គណបក្សកម្លាំងជាតិ ប្រកាសស្វែងរកដំណោះស្រាយជាមួយគណបក្សភ្លើងទៀន ក្នុងការចូលរួមការបោះឆ្នោតព្រឹទ្ធសភា និងការបោះឆ្នោតជ្រើសរើសក្រុមប្រឹក្សារាជធានីខេត្តស្រុកខណ្ឌដើម្បីកុំឱ្យបែកសំឡេងឆ្នោត។ ទោះយ៉ាងណាក្ដី មេដឹកនាំគណបក្សភ្លើងទៀន ឆ្លើយតបថា ការជជែករឿងនេះហាក់ហួសបន្តិចហើយ។
គណបក្សកម្លាំងជាតិ ផ្ដល់ជម្រើសទៅគណបក្សភ្លើងទៀន គួរចែកភូមិភាគគ្នាឈរឈ្មោះសម្រាប់ការបោះឆ្នោតព្រឹទ្ធសភា ក្នុងខែកុម្ភៈខាងមុខ។ គណបក្សនេះផ្ដល់សេណារីយោ ចំនួន៣សម្រាប់ស្វែងរកដំណោះស្រាយជាមួយគណបក្សភ្លើងទៀន ក្នុងការចុះបញ្ជីបេក្ខជនឈរឈ្មោះបោះឆ្នោត។ សេចក្ដីសម្រេចនេះ ចុះកាលពីថ្ងៃទី១៧ ខែធ្នូ តែទើបផ្សព្វផ្សាយនៅថ្ងៃទី១១ ខែមករា ឱ្យដឹងថា សេណារីយ៉ូទី១ និងទី២ គណបក្ស កម្លាំងជាតិ ចុះបញ្ជីបេក្ខជនឈរឈ្មោះចំនួន ៤ភូមិភាគ ចំណែកគណបក្សភ្លើងទៀនតាមរយៈគណបក្សឆន្ទៈខ្មែរ ចុះបញ្ជីបេក្ខជនចំនួន ៤ភូមិភាគដែរ។ សេណារីយ៉ូទី៣ គណបក្សភ្លើងទៀនតាមរយៈគណបក្សឆន្ទៈខ្មែរ ចុះបញ្ជីបេក្ខជនចំនួន ៥ភូមិភាគ តែ គណបក្ស កម្លាំងជាតិ ចុះបញ្ជីបេក្ខជនឈរឈ្មោះមកត្រឹម៣ភូមិភាគទេ ប៉ុន្តែ នៅពេលបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌ គឺគណបក្សកម្លាំងជាតិចុះបញ្ជីបេក្ខជនឈរឈ្មោះ ចំណែកគណបក្ស ភ្លើងទៀន តាមរយៈគណបក្សឆន្ទៈខ្មែរ ពុំដាក់បញ្ជីចុះឈ្មោះបេក្ខជនឈរសម្រាប់ការបោះឆ្នោតនេះឡើយ។
ទីប្រឹក្សាគណបក្សកម្លាំងជាតិ លោក រ៉ុង ឈុន ឱ្យវិទ្យុអាស៊ីសេរីដឹងថា មុនពេលគណបក្សកម្លាំងជាតិ បង្ហោះសេចក្ដីសម្រេចនេះជាសាធារណៈ គណបក្សកម្លាំងជាតិ បានផ្ញើលិខិតនេះទៅឱ្យគណបក្សភ្លើងទៀន តាំងពីថ្ងៃទី១៧ ខែធ្នូ មកម្ល៉េះតែគណបក្សភ្លើងទៀន នៅតែនិយាយដដែលៗថា ទាល់តែគណបក្សកម្លាំងជាតិចូលរួមសម្ព័ន្ធភាពនយោបាយជាមួយក្រុមរបស់ខ្លួនសិនទើបមានការជជែកគ្នាលើរឿងនេះបាន។ លោក រ៉ុង ឈុន បន្តថា គណបក្សកម្លាំងជាតិ មិនទាន់មានពេលសមរម្យដើម្បីអាចចូលរួមសម្ពន្ធភាពឆ្ពោះទៅអនាគត ជាមួយគណបក្សភ្លើងទៀន និងគណបក្សបីផ្សេងទៀតបាននៅឡើយទេ ហើយលោកក៏កត់សម្គាល់ឃើញដែរថា សម្ពន្ធភាពនេះមិនទាន់មានរចនាសម្ព័ន្ធជាក់លាក់នៅឡើយដែរ។ លោកបញ្ជាក់ថា ការដែលគណបក្សកម្លាំងជាតិ បង្ហាញសេណារីយ៉ូ នៅពេលនេះជាការបង្ហាញជំហរទន់ភ្លន់ដើម្បីឈ្នះៗ ទាំងអស់គ្នា។
លោក រ៉ុង ឈុន៖«គណបក្សកម្លាំងជាតិ យើងត្រូវការពេលវេលារៀបចំខ្លួនហើយយើងចូលក្នុងកាលៈទេសៈណាមួយដូច្នេះមិនត្រូវយកសម្ព័ន្ធមកចង យើងត្រូវការពេលវេលាណាមួយ។ យើងត្រូវជជែកកុំឱ្យខាតហើយបើសិនចេញមិនរួចប្រកួតគ្នាគឺថា ចាញ់ទាំងអស់គ្នាហើយអ្នកដែលឈ្នះគឺគណបក្សកាន់អំណាច»។
ឆ្លើយតបរឿងនេះ អតីតអនុប្រធានគណបក្សភ្លើងទៀន លោក សុន ឆ័យ ដែលលោកទៅឈរឈ្មោះជាបេក្ខជនឈរឈ្មោះព្រឹទ្ធសភា ឱ្យគណបក្សឆន្ទៈខ្មែរ ប្រាប់ថា លោកមិនសូវយល់ពីយុទ្ធសាស្ត្រ ឬសេណារីយ៉ូរបស់គណបក្សកម្លាំងជាតិនៅពេលនេះឡើយ។ ទោះយ៉ាងណា លោកថា សំណើរបស់គណបក្សកម្លាំងជាតិនៅពេលនេះ ហាក់យឹតពេលទៅហើយ ព្រោះគណបក្សភ្លើងទៀន តាមរយៈគណបក្សឆន្ទៈខ្មែរ បានដាក់បញ្ជីបេក្ខជនគ្រប់ភូមិភាគរួចហើយ។ ទោះបែបនេះ លោកថា ជំហររបស់លោកផ្ទាល់ លោកនៅតែយល់ថា គណបក្សទាំងពីរនៅតែជជែកគ្នាបានដដែល។ លោក សុន ឆ័យ ចង់ឃើញគណបក្សកម្លាំងជាតិ គួរគិតគូរពីផែនការបោះឆ្នោតឆ្នាំ២០២៧ និងឆ្នាំ២០២៨ វិញល្អជាង។
លោក សុន ឆ័យ៖«ខាងបេក្ខជនដែលចេញពីគណបក្សភ្លើងទៀន ដូចជាមិនបារម្ភទេ ដោយសារគណបក្សភ្លើងទៀន នៅគ្រប់គ្រងរចនាសម្ព័ន្ធនិងអង្គបោះឆ្នោត។ ខ្ញុំថា គណបក្សកម្លាំងជាតិគួរគិតទៅដល់ឆ្នាំ២០២៧ វិញ»។
គណបក្សភ្លើងទៀន បានចងសម្ពន្ធភាពនយោបាយ ជាមួយគណបក្សប្រជាធិបតេយ្យមូលដ្ឋាន គណបក្សឆន្ទៈខ្មែរ និងគណបក្សកែទម្រង់កម្ពុជា។ គណបក្សភ្លើងទៀន ក៏បានផ្ដល់សិទ្ធិទៅគណបក្សឆន្ទៈខ្មែរ សម្រាប់ចូលរួមការបោះឆ្នោតព្រឹទ្ធសភា និងការបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌ ជំនួសខ្លួន។ ចាប់តាំងពីពេលនោះដែរ មេដឹកនាំគណបក្សភ្លើងទៀនមួយចំនួនក៏ចេញទៅបង្កើតគណបក្សកម្លាំងជាតិ និងបានសម្រេចចូលរួមការបោះឆ្នោតអសកលទាំងពីរនោះដែរ។ ការបោះឆ្នោតព្រឹទ្ធសភានេះ ជាការបោះឆ្នោតអសកល ហើយអង្គបោះឆ្នោតគឺជាសមាជិកក្រុមប្រឹក្សាឃុំសង្កាត់ទូទាំងប្រទេស។ សព្វថ្ងៃគណបក្សនយោបាយ ដែលមានអង្គបោះឆ្នោតនេះគឺគណបក្សប្រជាជនកម្ពុជា គណបក្សភ្លើងទៀន និងមួយចំនួនតួចទៀតគឺគណបក្សប្រជាធិបតេយ្យមូលដ្ឋាន។
នាយកប្រតិបត្តិអង្គការ ឃ្លាំមើលការបោះឆ្នោតនៅកម្ពុជា ហៅកាត់ថា និចហ្វិច (Nicfec) លោក សំ គន្ធាមី លើកឡើងថា គណបក្សពីរដណ្ដើមអង្គបោះឆ្នោតតែមួយដូច្នេះ នឹងធ្វើឱ្យសំឡេងឆ្នោតថយចុះ ហើយអាចធ្វើឱ្យគណបក្សទាំងពីរប្រឈមបាត់បង់អាសនៈនៅក្នុងព្រឹទ្ធសភា។ លោកបន្តថា បើទោះជាអង្គបោះឆ្នោតរបស់គណបក្សទាំងពីរនេះ មកពីគណបក្សភ្លើងទៀនក្ដី ប៉ុន្តែមិនប្រាកដថា អង្គបោះឆ្នោតទាំងអស់ នឹងបោះឆ្នោតជូនគណបក្សឆន្ទៈខ្មែរតែមួយទេ ដូច្នេះអ្នកជំនាញកិច្ចការបោះឆ្នោតរូបនេះ ចង់ឃើញថា គណបក្សជួបជជែករកដំណោះស្រាយ។
លោក សំ គន្ធាមី៖«យើងមិនដឹងថា ក្នុងគណបក្សពីរហ្នឹងអ្នកណាមានប្រជាប្រិយជាងដែលអាចទាញសន្លឹកឆ្នោតពីក្រុមប្រឹក្សាឃុំសង្កាត់របស់ភ្លើងទៀនបានច្រើនទេណា»។
ការបោះឆ្នោតព្រឹទ្ធសភា នឹងប្រព្រឹត្តទៅនៅថ្ងៃទី២៥ ខែកុម្ភៈ ខាងមុខ ដោយមានគណបក្សចំនួន៤ចូលរួម គឺគណបក្សប្រជាជនកម្ពុជា គណបក្សឆន្ទៈខ្មែរ គណបក្សកម្លាំងជាតិ និងគណបក្សហ៊្វុនស៊ិនប៉ិច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។