មន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោត (គ.ជ.ប) បានរិះគន់ថា ជំនួយរបស់សហរដ្ឋអាមេរិក ឧបត្ថម្ភឲ្យគ.ជ.ប កន្លងមក មិនមានអ្វីច្រើនទេ គឺមានតែរថយន្តចាស់ៗ ចំនួន៤គ្រឿងប៉ុណ្ណោះ។
អគ្គលេខាធិការរងគ.ជ.ប លោក សោម សូរីដា បានផ្ដល់បទសម្ភាសន៍ឲ្យប្រព័ន្ធឃោសនាក្នុងស្រុកមួយចំនួន ក្រោយពេលដែលសហរដ្ឋអាមេរិក និងសហភាពអឺរ៉ុបបានកាត់ផ្ដាច់រាល់ជំនួយទៅកាន់ស្ថាប័នជាតិរៀបចំការបោះឆ្នោតទាំងអស់៖ «សូមបញ្ជាក់ថា សហរដ្ឋអាមេរិកពេលមុននេះ ផ្តល់ជំនួយដល់ គ . ជ . ប មានតែរថយន្តស៊ីខេន ហេន [second hand] ( រថយន្តមួយទឹក ) ៤ គ្រឿងតែប៉ុណ្ណោះ ដ៏កញ្ចាស់ គឺម៉ាកហ្វត (Ford) ដែលយើងយកមកប្រើប្រាស់ សូមបញ្ជាក់ទៅដល់បងប្អូនប្រជាពលរដ្ឋ សូមមេត្តាយល់អំពីអ្វីដែលយើងចង់ធ្វើ សំខាន់បំផុតការងារគ . ជ . ប ធ្វើតាមរដ្ឋធម្មនុញ្ញ»។
ការលើកឡើងរបស់មន្ត្រីជាន់ខ្ពស់គ.ជ.បនេះ គឺផ្ទុយពីសេចក្ដីប្រកាសព័ត៌មានរបស់សហរដ្ឋអាមេរិកកន្លងមក។ កាលពីខែមេសា ឆ្នាំ២០១៧ មុនកាលបោះឆ្នោតក្រុមប្រឹក្សាឃុំសង្កាត់ អាណត្តិទី៤ សហរដ្ឋអាមេរិក បានផ្ដល់ជំនួយចំនួន ជិត២លានដុល្លារ (១.៨លានដុល្លារ) ក្នុងរយៈពេលពីរឆ្នាំ ដល់គណៈកម្មាធិការជាតិរៀបចំការបោះឆ្នោត (គ.ជ.ប)។ ប៉ុន្តែ ក្រោយពីគ.ជ.ប បានដកហូតអាសនៈជិតពាក់កណ្ដាល របស់តំណាងរាស្ត្រ និងក្រុមប្រឹក្សាជាប់ឆ្នោត តាមច្បាប់ដែលបង្កើតដោយឯកបក្សរបស់គណបក្សកាន់អំណាច សហរដ្ឋអាមេរិក និងសហភាពអឺរ៉ុប បានកាត់ផ្ដាច់រាល់ជំនួយទាំងអស់ ដែលធ្លាប់ផ្ដល់ទៅឲ្យគ.ជ.ប។
សម្រាប់ការបោះឆ្នោត ដែលគ្រោងធ្វើឡើងនៅថ្ងៃទី២៩ ខែកក្កដា ខាងមុខ តាមបញ្ជាមេដឹកនាំរបបក្រុងភ្នំពេញ លោក សោម សូរីដា ឲ្យដឹងថា គ.ជ.បនឹងប្រើប្រាស់ថវិកាជាតិសរុបជាង ៥៣លានដុល្លារ ដោយមិនទាន់គិតពីថវិកាបានមកពីជំនួយរបស់ប្រទេសកុម្មុយនិស្តចិន៕