អង្គការសង្គមស៊ីវិលជាតិ និងអន្តរជាតិចំនួន ២៤ អំពាវនាវឱ្យរបបលោក ហ៊ុន សែន បង្កើតគណៈកម្មការស៊ើបអង្កេតដោយឯករាជ្យ លើករណីឃាតកម្មលោកបណ្ឌិត កែម ឡី ដើម្បីរកយុត្តិធម៌ ជូនក្រុមគ្រួសារលោកបណ្ឌិត។
នៅក្នុងសេចក្តីថ្លែងការណ៍រួមគ្នា នៅថ្ងៃទី៩ ខែកក្កដានេះ អង្គការទាំងនេះ ដែលរួមមាន មជ្ឈមណ្ឌលសិទ្ធិមនុស្សកម្ពុជា គណៈកម្មការអ្នកច្បាប់អន្តរជាតិ និងសហព័ន្ធអន្តរជាតិដើម្បីសិទ្ធិមនុស្សផង រកឃើញថា បើទោះជារយៈពេលបីឆ្នាំបានកន្លងផុតទៅហើយក្ដី ក៏នៅតែគ្មានការស៊ើបអង្កេតណាមួយ ប្រកបដោយប្រសិទ្ធភាពនោះដែរ ដោយសារតែគ្មានគណៈកម្មការស៊ើបអង្កេតឯករាជ្យ និងឥតលម្អៀង ដើម្បីស៊ើបអង្កេតករណីឃាតកម្មនេះឱ្យបានហ្មត់ចត់ និងត្រឹមត្រូវ។
ការស៊ើបអង្កេតឱ្យបានហ្មត់ចត់ និងត្រឹមត្រូវនេះ អង្គការទាំងនេះ រម្លឹករបបលោក ហ៊ុន សែន អំពីកាតព្វកិច្ចជាអន្តរជាតិរបស់កម្ពុជា ដែលជារដ្ឋភាគីនៃអនុសញ្ញាអន្តរជាតិ ស្ដីពីសិទ្ធិពលរដ្ឋ និង សិទ្ធិនយោបាយ តម្រូវឱ្យកម្ពុជា បង្កើតគណៈកម្មការស៊ើបអង្កេតមួយភ្លាមៗ ដោយឯករាជ្យ ឥតលម្អៀង និងមានប្រសិទ្ធភាព ក្នុងការស៊ើបអង្កេតករណីនៃការស្លាប់នេះ។ ការស៊ើបអង្កេតនោះទៀតសោត ត្រូវរកឱ្យឃើញ មិនមែនត្រឹមតែជនដៃដល់ទេ គឺត្រូវរកជនដែលពាក់ព័ន្ធទាំងអស់ ដែលចូលដៃ ឬ នៅពីក្រោយនៃអំពើឃាតកម្មនេះ។
សេចក្ដីថ្លែងការណ៍របស់អង្គការសង្គមស៊ីវិលទាំងនេះ ធ្វើឡើងមួយថ្ងៃ មុនគម្រប់ខួបបីឆ្នាំ នៃការបាញ់សម្លាប់លោកបណ្ឌិត កែម ឡី ដែលត្រូវឃាតកបាញ់ប្រហារ នៅហាងស្តារម៉ាត (Star Mart) ក្នុងហាងសាំងកាល់តិច (Caltex) ជាប់ស្តុបបូកគោ ក្នុងក្រុងភ្នំពេញ កាលពីថ្ងៃទី១០ ខែកក្កដា ឆ្នាំ២០១៦។
រហូតមកដល់ពេលនេះ គ្មានជនណាម្នាក់ផ្សេង ក្រៅពីឈ្មោះ អឿត អាង ដែលដាក់ឈ្មោះខ្លួនឯងថា ជួប សម្លាប់ ប៉ុណ្ណោះ ដែលត្រូវបានសមត្ថកិច្ចឃាត់ខ្លួន និងតុលាការកាត់ទោសឱ្យជាប់ពន្ធនាគារអស់មួយជីវិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។