បាតុករខ្មែររាប់រយនាក់ បានដើរហែក្បួន កាន់បដា និងស្រែកប្រឆាំងការដឹកនាំរបស់លោក ហ៊ុន សែន នៅទីក្រុងតូក្យូ (Tokyo) ប្រទេសជប៉ុន នៅថ្ងៃទី១២ ខែសីហា។ ក្រុមបាតុករភាគច្រើន គឺជាយុវជន ដែលរស់នៅ និងធ្វើការ ក្នុងប្រទេសជប៉ុន ប៉ុន្តែក៏មានពលរដ្ឋខ្មែរមកពីសហរដ្ឋអាមេរិក កាណាដា និងកូរ៉េខាងត្បួងចូលរួមដែរ។ ក្រៅពីនេះ ក៏មានថ្នាក់ដឹកនាំគណបក្សសង្គ្រោះជាតិមួយចំនួនបង្ហាញវត្តមានក្នុងការទាមទារនេះដែរ។
សម្រែកទាមទារឲ្យលោក ហ៊ុន សែន ចុះចេញពីតំណែង បានលាន់ឮពេញផ្លូវក្នុងទីក្រុងតូក្យូប្រទេសជប៉ុន ជាកន្លែងដែលក្រុមបាតុករដើរហែក្បួនធ្វើបាតុកម្ម។ ការទាមទារឲ្យលោក ហ៊ុន សែន ចុះចេញពីតំណែងនេះ ព្រោះបាតុករមិនទទួលស្គាល់ថា របបក្រុងភ្នំពេញសព្វថ្ងៃដឹកនាំប្រទេសស្របច្បាប់នោះទេ។
អ្នកដឹកនាំបាតុកម្ម និងជាប្រធានចលនាយុវជនសង្គ្រោះជាតិ នៅប្រទេសជប៉ុន លោក ហៃ វណ្ណា ប្រាប់អាស៊ីសេរីថា អ្នកចូលរួមធ្វើបាតុកម្មមានជាង ៥០០នាក់។ លោកយល់ថា នេះជោគជ័យខណៈការទាមទារ ដែលធ្វើឡើងចំថ្ងៃធ្វើការ ប៉ុន្តែបែរជាអ្នកចូលរួមច្រើនបែបនេះ។ លោកបន្តថា សារសំខាន់ដែលក្រុមបាតុករចង់បង្ហាញទៅសហគមន៍ជាតិ និងអន្តរជាតិ មានបួនចំណុចសំខាន់ៗ ចំណុចអ្វីដែលសំខាន់មួយទៀតនោះ គឺក្រុមបាតុករប្រកាសថា ពួកគេនឹងអមដំណើរលោក សម រង្ស៊ី ធ្វើមាតុភូមិនិវត្តន៍ក្នុងឆ្នាំ២០១៩ នេះ៖ «យើងទាមទារឲ្យប្រទេសហត្ថលេខីទីក្រុងប៉ារីសជួយស្តារលទ្ធិប្រជាធិបតេយ្យ ដែលត្រូវបានសម្លាប់ដោយរបបក្រុងភ្នំពេញដឹកនាំដោយជនផ្តាច់ការ ហ៊ុន សែន ហ្នឹង ហើយទី២ យើងចង់ឲ្យប្រទេសហត្ថលេខីនៃសន្ធិសញ្ញាទីក្រុងប៉ារីស ជួយធ្វើសាក្សីដឹងឮអំពីការធ្វើមាតុភូមិនិវត្តន៍របស់លោក សម រង្ស៊ី និងប្រជាពលរដ្ឋខ្មែរ ហើយទី៣ គឺយើងប្រឆាំងដាច់ខាតពីអ្វី ដែលរបបលោក ហ៊ុន សែន គ្រោងធ្វើលើប្រជាពលរដ្ឋស្លូតត្រង់ ដែលគាត់ជាម្ចាស់ស្រុក ដែលគាត់គ្រាន់តែទៅប្រទេសកំណើតគាត់វិញហេតុអី លោក ហ៊ុន សែន ចង់សម្លាប់ចង់ចាប់ចងពួកគាត់។ ទី៤ យើងនៅប្រកាសថា យើងមិនដែលទទួលស្គាល់ ហើយនៅតែមិនទទួលស្គាល់របបខុសច្បាប់កើតចេញពីការបោះឆ្នោតក្លែងក្លាយ»។
បាតុកម្មនេះចែកចេញជាពីរវគ្គ។ វគ្គទី១ ចាប់ផ្តើមពីម៉ោង១០ ព្រឹកដល់ម៉ោង ១២ ថ្ងៃត្រង់ ជាការធ្វើវេទិកាសាធារណៈ ដែលមានអនុប្រធានគណបក្សសង្រ្គោះជាតិ អ្នកស្រី មូរ សុខហួរ ឡើងថ្លែងសារ។ បន្ទាប់មក នៅវគ្គទី២ ក្រុមបាតុករដើរហែក្បួន ចាប់ពីម៉ោង ២ ដល់ម៉ោង ៣រសៀល។ ក្នុងពេលធ្វើវេទិកាសាធារណៈស្តីពីការស្ដារលទ្ធិប្រជាធិបតេយ្យនៅកម្ពុជា អនុប្រធានគណបក្សសង្រ្គោះជាតិ អ្នកស្រី មូរ សុខហួរ លើកឡើងថា ខ្មែរនៅក្រៅប្រទេសដែលមានសិទ្ធិសេរីភាពពេញលេញ ត្រូវតែយកសិទ្ធិនេះធ្វើជាឧបករណ៍ស្របច្បាប់ ដើម្បីទាមទារឲ្យមានការដោះលែងលោក កឹម សុខា និងទាមទារយកគណបក្សសង្គ្រោះជាតិមកវិញ។ អ្នកស្រី ចាត់ទុកការចោទប្រកាន់ពីតុលាការកម្ពុជា ដែលបានរំលាយគណបក្សសង្រ្គោះជាតិ និងធ្វើការចោទប្រកាន់នានា ទាក់ទងថ្នាក់ដឹកនាំ និងមន្ត្រីគណបក្សនេះ គឺគ្មានមូលដ្ឋានច្បាប់ត្រឹមត្រូវទេដែលជាការធ្វើតាមការចង់បានរបស់លោក ហ៊ុន សែន ប៉ុណ្ណោះ៖ «តុលាការតេឡេហ្នឹង តុលាការជឹបអូចៗ ហ្នឹងមែនទេ ? មានសិទ្ធិអំណាចអីតុលាការបែបហ្នឹង មែនទេបងប្អូន ?» ។
បាតុករម្នាក់ លោក សេង ការី ដែលបានចំណាយពេលជាង ១៦ម៉ោងធ្វើដំណើរពីព្រំដែនប្រទេសជប៉ុនមកចូលរួមធ្វើបាតុកម្មនេះ ប្រាប់អាស៊ីសេរីថា អ្វីដែលលោកលះបង់ គឺចង់ឃើញប្រទេសជប៉ុន និងប្រទេសសេរីផ្សេងទៀតជំរុញទៅរបបក្រុងភ្នំពេញឲ្យងាកមកស្តារប្រជាធិបតេយ្យនិងសិទ្ធិមនុស្សឡើងវិញ។ បាតុកររូបនេះផ្ញើសារទៅរបបក្រុងភ្នំពេញថា ការក្រោកឡើងរបស់ក្រុមយុវជនពេលនេះ ជាការបង្ហាញថា នេះគឺជាការទាមទារផ្លាស់ប្តូរមេដឹកនាំផ្តាច់ការខុសច្បាប់ចេញពីកម្ពុជា៖ «កូនខ្មែរពិតជាមានការសាមគ្គីគ្នាមែន ហើយកូនខ្មែរពិតជាចង់ផ្លាស់ប្តូរមេដឹកនាំ ដែលគាត់មិនបានគោរពស្រលាញ់ពលរដ្ឋខ្មែរហើយគាត់មិនបានយកបេះដូងខ្លួនមកបម្រើជាតិពិតប្រាកដទេ គាត់ធ្វើការរាល់ថ្ងៃនេះគាត់បម្រើតែផលប្រយោជន៍ឲ្យបរទេស ជាពិសេស គឺវៀតណាម និងចិនតែម្តង » ។
បាតុករម្នាក់ទៀត អ្នកនាង សៀ ណៃគួយ បង្ហាញចិត្តរីករាយនៅពេលឃើញមានបាតុករចូលរួមច្រើនដូចនេះ។ យុវជនខ្មែរនៅក្រៅស្រុករូបនេះស្នើទៅពលរដ្ឋខ្មែរក្នុងប្រទេសឲ្យត្រៀមខ្លួនទទួល លោក សម រង្ស៊ី និងពួកគេទាំងអស់គ្នាដែលអមដំណើរ លោក សម រង្ស៊ី និងថ្នាក់ដឹកនាំគណបក្សសង្គ្រោះជាតិផ្សេងទៀត ដែលនឹងវិលទៅកម្ពុជាវិញក្នុងឆ្នាំ២០១៩ នេះ៖ «ក្នុងអារម្មណ៍ខ្ញុំ គឺសប្បាយចិត្តក្នុងថ្ងៃនេះណាស់ ព្រោះចង់ឃើញការរួបរួមហើយដែលបានឃើញប្រជាជនយើងមកចូលរួមច្រើន។ សូមផ្តាំទៅរបបក្រុងភ្នំពេញថា ទោះពួកយើងមានកំលាំងនៅស្តួចស្តើងក៏ពិតមែនប៉ុន្តែកំលាំងរបស់ពួកខ្ញុំសន្សំគ្នាធ្វើជារឿយៗ អ៊ីចឹងហើយបើទោះជារបបអ្នកខ្លាំងប៉ុណ្ណា ក៏ដោយក៏ថ្ងៃណាមួយក៏គង់រលំរលាយទេ ខ្ញុំជឿជាក់អ៊ីចឹងហើយពួកខ្ញុំនឹងខំតស៊ូព្យាយាមរហួតដល់តែដួលបាន»។
ការធ្វើបាតុកម្មរបស់ក្រុមអ្នកគាំទ្រគណបក្សសង្រ្គោះជាតិបែបនេះ ក្នុងពេលសហភាពអឺរ៉ុបកំពុងអនុវត្តនីតិវិធីព្យួរប្រព័ន្ធអនុគ្រោះពន្ធEBA ពួកគេយល់ថា បើរបបក្រុងភ្នំពេញព្រមធ្វើតាមការទាមទាររបស់បាតុករគឺនឹងអាចបញ្ចៀសការកាត់ផ្តាច់ប្រព័ន្ធអនុគ្រោះពន្ធ EBA របស់សហភាពអឺរ៉ុប។
មេដឹកនាំបាតុកម្មលោក ហៃ វណ្ណា ថា ជំហានបន្ទាប់ក្រោយពេលធ្វើបាតុកម្មនេះ លោកនឹងផ្ញើញត្តិតាមប្រៃសណីយ៍ ទៅរដ្ឋាភិបាលប្រទេសជប៉ុន និងបណ្តាស្ថានទូតនៃប្រទេសជាហត្ថលេខី នៃកិច្ចព្រមព្រៀងសន្តិភាពទីក្រុងប៉ារីស ២៣តុលា ពីអ្វីដែលក្រុមបាតុករស្នើសុំ ដើម្បីឲ្យពួកគេដឹងឮ និងជួយធ្វើអន្តរាគមន៍ស្តារសិទ្ធិមនុស្ស និងលទ្ធិប្រជាធិបតេយ្យនៅម្ពុជាឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។