ប្រជាពលរដ្ឋ និងយុវជនមួយចំនួនអះអាងថា ពួកគាត់បានត្រៀមខ្លួនរួចជាស្រេចហើយក្នុងការចូលរួមបាតុកម្មទាមទារឱ្យមានការដោះលែងលោក កឹម សុខា និងលើកលែងទោសលោក សម រង្ស៊ី។ សមាគមគ្រូបង្រៀនកម្ពុជាឯករាជ្យ និងសហភាពការងារកម្ពុជា ដឹកនាំដោយលោក រ៉ុង ឈុន និងសហការរក្សាជំហរធ្វើបាតុកម្មនេះ បើទោះបីជារងការព្រមានពីអាជ្ញាធររាជធានីភ្នំពេញក៏ដោយ។ ពលរដ្ឋ និងយុវជនមួយចំនួន ថ្លែងថា ពួកគាត់គាំទ្រគំនិតជួបជុំសម្ដែងមតិឱ្យមានការដោះលែង និងទម្លាក់ចោលបទប្រកាន់ទាំងឡាយប្រឆាំងនឹងថ្នាក់ដឹកនាំគណបក្សសង្គ្រោះជាតិ។
ពលរដ្ឋមួយរូបនៅស្រុកពារាំង ខេត្តព្រៃវែង លោក សុភាព មេត្រី គាំទ្រគំនិតផ្ដួចផ្ដើមរបស់ក្រុមលោក រ៉ុង ឈុន ព្រោះលោកយល់ថា នេះជាការតវ៉ាអហិង្សា និងជំរុញឱ្យមានដំណោះស្រាយនយោបាយនៅកម្ពុជា។ លោកបញ្ជាក់ថា ប្រសិនបើសមាគមគ្រូបង្រៀនកម្ពុជាឯករាជ្យរៀបចំព្រឹត្តិការណ៍នេះមែន លោកនឹងទៅចូលរួម មិនឱ្យខកខានឡើយ៖ «យើងរីករាយគាំទ្រជានិច្ចនូវទង្វើលោកគ្រូ រ៉ុង ឈុន ដែលគាត់គម្រោងនឹងធ្វើបាតុកម្មទាមទារឱ្យមានការដោះលែងលោក កឹម សុខា ហើយនិងលើកការចោទប្រកាន់លើឯកឧត្ដម សម រង្ស៊ី ព្រោះនេះ ជាសកម្មភាពមួយដែលមានយុត្តិធម៌ តវ៉ាដោយអហិង្សាបំផុត»។
ស្រដៀងគ្នានេះ អតីតសកម្មជនគណបក្សសង្គ្រោះជាតិនៅខេត្តសៀមរាប លោក សៀក ចំណាប់ ថ្លែងថា លោកក៏នឹងទៅចូលរួមក្នុងបាតុកម្មនេះដែរ។ លោកបន្តថា ការធ្វើបាតុកម្មជារឿងធម្មតានៅក្នុងសង្គមប្រជាធិបតេយ្យ ដូច្នេះលោកស្នើសុំអាជ្ញាធរឱ្យបើកសិទ្ធិឱ្យពលរដ្ឋបានសម្ដែងកង្វល់របស់ពួកគាត់ ដើម្បីឱ្យមានដំណោះស្រាយបញ្ហាជាតិ៖ «ខ្ញុំយល់ថា ជារឿងមួយដ៏ល្អ ពីព្រោះតែក្នុងរបត់នយោបាយចុងក្រោយ យើងឃើញមានភាពតានតឹងរហូតដល់ធ្វើឱ្យប្រទេសយើងហ្នឹងមានបញ្ហាអាចនឹងបាត់ EBA អ៊ីចឹងហើយអ្វីដែលគាត់ធ្វើ គឺគាត់ចង់រក្សាផលប្រយោជន៍ជាតិ»។
សមាគមគ្រូបង្រៀនកម្ពុជាឯករាជ្យ និងសហភាពការងារកម្ពុជា ដឹកនាំដោយលោក រ៉ុង ឈុន និងសហការី គ្រោងប្រមូលផ្តុំក្រុមគ្រូបង្រៀន កម្មករ-កម្មការិនី និងប្រជាពលរដ្ឋ ជួបជុំគ្នាសម្ដែងមតិនៅមុខតុលាការក្រុងភ្នំំពេញ ដើម្បីស្នើសុំឱ្យមានការដោះលែងលោក កឹម សុខា និងទម្លាក់ចោលរាល់បទចោទប្រកាន់លើលោក សម រង្ស៊ី។
ក៏ប៉ុន្តែ គម្រោងជួបជុំគ្នានៅថ្ងៃទី១៥ សីហាខាងមុខនេះ មិនត្រូវបានអាជ្ញាធរក្រុងភ្នំពេញអនុញ្ញាតឡើយ ក្រោមហេតុផលថា នេះជាសកម្មភាពប្រឆាំងនឹងសាលដីកាតុលាការកំពូល និងរំលោភលើសមត្ថកិច្ចរបស់ស្ថាប័នតុលាការ។ អភិបាលរាជធានីភ្នំពេញលោក ឃួង ស្រេង បានព្រមានថា អាជ្ញាធរនឹងចាត់វិធានការតាមផ្លូវច្បាប់លើក្រុមលោក រ៉ុង ឈុន ប្រសិនបើមានការជួបជុំណាមួយដូចការគ្រោងទុកមែននោះ។
ក្រោយការព្រមាននេះ សមាគមគ្រូបង្រៀនកម្ពុជាឯករាជ្យ និងសហភាពសហជីពកម្ពុជា បានសម្រេចលើកពេលធ្វើបាតុកម្មនេះទៅថ្ងៃក្រោយវិញ។ ក៏ប៉ុន្តែ លោក រ៉ុង ឈុន អះអាងថា ខាងសមាគម និងសហជីពរបស់លោក រក្សាជំហរធ្វើបាតុកម្មដដែល ទោះជាត្រូវរងការព្រមាន ឬរឹតត្បិតសិទ្ធិសេរីភាពក៏ដោយ ពីព្រោះលោកយល់ថា សកម្មភាពនេះ គឺដើម្បីប្រយោជន៍ជាតិទាំងមូល មិនមែនប្រយោជន៍ផ្ទាល់ខ្លួន ឬក្រុមរបស់លោកនោះឡើយ៖ «រឿងដែលយើងធ្វើការប្រមូលផ្តុំនេះ មិនមែនមានន័យថា យើងប្រឆាំងរដ្ឋាភិបាលនោះទេ ហើយក៏មិនមែនមានន័យថា យើងប្រឆាំងទៅនឹងដីកាតុលាការ រំលោភលើស្ថាប័នតុលាការដែរ។ យើងក្នុងគោលបំណងចូលរួមធ្វើម៉េចការពារការងារជូនកម្មករ - កម្មការិនីខ្មែរតែប៉ុណ្ណឹង អាហ្នឹងដែលជាគោលបំណងធំបំផុត។ បើយើងមិនធ្វើការដោះស្រាយបញ្ហាហ្នឹង អ្នកដែលទទួលរងគ្រោះធ្ងន់ធ្ងរ គឺពលរដ្ឋកម្ពុជា»។
សហគមន៍អន្តរជាតិបានគិតគូពីការដាក់ទណ្ឌកម្មរបបក្រុងភ្នំពេញ បន្ទាប់ពីរបបនេះបានចាប់ខ្លួនលោក កឹម សុខា ដាក់ពន្ធនាគារ រំលាយគណបក្សសង្គ្រោះជាតិ និងបិទសិទ្ធិមន្ត្រីបក្សនេះជាង១០០ នាក់ មិនឱ្យធ្វើសកម្មភាពនយោបាយរយៈពេល ៥ឆ្នាំ ព្រមទាំងការរៀបចំព្រឹត្តិការណ៍បោះឆ្នោតបែបបង្គ្រប់កិច្ច ដែលផាត់ចោលគណបក្សប្រឆាំងធំជាងគេ។
ជាមួយគ្នានេះ របបក្រុងភ្នំពេញក៏បានបង្កើនការធ្វើទុក្ខបុកម្នេញលើក្រុមអង្គការសង្គមស៊ីវិល សហជីព និងសារព័ត៌មានឯករាជ្យផងដែរ ហើយជាងនេះទៅទៀតនោះ របបនេះបានបង្កើនការរឹតត្បិតកាន់តែខ្លាំងទៅលើសិទ្ធិសេរីភាពជាមូលដ្ឋានរបស់ប្រជាពលរដ្ឋ ដោយមិនអនុញ្ញាតឱ្យមានការជួបប្រជុំ ឬប្រមូលផ្តុំដោយសន្តិវិធីក្នុងទ្រង់ទ្រាយធំឡើយ។
ប្រធានសមាគមសម្ពន្ធនិស្សិតបញ្ញវន្តខ្មែរ លោក មួង សូនី ថ្លែងថា អាជ្ញាធរមិនគួរហាមឃាត់ក្រុមសង្គមស៊ីវិល និងប្រជាពលរដ្ឋ ដែលចង់ជួបជុំគ្នាសម្ដែងកង្វល់អំពីបញ្ហាជាតិនេះឡើយ។ លោកយល់ឃើញថា អ្វីដែលក្រុមលោក រ៉ុង ឈុន ចង់ធ្វើនេះ គឺដើម្បីប្រយោជន៍ជាតិ និងស្វែងរកឯកភាពជាតិ មិនមែនដើម្បីប្រឆាំងរដ្ឋាភិបាលនោះឡើយ៖ «ការដែលគាត់ស្នើសុំធ្វើបាតុកម្មដោយសន្តិវិធី គឺបំណងដើម្បីរក្សា EBA ដើម្បីប្រយោជន៍ជាតិ។ ខ្ញុំគិតថា ពួកខ្ញុំក៏នឹងទៅចូលរួមដែរ។ យើងអត់ជាបារម្ភខ្លាចអីទេ ព្រោះយើងធ្វើអីស្របតាមរដ្ឋធម្មនុញ្ញ ស្របតាមសិទ្ធិប្រជាពលរដ្ឋដែលមានជាអាទិ៍។ ហេតុដូច្នេះ ខ្ញុំសូមអំពាវនាវដល់អាជ្ញាធរពាក់ព័ន្ធជួយសម្រួល ឬក៏ជួយការពារការធ្វើបាតុកម្មដោយសន្តិវិធីនេះ ឱ្យប្រព្រឹត្តទៅដោយរលូន ដោយត្រឹមត្រូវ»។
ពលរដ្ឋមួយរូបទៀតនៅខេត្តព្រៃវែង លោក លី ចេម ស្នើឱ្យថ្នាក់ដឹកនាំសមាគម និងសហជីពរបស់លោក រ៉ុង ឈុន កុំបោះបង់គម្រោងធ្វើបាតុកម្មនេះ ព្រោះរូបលោក និងពលរដ្ឋមួយចំនួនទៀតគាំទ្រជាខ្លាំងចំពោះគម្រោងនេះ។ លោកបន្ថែមថា បើបាតុកម្មនេះធ្វើឡើងនៅថ្ងៃណា លោក និងពលរដ្ឋផ្សេងទៀតនៅក្នុងភូមិ នឹងទៅចូលរួមជាក់ជាមិនខាន៖ «បើគាត់ធ្វើបាតុកម្មថ្ងៃណា ខ្ញុំជាប្រជាពលរដ្ឋ ខ្ញុំនឹងទៅចូលរួមជាមួយនឹងលោក រ៉ុង ឈុន ខ្ញុំអត់ខ្លាចទេ។ ដំណាក់កាលនេះហើយ បើប្រជាពលរដ្ឋយើងនាំគ្នាដេកលក់ យើងមិននាំគ្នាងើបទេ នេះជាពេលវេលាចុងក្រោយហើយ»។
ជាង២ឆ្នាំមកនេះ ស្ថានភាពរំលោភសិទ្ធិមនុស្ស និងប្រជាធិបតេយ្យ មិនបានវិវឌ្ឍទៅរកភាពប្រសើរឡើងវិញទេ ប៉ុន្តែកាន់តែធ្លាក់ចុះដុនដាបថែមទៀត បន្ទាប់ពីសកម្មជនបក្សប្រឆាំងនៅមូលដ្ឋានប្រមាណ១៥០ នាក់ ត្រូវបានកោះហៅឱ្យចូលឆ្លើយបំភ្លឺរឿងបំពានសាលដីការំលាយគណបក្សសង្គ្រោះជាតិ ដោយក្នុងនោះមានសកម្មជនខ្លះត្រូវបានចាប់ខ្លួនដាក់ពន្ធនាគារ។
ក្រុមសង្គមស៊ីវិល សហជីព និងប្រជាពលរដ្ឋ នៅតែស្នើយ៉ាងទទូចឱ្យរបបក្រុងភ្នំពេញ ស្ដារស្ថានការណ៍សិទ្ធិមនុស្ស និងប្រជាធិបតេយ្យឡើងវិញ ដើម្បីបញ្ចៀសវិបត្តិទណ្ឌកម្មទាំងឡាយដែលកម្ពុជាកំពុងប្រឈម មានជាអាទិ៍ ការដកហូតប្រព័ន្ធអនុគ្រោះពន្ធ EBA របស់សហភាពអឺរ៉ុប និងប្រព័ន្ធអនុគ្រោះពន្ធ GSP របស់សហរដ្ឋអាមេរិកជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។