មន្ត្រីសង្គមស៊ីវិល ស្នើដល់តុលាការពន្លឿនសំណុំរឿង កញ្ញា សេង ធារី ដែលជាប់គាំងជាង ១ឆ្នាំនៅសាលាឧទ្ធរណ៍ភ្នំពេញ ដើម្បីផ្តល់យុត្តិធម៌ និងដោះលែងកញ្ញាឱ្យមានសេរីភាពឡើងវិញ។ ពួកគេយល់ថាការអូសបន្លាយសំណុំរឿងនេះនៅសាលាឧទ្ធរណ៍អាចធ្វើឱ្យប៉ះពាល់ដល់សិទ្ធិជនជាប់ចោទ។
មន្ត្រីសង្គមស៊ីវិលលើកឡើងថា សាលាឧទ្ធរណ៍ភ្នំពេញគួរពន្លឿននីតិវិធី និងទម្លាក់ចោលការចោទប្រកាន់គ្មានមូលដ្ឋានលើសកម្មជនសិទ្ធិមនុស្សកញ្ញា សេង ធារី ដែលកំពុងជាប់ពន្ធនាគារជាង១ឆ្នាំ ដោយគ្រាន់តែការអនុវត្តសិទ្ធិសេរីភាពជាមូលដ្ឋានរបស់ពលរដ្ឋធានាដោយច្បាប់ជាតិនិងអន្តរជាតិ។
ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា កត់សម្គាល់ថា ដំណើរការសំណុំរឿងរបស់សកម្មជនសិទ្ធិមនុស្ស ឬសកម្មជនផ្សេងទៀតអាចដំណើរការលឿន ឬយឺតអាស្រ័យបរិយាកាសនយោបាយរវាងគណបក្សប្រឆាំងនិងបក្សកាន់អំណាចក្នុងការដោះស្រាយវិបត្តិនយោបាយ។ ប៉ុន្តែលោកមើលឃើញថា ស្ថានភាពនយោបាយតានតឹងដូចសព្វថ្ងៃនេះវាសនារបស់អ្នកជាប់ទាំងនោះនឹងបន្តជាប់ពន្ធនាគារ ហើយពួកគេក៏មិនសូវទទួលបានជំនុំជម្រះឱ្យបានឆាប់ និងប្រកបដោយយុត្តិធម៌ឡើយ។
លោក នី សុខា៖ «សំណុំគួរតែបានស៊ើបអង្កេតបានពេញលេញ ឬបានស៊ើបមូលក្នុងដំណាក់កាលនៃការស៊ើបអង្កេតរបស់សាលាដំបូង ដូច្នេះមូលហេតុអ្វីបានទេសាលាឧទ្ធរណ៍មានពន្យារពេល មានការអូសបន្លាយពេលវេលានៅក្នុងការបើសាវនាការចំពោះករណីកញ្ញា សេង ធារី នេះជារឿងមួយដែលវាកំពុងមានការរំលោភលើគោលការណ៍នៃការទទួលបានការជំនុំជម្រះមួយដោយយុត្តិធម៌ឆាប់រហ័ស ឬក៏ទទួលបានយុត្តិធម៌»។
សមត្ថកិច្ចក្រុងភ្នំពេញ បានចាប់ខ្លួនកញ្ញា សេង ធារី កាលពីថ្ងៃទី១៤ ខែមិថុនា ឆ្នាំ២០២២ នៅខាងមុខតុលាការក្រុងភ្នំពេញ ក្រោយតុលាការប្រកាសសាលក្រមកាត់ទោសឲ្យកញ្ញាជាប់ពន្ធនាគារ ៦ឆ្នាំពីបទចោទរួមគំនិតក្បត់ក្នុងសំណុំរឿងវិលចូលស្រុករបស់លោក សម រង្ស៊ី កាលពីឆ្នាំ២០១៩។ មួយថ្ងៃបន្ទាប់មកតុលាការបានបញ្ជូនកញ្ញាទៅឃុំខ្លួននៅពន្ធនាគារខេត្តព្រះវិហារនៅឆ្ងាយពីបងប្អូននិងមិត្តភក្ដិជាដើម។ ប៉ុន្តែកាលពីថ្ងៃទី២៣ ខែកញ្ញា អាជ្ញាធរបានផ្ទេរសកម្មជនសិទ្ធិមនុស្សរូបនេះទៅឃុំខ្លួននៅពន្ធនាគារព្រៃស ឬមណ្ឌលអប់រំកែប្រែទី២ ក្នុងរាជធានីភ្នំពេញវិញ ក្រោយលោកនាយករដ្ឋមន្ត្រី ហ៊ុន ម៉ាណែត បានជួបជាមួយមន្ត្រីសហរដ្ឋអាមេរិកផ្ទួនៗគ្នាទាំងនៅក្នុងប្រទេសកម្ពុជានិងនៅលើទឹកដីអាមេរិក។
វិទ្យុអាស៊ីសេរីមិនអាចទាក់ទងអ្នកនាំពាក្យសាលាឧទ្ធរណ៍ភ្នំពេញលោក ប្លង់ សំណាង និងអ្នកនាំពាក្យក្រសួងយុត្តិធម៌លោក ជិន ម៉ាលីន ដើម្បីសាកសួររឿងនេះបានទេនៅថ្ងៃទី០៣ ខែវិច្ឆិកា។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ (Licadho) លោក អំ សំអាត មានប្រសាសន៍ថាទោះបីនីតិវិធីមិនបានកំណត់ថេរវេលាជាក់លាក់ទាក់ទងនឹងការបើកសវនាការក្រោយប្តឹងជំទាស់សាលក្រមសាលាដំបូង នៅសាលាឧទ្ធរណ៍យ៉ាងណាក្តី តែគោលការណ៍ច្បាប់អន្តរជាតិដែលកម្ពុជាទទួលស្គាល់នោះតម្រូវឱ្យសវនាការនៅតុលាការត្រូវធ្វើឡើងឱ្យបានឆាប់រហ័ស ដើម្បីកុំឱ្យប៉ះពាល់ដល់សិទ្ធិ និងផលប្រយោជន៍របស់ជនជាប់ចោទ។
លោក អំ សំអាត៖ «ខ្ញុំយល់ឃើញថា ករណីនេះគួរតែដោះលែងកញ្ញា សេង ធារី ឱ្យមានសេរីភាពពេញលេញឡើងវិញ ដើម្បីបន្ធូរបន្ថយបរិយាកាសនយោបាយនៃលំហសេរីភាពជាមូលដ្ឋាន និងលំហសេរីភាពផ្នែកនយោបាយហ្នឹងដើម្បីបង្ហាញឱ្យឃើញថា កម្ពុជារបស់យើងមានឆន្ទៈក្នុងការកែលម្អ ឬដោះស្រាយលើលំហលទ្ធិប្រជាធិបតេយ្យ និងសិទ្ធិមនុស្សផងនោះបាទ»។
កាលពីពេលថ្មីៗនេះ សហរដ្ឋអាមេរិកបានជំរុញឱ្យលោក ហ៊ុន ម៉ាណែត និងរដ្ឋាភិបាលថ្មីបើកលំហសិទ្ធិសេរីភាពពលរដ្ឋវិញដើម្បីធានាថា ពលរដ្ឋខ្មែរទាំងអស់អាចចូលរួមបានដោយសេរីក្នុងដំណើរការនយោបាយ ហើយដោះលែង សកម្មជននយោបាយ រួមទាំងសកម្មជនសិទ្ធិមនុស្សសញ្ជាតិ-ខ្មែរអាមេរិកកាំង គឺកញ្ញា សេង ធារី ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។