មេធាវីការពារក្ដីកញ្ញា សេង ធារី គឺលោក ជូង ជូងី គ្រោងដាក់លិខិតទៅសាលាឧទ្ធរណ៍ដើម្បីស្នើសុំឱ្យដោះលែងកញ្ញា សេង ធារី ឱ្យមានសេរីភាពវិញក្នុងពេលឆាប់ៗ។ លោកថា កញ្ញា សេង ធារី មានសិទ្ធិក្នុងការរស់នៅក្រៅឃុំ ព្រោះតុលាការមិនទាន់ចេញសេចក្ដីសម្រេចថា កញ្ញា សេង ធារី មានទោសនៅឡើយទេ។
មេធាវីការពារក្ដី កញ្ញា សេង ធារី គឺលោក ជូង ជូងី ប្រាប់អាស៊ីសេរីនៅថ្ងៃទី៣១ខែកក្កដាថា ការឃុំខ្លួនកញ្ញា សេង ធារី គឺខុសពីនីតិវិធីក្នុងការអនុវត្តច្បាប់ ព្រោះសេចក្ដីសម្រេចរបស់សាលាដំបូងរាជធានីភ្នំពេញមិនមែនជាសេចក្ដីសម្រេចស្ថាពរនៅឡើយទេ ហើយលោកកំពុងរៀបចំឯកសារដាក់ទៅសាលាឧទ្ធរណ៍ភ្នំពេញ ដើម្បីឱ្យដោះលែង កញ្ញា សេង ធារី ឱ្យមានសេរីភាពវិញ។ លោកយល់ថា កូនក្ដីរបស់លោកជាមនុស្សស្អាតស្អំហើយការងាររបស់កញ្ញា សេង ធារី បានធ្វើកន្លងមក គ្រាន់តែជាសកម្មភាពបញ្ចេញមតិ តវ៉ាដើម្បីលើកកម្ពស់ប្រជាធិបតេយ្យក្នុងប្រទេសកម្ពុជាតែប៉ុណ្ណោះ។
បើទោះបីជាកញ្ញា សេង ធារី មានសញ្ជាតិអាមេរិកក្ដី លោក ជូង ជូងី អះអាងថា កញ្ញា សេង ធារី នឹងនៅតតាំងក្ដីក្នុងប្រព័ន្ធតុលាការ ដូចកញ្ញាធ្លាប់បានធ្វើកន្លងមក៖ «មេធាវីបានប្ដឹងឧទ្ធរណ៍ហើយដែរ ដូច្នេះតុលាការអត់មានសេចក្ដីសម្រេចជាសំអាងដើម្បីយកទៅអនុវត្ត ចាប់គាត់ដាក់ពន្ធនាគារទេ អញ្ចឹងការដែលចាប់គាត់ដាក់ពន្ធនាគារហ្នឹងគឺអត់មានសំអាង បើសំអាងលើសាលក្រម គឺសាលក្រមអត់ទាន់ស្ថាពរផងទាល់តែចាំសាលក្រមស្ថាពរទើបអាច អនុវត្តសេចក្ដីសម្រេចនៅក្នុងសាលក្រមហ្នឹង » ។
ទាក់ទងនឹងបញ្ហានេះ ប្រធានសាលាដំបូងរាជធានីភ្នំពេញ លោក តាំង ស៊ុនឡាយ ប្រាប់វិទ្យុអាស៊ីសេរីថា លោកមិនមានអ្វីត្រូវបកស្រាយបន្ថែមនោះទេ ព្រោះការឃុំខ្លួន កញ្ញា សេង ធារី គឺសំអាងទៅលើសេចក្ដីសម្រេចរបស់សាលាដំបូងរាជធានីភ្នំពេញ៖ «បាទគាត់យល់អញ្ចឹង តែខាងចៅក្រមគាត់ធ្វើតាមនីតិវិធី គេអាចចាប់ អាចឃុំបានអញ្ចឹង គាត់បានសំអាងហេតុក្នុងសាលក្រម ហើយបើគាត់អត់ព្រមគាត់ប្ដឹងឧទ្ធរណ៍ទៅ ខ្ញុំអត់មានយោបល់លើសពីហ្នឹងកើតទេ » ។
ជុំវិញរឿងនេះ មន្ត្រីនៃសមាគមការពារសិទ្ធិមនុស្សអាដហុក លោក យី សុខសាន្ត យល់ថា តុលាការគួរដោះលែង កញ្ញា សេង ធារី ឱ្យមានសេរីភាពឡើងវិញដូចករណីតុលាការដោះលែងសកម្មជនបរិស្ថាន សកម្មជនសិទ្ធិមនុស្សកន្លងមក ដើម្បីលើកកម្ពស់សេរីភាពបញ្ចេញមតិ និងកិត្តយសរបស់រដ្ឋាភិបាល។ លោកបន្ថែមថា កញ្ញា សេង ធារី គឺជាបុគ្គលគំរូ ដែលមានភាពក្លាហានតស៊ូមតិ បង្ហាញចំណុចខុសឆ្គងរបស់រដ្ឋាភិបាល ហើយក្លាហានតតាំងក្ដីជាមួយតុលាការកម្ពុជា និងមិនចាកចេញទៅអាមេរិកឡើយ៖ «កញ្ញា សេង ធារី គាត់គោរពទៅតាមគោលការណ៍តុលាការហ្នឹងហើយបានគាត់មិនទៅណានោះ ហើយក្នុងនាមគាត់ជាអនីតិជនអាមេរិកផង គាត់មានសិទ្ធិក្នុងការចេញក្រៅបាន ប៉ុន្តែគាត់មិនចេញទេដោយសារគាត់យល់ថាគាត់មិនមានទោសទេ ដូច្នេះខ្ញុំយល់ថាគួរតែដោះលែងឱ្យគាត់នៅក្រៅឃុំតាមការស្នើសុំរបស់មេធាវី»។
អ្នកជំនាញច្បាប់ និងវិទ្យាសាស្ត្រនយោបាយអន្តរជាតិ កញ្ញា សេង ធារី ត្រូវបានសាលាដំបូងរាជធានីភ្នំពេញ កាត់ទោសឱ្យជាប់ពន្ធនាគារ ៦ឆ្នាំ កាលពីថ្ងៃទី១៤ មិថុនា ពីបទចោទ រួមគំនិតក្បត់ ក្នុងសំណុំរឿងវិលចូលស្រុករបស់ប្រធានស្ដីទីគណបក្សសង្គ្រោះជាតិ លោក សម រង្សី កាលពីឆ្នាំ២០១៩។ មុនការឃាត់ខ្លួន កញ្ញា សេង ធារី បានតតាំងជាមួយតុលាការជាច្រើនខែ ហើយកញ្ញាបានចាត់ទុកតុលាការកម្ពុជាជា តុលាការសម្ដែងល្ខោនរៀបចំដោយអ្នកនយោបាយ។
អង្គការសង្គមស៊ីវិលជាតិ និងអន្តជាតិ ព្រមទាំងសហរដ្ឋអាមេរិក ចាត់ទុកការផ្ដន្ទាទោសកញ្ញា សេង ធារី ថា ជារឿងនយោបាយ និងស្នើឱ្យតុលាការដោះលែងកញ្ញា ឱ្យមានសេរីភាពឡើងវិញ ដោយឥតលក្ខខណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។