គណៈកម្មាធិការជាតិរៀបចំការបោះឆ្នោត (គ.ជ.ប) ហាមគណបក្សនយោបាយ ធ្វើយុទ្ធនាការឃោសនារិះគន់ វាយប្រហារ ឬប្រៀបធៀបគោលនយោបាយបក្សរបស់ខ្លួន នឹងបក្សមួយផ្សេងទៀតទេ។ បម្រាមនេះធ្វើឡើងក្រោយពេលលោកនាយករដ្ឋមន្ត្រី ហ៊ុន សែន ប្រកាសឲ្យឈប់វាយប្រហារ ឬប្រៀបធៀបអត្តចរិតលោក និងគណបក្សរបស់លោក។ អ្នកវិភាគយល់ថា ទង្វើរបស់ គ.ជ.ប បង្ហាញឲ្យឃើញថា គ.ជ.បកំពុងរងឥទ្ធិពលខ្លាំងពីបក្សកាន់អំណាច។
បម្រាមនេះ ធ្វើឡើងក្រោយពេលដែល គ.ជ.ប បានកោះហៅភាគីពាក់ព័ន្ធ ទៅពន្យល់អំពីគោលការណ៍នៃយុទ្ធនាការឃោសនារកសំឡេងឆ្នោត នៅព្រឹកថ្ងៃទី៤ កក្កដា នៅទីស្ដីការ គ.ជ.ប ក្នុងបរិវេណក្រសួងមហាផ្ទៃ។ គ.ជ.ប បានប្រាប់ទៅភាគីពាក់ព័ន្ធថា ក្នុងយុទ្ធនាការឃោសនាបោះឆ្នោតនេះ គ្រប់គណបក្សនយោបាយ គឺអាចធ្វើការឃោសនាបានតាមរយៈមេក្រូ ធុងបាស សម្រែកជ័យឃោសគ្រប់បែបយ៉ាងតាមដងផ្លូវ តែហាមផ្ដាច់មិនឲ្យមានការទិតៀន រិះគន់ វាយប្រហារ ឬ ប្រៀបធៀបគោលនយោបាយបក្សរបស់ខ្លួន ទៅនឹងគណបក្សនយោបាយណាផ្សេងទៀត។
អ្នកនាំពាក្យ គ.ជ.ប លោក ហង្ស ពុទ្ធា ប្រៀបធៀបថា យុទ្ធនាការឃោសនាបោះឆ្នោតនេះ គឺដូចការផ្សាយពាណិជ្ជកម្មអ៊ីចឹង បានត្រឹមតែផ្សព្វផ្សាយពីផលិតផល ឬសេវាកម្មល្អៗរបស់ខ្លួនឯងតែប៉ុណ្ណោះ។ លោក ហង្ស ពុទ្ធា ព្រមានថា ប្រសិនបើគណបក្សនយោបាយណាមួយ ប្រព្រឹត្តិខុសពីការណែនាំនេះ គ.ជ.ប នឹងដាក់ពិន័យដល់គណបក្សនយោបាយនោះ។ «»
បម្រាមរបស់ គ.ជ.បនេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន បានបង្ហាញក្ដីខឹងសម្បារ នឹងគណបក្សប្រជាធិបតេយ្យមូលដ្ឋាន ដែលហ៊ានយកគោលនយោបាយ អត្តចរិត លក្ខណៈសម្បត្តិរបស់លោក ទៅប្រៀបធៀបនឹងបេក្ខជននាយករដ្ឋមន្ត្រីបក្សមូលដ្ឋាន គឺលោកបណ្ឌិត យ៉ង សាំងកុមារ។
លោក ហ៊ុន សែន កាលពីថ្ងៃទី២៧ ខែមិថុនា ថ្លែងក្នុងយុទ្ធនាការឃោសនារកសំឡេងឆ្នោតខុសកាលកំណត់ ពីក្រុមកម្មករនៅខេត្តកំពង់ឆ្នាំង បានព្រមានដល់មេដឹកនាំគណបក្សនយោបាយ ឲ្យឈប់ប្រើប្រាស់ឈ្មោះរបស់លោក ដើម្បីលើកកម្ពស់តួនាទីខ្លួននោះ ឲ្យឈប់ជាបន្ទាន់ ហើយលោកថែមទាំងហាមមន្ត្រីរបស់លោក មិនឲ្យឆ្លើយតបទៅមេដឹកនាំគណបក្ស ដែលរិះគន់បក្សរបស់លោក។ លោក ហ៊ុន សែន អះអាងថា ការវាយប្រហាររបស់គណបក្សផ្សេងលើបក្សលោក ជាការកេងចំណេញនយោបាយ តែការវាយប្រហាររបស់លោក ទៅលើបក្សផ្សេងវិញ គឺដើម្បីជួយឃោសនាឲ្យ។ «»
បើទោះជាទាំង គ.ជ.ប និង លោក ហ៊ុន សែន បានហាមប្រាមមិនឲ្យគណបក្សនយោបាយរិះគន់បក្សលោកក្ដី ប៉ុន្តែ ទាំងលោក ហ៊ុន សែន សាច់ញាតិ និងមន្ត្រីក្រោមឱវាទលោក តែងចុះឃោសនា រិះគន់ គណបក្សតូចៗ ថា សន្យាខ្យល់ គ្មានគុណសម្បត្តិធំ បើបើធៀបនឹងបក្សកាន់អំណាចវិញ មានគុណធំធេងណាស់ ក្នុងការរំដោះប្រទេស បញ្ចប់សង្គ្រាម ជាដើម។ ជាងនេះទៅទៀត គេសង្កេតឃើញថា លោក ហ៊ុន សែន មន្ត្រីធំៗ និងមេទាហានស្បថថា បម្រើគ្រួសារ លោក ហ៊ុន សែន មួយជីវិត តែងបើកការវាយប្រហារបក្សប្រឆាំងជានិច្ច នៅពេលចុះឃោសនាមុនរដូវកាល។
កាលពីកំឡុងពេលឃោសនា បោះឆ្នោតក្រុមប្រឹក្សាឃុំសង្កាត់ អាណត្តិទី៤ ឆ្នាំ២០១៧ ទាំង លោក ហ៊ុន សែន និងមន្ត្រីក្រោមឱវាទលោក ដូចជា ប្រធានរាជបណ្ឌិត្យសភា លោក សុខ ទូច ជាដើម បានបើកការវាយប្រហារ គោលនយោបាយ លុបចោលក្រសួងអភិវឌ្ឍន៍ជនបទ ទម្លាក់ថវិកា៥០ម៉ឺនដុល្លារ ទៅតាមឃុំសង្កាត់ របស់គណបក្សសង្គ្រោះជាតិ។ លោក ហ៊ុន សែន ក៏តែងវាយប្រហារគោលនយោបាយបក្សប្រឆាំងឈប់ឈរដែរ គឺគោលនយោបាយ ដំឡើងប្រាក់ខែមន្ត្រីរាជការ កម្មករ និងផ្ដល់ប្រាក់ជូនចាស់ជរា អាយុលើសពី៦០ឆ្នាំ។
អ្នកនាំពាក្យ គ.ជ.ប លោក ហង្ស ពុទ្ធា ថាក្នុងយុទ្ធនាការឃោសនារកសំឡេងឆ្នោត ការរិះគន់ដើម្បីស្ថាបនាបក្សផ្សេងមិនមានទោសទេ ប៉ុន្តែមានច្បាប់ ដាក់ពិន័យគណបក្សណា ដែលឃោសនា ដើម្បីឆក់យកអ្នកគាំទ្ររបស់គេ។ «»
សមាជិកក្រុមអ្នកវិភាគនយោបាយវ័យក្មេង លោក បុង ដេត យល់ថា ការមិនហ៊ានឲ្យគេរិះគន់ ឬ ប្រៀបធៀបគោលនយោបាយបក្សខ្លួន គឺដោយសារតែ គណបក្សប្រជាជនកម្ពុជា បានប្រើប្រាស់គោលនយោបាយទុច្ចរិត មិនសុចរិតដូចគណបក្សដទៃ។ អ្នកវិភាគ ថា បើមិនចង់ឲ្យគេរិះគន់ ឬ ប្រៀបធៀប គួរកុំធ្វើនយោបាយ ឬ កុំធ្វើជាបុគ្គលសាធារណៈ។ «»
ដំណើរការបោះឆ្នោតប្រកបដោយភាពចម្រូងចម្រាសនៅអាណត្តិទី៦នេះ កើតឡើងក្រោយពេលដែលអ្នកនិយមប្រជាធិបតេយ្យ បានដកខ្លួនចេញពីការបោះឆ្នោតនេះ។ លោក ហង្ស ពុទ្ធា ក៏បានអះអាងថា គ្មានការបោះឆ្នោតណាត្រឹមត្រូវ សេរី យុត្តិធម៌ ១០០ភាគរយទេ ឲ្យតែគ្រប់ភាគីទទួលយកបាន ប៉ុន្ដែភាគីអ្នកនិយមប្រជាធិបតេយ្យ បានបដិសេធមិនទទួលយកទេ។
អ្នកនាំពាក្យ គ.ជ.ប លោក ហង្ស ពុទ្ធា បញ្ជាក់ថា ការបោះឆ្នោតអាណត្តិ នេះ គ.ជ.ប បានប្រើប្រាស់មធ្យោបាយផ្សព្វផ្សាយច្រើនជាងមុន ដើម្បីឃោសនាពីដំណើរការបោះឆ្នោត ប៉ុន្តែអ្នកសង្កេតការណ៍ និងអ្នកវិភាគនយោបាយថា គជប កំពុងលម្អៀង និងស្ថិតក្រោមឥទ្ធិពលនយោបាយរបស់បក្សកាន់អំណាច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។