុលាការខេត្តកណ្ដាល លោក សូ សារិន វិញ លោកប្រាប់ថាជាប់រវល់ប្រជុំ ហើយក៏ចុចផ្ដាច់ទូរស័ព្ទ។
កន្លងមកអាជ្ញាធររបបក្រុងភ្នំពេញបានច្រើនតែចាប់ខ្លួនសកម្មជននយោបាយ សកម្មជនសង្គម និងយុវជន ដោយលាក់បាំងព័ត៌មាន ជួនមិនបង្ហាញដីកា ឬក៏មិនបានជូនដំណឹងទៅក្រុមគ្រួសារពួកគេ ឱ្យបានដឹងនោះឡើយ។ ករណីខ្លះទាល់តែអ្នកដែលត្រូវបានចាប់ខ្លួនទាំងនោះ ហៅទូរស័ព្ទចេញពីពន្ធនាគារមកវិញ ទើបគ្រួសាររបស់ពួកគាត់បានដឹងអំពីការចាប់ខ្លួនទាំងនោះ។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា មានប្រសាសន៍ថា ការដែលសមត្ថកិច្ចមិនបានបង្ហាញដីកាចាប់ខ្លួន ឬមិនប្រាប់ពីមូលហេតុនៃការចាប់ខ្លួនក្នុងករណីមិនមែនជាបទល្មើសជាក់ស្ដែង នោះគឺជាការអនុវត្តន៍ខុសនីតិវិធីច្បាប់ ដែលធ្វើឱ្យប៉ះពាល់ដល់សិទ្ធិរបស់ពួកគាត់។ លោកថាបញ្ជាក់ថា ក្នុងសង្គមប្រជាធិបតេយ្យ ពលរដ្ឋមានសិទ្ធិសេរីភាពបញ្ចេញមតិ និងសេរីភាពក្នុងការចូលរួមសកម្មភាពនយោបាយ និងសកម្មភាពសង្គមនានា៖ «យើងដឹងហើយថាសិទ្ធិមានមេធាវីគឺជាសិទ្ធិស្របច្បាប់របស់ជនជាប់ចោទ ជនជាប់ចោទណាក៏ដោយត្រូវតែមានមេធាវីនៅចំពោះមុខការសួរដេញដោលរបស់តុលាការ ប្រសិនបើគាត់មិនមានមេធាវីទេវាធ្វើឱ្យប៉ះពាល់ដល់សិទ្ធិរបស់ពួកគាត់ហើយ ជនជាប់ចោទមានការយល់ដឹងពីច្បាប់តិចតួចអ្នកខ្លះគាត់មិនមានការយល់ដឹងផ្លូវច្បាប់ អ៊ីចឹងទេ ពេលមានការសាកសួរដេញដោលហ្នឹងតម្រូវឱ្យមានមេធាវីក្នុងការការពារទៅដល់សិទ្ធិរបស់ពួកគាត់»។
មកដល់ពេលនេះ សកម្មជននយោបាយ សកម្មជនបរិស្ថាន សកម្មជនសង្គម និងយុវជនជាង ៨០នាក់ហើយ ដែលត្រូវបានអាជ្ញាធររបបក្រុងភ្នំពេញចាប់ខ្លួនដាក់ពន្ធនាគារជាបន្តបន្ទាប់ ដោយសារការអនុវត្តសិទ្ធិសេរីភាពនៅក្នុងសង្គម និងតាមបណ្ដាញអ៊ីនធឹណិត។ តុលាការបានចោទប្រកាន់ពួកគេពីបទ រួមគំនិតក្បត់ ញុះញង់ និងប្រមាថថ្នាក់ដឹកនាំ ជាដើម។
ក្រុមអង្គការជាតិអន្តរជាតិ រួមទាំងក្រុមប្រទេសប្រជាធិបតេយ្យធំៗ តែងតែថ្កោលទោសជាបន្តបន្ទាប់ថា ការចាប់ឃុំខ្លួនទាំងនេះ ធ្វើឡើងដោយគ្មានមូលដ្ឋានច្បាប់ និងជាការធ្វើទុក្ខបុកម្នេញផ្នែកនយោបាយ ព្រមទាំងទាមទារឱ្យដោះលែងពួកគេវិញជាបន្ទាន់ បើពុំនោះទេកម្ពុជានឹងទទួលរងទណ្ឌកម្មបន្ថែមទៀតពីសហគមន៍អន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។