អ្នកស្រីមូរ សុខហួរ អនុប្រធានគណបក្សសង្គ្រោះជាតិប្រាប់អាស៊ីសេរីកាលពីថ្ងៃទី ២២ ធ្នូ ថា ថ្នាក់ដឹកនាំគណបក្សសង្គ្រោះជាតិ នៅតែមានសង្ឍឹមថា នឹងបានចូលប្រទេសកម្ពុជាដូចតាមការគ្រោងទុក។ បើទោះបីជាមកដល់ពេលនេះមិនទាន់មានការឆ្លើយតបពីអគ្គកុងស៊ុលកម្ពុជាប្រចាំទីក្រុងឡូវែល(Lowell) រដ្ឋម៉ាសាឈូសេត (Massachusetts) យ៉ាងណាក៏ដោយ។
អ្នកស្រីបញ្ជាក់ថា ដើម្បីបញ្ជាក់ពីភាពស្អាតស្អំ អគ្គកុងស៊ុលកម្ពុជាត្រូវតែផ្ដល់ទិដ្ឋាការដល់ថ្នាក់ដឹកនាំបក្សសង្គ្រោះជាតិ បានវិលចូលប្រទេសកម្ពុជាដើម្បីបានតតាំងក្ដីនៅក្នុងតុលាការ៖«យើងខ្ញុំនៅតែរក្សាផែនការវិលត្រឡប់ទៅថ្ងៃទី ៤ ខែ មករា ឆ្នាំ២០២១ ដោយសារទៅឆ្លើយនឹងដីកា របស់តុលាការ។នៅគ្រប់ឧបសគ្គទាំងអស់សូមបងប្អូនអញ្ជើញមើល ឱ្យឃើញទាំងអស់គ្នា ជាឧបសគ្គដែលគេបង្កមកលើយើង ជាអ្នករងគ្រោះ។ យើងខ្ញុំអត់ មានដែលថា បរាជ័យនៅក្នុងការតស៊ូ ដើម្បីយុត្តិធម៌ទេ។ ម៉្យាងទៀតខ្ញុំសូមអំពាវនាវឱ្យបងប្អូនទាំងអស់ថា យើងមិនអាចអង្គុយស្ងៀមហើយឱ្យគេកាត់សេចក្តី ហើយសូមអំពាវនាវដល់បងប្អូនការពារយុត្តិធម៌ជាមួយគ្នា។»
អ្នកស្រីមូរ សុខហួរ និងមន្ត្រីជាន់ខ្ពស់គណបក្សមួយចំនួនទៀតកាលពីថ្ងៃទី ២២ ធ្នូ បានទៅអគ្គកុងស៊ុលកម្ពុជាប្រចាំទីក្រុងឡូវែល(Lowell) រដ្ឋម៉ាសាឈូសេត (Massachusetts) ម្ដងទៀត ដើម្បីសាកសួរព័ត៌មានពីទិដ្ឋាការ ក្រោយពីបានដាក់ពាក្យស្នើសុំកាលពីថ្ងៃទី ១៥ ធ្នូ។
អ្នកស្រីមានប្រសាសន៍ថា ខាងមន្ត្រីកុងស៊ុល នៅតែដោះសារដដែលៗថា កំពុងរង់ចាំសេចក្តីសម្រេចពីថ្នាក់ដឹកនាំក្រសួងការបរទេស។
អាស៊ីសេរីមិនអាចទាក់ទងលោក អ៊ូ សុវណ្ណ អគ្គកុងស៊ុលកិត្តិយសរបស់ប្រទេសកម្ពុជាប្រចាំ ទីក្រុងឡូ វែល(Lowell) រដ្ឋ ម៉ាសាឈូសេត( Massachusetts) បានទេ ដោយទូរស័ព្ទហៅចូលជាច្រើនដងគ្មានអ្នកទទួល។
មន្ត្រីជាន់ខ្ពស់គណបក្សសង្គ្រោះជាតិភាគច្រើនជាសមាជិកសភា ដែលកំពុងភៀសខ្លួននៅក្រៅប្រទេសបានប្រកាសថា អ្នកដែលមានសញ្ជាតិពីរ ឬមានលិខិតឆ្លងដែនពីរគឺគ្រោង វិលទៅប្រទេសកម្ពុជា នៅថ្ងៃទី០៤ ខែមករា ឆ្នាំ២០២១ រីឯអ្នកមានលិខិតឆ្លងដែនសញ្ជាតិខ្មែរតែមួយគឺកំពុងរៀបចំឯកសារដើម្បីអាចចូលប្រទេសកម្ពុជាតាមការគ្រោងទុក ដើម្បីតតាំងក្ដីនៅក្នុងតុលាការ។
តុលាការក្រុងភ្នំពេញនៅថ្ងៃកាលពីថ្ងៃទី ១១ ខែ ធ្នូ បានសម្រេចលើកពេលសវនាការលើសំណុំរឿងប្រធានស្តីទីគណបក្សសង្គ្រោះជាតិលោក សម រង្ស៊ី និងមន្ត្រីជាន់ខ្ពស់គណបក្សនេះចំនួន៨រូបផ្សេងទៀត សំណុំរឿង"ឧបឃាត" បទ "រួមគំនិតក្បត់" និងបទ "ញុះញង់"ដោយសារតែពួកគេកំពុងនៅក្រៅប្រទេសត្រូវរបបក្រុងភ្នំពេញរារាំងមិនឱ្យចូលរួមសវនាការបាន។
មន្ត្រីជាន់ខ្ពស់ទាំង៩រូបនេះ រួមមានលោក សម រង្ស៊ី និងភរិយាលោក គឺ អ្នកស្រី ជូឡុង សូមូរ៉ា [សូមូរ៉ា] អ្នកស្រី មូរ សុខហួរ លោក អេង ឆៃអ៊ាង លោក អូ ច័ន្ទឬទិ្ធ លោក ហូរ វ៉ាន់ លោក ឡុង រី លោក ម៉ែន សុថាវរិន្ទ្រ និង លោក នុត រំដួល។
ក្រៅពីសំណុំរឿងមេដឹកនាំបក្សប្រឆាំងនៅក្រៅប្រទេសទាំង៩រូប តុលាការក្រុងភ្នំពេញកាលពីថ្ងៃទី ៤ វិច្ឆិកា បានកោះហៅមន្ត្រី និងសកម្មជនគណបក្សសង្គ្រោះជាតិប្រមាណ៧០នាក់ ផ្សេងទៀតអោយចូលខ្លួនបំភ្លឺក្នុងតុលាការនៅថ្ងៃទី ២៦ វិច្ឆិកា ពាក់ព័ន្ធន្ធនឹងសំណុំរឿងចោទប្រកាន់ពីបទ«រួមគំនិតក្បត់» ក្នុងការគាំទ្រគម្រោងវិលត្រឡប់មកកម្ពុជាវិញរបស់លោក សម រង្ស៊ី តែសំណុំរឿងនេះត្រូវពន្យារពេលវិញ ដោយតុលាការសំអាងលើវិបត្តិជំងឺកូវីដ-១៩៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។