អាជ្ញាធរខេត្តបន្ទាយមានជ័យបានដោះលែងសកម្មជនគណបក្សសង្គ្រោះជាតិស្រុកថ្មពួក លោក រ័ត្ន សុធី វិញហើយ នៅរសៀលថ្ងៃទី១០ ធ្នូ បន្ទាប់ពីចាប់ឃុំខ្លួនលោកនៅអគ្គស្នងការដ្ឋាននគរបាលជាតិអស់មួយយប់។ មន្ត្រីសង្គមស៊ីវិល ចាត់ទុករឿងនេះថា ជាការធ្វើទុក្ខបុកម្នេញផ្នែកនយោបាយ។
មន្ត្រីជាន់ខ្ពស់គណបក្សសង្គ្រោះជាតិ ដែលស្និទ្ធនឹងលោក កឹម សុខា គឺលោក មាជ សុវណ្ណារ៉ា ប្រាប់អាស៊ីសេរីនៅរសៀលថ្ងៃទី១០ ធ្នូថា ប៉ូលិសនៅនាយកដ្ឋានបច្ចេកវិទ្យានៃអគ្គស្នងការដ្ឋាននគរបាលជាតិ បានសាកសួរលោក រ័ត្ន សុធី អំពីការបង្ហោះសារនៅក្នុងហ្វេសប៊ុក ក៏ប៉ុន្តែលោកមិនដឹងខ្លឹមសារអ្វីនោះទេ។ លោកប្រាប់ថា ប៉ូលិសបានដោះលែងលោក រ័ត្ន សុធី វិញ នៅរសៀលថ្ងៃទី១០ ធ្នូ ប៉ុន្តែបានដាក់សកម្មជនរូបនេះ ឱ្យស្ថិតនៅក្រោមការត្រួតពិនិត្យ របស់អាជ្ញាធរ និងហាមឃាត់មិនឱ្យធ្វើដំណើរចេញក្រៅប្រទេស។ លោកចាត់ទុករឿងនេះ ថា ជាអំពីអយុត្តិធម៌ និងជាការគំរាមកំហែងបំបាក់ស្មារតីសកម្មជនគណបក្សប្រឆាំង៖ «ដល់អីចឹងខ្ញុំមើលឃើញថា អានេះជាការគំរាមកំហែងបំភិតបំភ័យ ចង់បង្ហាញថា ឱ្យសកម្មជននយោបាយបក្សប្រឆាំងដទៃទៀត មានការខ្លាចរអា វាជារឿងដែលយើងមិនអាចទទួលយកបានទេ។ សមត្ថកិច្ចគួរតែត្រូវដឹងថាអ្នកណា ដែលបង្កបញ្ហាអ្នកណាដែលមិនបង្កបញ្ហា យើងមិនត្រូវចាប់ដោយគ្មានហេតុផលតាមតែអំពើចិត្ត ហើយយើងទៅបានមកដោះលែងគេ។ អាហ្នឹងវាធ្វើឱ្យគេខាតពេលវេលា ធ្វើឱ្យគេហ្នឹងមានវិប្បដិសារីអ្វី ដែលគេមិនបានធ្វើខុស » ។
លោក មាជ សុវណ្ណារ៉ា ឱ្យដឹងថា ក្រោយពីដោះលែង លោក រ័ត្ន សុធី បន្តស្នាក់នៅរាជធានីភ្នំពេញមួយយប់ ហើយគាត់នឹងធ្វើដំណើរទៅខេត្តបន្ទាយមានជ័យវិញនៅព្រឹកថ្ងៃទី១១ ធ្នូ។
អាស៊ីសេរីមិនអាចទាក់ទងលោក រ័ត្ន សុធី ដើម្បីសាកសួរអំពីករណីអាជ្ញាធរចាប់ខ្លួនលោកនេះបានទេ នៅថ្ងៃទី១០ ធ្នូ។
សកម្មជនគណបក្សសង្គ្រោះជាតិស្រុកថ្មពួក លោក រ័ត្ន សុធី ត្រូវបានប៉ូលិសខេត្តបន្ទាយមានជ័យ សហការជាមួយក្រសួងមហាផ្ទៃចាប់ខ្លួននៅស្រុកថ្មពួក កាលពីម៉ោង ៣រសៀលថ្ងៃទី៩ ធ្នូ និងបានបញ្ជូនទៅឃុំខ្លួននៅអគ្គស្នងការដ្ឋាននគរបាលជាតិ នៅឯក្រុងភ្នំពេញ។ ការចាប់ខ្លួននេះ បន្ទាប់ពីលោក រ័ត្ន សុធី បានសរសេរសារបង្ហោះនៅក្នុងហ្វេសប៊ុករបស់លោកថា សូមឱ្យប្រជាពលរដ្ឋរង់ចាំតាមដានទាំងអស់គ្នានៅថ្ងៃទី៤ មករាឆ្នាំ២០២១ ខាងមុខ។ ថ្ងៃទី៤ មករា ឆ្នាំ២០២១ នោះ គឺជាពេលវេលា ដែលថ្នាក់ដឹកនាំគណបក្សសង្គ្រោះជាតិប្រកាសវិលត្រឡប់ទៅកម្ពុជាជាថ្មីម្ដងទៀត ដើម្បីតតាំងក្តីនៅតុលាការ។ លោក រ័ត្ន សុធី សរសេរបន្ថែមថា សូមឱ្យពលរដ្ឋចូលរួមបញ្ចេញមតិ និងរិះគន់អ្នកប្រកួត ដើម្បីស្ថាបនាទាំងអស់គ្នា។
អាស៊ីសេរីមិនអាចទាក់ទងអ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន ដើម្បីសុំអត្ថាធិប្បាយជុំវិញបញ្ហានេះបានទេនៅថ្ងៃទី១០ ធ្នូ ដោយទូរស័ព្ទចូលជាច្រើនដងពុំមានអ្នកទទួល។
លោក រ័ត្ន សុធី ជាសកម្មជនគណបក្សសង្គ្រោះជាតិ ដែលតែងបង្ហោះសារលើហ្វេសប៊ុក រិះគន់រដ្ឋាភិបាលជាបន្តបន្ទាប់។ លោកនាយករដ្ឋមន្ត្រី ហ៊ុន សែន ធ្លាប់ព្រមានចាប់ខ្លួនលោកចំនួន ២លើករួចមកហើយ។ ដោយលើកចុងក្រោយ លោក ហ៊ុន សែន បានប្រកាសនៅក្នុងពិធីចែកកូនត្រីដល់ប្រជាពលរដ្ឋនៅខេត្តព្រៃវែង កាលពីថ្ងៃទី១៤ កក្កដា ឆ្នាំ២០២០ ថា សំណាងហើយលោក រ័ត្ន សុធី ដែលលោកមិនបញ្ជាឱ្យអាជ្ញាធរចាប់ខ្លួន។ លោក ហ៊ុន សែន លើកឡើងបែបនេះ ដោយសារនៅពេលនោះ លោក រ័ត្ន សុធី រិះគន់ថា រដ្ឋាភិបាលយកប្រាក់ជំនួយពីសហភាពអឺរ៉ុប បើកឱ្យប្រជាពលរដ្ឋក្រីក្រដែលរងផលប៉ះពាល់ពីវិបត្តិជំងឺកូវីដ។
ទាក់ទងរឿងនេះ អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា មានប្រសាសន៍ថា ការបង្ហោះសារបែបនេះមិនខុសច្បាប់ឡើយ ពីព្រោះជាសិទ្ធិសេរីភាពសម្ដែងមតិរបស់ប្រជាពលរដ្ឋ ស្របតាមរដ្ឋធម្មនុញ្ញ។ លោកហៅការចាប់ខ្លួន ហើយដោះលែងវិញនេះថា បំភិតបំភ័យផ្នែកនយោបាយ៖ «អីចឹងចង់ទទួលឱ្យខាងរដ្ឋាភិបាលពិចារណា ឬក៏ខាងសមត្ថកិច្ចនិងអ្នកដែលអនុវត្តច្បាប់ហ្នឹង សូមពិនិត្យមើលទៅការប្រព្រឹត្តជន ដែលទទួលរងការធ្វើទុក្ខបុកម្នេញហ្នឹងឡើងវិញ ព្រោះអាហ្នឹង ការដែលចេះតែបកស្រាយយល់ឃើញហ្នឹងវាធ្វើឱ្យរងគ្រោះឬធ្វើឱ្យបាត់បង់នូវសិទ្ធិសេរីភាព ឬក៏រំលោភទៅលើសិទ្ធិសេរីភាពរបស់ពលរដ្ឋដែលរស់នៅក្នុងសង្គមប្រជាធិបតេយ្យ » ។
គិតពីចុងឆ្នាំ២០១៩ រហូតដល់ចុងឆ្នាំ២០២០ នេះ អាជ្ញាធរចាប់ខ្លួនសកម្មជន និងអ្នកគាំទ្រគណបក្សសង្គ្រោះជាតិប្រមាណ ១០០នាក់ ដាក់ពន្ធនាគារ ដោយចោទប្រកាន់ពួកគេពីបទរួមគំនិតក្បត់ និងញុះញង់។ មនុស្សមួយចំនួនត្រូវបានដោះលែងឱ្យនៅក្រៅឃុំ ប៉ុន្តែខ្លះទៀតកំពុងជាប់ពន្ធនាគារនៅឡើយ។ ក្រៅពីនេះ របបលោក ហ៊ុន សែន បានចាប់ខ្លួនអ្នកការពារសិទ្ធិមនុស្ស សកម្មជនសង្គម និងបរិស្ថាន ព្រះសង្ឃខ្មែរថាវរៈ យុវជន និងពលរដ្ឋ យ៉ាងហោចណាស់ជិត ២០នាក់ ដាក់ពន្ធនាគារដោយចោទពួកគេពីបទញុះញង់ ក្រោយពីពួកគេបញ្ចេញមតិរិះគន់រដ្ឋាភិបាល និងប្រមូលផ្តុំគ្នាទាមទារឱ្យមានយុត្តិធម៌សង្គម។
អង្គការសង្គមស៊ីវិលជាតិនិងអន្តរជាតិជាច្រើនស្ថាប័ន រួមទាំងទីភ្នាក់ងារអង្គការសហប្រជាជាតិទទួលបន្ទុកផ្នែកសិទ្ធិមនុស្សផង បានថ្កោលទោសនឹងការចាប់ខ្លួននេះថា ជារឿងនយោបាយ និងស្នើឱ្យរដ្ឋាភិបាលដោះលែងពួកគេឱ្យមានសេរីភាពវិញ ហើយបើកឱ្យប្រជាពលរដ្ឋបានជួបជុំសម្ដែងមតិដូចដែលមានចែងនៅក្នុងរដ្ឋធម្មនុញ្ញឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។