អង្គការសិទ្ធិមនុស្សលីកាដូ(Licado) កត់សម្គាល់ថា សកម្មជននយោបាយ និងសកម្មជនសង្គមដែលត្រូវជាប់គុកចំនួនពីរដងឡើងទៅដោយសារការអនុវត្តសិទ្ធិសេរីភាពជាមូលដ្ឋានរបស់ពួកគេបានកើនឡើង ប៉ុន្តែពួកគេនៅតែមិនចុះញ៉ម ឬបោះបង់ភាពសកម្មនោះទេ។ ចំណែកគ្រួសារជនជាប់ឃុំនៅតែចាត់ទុកករណីចាប់ខ្លួនទាំងនោះថាជាការធ្វើទុក្ខបុកម្នេញនយោបាយ ហើយទាមទារឱ្យរដ្ឋាភិបាលបើកលំហសេរីភាពពលរដ្ឋ និងនយោបាយ ជាពិសេសដោះលែងអ្នកទោសមនសិការទាំងអស់ឱ្យមានសេរីភាពដោយឥតលក្ខខណ្ឌ។
អង្គការសិទ្ធិមនុស្សលីកាដូនៅថ្ងៃទី២៤ ខែមិថុនា បានចុះផ្សាយអត្ថបទមួយក្រោមចំណងជើងថាសកម្មជនមិនរាងចាល។ ក្នុងអត្ថបទនោះកត់សម្គាល់ថា ចរន្តនៃការចាប់ខ្លួននៅឆ្នាំនេះបានធ្វើឱ្យសកម្មជនជាច្រើននាក់ដែលពីមុនធ្លាប់ជាប់ពន្ធនាគារម្តងរួចមកហើយ ត្រូវជាប់នៅក្នុងពន្ធនាគារដែលមានស្ថានភាពមិនល្អខ្លាំងម្តងទៀត ក្រោយពេលអ្នកទាំងនោះនៅតែបន្តភាពសកម្មរបស់ពួកគេ។
អង្គការរសិទ្ធិមនុស្សនេះក៏បានរំលឹកអំពីស្ថានភាពរស់នៅក្នុងពន្ធនាគារ ដូចជាកង្វះអាហារហូបចុក កង្វះទឹកស្អាត ទឹកមានតម្លៃថ្លៃ ការរឹតត្បិតការជួបអ្នកខាងក្រៅ និងកម្តៅក្តៅខ្លាំងនៅក្នុងបន្ទប់ជាដើម។ ចំណែកអត្រាផ្ទុកអ្នកជាប់ឃុំនៅក្នុងពន្ធនាគារគឺកើនឡើងលើស២០០ភាគរយ នៃសមត្ថភាពផ្ទុករបស់ពន្ធនាគារ ហើយពន្ធនាគារមួយចំនួន ផ្ទុកអ្នកទោសរហូតដល់ទៅ៥០០ភាគរយ នៃសមត្ថភាពផ្ទុករបស់ខ្លួន។
ប្រភពដដែលមើលឃើញថាទោះជាពន្ធនាគារជាកន្លែងដែលមានស្ថានភាពមិនល្អខ្លាំងក៏ដោយ ក៏សកម្មជននយោបាយ និងអ្នកការពារសិទិ្ធមនុស្ស ដែលបន្តតស៊ូដើម្បីយុត្តិធម៌សង្គមនៅតែមានចំនួនច្រើន ទោះបីជាអ្នកទាំងនោះធ្លាប់ជាប់ក្នុងពន្ធនាគារ ដោយមិនត្រឹមត្រូវម្តងរួចមកហើយក្តី។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា បច្ចុប្បន្នអ្នកការពារសិទិ្ធមនុស្ស និងសកម្មជននយោបាយដែលកំពុងជាប់ឃុំនៅក្នុងពន្ធនាគារជាលើកទីពីរ មានចំនួនកើនឡើង ក្រោមបទចោទដដែលៗ ឬជាប់ឃុំពីបទចោទមួយទៅមួយទៀត។ លោកបន្ថែមថា ការចាប់ និងឃុំខ្លួនកើតឡើងនៅអំឡុងពេលដែលស្ថានភាពនយោបាយនៅកម្ពុជាមិនទាន់បានដោះស្រាយ ដែលករណីទាំងនេះបាននាំឱ្យសហគន៍អន្តរជាតិរិះគន់ថាជាការរំលោភសិទ្ធិសេរីភាពពួកគេដែលធានាដោយរដ្ឋធម្មនុញ្ញ។
លោក អំ សំអាត៖ «អ្នកដែលត្រូវជាប់ឃុំម្តងហើយម្តងទៀត គឺមនុស្សដដែល ហើយបទចោទប្រកាន់ក៏វាដដែលឡើងវិញ អ៊ីចឹងហើយវាគ្រាន់តែជាប់ពាក់ព័ន្ធអ្នកជាប់ឃុំពីរដងឡើងទៅភាគច្រើនទាក់ទងអ្នកដែលធ្វើការទៅលើបញ្ហាសិទ្ធិមនុស្ស បញ្ហាបរិស្ថាន សង្គម និងសកម្មជននយោបាយដែលស្ថិតនៅក្នុងការរិះគន់ ហើយក៏គេទាមទារឱ្យពិនិត្យឡើងវិញទៅលើបញ្ហាទាំងអស់នេះ ហើយសូមមានការដោះលែងទៅលើសកម្មជនទាំងអស់ហ្នឹងជាការបន្ធូរបន្ថយបរិយាកាសដ៏តានតឹង»។
ការលើកឡើងនេះ គឺបន្ទាប់ពីចរន្តនៃការចាប់ និងឃុំខ្លួនសកម្មជនបក្សប្រឆាំង សកម្មជនសិទ្ធិមនុស្ស អ្នករិះគន់រដ្ឋាភិបាលដាក់ពន្ធនាគារសាជាថ្មី ឬជាប់ឃុំចាប់ពីពីរដងបានកើនឡើងនៅរយៈពេលចុងក្រោយនេះ។ ក្នុងចំណោមអ្នកទោសមនសិការកំពុងជាប់ពន្ធនាគារជាង៥០នាក់ មានអ្នកទោសមនសិការយ៉ាងហោច១០នាក់ត្រូវបានចាប់ដាក់ពន្ធនាគារច្រើនដង ដោយចំនួននេះមិនគិតពីអ្នកមានសេរីភាពក្រោយអនុវត្តទោសចប់ និងប្រកាសចុះចូលជាមួយបក្សកាន់អំណាចជាថ្នូរនឹងការដោះលែងកន្លងមកនោះទេ។
អ្នកជាប់ឃុំច្រើនដងទាំងនោះមានដូចជាប្រធានគណបក្សសង្គ្រោះជាតិលោក កឹម សុខា និងសមាជិកបក្សជំទាស់លោក ហេង ច័ន្ទសុទ្ធី លោក គា វិសាល ព្រមទាំងសកម្មជនសិទ្ធិមនុស្ស មេសហជីព និងអ្នករិះគន់រដ្ឋាភិបាលនៅលើបណ្តាញសង្គមផ្សេងទៀតរួមមានកញ្ញា ឈឹម ស៊ីថរ លោក នី ណាក់ លោក កើត សារ៉ាយ លោក កង សារ៉ន និងជនពិការលោក ភុន យុទ្ធ ជាដើម។ ក្នុងនោះអ្នកខ្លះមិនត្រឹមតែជាប់គុកជាច្រើនដងដោយអយុត្តិធម៌ទេ ថែមទាំងរងអំពើហិង្សាដោយការលបវាយដំបណ្តាលឱ្យរងរបួសធ្ងរថែមទៀត។
ជុំវិញរឿងនេះ ជំទប់ទី២ នៃឃុំកោះមិត្ត ស្រុកកំពង់សៀម ខេត្តកំពង់ចាម ដែលត្រូវជាប្រពន្ធរបស់លោក គា វិសាល កំពុងជាប់នៅក្នុងពន្ធនាគាររាជធានីភ្នំពេញ ឬប៉េសហ្ស៊ី(PJ) គឺអ្នកស្រី ញ៉ែ សុខឿន ប្រាប់វិទ្យុអាស៊ីសេរីថា ប្តីអ្នកស្រីធ្លាប់ត្រូវបានតុលាការក្រុងភ្នំពេញកាត់ទោសឱ្យជាប់ពន្ធនាគារម្ដងរួចមកហើយ ហើយបានចេញពីពន្ធនាគារវិញកាលពីខែកញ្ញាឆ្នាំ២០២០ បន្ទាប់ពីគាត់បានអនុវត្តទោសគ្រប់ចំនួនរយៈពេល១ឆ្នាំពេញនៅក្នុងពន្ធនាគារ។ ប៉ុន្តែអ្នកស្រីឱ្យដឹងថាប្តីអ្នកស្រីមិនដែលចុះចាញ់ ឬបោះបង់ការតស៊ូម្តងណាឡើយ ពីព្រោះគាត់ចង់បានសង្គមមានប្រជាធិបតេយ្យ និងការគោរពសិទ្ធិមនុស្សពិតប្រាដករហូតអាជ្ញាធររដ្ឋាភិបាលចាប់ខ្លួនដាក់ពន្ធនាគារម្តងទៀតកាលពីខែមីនា។ អ្នកស្រី ញ៉ែ សុខឿន នៅតែចាត់ទុកការចាប់ខ្លួននោះថាជារឿងនយោបាយ និងស្នើឲ្យតុលាការដោះលែងប្តី និងអ្នកទោសមនសិការដៃទៀតឲ្យមានសេរីភាពវិញ និងទម្លាក់បទចោទប្រកាន់ទាំងនេះ។
អ្នកស្រី ញ៉ែ សុខឿន៖ «រឿងគ្រួសាររបស់ខ្ញុំ រឿងអ្នកទោសផ្សេងទៀតដែលនិយាយពីបញ្ហាសង្គមហ្នឹង វាអយុត្តិធម៌ណាស់ វាជារឿងនយោបាយសុទ្ធសាធ ពួកយើងសុទ្ធតែយល់ថា នៅក្នុងពន្ធនាគារជួបការលំបាក គ្រួសារនៅខាងក្រៅនេះក៏ប្រឈមក្នុងការលំបាកដែរ យើងសុទ្ធតែដឹងរឿងហ្នឹង តែសួរថាហេតុអ្វីបានជាគាត់នៅតែតស៊ូ គឺដើម្បីឱ្យសង្គមយើងមានការផ្លាស់ប្តូរ មានការគោរពសិទ្ធិមនុស្ស និងការបញ្ចេញមតិក្នុងន័យរិះគន់ដើម្បីស្ថាបនា»។
អង្គការសិទ្ធិមនុស្សលីកាដូបញ្ជាក់ថាការណ៍ដែលសកម្មជនទាំងនោះមិនព្រមចុះចាញ់ និងមិនបោះបង់ភាពសកម្មនិយមរបស់ខ្លួន បើទោះបីជាពួកគេធ្លាប់ស្គាល់រសជាតិជាប់ពន្ធនាគារក្នុងស្ថានភាពអាក្រក់ និងហានិភ័យក្តី ក៏ពួកគេនៅតែមិនខ្លាចរអា និងនៅតែសុខចិត្តលះបង់សេរីភាពផ្ទាល់ខ្លួនម្តងហើយម្តងទៀតនោះ ពីព្រោះពួកគេសង្ឃឹមថា កម្ពុជានឹងមានភាពល្អប្រសើរ ផ្នែកសិទិ្ធមនុស្ស និងលទ្ធិប្រជាធិបតេយ្យ សម្រាប់ប្រជាពលរដ្ឋទូទាំងប្រទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។