សមាជិកគណៈកម្មាធិការជាតិរៀបចំការបោះឆ្នោត (គ.ជ.ប) លោក ហ៊ែល សារ៉ាត់ បញ្ជាក់ក្នុងសន្និសីទកាសែត ធ្វើតេស្ដទឹកខ្មៅជ្រលក់ម្រាមដៃ នៅព្រឹកថ្ងៃទី១៧ កក្កដា ថា នៅតាមការិយាល័យបោះឆ្នោត និងរាប់សន្លឹកឆ្នោតនីមួយៗ គ.ជ.ប នឹងដាក់កម្លាំងសន្តិសុខការពារចំនួន៣នាក់ ប៉ុន្តែកងកម្លាំងនោះ អាចកាន់អាវុធវែងបានតែ១ដើមគត់ ដែលមានគ្រាប់យ៉ាងច្រើន៣០គ្រាប់ ដើម្បីការពារសន្តិសុខសណ្ដាប់ធ្នាប់ ក្នុងថ្ងៃបោះឆ្នោត។
លោក ហ៊ែល សារ៉ាត់ បន្ដថា ភ្នាក់ងារសន្តិសុខ៣នាក់ ដែលការពារតាមការិយាល័យបោះឆ្នោត និងរាប់សន្លឹកឆ្នោតនីមួយៗ ត្រូវស្លៀកពាក់ឯកសណ្ឋានកងកម្លាំងឱ្យបានត្រឹមត្រូវ និងត្រូវពាក់ប្រឡង់ដៃសន្តិសុខរបស់គ.ជ.ប រហូតដល់ចប់ភារកិច្ច។ លោក បន្ដថាភ្នាក់ងារសន្តិសុខបោះឆ្នោតមានភារកិច្ចការពារសន្តិសុខ សណ្ដាប់ធ្នាប់ កុំឱ្យមានការរំខាន ការអុកឡុក ការបំភិតបំភ័យ និងការគំរាមកំហែង ឬហេតុការណ៍ផ្សេងៗដែលអាចកើតឡើងបាន ហើយអាចហាត់ឃាត់ជនដែលយកអាវុធជាតិផ្ទុះ និងវត្ថុដែលអាចបង្កគ្រោះថ្នាក់ផ្សេងៗចូលក្នុងបរិវេណខាងក្រៅ និងបរិវេណខាងក្នុងការិយាល័យបោះឆ្នោត និងរាប់សន្លឹកឆ្នោត។
សមាជិកគ.ជ.បរូបនេះ បន្ថែមថា ភ្នាក់ងារសន្តិសុខម្នាក់ ត្រូវចល័តការពារបរិវេណខាងក្នុងនៃការិយាល័យបោះឆ្នោត និងរាប់សន្លឹកឆ្នោត ដែលមានចម្ងាយយ៉ាងតិច១៥ម៉ែត្រ ពីការិយាល័យនោះ ដោយមិនចាំបាច់ប្រើប្រាស់អាវុធ។ រីឯភ្នាក់ងារសន្តិសុខចំនួន២នាក់ទៀត ត្រូវចល័តជុំវិញបរិវេណការិយាល័យបោះឆ្នោត និងរាប់សន្លឹកឆ្នោត ក្នុងចម្ងាយពី១០០ម៉ែត្រ ឬស្ថិតក្នុងស្ថានភាពជាក់ស្ដែង នៃបរិវេណខាងក្រៅនៃការិយាល័យបោះឆ្នោត និងរាប់សន្លឹកឆ្នោតនីមួយៗ អាចប្រើប្រាស់អាវុធវែង១ដើម ដែលមានគ្រាប់យ៉ាងច្រើន៣០គ្រាប់។
ក្នុងករណីការិយាល័យបោះឆ្នោត និងរាប់សន្លឹកឆ្នោតច្រើនប្រមូលផ្តុំក្នុងបរិវេណ ឬ អគារតែមួយ សមាជិកគ.ជ.ប បញ្ជាក់ថា ចំនួនភ្នាក់ងារសន្តិសុខបោះឆ្នោតសម្រាប់ការិយាល័យបោះឆ្នោត និងរាប់សន្លឹកឆ្នោត ត្រូវសមស្របទៅនឹងស្ថានភាពជាក់ស្ដែង ប៉ុន្តែមិនត្រូវលើសពី៣នាក់ក្នុងមួយការិយាល័យឡើយ៖ «ជាសេចក្ដីសន្និដ្ឋានសរុបមកគ.ជ.បបានរៀបចំការពារ សុខសន្តិសុខ សុវត្ថិភាព និងសណ្ដាប់ធ្នាប់សម្រាប់ការបោះឆ្នោតនាពេលខាងមុខមួយចំនួន ដូចខាងក្រោម ការបង្ការ ការទប់ស្កាត់ និងការប្រយុទ្ធប្រឆាំងការបោះឆ្នោត ដើម្បីឲ្យការបោះឆ្នោត មានសេរីភាព យុត្តិធម៌ គ្មានការរឹតត្បិត ផ្ដល់ភាពរលូនដល់ការចូលរួមសង្កេតការណ៍ទាំងអ្នកសង្កេត ការណ៍ជាតិនិងអន្តរជាតិកាលពីបោះឆ្នោតក្រុមប្រឹក្សាឃុំសង្កាត់ឆ្នាំ២០១៧ គ.ជ.ប ក៏បានដាក់ពង្រាយកងកម្លាំងការពារការិយាល័យបោះឆ្នោត និងរាប់សន្លឹកឆ្នោតបែបនេះដែរ ប៉ុន្តែមានការបារម្ភពីពលរដ្ឋ ថា ការដាក់កងកម្លាំងច្រើនពេក អាចធ្វើឲ្យអ្នកបោះឆ្នោតមានការភិតភ័យ ខណៈដែល ការបោះឆ្នោតកាលពីឆ្នាំ២០១៣ រដ្ឋាភិបាល បានចល័តទ័ព រថក្រោះ និងរថពាសដែកយ៉ាងច្រើន ពាសពេញទីក្រុងភ្នំពេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។