អ្នកវិភាគលើកឡើងថា លោក គង់ គាំ ឧត្តមទីប្រឹក្សាគណបក្សភ្លើងទៀន ហាក់គ្មានជម្រើសអ្វីផ្សេងក្រៅពីត្រូវប្រគល់ដីធ្លី និងផ្ទះសម្បែងជូនរដ្ឋវិញ ទៅតាមការគំរាមកំហែងរបស់លោកនាយករដ្ឋមន្រ្តី ហ៊ុន សែន ឡើយ ដើម្បីជៀសវាងជាប់ពន្ធនាគារ។
អ្នកវិភាគលើកឡើងបែបនេះ នៅក្រោយពេលលោក គង់ គាំ បានប្រកាសថា លោកបានប្រគល់ដី និងផ្ទះ ដែលមានតម្លៃរាប់លានដុល្លារនោះ ជូនក្រសួងការបរទេសវិញហើយ ទោះបីជាលោក មានប្លង់កម្មសិទ្ធិក៏ដោយ។
អ្នកវិភាគលើកឡើងថា លោក គង់ គាំ សុខចិត្តបាត់បង់ផ្ទះ ដីធ្លី ជាថ្នូរនឹងសេរីភាព និងសន្តិសុខ។
លោក គឹម សុខ ឲ្យដឹង កាលពីយប់ថ្ងៃទី១២ មករាថា លោក គង់ គាំ តុលាការ ត្រូវបានរដ្ឋាភិបាលប្រើប្រាស់ជាអាវុធ ផ្ដាច់មុខសម្រាប់បម្រើនយោបាយរបស់ខ្លួន។
លោក គឹម សុខ៖«មិនត្រឹមតែជារងទ្រព្យសម្បត្តិទេ បើសិនជាលោក គង់ គាំ នៅតែមានៈ លោកអាចប្រឈមនឹងសន្តិសុខ គុក ច្រវាក់ ឬអាយុជីវិតរបស់លោកថែមទៀតផង»។
លោក គង់ គាំ និងភរិយា បានផ្ដិតមេដៃលើខិតប្រគល់ដី និងផ្ទះនេះ ផ្ញើទៅអង្គភាពប្រឆាំងអំពើពុករលួយ កាលពីថ្ងៃទី១២ មករា។ លិខិត នេះ ធ្វើឡើងតែប៉ុន្មានម៉ោង បន្ទាប់ពីលោក ហ៊ុន សែន បានបញ្ជាទៅអង្គភាពប្រឆាំងអំពើពុករលួយ ស្រាវជ្រាវជាបន្ទាន់ អំពី ករណីផ្ទះ និងដីធ្លីរបស់លោក គង់ គាំ នេះ។ លោក ហ៊ុន សែន បានចោទថា លោក គង់ គាំ បានលួចបន្លំធ្វើប័ណ្ណកម្មសិទ្ធិដីធ្លី ផ្ទះសម្បែងទៅវិញ។
លិខិតរបស់លោក គង់ គាំ សរសេរថា លោកមិនបានដឹងអស់អំពីបែបបទនៃការសុំកាន់កាប់ផ្ទះ និងដី នៅសង្កាត់ទន្លេបាសាក់ ខណ្ឌចំការមន។ លោកបញ្ជាក់ថា ដើម្បីកុំឲ្យអង្គភាពប្រឆាំងអំពើពុករលួយ ខាតពេលវាស្រាវជ្រាវ ហើយដើម្បីបញ្ចប់ករណីនេះលោកនឹងភរិយា សូមប្រគល់ផ្ទះ និងដីលេខ៧១ ជូនរដ្ឋវិញ។ លោក គង់ គំា អរគុណ អង្គភាពប្រឆាំងអំពើពុករលួយ និង លោក ហ៊ុន សែន ដែលបានអនុគ្រោះជូនលោក។
លោកនាយករដ្ឋមន្ត្រី ហ៊ុន សែន បានបញ្ជាក់ថា លោក គង់ គាំ ប្រគល់ដីជូនរដ្ឋវិញនេះ នៅបន្ទាប់ពីលោក គង់ គាំ បានជួបមន្ត្រីអង្គភាពប្រឆាំងអំពើពុករលួយ កាលពីថ្ងៃទី១២ មករា ប្រមាណ ៣ម៉ោងកន្លះ។ ក្រោយពីលោក គង់ គាំប្រកាសប្រគល់ដីជូនរដ្ឋវិញនេះ លោក ហ៊ុន សែន សរសេរនៅលើហ្វេសប៊ុករបស់លោកភ្លាមៗ ថា លោកនឹងឈប់ប្ដឹងលោក គង់ គាំ ទៀត ។
នៅមុនពេលគង់ គាំ សម្រេចចិត្តលិខិតប្រគល់ជូនក្រសួងការបរទេស ឬរដ្ឋវិញនេះ លោក និងកូនប្រុសរបស់លោក គឺលោក គង់ មុនីកា បានសរសេរលិខិតដាច់ដោយឡែកពីគ្នាស្នើសុំជួបលោក ហ៊ុន សែនដែរ។ លិខិតរបស់លោក គង់ គាំ នោះ គឺចង់និយាយជាមួយលោក ហ៊ុន សែន អំពី ដី ផ្ទះរបស់លោក និង រឿងគណបក្សប្រជាជនកម្ពុជា ខែត្រត្បូងឃ្មុំប្ដឹងលោក ពីបទ ញុះញង់បង្កឱ្យមានភាពវឹកវរចលាចលអសន្តិសុខសង្គម និងទាមទារជំងឺចិត្តចំនួន ៥០ម៉ឺនដុល្លារ។ ដោយឡែកលោក គង់ គាំ ក៏ប្រឈមនឹងពាក្យបណ្ដឹងពីក្រសួងការបរទេសមួយទៀត ឲ្យប្រគល់ដី និងផ្ទះឲ្យក្រសួងនេះវិញ ដោយថែមទាំងទារជំងឺចិត្តចំនួន ១លានដុល្លារថែមទៀតផង។ នៅមុនពេលលោក គង់ គាំ ប្រគល់ដី និងផ្ទះជូនរដ្ឋវិញនេះ លោក គង់ គាំ ត្រូវបង់ជំងឺចិត្ត ១លាន ៥សែនដុល្លារ ដែលត្រូវបង់ទៅក្រសួងការបរទេស និងគណបក្សប្រជាជនកម្ពុជា។
វិទ្យុអាស៊ីសេរីមិនអាចទាក់ទងលោក គង់ គាំ ដើម្បីសុំសួរអំពីបញ្ហានេះបន្ថែមបានទេ កាលពីថ្ងៃទី១២ មករា។
ទោះបីជាណាក្ដី លោក គង់ គាំ បានប្រាប់វិទ្យុអាស៊ីសេរី កាលពីថ្ងៃទី១១ មករាថា ដី និងផ្ទះនេះ លោកបានទៅស្នាក់នៅតាំងពីឆ្នាំ១៩៨២ ហើយក្រសួងការបរទេសបានចេញបង្កាន់ដៃឲ្យលោកត្រឹមត្រូវ។ រហូតមកដល់ឆ្នាំ២០១៥ ខាងសុរិយោដី បានចុះទៅធ្វើប្លង់កម្មសិទ្ធិកាន់កាប់ដីធ្លីនេះ ជូនលោកថែមទៀតផង។ លោកមិនបានលួចបន្លំធ្វើលិខិតកាន់កាប់នេះឡើយ។ ទោះជាយ៉ាងណាក្ដី តាមច្បាប់ភូមិបាលបានចែងថា អ្នកណាហើយរស់នៅលើដីរដ្ឋ ចាប់ពី ៥ឆ្នាំឡើងទៅ ដោយគ្មានជំទាស់ពីភាគីណាមួយនោះ គឺដីធ្លី ឬអចលនទ្រព្យបានក្លាយជាទ្រព្យច្បាប់របស់បុគ្គលនោះ។ លោកថា លោកសុខចិត្តលះបង់ទ្រព្យសម្បត្តិ ដើម្បីលទ្ធិប្រជាធិបតេយ្យ។
ទាក់ទងនឹងបញ្ហា ដើមចមដែលធ្វើឲ្យលោក គង់ គាំ បាត់បង់ដីធ្លីផ្ទះសម្ដែង ទោះជាលោកមានប្លង់កាន់កាប់រឹងមាំទៅហើយក្ដីនេះ គឺមកពីលោក ហ៊ុន សែន ខឹងសម្បារ និងលោក គង់ គាំ រឿងលោក គង់ គាំ និយាយរិះគន់គណបក្សប្រជាជនកម្ពុជា កាលពីថ្ងៃទី១២ មករា នាឱកាសជួបអ្នកគាំទ្រគណបក្សភ្លើងទៀនថា គណបក្សប្រជាជនកម្ពុជាមានកំណើតមកពីខាងកើត គឺសំដៅដល់ប្រទេសវៀតណាម។ ក្រោយពីឮដូច្នេះ លោក ហ៊ុន សែន ប្រតិកម្មភ្លាមៗ ហើយលោកបានសើរើរឿងផ្ទះសម្ដែងរបស់លោក គង់ គាំ នេះ។ លោកបានព្រមានឲ្យលោក គង់ គាំ ត្រូវប្រគល់ដីផ្ទះនេះជូនរដ្ឋវិញ ក្នុងរយៈពេល ១ខែជាកំហិត គិតចាប់ពី "ថ្ងៃទី១១ ខែមករា" តទៅ។
លោក ហ៊ុន សែន៖«ខ្ញុំសុំដាស់តឿន ដាស់តឿន(គង់ គាំ)ជាការព្រមានបន្ថែម ហ្អែង សាកមើលៗ។ ខ្ញុំហ៊ានវាយខ្នោះជនក្បត់ជាតិម៉ោង ១២យប់ ហ្អែងចាំមើល?អ្នកឯងចង់និយាយអីនិយាយទៅៗ កុំតែប៉ះពាល់ដល់គណបក្សប្រជាជនកម្ពុជា។ អ្នកឯងដឹងថា គេឈឺទេ?»។
ឆ្លើយតបនឹងបញ្ហានេះ អ្នកវិភាគនយោបាយលោក គឹម សុខ បញ្ជាក់ថា រឿងលោក ហ៊ុន សែន ទាមទារផ្ទះលោក គង់ គាំ នេះ មិនមែនជារឿង ដើម្បីផលប្រយោជន៍ជាតិអ្វីទេ គឺសំខាន់លោក គង់ គាំ និយាយប៉ះពាល់ដល់គណបក្សកាន់អំណាច ដែលលោក ហ៊ុន សែន ចង់បិទបាំងអំពីប្រវត្តិពិតរបស់លោក និងគណបក្សប្រជាជនកម្ពុជា។ លោក គឹម សុខ បន្ថែមថា ប្រសិនបើលោក ហ៊ុន សែន ចង់រឹបអូសផ្ទះសម្បែង ដីធ្លីរបស់លោក គង់ គាំ ដាក់ជាទ្រព្យសម្បត្តិរបស់រដ្ឋវិញនោះ គឺលោក ហ៊ុន សែន ខ្លួនឯង និងមន្ត្រីក្នុងគណបក្សប្រជាជនកម្ពុជាច្រើនទៀត ត្រូវប្រគល់ផ្ទះ ដែលពួកគេរស់នៅសព្វថ្ងៃនេះ ជូនរដ្ឋវិញដែរ។
លោក គង់ គាំ អតីតជាមន្ត្រីជាន់ខ្ពស់គណបក្សប្រជាជនកម្ពុជា និងជាអតីតអនុរដ្ឋមន្ត្រីការបរទេសរបស់លោក ហ៊ុន សែន។ ក្រោយមក លោកបានចាកចេញពីគណបក្សប្រជាជនកម្ពុជា។ លោក គង់ គំា អះអាងថា មូលហេតុ ដែលលោកចាកចេញពីគណបក្សប្រជាជនកម្ពុជានោះ ដោយសារតែលោកស្រឡាញ់ ប្រជាធិបតេយ្យ។ លោកបានមកធ្វើនយោបាយនៅគណបក្សប្រឆាំងជាមួយលោក សម រង្ស៊ី។ លោកធ្លាប់ជាអនុប្រធានគណបក្ស សម រង្ស៊ី ដែលបច្ចុប្បន្ន ប្ដូរឈ្មោះមកជាគណបក្សភ្លើងទៀន៕
កំណត់ចំណាំ ចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។