បេក្ខជន​​ក្រុម​ប្រឹក្សា​​ឃុំ​សង្កាត់​​គណបក្ស​ភ្លើង​ទៀន​​ឃុំ​​ស្វាយ​រលំ​ ​ត្រូវ​​ជន​​មិន​​ស្គាល់​​មុខ​​បួន​​នាក់​​លួច​​វាយ​នឹង​ដំបង

0:00 / 0:00

បេក្ខជន​ក្រុមប្រឹក្សា​ឃុំ​សង្កាត់​គណបក្ស​ភ្លើង​ទៀន​លេខរៀង​ទី​១​ ​នៅ​ឃុំ​ស្វាយ​រលំ​ ​ស្រុក​ស្អាង​ ​ខេត្ត​កណ្តាល​ ​ត្រូវ​បាន​ជន​មិន​ស្គាល់​មុខ​បួន​នាក់​ ​ជិះ​ម៉ូតូ​លួច​វាយ​ពីក្រោយ​នឹង​ដំបង​ ​ក្នុង​ពេល​គាត់​កំពុង​ធ្វើដំណើរ​តាម​ម៉ូតូ​ ​ចេញពី​លើកស្លា​ក​គណបក្ស​នេះ​ ​នៅ​ព្រែក​ហូរ​ ​កាលពី​ល្ងាច​ថ្ងៃ​ទី​​២៧​ ​ខែ​​កុម្ភៈ​។​

បេក្ខជន​ក្រុមប្រឹក្សា​ឃុំ​សង្កាត់​គណបក្ស​ភ្លើង​ទៀន​នៅ​ខេត្ត​កណ្ដាល​ ​ដែល​ត្រូវ​ជន​មិន​ស្គាល់​មុខ​ទាំងបួន​នាក់​ ​លប​វាយនឹងដំបង​នោះ​ ​គឺ​លោក​ ​ម៉ី​ ​សោភ័ណ្ឌ ​អាយុ​ ​២​៧​ ​ឆ្នាំ​ ​ធ្លាប់​ជាសកម្ម​ជន​គណបក្ស​សង្គ្រោះ​ជាតិ​ ​និង​ធ្លាប់​ជាប់​ពន្ធ​គា​រ​៦​ខែ​ ​ដោយសារតែ​ការ​សរសេរ​សារ​រិះគន់​រដ្ឋាភិបាល​លោក​ ​ហ៊ុន​ ​សែន​ ​តាម​ហ្វេសប៊ុក​។​

មន្រ្តី​គណបក្ស​ភ្លើង​ទៀន​ ​ប្រាប់​វិទ្យុ​អាស៊ី​សេរី​ ​កាលពី​យប់​ថ្ងៃ​ទី​​២៧​ ​ខែ​កុម្ភៈ​ ​ថា​សាក្សី​នៅកន្លែង​កើតហេតុ​ ​ស្គាល់​ភិនភាគ​ជនល្មើស​ ​ត្រឹមតែ​ថា ​អ្នក​ទាំងបួន​នោះ​ ​ជា​ក្មេង​ស្ទាវ​ជិះ​ម៉ូតូ​ពីរ​គ្រឿង​ម៉ាក់​ ​អៃស៊្នើរ​ (​Eisner) ​ម្នាក់​ពាក់អាវ​ស​ ​ម្នាក់​ពាក់អាវ​ក្រហម​ ​ម្នាក់ទៀត​ពាក់អាវ​លឿង​ ​និង​អ្នក​ទី​បួន​ពាក់អាវ​ខ្មៅ​។​ ​អ្នក​ទាំងនោះ​បាន​​កាន់ដំបង​វាយ​លោក​ ​ម៉ី​ ​សោភ័ណ្ឌ ​ពីក្រោយ​ ​ធ្វើឲ្យ​បែក​មួក​ការពារ​សុវត្ថិភាព​ ​ប៉ុន្តែ​តែ​មិន​បណ្តាលឲ្យ​របួស​នោះ​ទេ​។​ ​ហេតុការណ៍​នេះ​ ​បាន​កើតឡើង​ ​កាលពី​វេលា​ម៉ោង​ជិត​ ​២​ល្ងាច​ ​ថ្ងៃ​ទី​​២៧​ ​ខែ​កុម្ភៈ​ ​នៅ​ភូមិលេខ​១​ក​ ​សង្កាត់​ស្វាយ​រលំ​ ​ក្រុង​តាខ្មៅ​ ​ខេត្ត​កណ្តាល​។​ ​ភ្លាម​ៗ​ក្រោយ​វាយ​ជនរងគ្រោះ​រួច​ ​ជនល្មើស​បាន​បើក​ម៉ូតូ​គេច​ខ្លួន​បាត់​។​ ​ចំណែក​ជនរងគ្រោះ​ ​គាត់​បាន​ជិះ​ម៉ូតូ​ទៅ​ដាក់​បណ្តឹង​នៅ​ប៉ុស្តិ៍​ប៉ូលីស​សង្កាត់​នោះ​ដែរ​ ​ប៉ុន្តែ​សង្កាត់​បិទទ្វារ​គ្មាន​មន្រ្តី​ប្រចាំការ​ ​ដើម្បី​ទទួល​បណ្តឹង​នោះ​ទេ​។​

លេខាធិការ​គណបក្ស​ភ្លើង​ទៀន​ប្រចាំ​ខេត្ត​កណ្ដាល​លោក​ ​ផុន​ ​សុភា​ ​ថា​លោក​ ​ម៉ី​ ​សោភ័ណ្ឌ ​ជា​មនុស្ស​ស្លូតបូត​ ​មិន​មាន​ទំនាស់​ ​ឬ​គំនុំ​គុំកួន​ជាមួយ​នរណា​នោះ​ទេ​។​ ​លោក​បន្ត​ថា​ លោក​ ​ម៉ី​ ​សោភ័ណ្ឌ ​សកម្ម​ក្នុង​ការងារ​គណបក្ស​ភ្លើង​ទៀន​។​ ​លោក​ ​ផុន​ ​សុភា​ ​ថា​ការ​លប​វាយ​នេះ​ ​អាច​ជា​ផែន​ការរៀបចំ​ទុកជាមុន​របស់​ជនល្មើស​ ​ក្នុង​ន័យ​ធ្វើទុក្ខបុកម្នេញ​ផ្នែក​នយោបាយ​ទៅលើ​សកម្មជន​គណបក្ស​ភ្លើង​ទៀន៖ «ពីមុន​មក​ក៏មាន​សកម្មជន​យើង​ជាច្រើន​ ​ដែល​រង​ការវាយប្រហារ​ ​ហើយ​រកមុខ​អត់​ឃើញ​ដូចគ្នា​ដែរ​។​ ​ហើយ​ម្យ៉ាង​វិញទៀត​ ​មិន​ត្រឹមតែ​សោភ័ណ្ឌ​ក្រុមសកម្ម​ជន​ ​និង​បេក្ខជន​យើង​ជាច្រើន​ ​ដែល​ត្រៀម​ដាក់ឈ្មោះ​ឈរឈ្មោះ​សម្រាប់​គណបក្ស​ភ្លើង​ទៀន​នៅ​តាម​មូលដ្ឋាន​ហ្នឹង​ ​ក៏​រង​ការ​គំរាមកំហែង​ជាច្រើន​ ​ធ្វើឲ្យ​មានការ​ស្មុគ​ស្មាញ​ដល់​ការរៀបចំ​បេក្ខជន​របស់​ពួក​ខ្ញុំ​ខ្លាំង​មែនទែន» ។​

តាំង​ពីក្រោយ​រម្លាយ​គណបក្ស​សង្គ្រោះ​ជាតិ​ ​មន្រ្តី​គណបក្ស​កាន់អំណាច​រង​ការរិះគន់​ ​ថាតាម​លួងលោម​ ​បញ្ចុះបញ្ចូល​ ​ទិញ​ទឹកចិត្ត​ ​និង​គំរាមកំហែង​ផង​ ​ដើម្បីឲ្យ​មន្រ្តី​បក្ស​ប្រឆាំង​ចុះចូល​ជាមួយ​គណបក្ស​នេះ​។​ ​មន្រ្តី​គណបក្សប្រឆាំង​ ​ដែល​នៅ​ក្រាញននៀល​មិនព្រម​ចុះចូល​ជាច្រើន​ ​នាក់​ ​រង​ការ​ធ្វើទុក្ខបុកម្នេញ​គ្រប់រូប​ភាព​ ​តាំងតែពី​ត្រូវ​ចាប់ខ្លួន​ដាក់​ពន្ធ​នាគា​រ​ ​និង​ត្រូវ​ជន​មិន​ស្គាល់​មុខ​លប​វាយ​ឲ្យ​របួស​រហូត​ដល់ស្លាប់​ក៏មាន​ ​ដូច​ករណី​សកម្មជន​គណបក្ស​សង្គ្រោះ​ជាតិ​លោក​ ​ស៊ិន​ ​ខុន​ជាដើម​។​

ឥឡូវនេះ​ ​នៅ​ពេល​ការបោះឆ្នោត​ក្រុមប្រឹក្សា​ឃុំ​សង្កាត់​ជិត​ចូល​មកដល់​ ​ការ​ធ្វើទុក្ខបុកម្នេញ​សកម្មជន​បក្ស​ប្រឆាំង​នេះ​ ​កាន់តែ​កម្រើក​ឡើង​នៅ​ទូទាំង​ប្រទេស​។​ ​ប្រធាន​ស្ដីទី​គណបក្ស​ភ្លើង​ទៀន​ជាតិ​លោក​ ​ថា​ច់ ​សេដ្ឋា​ ​ថា​លោក​កំពុង​ព្រួយបារម្ភ​ ​អំពី​សុវត្ថិភាព​សកម្មជន​គណបក្ស​ភ្លើង​ទៀន​ ​និង​បរិយាកាស​អាប់អួ​រ​នៅមុន​ការបោះឆ្នោត​ ​ដោយសារតែ​អំពើ​និ​ទណ្ឌ​ភាព​ ​ឬ​ការប្រព្រឹត្តល្មើស​លើ​សកម្មជន​គណបក្សប្រឆាំង​ ​ប៉ុន្តែ​ជនល្មើស​នៅតែ​បន្ត​រួចខ្លួន​បែប​នេះ​៖ «ថ្ងៃនេះ​យើង​ឃើញ​មានការ​លប​វ៉ៃ​ដោយ​ចេញមុខ​នេះ​ ​ដែល​យើង​ឃើញ​ជាក់ស្ដែង​ ​ហើយ​ថ្ងៃនេះ​ផង​ដែរ​ ​ក៏​នៅ​ខាង​ត្បូងឃ្មុំ​មាន​ទាំង​ប៉ូលីស​ ​ទៅ​ឆាឆៅ​នៅ​ក្នុង​ពិធី​ប្រជុំ​ជួបជុំ​របស់​គណបក្ស​ភ្លើង​ទៀន​ផង​ដែរ»។​

ជុំវិញ​រឿង​នេះ​ ​វិទ្យុ​អាស៊ី​សេរី​ ​មិនទាន់​អាច​សុំ​ការ​បំភ្លឺ​ពី​អ្នកនាំពាក្យ​ក្រសួងមហាផ្ទៃ​លោក​ ​ខៀវ​ ​សុភ័គ​ ​និង​អ្នកនាំពាក្យ​អគ្គស្នងការ​នគរបាល​ជាតិ​លោក​ ​ឆាយ​ ​គឹម​ឃឿន​ ​បាន​នៅឡើយ​ទេ​។​

ចំណែក​ឯមន្រ្តី​អង្គការសង្គម​ស៊ីវិល​ផ្នែក​ឃ្លាំមើល​សិទ្ធិមនុស្ស​ឯណោះ​វិញ​ ​លោក​មិន​ភ្ញាក់ផ្អើល​ទេ​ចំពោះ​អំពើ​ហិង្សា​លើ​សកម្មជន​បក្ស​ប្រឆាំង​ ​ព្រោះ​នេះ​មិនមែន​ជា​រឿង​ថ្មី​នោះ​ឡើយ​។​ ​ប្រធាន​អង្គការ​សម្ពន្ធភាព​ការពារ​សិទ្ធិមនុស្ស​កម្ពុជា​ ​ហៅ​កាត់​ថា​ ច្រាក់ (CHRAC) ​លោក​ ​រស់​ សុដ្ឋា ​ថា​រឿង​បែប​នេះ​កើតឡើង​ដដែល​ៗ​ ​ដែល​ធ្វើឲ្យ​លោក​យល់ថា​ ​អាច​ជា​អំពើ​របស់​ក្រុម​ដែល​មាន​ការចាត់តាំង​ច្បាស់លាស់​ ​ដើម្បី​ធ្វើទុក្ខបុកម្នេញ​សំឡេង​ប្រឆាំង៖ «វា​ហាក់ដូចជា​មាន​គេ​ហៅ​ក្រុម​ងងឹត​មួយ​ក្រុមក្នុង​សង្គម​យើង​ ​ខ្ញុំ​មានការ​ព្រួយបារម្ភ​ដែរ​។​ ​ហើយ​វា​មាន​ក្រុម​បាតដៃ​ទីបី​នោះ​ទៀត​។​ ​ស្ថានភាព​នយោបាយ​របស់យើង​ហ្នឹង​ ​គឺ​មិនទាន់​កក់ក្ដៅ​ទេ​ ​នៅ​ក្នុង​ការ​ព្រួយបារម្ភ​នៅឡើយ​ ​តាមដែល​ខ្ញុំ​ពិនិត្យមើល»។​

​ថ្មីៗ​នេះ​ទាំង​រដ្ឋ​មន្រ្តី​ក្រសួងមហាផ្ទៃ​លោក​ ​ស​ ​ខេង​ ​និង​លោកនាយក​រដ្ឋ​មន្រ្តី ​ហ៊ុន​ ​សែន​ ​សុទ្ធតែ​បាន​ប្រកាស​ជា​សាធារណៈ​ ​ដូចជា​ចង់​បង្ហាញ​ ​ថា​ពួកគាត់​ចង់ឲ្យ​បរិយាកាស​បោះឆ្នោត​ខាងមុខ​ ​ប្រព្រឹត្តទៅ​ដោយល្អ​ ​និង​គ្មាន​ការ​ធ្វើទុក្ខបុកម្នេញ​សំឡេង​ប្រឆាំង​។​ ​ប៉ុន្តែ​លោក​ ​ថា​ច់ ​សេដ្ឋា​ ​ថា​ដើម្បីកុំឲ្យ​សារ​នោះ​ ​គ្រាន់តែ​ធ្វើឲ្យ​ល្អមើល​ ​បែប​ប្រជាភិថុតិ​ ​ឬ​ដើម្បី​គ្រាន់តែ​ចង់​បំភាន់​ភ្នែក​មហាជន​ខ្មែរ​ ​និង​អន្តរជាតិ​ ​គឺ​ទាល់តែ​ថ្នាក់​ដឹកនាំ​រដ្ឋាភិបាល​ ​ចាត់ការ​ទៅលើ​ជន​ទាំងឡាយ​ណា​ដែល​បាន​ធ្វើទុក្ខបុកម្នេញ​លើ​សកម្មជន​បក្ស​ប្រឆាំង​ ​ដោយ​វែកមុខ​រក​ជន​នោះ​ឲ្យ​ឃើញ​ ​និង​ដាក់ទោសទណ្ឌ​ជាកំហិត​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។