ចលនាបណ្ដាញសង្គមមានឈ្មោះថា ខ្មែរដើម្បីខ្មែរ ដែលមានមេដឹកនាំសង្គមស៊ីវិលមួយក្រុមជាអ្នកផ្ដួចផ្ដើម បានបង្កើតវេទិកាបញ្ជ្រាបការយល់ដឹងដល់អ្នកគាំទ្រ ប្រជាពលរដ្ឋ និងសិស្សនិស្សិត ដើម្បីឈានទៅបង្កើតគណបក្សតាមភូមិ ឬគណបក្សមូលដ្ឋាននាថ្ងៃអនាគត។
ជំនួបនេះ រៀបចំនៅខេត្តព្រះសីហនុ ព្រឹកថ្ងៃសៅរ៍ ទី៣១ ខែមករា ដោយមានពលរដ្ឋមកពី ៨ឃុំចូលរួម។
ប៉ុន្តែ ជំនួបនេះសម្រាប់មេដឹកនាំគណបក្សសង្គ្រោះជាតិ មិនចាប់អារម្មណ៍ចំពោះសកម្មភាពនយោបាយរបស់ក្រុមអង្គការសង្គមស៊ីវិលទាំងនេះទេ។
រហូតមកដល់ពេលនេះ លោក កែម ឡី អ្នកស្រាវជ្រាវការអភិវឌ្ឍសង្គម នៅតែបដិសេធថា រូបលោក និងសហការី គ្មានបំណងបង្កើតគណបក្សនយោបាយថ្មីដើម្បីប្រកួតប្រជែងនឹងគណបក្សនយោបាយណាមួយនោះទេ។ ប៉ុន្តែលោកអះអាងថា បើថ្ងៃអនាគត មេដឹកនាំគណបក្សប្រជាជនកម្ពុជា និងគណបក្សសង្គ្រោះជាតិ ដែលឈ្នះអាសនៈសភា អនុវត្តគោលនយោបាយរបស់ខ្លួនមិនស្របតាមការចង់បានរបស់ពលរដ្ឋទេ ពេលនោះគណបក្សមូលដ្ឋានដែលបង្កើតដោយប្រជាពលរដ្ឋមានឈ្មោះថា ខ្មែរដើម្បីខ្មែរ អាចនឹងឈានទៅបង្កើតគណបក្ស។
លោក កែម ឡី ឲ្យដឹងដូច្នេះនៅក្នុងពិធីជួបជុំប្រជាពលរដ្ឋចំនួន ៨ឃុំមកពីខេត្តកំពង់ស្ពឺ និងសិស្សនិស្សិត ព្រមទាំងក្រុមបញ្ញវន្តសរុបជាង ៥០នាក់ នៅព្រឹកថ្ងៃទី៣១ ខែមករា នាសណ្ឋាគារតោមាស ខេត្តព្រះសីហនុ៖ «អង្គការសង្គមស៊ីវិល ឬផ្នែកពាក់ព័ន្ធ ត្រូវតែបណ្តុះបណ្តាលឲ្យប្រជាពលរដ្ឋមានការយល់ដឹងពីបញ្ហាផ្សេងៗ ដូចជាបញ្ហានយោបាយជាដើម។ កាលណាប្រជាពលរដ្ឋយល់ច្បាប់ ពួកគាត់អាចចេះវិភាគ ហើយគាត់មានព័ត៌មាន ហើយដល់ពេលនេះ គាត់នឹងអាចជ្រើសរើសគណបក្សដែលល្អ និងមេដឹកនាំដែលល្អ។ ដូច្នេះ ពីថ្ងៃនេះទៅអនាគត ប្រសិនបើគណបក្សណាធ្វើសកម្មភាពល្អ និងមានប្រជាធិបតេយ្យពិតប្រាកដ ហើយមានមេដឹកនាំមានភាពជាអ្នកដឹកនាំច្បាស់លាស់ គឺប្រជាពលរដ្ឋបោះឆ្នោតជូន និងកាន់តែកើនសំឡេង។ ហើយបើប្រជាពលរដ្ឋយល់ដឹងខ្ពស់ ហើយគណបក្សមិនព្រមកែ គឺនៅតែដដែលៗ របៀបបុណ្យ ខ្ញុំជឿថា គណបក្សនេះនឹងទទួលបរាជ័យអនាគត»។
អ្នកឃ្លាំមើលសង្គម លោក កែម ឡី បញ្ជាក់ថា បណ្ដាញចលនាខ្មែរដើម្បីខ្មែរ គឺមានបំណងពង្រឹងសិទ្ធិអំណាចនយោបាយដល់ប្រជាពលរដ្ឋនៅតាមមូលដ្ឋាន តាមរយៈការជួយលើកទឹកចិត្តឲ្យប្រជាពលរដ្ឋបង្កើតគណបក្សមូលដ្ឋានមួយដោយខ្លួនឯង។
លោក គួយ ប៊ុនរឿន មន្ត្រីជាន់ខ្ពស់គណបក្សសង្គ្រោះជាតិ ថ្លែងមិនចាប់អារម្មណ៍ចំពោះការបង្កើតបណ្ដាញខ្មែរដើម្បីខ្មែរ ឬឈានដល់បង្កើតបក្សនយោបាយថ្មីមួយនាថ្ងៃអនាគតរបស់ក្រុមអង្គការសង្គមស៊ីវិលទាំងនោះទេ៖ «គណបក្សយើងខ្ញុំមិនចាប់អារម្មណ៍ទេ ប៉ុន្តែអ្វីដែលគណបក្សយើងខ្ញុំកំពុងធ្វើ គឺការរៀបចំខ្លួនអនុវត្តទៅតាមគោលការណ៍ ឬកម្មវិធីនយោបាយរបស់គណបក្ស។ ជាងនេះ នឹងរៀបចំឲ្យមានចំណាត់ការក្នុងការជួយដោះស្រាយបញ្ហាជាតិធំៗ និងបញ្ហាលំបាករបស់ប្រជាពលរដ្ឋដែលកំពុងរងគ្រោះឲ្យបានប្រសើរឡើងនាថ្ងៃអនាគត»។
ចំណែកលោកនាយករដ្ឋមន្ត្រី ហ៊ុន សែន និងជាអនុប្រធានគណបក្សប្រជាជនកម្ពុជា កន្លងទៅថ្មីៗនេះ បានសាទរការបង្កើតឲ្យមានចលនាបណ្ដាញសង្គមឈានទៅបង្កើតគណបក្សនយោបាយ ចូលរួមប្រកួតប្រជែងការបោះឆ្នោតនាពេលខាងមុខ។
កញ្ញា កែវ ម៉ានី និស្សិតមកពីសាកលវិទ្យាល័យមួយនៅទីក្រុងភ្នំពេញ ដែលបានចូលរួមពិធីជួបជុំក្នុងបណ្ដាញខ្មែរដើម្បីខ្មែរ នាខេត្តព្រះសីហនុ ឲ្យដឹងថា បន្ទាប់ពីបានតាមដានស្ថានការណ៍វិវឌ្ឍនយោបាយក្រោយការបោះឆ្នោតអាណត្តិទី៥ រួចមក នាំឲ្យរូបនាងចង់ចូលរួមក្នុងកិច្ចការងារសង្គម។ កញ្ញាបន្តថា ពេលនេះកំពុងតាមដានពីដំណើរការនៃការបង្កើតគណបក្សមូលដ្ឋាន ដឹកនាំដោយបញ្ញវន្ត ឬមេដឹកនាំសង្គមស៊ីវិល ដែលថាអាចជួយដល់ការអភិវឌ្ឍនៅតាមសហគមន៍នាថ្ងៃអនាគត៖ «បើសិនជាលក្ខន្តិកៈរបស់បណ្ដាញខ្មែរដើម្បីខ្មែរអនុវត្តទៅមានភាពល្អប្រសើរ ខ្ញុំនឹងចូលរួមធ្វើសកម្មភាពធ្វើការងារសង្គមជាមួយបណ្ដាញនេះនាថ្ងៃអនាគត។ ប៉ុន្តែ ពេលនេះ ខ្ញុំកំពុងតែអង្កេតអំពីសកម្មភាពការងាររបស់បណ្ដាញខ្មែរដើម្បីខ្មែរ កំពុងតែធ្វើសកម្មភាពពីអ្វី និងមានគោលដៅបែបណាឲ្យពិតប្រាកដ ដើម្បីសង្គមជាតិ និងប្រជាពលរដ្ឋទូទៅ»។
បញ្ហានេះ លោក កែម ឡី អ្នកស្រាវជ្រាវសង្គមឋិតក្នុងចំណោមមេដឹកនាំសង្គមស៊ីវិលច្រើនទៀត បានឲ្យដឹងថា មានឃុំចំនួន២៥ ឋិតក្នុងគម្រោងសាកល្បងជាមួយប្រជាពលរដ្ឋក្នុងការរៀបចំបង្កើតគណបក្សមូលដ្ឋាន រួមមាន ខេត្តព្រៃវែង តាកែវ កំពង់ចាម មណ្ឌលគិរី កំពង់ស្ពឺ និងខេត្តកណ្ដាល។ ទោះយ៉ាងណា លោក កែម ឡី បានបដិសេធថា ក្រុមលោកគ្មានបំណងបង្កើតគណបក្សនយោបាយថ្មីទេ ប៉ុន្តែទទួលស្គាល់ថា ក្រុមរបស់លោកកំពុងបង្កើតចលនាបណ្ដាញសង្គមដ៏ធំមួយ ក្នុងបំណងបញ្ជ្រាបការយល់ដឹងដល់ប្រជាពលរដ្ឋ សិស្សនិស្សិត ដើម្បីឲ្យមានការប្រែប្រួលនយោបាយនៅកម្ពុជា នាថ្ងៃអនាគត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។