លោក កឹម សុខា ប្រធានគណបក្សសង្គ្រោះជាតិ ដែលត្រូវរបបលោក ហ៊ុន សែន រំលាយចោលនោះ ត្រូវបានតុលាការឃុំខ្លួន អូសបន្លាយពេលជិត ១ឆ្នាំហើយ។ ក្រុមមេធាវីការពារក្ដី លោក កឹម សុខា អះអាងថា មកទល់ពេលនេះ តុលាការគ្មានភស្តុតាងអ្វី ដើម្បីដាក់បន្ទុកកូនក្ដីរបស់ខ្លួនឡើយ ក្រៅពីវីដេអូឃ្លីបមួយតែប៉ុណ្ណោះ។ ក្រុមមេធាវី សុំឲ្យតុលាការដោះលែងលោក កឹម សុខា ជាបន្ទាន់។
មេធាវី លោក កឹម សុខា សុំឲ្យតុលាការពន្លឿនសំណុំរឿងដើម្បីយកមកជំនុំជម្រះ ដោយសារជំងឺគាបសរសៃលោក កឹម សុខា កំពុងរើឡើងវិញ។
លោក មេធាវី ផែង ហេង មានប្រសាសន៍ថា សំណុំរឿងដែលក្រុមមេធាវីប្ដឹងទាស់ទៅតុលាការមានពីរ គឺទី១ សំណុំរឿងប្ដឹងទៅសាលាដំបូងរាជធានីភ្នំពេញកាលពីខែមីនា ឆ្នាំ២០១៨ សុំឲ្យសាលាដំបូងលើកលែងការចោទប្រកាន់លោក កឹម សុខា វិញ។ សំណុំរឿងទី២ គឺបណ្ដឹងសាទុក្ខសុំនៅក្រៅឃុំ ប្ដឹងទៅតុលាការកំពូលកាលពីខែមិថុនា ឆ្នាំ២០១៨។ ក៏ប៉ុន្តែសំណុំរឿងទាំងពីរនេះ តុលាការទាំងពីរថ្នាក់ មិនទាន់យកមកជំនុំជម្រះនៅឡើយ ហើយការបន្តឃុំខ្លួនកូនក្ដីរបស់លោក ក៏នៅតែអូសបន្លាយ។ លោកមេធាវី ផែង ហេង សង្កត់ធ្ងន់ថា ចៅក្រមស៊ើបសួរសាលាដំបូងរាជធានីភ្នំពេញ រកមិនឃើញភស្តុតាងអ្វីផ្សេង ក្រៅពីវីដេអូឃ្លីបនោះឡើយ៖ «តុលាការពិសេសចៅក្រមស៊ើបសួរត្រូវសម្រេចលើកលែងការចោទប្រកាន់ឯកឧត្ដម កឹម សុខា តុលាការធ្វើដោយមិនបានពិចារណា»។
ចៅក្រមស៊ើបសួរសាលាដំបូងរាជធានីភ្នំពេញ លោក គី ឫទ្ធី ដែលកាន់សំណុំរឿងលោក កឹម សុខា នោះ មិនឆ្លើយសំនួរអំពីករណីនេះទេ ដោយលោកចុចបិទទូរស័ព្ទ។ អាស៊ីសេរីមិនអាចទាក់ទងមន្ត្រីតុលាការកំពូលបានទេ នៅថ្ងៃពុធ ទី២៥ កក្កដា នេះ។
លោក កឹម សុខា ត្រូវបានលោកនាយករដ្ឋមន្ត្រី ហ៊ុន សែន បញ្ជាអោយចាប់ខ្លួន ហើយសមត្ថកិច្ចរបស់លោកបានសម្រុកចាប់ខ្លួនលោក កឹម សុខា ដល់ក្នុងផ្ទះទាំងកណ្ដាលអធ្រាត្រ កាលពីដើមខែកញ្ញា ឆ្នាំ២០១៧ ដោយចោទប្រកាន់ពីបទសន្ទិដិ្ឋភាពជាមួយបរទេស ដោយមានការគាំទ្រ ពីសហរដ្ឋអាមេរិក។
សំណុំរឿងលោក កឹម សុខា នេះ ចៅក្រមស៊ើបសួរនៃសាលាដំបូងរាជធានីភ្នំពេញលោក គី ឫទ្ធី បានចេញដីកាកោះហៅមនុស្សចំនួន ១០នាក់ ក្នុងនាមជាសាក្សី ដូចជា អ្នកនាំពាក្យគណបក្សប្រជាជនកម្ពុជា លោក ឈឹម ផលវរុណ ប្រធានគណបក្សសំបុកឃ្មុំសង្គមប្រជាធិបតេយ្យ លោក ម៉ម សូណង់ដូ នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព ប្រធានអង្គការសមាគមធាងត្នោត លោក មាស គឹមសេង ប្រធានមជ្ឈមណ្ឌលប្រព័ន្ធផ្សព្វផ្សាយឯករាជ្យលោក ប៉ា ងួនទៀង អតីតប្រធានក្រុមការងារពិសេសសិទ្ធិលំនៅឋានលោក សៀ ភារម្យ និងសកម្មជនគណបក្សសង្គ្រោះជាតិមួយចំនួនទៀត។
ចំពោះបណ្ដឹងសុំនៅក្រៅឃុំវិញ កន្លងមក តុលាការបានបដិសេធបណ្ដឹងរបស់ក្រុមមេធាវីជាបន្តបន្ទាប់។ កាលពីថ្ងៃទី៥ មិថុនា ក្រុមចៅក្រមនៃសភាស៊ើបសួរសាលាឧទ្ធរណ៍បានបដិសេធបណ្ដឹងសុំនៅក្រៅឃុំរបស់ក្រុមមេធាវី លោក កឹម សុខា ម្ដងទៀត ដោយសំអាងហេតុផលដដែល គឺមិនអាចដោះលែងលោក កឹម សុខា ឲ្យនៅក្រៅឃុំបណ្ដោះអាសន្នបានទេ ដោយអះអាងថា បទល្មើសចោទប្រកាន់លោក កឹម សុខា នេះ ជាប្រភេទបទល្មើសធ្ងន់ធ្ងរ នាំឲ្យអន្តរាយដល់ជាតិខ្លាំង។ ក៏ប៉ុន្តែក្រុមមេធាវីបានសំដែងការការខកចិត្តចំពោះការសម្រេចនេះ ហើយអះអាងថា ការសំអាងហេតុរបស់សាលាឧទ្ធរណ៍ ថា មិនសមហេតុផល និងគ្មានមូលដ្ឋានច្បាស់លាស់។ ក្រុមមេធាវីបានប្ដឹងសាទុក្ខទៅតុលាការកំពូលភ្លាមៗ។
ជាថ្មីម្ដងទៀត លោកមេធាវី ផែង ហេង សង្ឃឹមថា តុលាការកំពូលនឹងយកបណ្ដឹងសាទុក្ខសុំនៅក្រៅឃុំនេះ យកមកជំនុំជម្រះឆាប់ៗ ដោះលែងកូនក្ដីរបស់លោកនៅក្រៅឃុំបណ្ដោះអាសន្ន។ ហើយក្រុមមេធាវីធានាថា លោក កឹម សុខា ជាមនុស្សដែលមានការសហការល្អជាមួយតុលាការ ដូច្នេះ ប្រសិនបើដោះលែងឲ្យនៅក្រៅឃុំបណ្ដោះអាសន្ន លោក កឹម សុខា នឹងអនុវត្តតាមនីតិវិធីទាំងអស់របស់តុលាការ ដែលបានកំណត់ ដើម្បីឲ្យលោក កឹម សុខា មានលទ្ធភាពទៅព្យាបាលជំងឺកៀបសរសៃនៅប្រទេសសិង្ហបុរី តាមវេជ្ជបញ្ជាតាំងពីមុនពេលចាប់ខ្លួនមកនោះ៖ «គាត់នៅតែឈឺពេលគេងប៉ះដៃកន្លែងហ្នឹងទៅ ឈឺ ដោយសារតែគាត់មិនទាន់បានព្យាបាល ហើយបើតាមអ៊ីមែល ពេទ្យពីសិង្ហបុរីមកថា គេមិនអាចវាយតម្លៃបានទេ បើមិនទាន់បានទៅពិនិត្យព្យាបាលនោះ លុះត្រាតែបានទៅព្យាបាលសិន ទើបអាចវាយតម្លៃបានថា ស្ថានភាពជំងឺត្បៀតសរសៃនោះ ធ្ងន់ធ្ងរកម្រិតណា»។
ការឃុំខ្លួន លោក កឹម សុខា នេះ គឺមានការថ្កោលទោសពីសហគមន៍អន្តរជាតិជាបន្តបន្ទាប់ នៅចុងក្រោយនេះ គឺភ្នាក់ងាររបស់អង្គការសហប្រជាជាតិ អះអាងថា ការឃុំខ្លួនលោក កឹម សុខា ធ្វើឡើងតាមទំនើងចិត្ត ហើយទាមទារឲ្យរបបលោក ហ៊ុន សែន ដោះលែងលោក កឹម សុខា ជាបន្ទាន់ដោយគ្មានលក្ខខណ្ឌ។
ភា្នក់ងាររបស់អង្គការសហប្រជាជាតិ ឃ្លាំមើលការឃុំឃាំងដោយអយុត្តិធម៌ ហៅជាអង់គ្លេសថា WGAD បានចាត់ទុកការចាប់ខ្លួន និងការឃុំឃាំង លោក កឹម សុខា ថា ធ្វើឡើងក្នុងហេតុផលនយោបាយ ដែលនាំឲ្យកើនឡើងនៃការកៀបសង្កត់លើក្រុមអ្នករិះគន់របបលោក ហ៊ុន សែន មុនការបោះឆ្នោតនាថ្ងៃទី២៩ កក្កដា ឆ្នាំ២០១៨នេះ។
ភា្នក់ងាររបស់អង្គការសហប្រជាជាតិ ឃ្លាំមើលការឃុំខ្លួនដោយអយុត្តិធម៌នេះ បានអំពាវនាវដល់របបលោក ហ៊ុន សែន ឱ្យផ្ដល់សំណងដល់លោក កឹម សុខា និងសំណងផ្សេងៗទៀតសម្រាប់ការឃុំឃាំងដោយបំពាន ស្របតាមច្បាប់អន្តរជាតិ។ ក្រុមនេះក៏សម្ដែងការព្រួយបារម្ភយ៉ាងខ្លាំងអំពីបញ្ហាសុខភាព របស់លោក កឹម សុខា ដែលកំពុងទទួលរងការឈឺចាប់ធ្ងន់ធ្ងរពីការត្បៀតសរសៃស្មារបស់លោក ក៏ដូចជាសម្ពាធឈាមឡើងខ្ពស់ និងជំងឺលើសឈាមជាដើម។ អង្គការសហប្រជាជាតិបានអំពាវនាវឱ្យរដ្ឋាភិបាលធានាឱ្យលោក កឹម សុខា ទទួលការព្យាបាលត្រឹមត្រូវឱ្យបានឆាប់រហ័សតាមស្តង់ដារអន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។