លោក ខឹម វាសនា នៅតែបំផុសបំផុលព័ត៌មាន អំពីទឹកនឹងលិចលង់ពិភពលោកដដែល ទោះជាដល់ថ្ងៃអាជ្ញាធរខែត្រសៀមរាបដាក់កំហិតឲ្យរំសាយការជួបជុំគ្នាកាលពីយប់ថ្ងៃទី៣០ សីហា នេះក្ដី។
អ្នកវិភាគថា ប្រសិនបើអាជ្ញាធរលោកនាយករដ្ឋមន្ត្រី លោក ហ៊ុន សែន មិនឃាត់ខ្លួនលោក ខឹម វាសនាឬរំសាយការជួបជុំនេះបានទេ នឹងធ្វើឲ្យសង្គមចលាចល និងប៉ះសន្តិសុខសង្គម។
លោក ខឹម វាសនា ប្រធានគណបក្សសម្ព័ន្ធដើម្បីលទ្ធិប្រជាធិបតេយ្យ បានឡាយវីដេអូ (Live)តាម បណ្ដាញសង្គមហ្វេសប៊ុកខ្លួនដោយអំពាវនាវ ឲ្យអ្នកគាំទ្រលោក កុំខ្លាចអាជ្ញាធររដ្ឋ រួមទាំងលោកនាយករដ្ឋមន្ត្រី ហ៊ុន សែន ផង។
ការប្រកាសរបស់លោក ខឹម វាសនា ចំពេលដែលលោកបានសន្យាជាមួយអាជ្ញាធរខែត្រសៀមរាបថា នឹងរំសាយការជួបជុំគ្នានៅលើដីចំការរបស់លោកនៅក្បែរជើងភ្នំគូលែនត្រឹមថ្ងៃទី៣០សីហាម្សិលមិញ ប៉ុន្តែមកទល់ពេលនេះ លោក ខឹម វាសនា មិនប្រកាសរំសាយការជួបជុំនេះនៅឡើយទេ។
លោក ខឹម វាសនា នៅតែសរសេរនិងនិយាយឡាយតាមវីដេអូថា ពិភពលោកនឹងលិចលង់ដដែល ទោះបីជាអាជ្ញាធរនិងសាធារណជនរិះគន់ថា ជាការបោកប្រាស់និងធ្វើឲ្យសង្គមចលាចលក្ដី។
លោក ខឹម វាសនា បាននិយាយនៅក្នុងវីដេអូឡាយកាលពីយប់មិញថា អាជ្ញាធរ និងលោកនាយករដ្ឋមន្ត្រី ហ៊ុន សែន មិនអាចធ្វើអ្វីលោកបានទេ។ លោក ខឹម វាសនា បានចាត់ទុកខ្លួនថា ជាព្រហ្មរក្សាលោក ហើយបានប្រើពាក្យអសុរសតិះដៀលថ្នាក់ដឹកនាំទៀតផង៖ «អាកូនចៅវាល្ងង់ៗ១០គត់ បើសិនជាវាហ៊ានមកហើយ ងាប់ហើយ»។
អភិបាលខេត្តសៀមរាប លោក ទៀ សីហា បានចេញលិខិតណែនាំទៅ លោក ខឹម វាសនា ឱ្យបញ្ឈប់ការប្រមូលផ្ដុំពលរដ្ឋត្រឹមពាក់កណ្ដាលអធ្រាត្រ ឬម៉ោង១២យប់ថ្ងៃទី៣០ ខែសីហាជាកំហិត។
លិខិតដដែលបញ្ជាក់ថា ការប្រមូលផ្តុំគ្នារបស់ពលរដ្ឋមកពីបណ្ដាខេត្តនានា និងមកពីក្រៅប្រទេសផងទៅតាមការអំពាវនាវ ផ្សព្វផ្សាយរបស់លោក ខឹម វាសនានោះ ពុំបានសុំកិច្ចសហការ ឬអនុញ្ញាតពីអាជ្ញាធរទេ ហើយថែមទាំងបានធ្វើឱ្យប៉ះពាល់ដល់សន្តិសុខសណ្ដាប់ធ្នាប់សាធារណៈ បរិស្ថាន អនាម័យ និងការទប់ស្កាត់ការឆ្លងរាលដាលជំងឺកូវីដ-១៩។
ជាមួយគ្នានេះ រដ្ឋបាលខេត្តសៀមរាបកាលពីយប់ថ្ងៃទី២៩ ខែសីហាដដែលបានចេញលិខិតណែនាំដល់ពលរដ្ឋ ដែលកំពុងប្រមូលផ្ដុំគ្នារស់នៅលើដីចម្ការរបស់លោក ខឹម វាសនា ឱ្យបញ្ឈប់ការជួបជុំនោះត្រឹមថ្ងៃជូនដំណឹងតទៅដែរ។ រដ្ឋបាលខេត្តលើកឡើងនូវហេតុផលចំនួន៣ពន្យល់ទៅពលរដ្ឋ ដែលរួមមាន៖ កុំឱ្យជឿការឃោសនា បែបប្រជាភិថុតិរបស់ លោក ខឹម វាសនា ព្រោះការប្រមូលផ្ដុំនេះធ្វើឱ្យពលរដ្ឋមួយចំនួនបាត់បង់ការងារ មុខរបរ ក្មេងៗមិនបានទៅសាលារៀន គ្មានអនាម័យបរិស្ថាន និងបានធ្វើឱ្យប៉ះពាល់សន្តិសុខសង្គម សុវត្ថិភាពសាធារណៈ សុខុមាលភាព ខ្វះទឹកស្អាត ព្រមទាំងប្រឈមនឹងការឆ្លងរាលដាលជំងឺកូវីដ-១៩ ជាដើម។
វិទ្យុអាស៊ីសេរី មិនអាចទាក់ទងអភិបាលខែត្រសៀមរាប លោក ទៀ សីហា ដើម្បីសុំសួរអំពីបញ្ហានេះ បានទេកាលពីយប់ថ្ងៃទី៣០ សីហា។
ប៉ុន្តែអភិបាលខែត្រសៀមរាប លោក ទៀ សីហា បានប្រាប់សារព័ត៌មានស្និទ្ធនឹងលោក ហ៊ុន សែន កាលពីម៉ោង១២យប់ ថ្ងៃទី៣០ សីហា ថា អាជ្ញាធរខែត្របានសម្រេចបិទទីតាំងជួបជុំរបស់លោក ខឹម វាសនា ចាប់ពីម៉ោង១២ចូល ថ្ងៃទី៣១ សីហា។
សារព័ត៌មានដដែលបន្ថែមថា អាជ្ញាធរខែត្របានសម្រេចបិទនេះ ក្រោយពេលទទួលបានលិខិតរបស់គណបក្សសម្ព័ន្ធ ដើម្បីប្រជាធិបតេយ្យ សុំពន្យារពេលការជួបជុំរហូតដល់ដាច់ខែកញ្ញាខាងមុខ។
កាលពីយប់ថ្ងៃទី៣០ សីហា លោក ខឹម វាសនា បានសរសេរជាច្រើននៅលើបណ្ដាញហ្វេសប៊ុករបស់លោក ដោយអំពាវនាវកុំឲ្យកូនចៅលោកខា្លច។ លោក ខឹម វាសនា បានសរសេរព្រមានវិញថា ព្រមានអាជ្ញាធរវិញថា កុំថាឡើយប៉ះលោក សូម្បីតែកូនចៅរបស់លោកក៏មិនអាចធ្វើបានដែរ។ទាក់ទងនឹងបញ្ហានេះ អ្នកវិភាគនយោបាយ លោក គឹម សុខ មានប្រសាសន៍ថា លោក ខឹម វាសនា ហ៊ានប្រកាស មិនខ្លាចរអាអាជ្ញាធរ រួមទាំងលោក ហ៊ុន សែន បែបនេះ ទំនងជាលោក ខឹម វាសនា អាងលើកម្លាំងស្មោះត្រង់លោកមានចំនួនច្រើន ហើយប្រសិនបើអាជ្ញាធរចាប់ខ្លួននឹងអាចកម្លាំងងើតតតាំង៖ «ទំនងជាគាត់មានអ្នកគាំទ្រច្រើន ទំនងជា ខឹម វាសនាមិនខ្លាចនឹងសាកល្បងជាមួយលោក ហ៊ុន សែនទេ។ ហើយលោក ហ៊ុន សែន នៅស្ទាបស្ទង់មើលថា តើកម្លាំងលោក ខឹម វាសនា នៅគាំទ្រច្រើនកម្រិតណា។ ហើយបើចាប់លោក ខឹម វាសនា ហើយ ថាតើកម្លាំងនឹងងើបក្នុងកម្រិតណា ? ។ សព្វថ្ងៃនេះ លោក ហ៊ុន សែន ខ្លាចកម្លាំងងើតឡើងណាស់ ទោះជាកម្លាំងណាក៏ដោយ»។
ទោះបីជាបែបនេះក្ដី លោក គឹម សុខ បញ្ជាក់ថា ប្រសិនអាជ្ញាធរអាជ្ញាធរមិនចាត់ការលោក ខឹម វាសនាតាមផ្លូវច្បាប់ណាមួយទេនោះ នឹងធ្វើឲ្យសង្គមចលាចលដោយសារតែការបំផុសបំផុលការពិតរបស់លោក ខឹម វាសនា។
លោក គឹម សុខ បន្ថែមថា សកម្មជនបរិស្ថាន សកម្មជននយោបាយ មិនបានធ្វើអ្វីប៉ះពាល់ដល់សង្គមនោះទេ តែបែរជាអាជ្ញាធរចោទប្រកាន់ពីបទញុះញង់ ធ្វើឲ្យវឹកវរដល់សង្គមហើយចាប់ដាក់ពន្ធនាគារជាបន្តបន្ទាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។