មេធាវីសម្រេចប្ដឹងសាទុក្ខទៅតុលាការកំពូលស្នើសុំឱ្យអនុប្រធានគណបក្សភ្លើងទៀន លោក ថាច់ សេដ្ឋា នៅក្រៅឃុំបណ្ដោះអាសន្ន។ ចំណែកអ្នកវិភាគនយោបាយមិនរំពឹងថា តុលាការអនុញ្ញាតឱ្យមេដឹកនាំគណបក្សភ្លើងទៀនរូបនេះអាចនៅក្រៅឃុំបានឡើយ។
មេធាវីរំពឹងថា បើតុលាការកំពូលសម្រេចក្ដីដោយសុភវិនិច្ឆ័យនឹងអនុញ្ញាតអនុប្រធានគណបក្សភ្លើងទៀន លោក ថាច់ សេដ្ឋា អាចនៅក្រៅឃុំបណ្ដោះអាសន្នតាមសំណើ។ ការរំពឹងនេះ ក្រោយពេលសាលាដំបូង និងសាលាឧទ្ធរណ៍រាជធានីភ្នំពេញសម្រេចបន្តឃុំខ្លួនលោក ថាច់ សេដ្ឋា ឱ្យជាប់ពន្ធនាគារដដែល។
មេធាវីការពារក្ដីលោក ថាច់ សេដ្ឋា ម្នាក់គឺលោកមេធាវី សឺន ជុំជួន ឱ្យវិទ្យុអាស៊ីសេរីដឹងនៅថ្ងៃទី៥ ខែមេសា ថា ក្រុមមេធាវីបានដាក់ប្ដឹងសាទុក្ខទៅតុលាការកំពូលរួចហើយ ក្រោយពីបានទៅជួបកូនក្ដីរបស់ខ្លួននៅពន្ធនាគារកាលពីដើមសប្ដាហ៍នេះ។ លោកមេធាវីរិះគន់ថា ការសម្រេចរបស់សភាស៊ើបសួរសាលាឧទ្ធរណ៍កន្លងមក គឺមិនសមហេតុផលទេ ព្រោះកូនក្ដីរបស់លោកមានប្រាក់តម្កល់ចំនួន ៣ម៉ឺនដុល្លារដាក់នៅតុលាការ និងមានសំបុត្របញ្ជាក់ពីបញ្ហាសុខភាពលោក ថាច់ សេដ្ឋា ផងដែរ តែសាលាឧទ្ធរណ៍នៅតែមិនអនុញ្ញាតឱ្យកូនក្ដីរបស់លោកអាចនៅក្រៅឃុំ។
មេធាវី សឺន ជុំជួន៖«ខ្ញុំសង្ឃឹមថា នឹងផ្ដល់យុត្តិធម៌ដល់កូនក្ដីខ្ញុំព្រោះដូចលើកឡើងហើយថា នេះជារឿងបុគ្គលអ៊ីចឹងមានយើងមានប្រាក់តម្កល់យើងមានឯកសារភស្តុតាងបញ្ជាក់ពីបញ្ហាសុខភាពរបស់គាត់(លោក ថាច់ សេដ្ឋា)ហើយសង្ឃឹមថា តុលាការកំពូលនឹងពិចារណាទៅលើភស្តុតាងទាំងអស់នេះ ហើយដោះលែងឱ្យគាត់នៅក្រៅឃុំជាបណ្ដោះអាសន្ន»។
លោក ថាច់ សេដ្ឋា ជាអ្នកនយោបាយមានកំណើតខ្មែរក្រោមដ៏លេចធ្លោម្នាក់ក្នុងចំណោមក្បាលម៉ាស៊ីនគណបក្សភ្លើងទៀន។ សមត្ថកិច្ចបានចាប់ខ្លួន លោកកាលពីនៅថ្ងៃទី១៦ មករា និងចោទប្រកាន់ពីបទមិនបំពេញកាតព្វកិច្ចចំពោះឧបករណ៍អាចជួញដូរបាន ឬចេញសែកអត់លុយ។ គិតដល់ពេលនេះលោក ថាច់ សេដ្ឋា បានឃុំនៅនៅពន្ធនាគារព្រៃស (ម១) អស់រយៈពេល ៧៩ថ្ងៃមកហើយ។ លោក ថាច់ សេដ្ឋា ដែលមានអាយុ ៦៩ឆ្នាំ កំពុងមានជំងឺប្រចាំកាយមួយចំនួន ដូចជា ជំងឺបេះដូង ជំងឺលើសឈាម និងជំងឺទឹកនោមផ្អែមជាដើម។ លោកជាមេដឹកនាំម្នាក់ក្នុងចំណោមមេដឹកនាំគណបក្សភ្លើងទៀន ៤រូប ដែលត្រូវបានសមត្ថកិច្ចរបស់រដ្ឋាភិបាលចាប់ខ្លួន មុនការបោះឆ្នោតជាតិថ្ងៃទី២៣ ខែកក្កដាខាងមុខ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ថ្លែងការពារចំណាត់របស់តុលាការថា ការតម្កល់ប្រាក់របស់លោក ថាច់ សេដ្ឋា នៅតុលាការពេលនេះ គ្មានតម្លៃទៀតឡើយ។ លោកចោទប្រកាន់ថា លោក ថាច់ សេដ្ឋា មានគំនិតទុច្ចរិតដោយជំពាក់ប្រាក់គេ តែមិនចង់សងប្រាក់ម្ចាស់បំណុល ហើយថា នៅពេលករណីនេះចូលដល់ដៃតុលាការរួចហើយ បញ្ហានេះបានក្លាយទៅជាបទល្មើសដែលមិនអាចប្រាក់ជំពាក់នោះមកដោះស្រាយបានទៀតឡើយ។
លោក សុខ ឥសាន៖«បើគាត់(លោក ថាច់ សេដ្ឋា)មានគំនិតល្អគាត់ម៉េចមិនសងគេ ហើយដល់គេចាប់ចេញសែកស្អុយដល់ពេលមានពិរុទ្ធភាពដល់គេចាប់ទៅតុលាការថា សងលុយវិញម៉េចកើត?»។
បើទោះជាមន្ត្រីបក្សកាន់អំណាចអះអាងពីឯករាជ្យរបស់តុលាការក្ដី តែអ្នកវិភាគនយោបាយ នៅតែសង្កេតឃើញថា ការសម្រេចក្ដីរបស់តុលាការកម្ពុជាស្ថិតក្រោមខ្សែញាក់របស់លោកនាយករដ្ឋមន្ត្រី ហ៊ុន សែន។
អ្នកវិភាគនយោបាយលោក គឹម សុខ យល់ថា តុលាការកំពូលទំនងមិនអនុញ្ញាតឱ្យលោក ថាច់ សេដ្ឋា នៅក្រៅឃុំឡើយ ព្រោះលោកយល់ថា ការសម្រេចតុលាការគ្រប់ជាន់ថ្នាក់សព្វថ្ងៃស្ថិតក្រោមការបញ្ជារបស់លោក ហ៊ុន សែន។ លោក គឹម សុខ បន្តទៀតថា ពេលនេះស្ថានភាពនយោបាយស្ថិតក្នុងដំណាក់កាលនៃការផ្ទេរអំណាចរបស់លោក ហ៊ុន សែន ទៅកូនរបស់ខ្លួន។ ដូច្នេះ លោក ហ៊ុន សែន ហ៊ានធ្វើគ្រប់រូបភាព ដើម្បីបំបិទសំឡេងអ្នកនយោបាយ ដែលប្រឆាំងនឹងរូបលោក។
លោក គឹម សុខ៖«លោក ហ៊ុន សែន បារម្ភថា ប៉ះពាល់ធ្ងន់ធ្ងរដល់ផែនការផ្ទេរអំណាចពីគាត់ទៅកូនប្រុសរបស់គាត់(លោក ហ៊ុន ម៉ាណែត)ដូច្នេះហើយមិនថា តែលោក ថាច់ សេដ្ឋា ទេ អ្នកណាក៏ដោយ យើងឃើញហើយរឹតត្បិតលោក សុន ឆ័យ ហើយអ្នកផ្សេងៗ ទៀតមិនឱ្យមានសកម្មភាពផុលផុសនោះទេ ក្នុងការដឹកនាំគណបក្សនយោបាយតទល់ នឹងគណបក្សប្រជាជនកម្ពុជា»។
លោក គឹម សុខ លើកឡើងទៀតថា បើទោះជាលោក ហ៊ុន សែន អាចប្រើប្រព័ន្ធតុលាការធ្វើទុក្ខទោសលើដៃគូប្រកួតប្រជែងនយោបាយរបស់ខ្លួនបានតាមចិត្តក្ដី ប៉ុន្តែ រដ្ឋាភិបាលក៏អាចប្រឈមការរិះគន់ក្រុមប្រទេសលោកសេរី និងការមិនពេញចិត្តរបស់ពលរដ្ឋ គ្រាន់តែពួកគាត់មិនហ៊ានចេញមកតវ៉ាប៉ុណ្ណោះ។ នៅពេលនេះសហភាពអឺរ៉ុបកំពុងតាមដានអំពីស្ថានការណ៍វិវត្តចុងក្រោយនៅកម្ពុជា។ សហភាពអឺរ៉ុបព្រមានថា នឹងដកប្រព័ន្ធអនុគ្រោះពន្ធ ឬ EBA បន្ថែមទៀតពីកម្ពុជា បើការបោះឆ្នោតខាងមុខប្រព្រឹត្តទៅមិនស្របតាមស្តង់ដារអន្តរជាតិ និងនៅតែមានការរំលោភសិទ្ធិមនុស្សតទៅទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។