គណបក្សខ្មែររួបរួមជាតិ និងគណបក្សកម្ពុជានិយមគ្រោងរួមគ្នាជាបក្សតែមួយសម្រាប់ការបោះឆ្នោតឆ្នាំ២០២៣។ អ្នកតំណាងគណបក្សទាំង២នេះរំពឹងថា ការរួបរួមនេះនឹងបង្កើតបានជាប៉ូលនយោបាយប្រជាធិបតេយ្យសេរីថ្មីមួយ ដើម្បីបុព្វហេតុជាតិ ប្រជាធិបតេយ្យសេរី សិទ្ធិមនុស្ស យុត្តិធម៌សង្គម និងផលប្រយោជន៍ខ្មែរ។ អ្នកតាមដានកិច្ចការបោះឆ្នោតស្វាគមន៍ការរួបរួមរបស់គណបក្សនយោបាយទាំងឡាយ ព្រោះមានតែការរួមគ្នាទេទើបអាចឱ្យគណបក្សនយោបាយក្រៅពីគណបក្សកាន់អំណាចមានឱកាសបង្កើនកម្លាំងប្រដំប្រសងគ្នា ដើម្បីទៅប្រកួតប្រជែង។
មេដឹកនាំគណបក្សនយោបាយទាំង២ គឺគណបក្សគណបក្សខ្មែររួបរួមជាតិ និងគណបក្សកម្ពុជានិយមនឹងជួបពិភាក្សាគ្នានៅព្រឹកថ្ងៃទី១០ ខែតុលា នេះ ដើម្បីពិភាក្សាលម្អិត ស្វែងរកការសម្រេចរួមឈានទៅរួបរួមគ្នា បង្កើតជាប៉ូលនយោបាយប្រជាធិបតេយ្យសេរីមួយ។
អគ្គលេខាធិការរងគណបក្សខ្មែររួបរួមជាតិលោក ទិប ទាវ ប្រាប់វិទ្យុអាស៊ីសេរីកាលពីយប់ថ្ងៃទី៩ ខែតុលា ថាគណបក្សទាំង២នឹងជជែកពីរបៀបដែលអាចរួបរួមគ្នាទៅជាបក្សតែមួយបន្ថែមទៀត។ លោកថា ជម្រើសល្អបំផុតនៅក្នុងពេលបច្ចុប្បន្ននេះ នៅពេល ដែលពេលវេលាត្រៀមសម្រាប់ការបោះឆ្នោតជាតិកាន់តែខើចណាស់ទៅហើយនេះ គណបក្សទាំង២បានព្រមព្រៀងថា នឹងរួមគ្នានៅក្រោមឈ្មោះគណបក្សតែមួយ គឺគណបក្សខ្មែររួបរួមជាតិ។ លោកថា ការរួបរួមគ្នានេះ នឹងផ្ដល់ក្ដីសង្ឃឹមដល់អ្នកគាំទ្រជាម្ចាស់ឆ្នោត៖ « វាជាការង្ហាញឱ្យឃើញអំពីអ្នកប្រជាធិបតេយ្យបែបកណ្ដាលនិយមចេះរួបរួមគ្នា ចេះសហការគ្នាក្នុងនាមយើងជាខ្មែរដូចគ្នា ដើម្បីផ្ដល់ក្ដីសង្ឃឹមទៅឱ្យពលរដ្ឋម្ចាស់ឆ្នោត កាត់មានការកក់ក្ដៅ គាត់មានការបោះឆ្នោតជូនគណបក្សរួបរួមជាតិឆ្នាំ២០២៣ខាងមុខនេះ »។
គណបក្សខ្មែររួបរួមជាតិរបស់លោក ញឹក ប៊ុនឆៃ និងគណបក្សកម្ពុជានិយមរបស់លោក យ៉ែម បុញ្ញឫទ្ធិ បានប្រកាសរួមគ្នាកាលពីថ្ងៃទី៧ ខែតុលា ថាការបង្កើតប៉ូលនយោបាយថ្មីនេះ មានគោលដៅបង្រួបបង្រួម ផ្សះផ្សា អ្នកតស៊ូ ដើម្បីបុព្វហេតុជាតិ អ្នកជាតិនិយមប្រជាធិបតេយ្យ សេរីនិយម និងលើកកម្ពស់ ប្រជាធិបតេយ្យសេរី សិទ្ធិសេរីភាព ការគោរពសិទ្ធិមនុស្ស យុត្តិធម៌សង្គម សម្រាប់ផលប្រយោជន៍របស់ប្រទេសជាតិ និងប្រជាជាតិខ្មែរតាមស្មារតីនៃកិច្ចព្រមព្រៀងសន្តិភាពទីក្រុងប៉ារីស (Paris) ២៣ តុលា ១៩៩១។ សេចក្ដីប្រកាសរួមដដែលឱ្យដឹងថា បក្សទាំង២នឹងពិភាក្សាបន្ថែមពីការរួបរួមគ្នាបង្កើតប៉ូលនយោបាយប្រជាធិបតេយ្យសេរីថ្មី ដោយមានសមាសភាពចូលរួមចម្រុះពីនិស្សិត បញ្ញវន្ត យុវជន ស្ត្រី អ្នកតស៊ូមតិ ដើម្បីបុព្វហេតុជាតិ អ្នកជាតិនិយម និងអ្នកប្រជាធិបតេយ្យសេរីនិយម។
ចំណែកស្ថាបនិកគណបក្សកម្ពុជានិយមលោក ស៊ឹង រ៉េត បញ្ជាក់ប្រាប់ថា ការរួបរួមនេះក៏ផ្ដល់ក្ដីសង្ឃឹមសម្រាប់ការប្រកួតប្រជែងដណ្ដើមអាសនៈសមាជិកសភាជាមួយគណបក្សកាន់អំណាច។ យ៉ាងនេះក្ដីលោកមិនទាន់អាចបញ្ជាក់បានពីចំនួនអាសនៈ ដែលរំពឹងថា នឹងឈ្នះដោយសារការរួបរួមគ្នានេះនៅឡើយទេ៖ « ជាការពិតពេលយើងរួមគ្នាវាតែងតែមានសំឡេងគ្រាន់បើជាងយើងមិនរួមគ្នា។ អ្វីក៏ដោយកាលណាយើងរួមវាធំ កាលណាយើងបែកវាតូច។ ការរួមរួមនេះមានក្ដីសង្ឃឹមថា មានការរីកចម្រើនលូតលាស់ជាងមុន »។
ទាក់ទងនឹងរឿងនេះ អ្នកសម្របសម្រួលផ្នែកអង្កេត និងតស៊ូមតិនៃអង្គការខុមហ្វ្រែល (COMFREL) លោក កន សាវាង្ស ស្វាគមន៍ការរួបរួមរបស់គណបក្សនយោបាយទាំងឡាយ ព្រោះមានតែការរួមគ្នាទេទើបអាចឱ្យគណបក្សនយោបាយក្រៅពីគណបក្សកាន់អំណាចមានឱកាសបង្កើនកម្លាំងប្រដំប្រសងគ្នា ដើម្បីប្រកួតប្រជែង។ តែទោះជាយ៉ាងណាលោក កន សាវាង្ស ថាលោកនៅមិនទាន់ដឹងថា តើការរួបរួមគ្នានេះមានឥទ្ធិពលកម្រិតណានៅឡើយ នៅពេលដែលមានគណបក្ស២ទៀត គឺគណបក្សភ្លើងទៀន និងគណបក្សឆន្ទៈខ្មែរបានរួបរួមគ្នាជាគណបក្សតែ១ដែរ៖ « ប្រសិនបើមានការរួមបានន័យថា សំឡេងហ្នឹង ការគាំទ្រហ្នឹងវាទៅរួមគ្នាលើគណបក្សដែលធ្វើឱ្យគណបក្សមួយៗហ្នុងអាចមានលទ្ធភាពនៅក្នុងការចាប់យកអាសនៈរបស់ខ្លួននៅក្នុងផ្នែកណាមួយ គឺជារឿងមួយ ដែលល្អ។ ប្រសិនបើគណបក្សទាំងអស់អាចរួមគ្នាឱ្យកាន់តែតូចថែមទៀតក៏រិតតែប្រសើរ »។
ការប្រកាសរួបរួមគ្នារបស់គណបក្សគណបក្សខ្មែររួបរួមជាតិ និងគណបក្សកម្ពុជានិយមធ្វើឡើងភ្លាមៗនៅក្រោយគណបក្សឆន្ទៈខ្មែរ ប្រកាសទៅចូលរួមជាគណបក្សតែ១ ក្រោមឈ្មោះគណបក្សភ្លើងទៀន ដើម្បីត្រៀមខ្លួនចូលរួមការបោះឆ្នោតឆ្នាំ២០២៣ ដែរ។
ទាក់ទងនឹងរឿងនេះ លោក ទិប ទាវ ឆ្លើយតបថា គណបក្សក៏បើកចំហសម្រាប់ការរួបរួមជាមួយគណបក្សផ្សេងទៀតដែរ នៅពេលចោទសួរថា តើហេតុអ្វីគណបក្សមិនជ្រើសរើសទៅរួបរួមជាមួយសម្ព័ន្ធភាពថ្មីរវាងគណបក្សភ្លើងទៀន និងគណបក្សឆន្ទៈខ្មែរ។
តែទោះជាយ៉ាងណាគណបក្សខ្មែររួបរួមជាតិបានចេញប្រកាសព័ត៌មានមួយកាលពីថ្ងៃទី៩ ខែតុលា ដោយប្រកាសដកខ្លួនចេញពីសម្ព័ន្ធភាពគណបក្សនយោបាយមួយឈ្មោះថា សម្ព័ន្ធភាពអ្នកប្រជាធិបតេយ្យខ្មែរ ដោយសម្អាងហេតុផលថា សម្ព័ន្ធភាពនេះមិនអាចអនុវត្តទៅបានដោយរលូនសម្រាប់ការបោះឆ្នោតជាតិអាណត្តិ៧ខាងមុខនេះ។
សម្ព័ន្ធភាពអ្នកប្រជាធិបតេយ្យខ្មែរត្រូវបានបង្កើតឡើងកាលពីខែវិច្ឆិកា ឆ្នាំ២០២០ ដោយគណបក្សចំនួន៣ គឺគណបក្សសំបុកឃ្មុំសង្គមប្រជាធិបតេយ្យរបស់លោក ម៉ម សូណង់ដូ គណបក្សខ្មែររួបរួមជាតិ និងគណបក្សខ្មែរតែមួយរបស់លោក កែម រិទ្ធិសិត។ គោលបំណងនៃការបង្កើតសម្ព័ន្ធភាពនេះ គឺដើម្បីបណ្ដុះគំនិតជាតិនិយម គំរូថ្មីមួយ ដើម្បីយុវជនខ្មែរបន្តវេនដោយគ្មានវប្បធម៌លាបពណ៌ និងគ្មានវប្បធម៌ក្តិចត្រួយ។ លើសពីនេះគណបក្សទាំង៣ ធ្លាប់អះអាងថា ជាការរួបរួមសម្រាប់ការបោះឆ្នោតក្រុមប្រឹក្សា ឃុំ-សង្កាត់ ឆ្នាំ២០២២ និងការបោះឆ្នោតជ្រើសតាំងតំណាងរាស្ត្រ អាណត្តិទី៧ ឆ្នាំ២០២៣។
ពាក់ព័ន្ធនឹងការរួមគ្នារបស់គណបក្សទាំងឡាយនេះ អ្នកនាំពាក្យគណបក្សកាន់អំណាចលោក សុខ ឥសាន ធ្លាប់លើកឡើងថា គណបក្សរបស់លោកមិនបារម្ភពីការរួបរួមគ្នាទាំងនោះឡើយ ដោយលោក សម្អាងថា គណបក្សទាំងនោះជាគណបក្សខ្សោយព្រោះនាំគ្នារួមគ្នាពីការបែកបាក់ ហើយបន្ទាប់មកក៏អាចបែកបាក់ទៀត ហើយសុទ្ធតែជាគណបក្សដែលមិនធ្លាប់ឈ្នះឆ្នោត។
យ៉ាងណាក៏ដោយក្រុមអ្នកវិភាគ និងសង្គមស៊ីវិលនៅតែមើលឃើញថា ការរួបរួមនឹងធ្វើឱ្យគណបក្សក្រៅរដ្ឋាភិបាលមានកម្លាំងប្រកួតប្រជែង ដូចគេធ្លាប់ឃើញកម្លាំងគណបក្សសង្រ្គោះជាតិចូលរួមការបោះឆ្នោតឆ្នាំ២០១៣កន្លងទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។