មេដឹកនាំបាតុកម្មនៅប្រទេសជប៉ុនអំពាវនាវដល់ពលករខ្មែរ និងពលរដ្ឋខ្មែររស់នៅប្រទេសជប៉ុន ត្រៀមខ្លួនក្នុងការចូលរួមធ្វើបាតុកម្មប្រឆាំងរបបក្រុងភ្នំពេញនៅថ្ងៃទី១២ ខែសីហាខាងមុខ ។ ប៉ុន្តែអ្នកនាំពាក្យគណបក្សប្រជាជនកម្ពុជា យល់ថា បាតុកម្មនេះគ្មានឥទ្ធិពលអ្វីដល់របបក្រុងភ្នំពេញនោះទេ។
មេដឹកនាំបាតុកម្មប្រឆាំងរបបក្រុងភ្នំពេញ នៅប្រទេសជប៉ុន អះអាងថា ការធ្វើបាតុកម្មជាថ្មីនៅថ្ងៃទី១២ ខែសីហាខាងមុខនេះ គឺជាការតស៊ូមតិក្នុងនាមជាពលរដ្ឋខ្មែរ ដើម្បីឲ្យមានការផ្លាស់ប្តូរជាវិជ្ជមាននៅកម្ពុជា និងជាការជំរុញឲ្យប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ២៣តុលាជួយជ្រោមជ្រែងស្តារលទ្ធិប្រជាធិបតេយ្យនៅកម្ពុជាឡើងវិញ។
ប្រធានចលនាយុវជនសង្គ្រោះជាតិ នៅប្រទេសជប៉ុន លោក ហៃ វណ្ណា បង្ហោះវីដេអូតាមបណ្តាញហ្វេសប៊ុកថ្ងៃទី៤ ខែសីហា ប្រាប់ទៅពលរដ្ឋខ្មែរ ដែលគ្រោងចូលរួមបាតុកម្មនេះ ឲ្យត្រៀមឆ័ត្រ ទឹក និងម្ហូបអាហារមកជាមួយផង ក្នុងពេលធ្វើបាតុកម្មនេះ។ លោកឲ្យដឹងទៀតថា តាមគម្រោងបាតុកម្មនេះ ចាប់ផ្តើមពីម៉ោង ១០ព្រឹកដល់ម៉ោង ១២ថ្ងៃត្រង់ ដែលជាការធ្វើវេទិកាសាធារណៈ ចំណែកនៅពេលរសៀល ក្រុមបាតុករនឹងដើរហែក្បួនពីម៉ោង ២ ដល់ម៉ោង ៣រសៀល៖ «ដោយសារការធ្វើបាតុកម្មហ្នឹង យើងធ្វើចំពេលរដូវក្តៅនៅប្រទេសជប៉ុន អ៊ីចឹងខ្ញុំសូមអំពាវនាវដល់បងប្អូនប្រជាពលរដ្ឋខ្មែរដែលគ្រោងចូលរួមយកទឹកមកជាមួយ ដោយសារក្រុមការងារខ្វះខាតថវិកាមិនមានថវិកាគ្រប់គ្រាន់រៀបចំអាហារថ្ងៃត្រង់ជូនបងប្អូន សូមឲ្យបងប្អូនត្រៀមខ្លួនយកអាហាររៀងៗ ខ្លួនមក»។
លោក ហៃ វណ្ណា ស្នើសុំដល់ពលរដ្ឋខ្មែរនៅប្រទេសជប៉ុនទាំងអស់ ចូលរួមការតវ៉ានេះឲ្យបានច្រើន កុះករ ដើម្បីទាមទារតម្លៃពិតនៃលទ្ធិប្រជាធិបតេយ្យ និងជាសារប្រាប់ទៅរបបក្រុងភ្នំពេញឲ្យងាកមកគោរពសិទ្ធិមនុស្ស និងប្រជាធិបតេយ្យឡើងវិញ។ មេដឹកនាំបាតុកម្មប្រឆាំងរបបក្រុងភ្នំពេញរូបនេះ សង្កត់ធ្ងន់ថា ពលករខ្មែរ ឬពលរដ្ឋខ្មែរនៅជប៉ុន ត្រូវគិតថា ពួកគេមករស់នៅទីនេះ ដើម្បីធ្វើការបានលុយផ្ញើទៅឪពុកម្តាយនៅស្រុកកំណើតតែមួយមុខ គឺមិនទាន់គ្រប់គ្រាន់ទេ ប៉ុន្តែ ពួកគេត្រូវនាំគ្នាធ្វើការទាមទារ ដើម្បីជំរុញឲ្យមានការផ្លាស់ប្តូរជាវិជ្ជមាននៅកម្ពុជាបន្ថែមទៀត៖ «ប្រសិនបើបងប្អូននៅតែគិតថា ចង់មានការផ្លាស់ប្តូរ ចង់ឲ្យសង្គមជាតិយើងមានការរីកចំរើនពិតប្រាកដមានលទ្ធិប្រជាធិបតេយ្យបងប្អូនត្រូវតែគិតឲ្យបានវែងឆ្ងាយ មិនមែនត្រឹមតែទទួលបានការផ្តល់សេវាកម្មល្អៗ ពីមន្រ្តីទូតខ្មែរនៅប្រទេសហ្នឹង មិនអាចធ្វើឲ្យមានអ្វីល្អៗ នៅកម្ពុជាទេ។ អ៊ីចឹង បើសិនជាយើងចង់ឲ្យការប្រសើរឡើងនៅកម្ពុជា យើងត្រូវតែបន្តតស៊ូមតិទាំងអស់គ្នា ហើយត្រូវសហការណ៍គ្នាជាមួយអ្នកលទ្ធិប្រជាធិបតេយ្យនៅប្រទេសជប៉ុន»។
នេះមិនមែនជាលើកទីមួយទេ ដែលពលរដ្ឋខ្មែរនៅជប៉ុន ដែលភាគច្រើនជាយុវជននាំគ្នាធ្វើបាតុកម្មប្រឆាំងរបបក្រុងភ្នំពេញ ដោយសារពួកគេមិនពេញចិត្តចំពោះការរំលោភសិទ្ធិមនុស្សធ្ងប់ធ្ងរ និងរបៀបដឹកនាំប្រទេសលម្អៀងជ្រុលនឹងរកប្រទេសកុម្មុយនិស្តចិនរបស់ក្រុមលោក ហ៊ុន សែន។ អ្នកឃ្លាំមើលសង្គមយល់ថា បាតុកម្មនេះនឹងធ្វើឱ្យរបបក្រុងភ្នំពេញបាក់មុខនៅលើឆាកអន្តរជាតិ។
ទោះជាយ៉ាងណា អ្នកនាំពាក្យគណបក្សប្រជាជនកម្ពុជា លោក សុខ ឥសាន យល់ថា បាតុកម្មនេះគ្មានឥទ្ធិពលអ្វីមកលើរដ្ឋាភិបាលកម្ពុជានោះទេ។ លោកនៅតែថ្លែងការពារដដែលៗ ថា ប្រទេសកម្ពុជាក្រោមការដឹកនាំ របស់គណបក្សប្រជាជនកម្ពុជា កំពុងមានសន្តិភាពពេញលេញ ហើយចំពោះរូបលោកផ្ទាល់ កំពុងវាយកូនហ្គោលយ៉ាងសប្បាយចិត្ត៖ «រឿងលោក ហៃ វណ្ណា ប្រធានចលនាយុវជនសង្គ្រោះជាតិនៅប្រទេសជប៉ុនធ្វើច្រើនដងមកហើយ អត់បានការអីទាំងអស់ យើងមិនមានការចាប់អារម្មណ៍អីទេ គាត់ធ្វើអីក៏ធ្វើទៅ » ។
ទោះបីជារបបក្រុងភ្នំពេញកំពុងប្រកាសក្តែងៗ ថា ខ្លូនគោរពសិទ្ធិមនុស្ស និងប្រជាធិបតេយ្យយ៉ាងណាក្តី ក៏សហភាពអឺរ៉ុប និងសហរដ្ឋអាមេរិក កំពុងដាក់ទណ្ឌជាបណ្តើៗ ហើយលើក្រុមមេដឹកនាំ របបនេះ ដោយសារតែទង្វើរំលោភសិទ្ធិ និងប្រជាធិបតេយ្យយ៉ាងធ្ងន់ធ្ងររបស់ពួកគេ។
ទន្ទឹមនឹងការដាក់ទណ្ឌកម្មពីក្រុមប្រទេសលោកខាងលិចនេះ ពលរដ្ឋខ្មែរនៅប្រទេសជប៉ុន និងប្រទេសប្រជាធិបតេយ្យដទៃទៀត តែងនាំគ្នាធ្វើបាតុកម្មប្រឆាំងនឹងរបបក្រុងភ្នំពេញ ដើម្បីទាមទារឲ្យរបបនេះ ស្តារប្រជាធិបតេយ្យ និងរៀបចំការបោះឆ្នោតឡើងវិញដែលមានគណបក្សសង្គ្រោះជាតិចូលរួមប្រកួតប្រជែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។