ប្រពន្ធសកម្មជនបក្សប្រឆាំង លោក វឿង សំណាង គឺលោកស្រី ទៀង ចិន្តា បដិសេធទទួលយកការចោទប្រកាន់របស់តំណាងអយ្យការថា ប្ដីលោកស្រីបានប្រព្រឹត្តបទឧក្រិដ្ឋ។ លោកស្រីចាត់ទុកថាការចោទប្រកាន់របស់តុលាការនេះ នឹងអាចបំផ្លាញដល់អនាគតកូនរបស់លោកស្រី។ ការលើកឡើងនេះ ធ្វើឡើងបន្ទាប់ពីសាលាដំបូងរាជធានីភ្នំពេញនៅថ្ងៃទី២៧ ខែកញ្ញា បានបើកសវនាការលើសកម្មជនបក្សប្រឆាំង លោក រឿន វាសនា និងលោក វឿង សំណាង ពាក់ព័ន្ធនឹងបទចោទរួមគំនិតក្បត់ និងបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម ជាមួយនឹងមួយលោក សម រង្ស៉ី និងថ្នាក់ដឹកនាំគណបក្សប្រឆាំងនៅក្រៅប្រទេសដទៃទៀត។
ក្រោយចេញពីសវនាការមេធាវី ដែលការពារក្ដីសកម្មជនបក្សប្រឆាំង លោក សំ សុគង់ បានឱ្យដឹងថា ភស្តុតាងដែលតំណាងអយ្យការចោទប្រកាន់ទៅលើកូនក្ដីរបស់លោកទាំងពីរនោះ គឺការបង្ហោះសារនៅតាមបណ្ដាញសង្គមហ្វេសប៊ុក (Facebook) ជុំវិញការប្រើពាក្យវោហារសាសន៍នយោបាយរវាងថ្នាក់ដឹកដឹកនាំបក្សប្រឆាំងនៅក្រៅប្រទេស ជាមួយនឹងអតីតលោកនាយករដ្ឋមន្ត្រី ហ៊ុន សែន ទាក់ទិននឹងការទិញសញ្ជាតិពីប្រទេសស៊ីប (Cyprus)។
លោក សំ សុគង់ ៖«ពួកគាត់ទាំងពីរនាក់ បើយើងមើលភស្តុតាងដូចមិនមានការពាក់ព័ន្ធ ដោយសារពួកគាត់បានបដិសេធនៅពេលសួរដេញដោលថា អាខោនហ្វេសប៊ុកដែលគេយកមកចោទប្រកាន់គាត់ហ្នឹង គឺជាអាខោនមួយដែលអ្នកដទៃយកទៅប្រើរបស់គាត់ ហើយទីពីរខ្ញុំគិតថាអ្វីដែលជាការលើកឡើងទាក់នឹងបញ្ហាហ្នឹង យើងគិតថាជាយើងថ្នាក់ដឹកនាំនៅក្រៅប្រទេសគាត់ធ្វើពាក់ព័ន្ធនឹងការបញ្ចេញមតិយោបល់បែបវោហារសាសន៍នយោបាយពេលនោះ»។
លោក សំ សុគង់ ថា លោកនៅតែបដិសេធការចោទប្រកាន់នេះដោយសារតែគណនីហ្វេសប៊ុកដែលយកមកចោទប្រកាន់នោះ មិនមែនជារបស់កូនក្ដីលោកនោះទេ។ លោក សំ សុគង់ ស្នើដល់តុលាការពិនិត្យភស្តុតាងឱ្យបានជាក់លាក់ និងទម្លាក់ការចោទប្រកាន់លើកូនក្ដីរបស់លោកនៅថ្ងៃប្រកាសសាលក្រម ថ្ងៃទី៩ ខែតុលា ឆ្នាំ ២០២៣ ខាងមុខ។
ជុំវិញរឿងនេះ លោកស្រី ទៀង ចិន្តា ដែលត្រូវជាប្រពន្ធ អតីតចៅសង្កាត់រងទី២ របស់គណបក្សសង្គ្រោះជាតិ គឺលោក លោក វឿង សំណាង បានឱ្យដឹងថា លោកស្រីមិនអាចទទួលយកបានទេចំពោះការចោទប្រកាន់ដែលមិនពិត ហើយក្នុងសវនាការប្ដីលោកស្រីក៏បានស្រែកអយុត្តិធម៌ផងដែរ។ លោកស្រី ទៀង ចិន្តា បន្តថា មូលហេតុដែលមិនអាចទទួលយកបានគឺតំណាងអយ្យការ លោក លឹម ប៊ុនហេង បានយកភស្តុតាងដែលមិនជាក់លាក់ក្នុងទូរស័ព្ទ ក្រោយចាប់ខ្លួនប្ដីលោកស្រី។
លោកស្រី ទៀង ចិន្តា៖ «ខ្ញុំមិនអាចទទួលយកបានទេ នេះគឺជារឿងអយុត្តិធម៌ខ្លាំងបំផុត ដោយសារគាត់អត់បានធ្វើអីខុសហើយ គ្រាន់តែយកឯកសារចេញពីក្នុងទូរស័ព្ទ ហើយក្នុងទូរស័ព្ទហ្នឹងយើងធ្វើឯកសារម៉េចក៏បានដែរ ហើយយកទូរស័ព្ទហ្នឹងមកថា ជារឿងខុសច្បាប់ ខ្ញុំអត់ដឹង អត់យល់ថាខុសច្បាប់ត្រង់ណា គេចោទគាត់អ៊ីចឹង»។
លោកស្រី ទៀង ចិន្តា ថាការចោទជាលើកទីពីរដែលអាចជាប់ពន្ធនាគារពី ៥ឆ្នាំ ទៅ១០ ឆ្នាំ មកលើប្ដីទាំងគ្មានកំហុស អាចនឹងបំផ្លាញដល់អនាគតកូនស្រីជាមិនខាន។ លោកស្រី ទៀង ចិន្តា ជឿជាក់ សកម្មភាពនយោបាយប្ដីលោកស្រីកន្លងដើម្បីពលរដ្ឋ និងលើកស្ទួយប្រជាធិបតេយ្យប៉ុណ្ណោះ។
លោកស្រី ទៀង ចិន្តា៖ «ឪពុកគាត់ដាក់ខ្នោះអ៊ីចឹង អារម្មណ៍គាត់ដិតដាមតែរឿងប៉ុណ្ណឹង គាត់និយាយតែរឿងប៉ុណ្ណឹងដដែលៗ។ ពិតជាបារម្ភសម្រាប់កូនខ្ញុំក្នុងការរៀនសូត្រក៏អត់មានលទ្ធភាពឱ្យគាត់រៀន ហើយភាពកក់ក្ដៅពីឪពុកក៏អត់មានឱ្យគាត់ ហើយអ៊ីចឹងធម្មតាក្មេងបាត់បង់ភាពកក់ក្ដៅ ហើយស្មារតីក្នុងការរៀនសូត្រក៏អត់សូវបានល្អដែរ»។
វិទ្យុអាស៊ីសេរីមិនអាចទាក់ទងអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ និងលោក ប្លង់ សុផល ដើម្បីសាកសួរអំពីរឿងនេះបានទេ នៅថ្ងៃទី២៧ ខែកញ្ញា។ វិទ្យុអាស៊ីសេរីក៏មិនអាចទាក់ទង លោក រឿន វាសនា បានដែរ នៅថ្ងៃដដែលនេះ។
អាជ្ញាធរថៃបានសហការជាមួយអាជ្ញាធរកម្ពុជា ចាប់បញ្ជូនសកម្មជនគណបក្សសង្គ្រោះជាតិ លោក វឿន វាសនា និងលោក វឿង សំណាង ទៅដាក់ពន្ធនាគារនៅប្រទេសកម្ពុជា កាលពីថ្ងៃទី៩ តុលា ឆ្នាំ២០២១។ សាលាដំបូងរាជធានីភ្នំពេញកាលពីខែធ្នូ ឆ្នាំ២០២២ បានផ្ដន្ទាទោសលោក វឿង សំណាង ព្រមទាំងសកម្មជននិងថ្នាក់ដឹកនាំគណបក្សប្រឆាំងចំនួន៣៧នាក់ដាក់ពន្ធនាគារក្នុងម្នាក់ៗចន្លោះពី៥ឆ្នាំ ទៅ ៧ឆ្នាំ ពីបទរួមគំនិតក្បត់ពាក់ព័ន្ធនឹងរឿងគម្រោងការវិលចូលស្រុករបស់ថ្នាក់ដឹកនាំគណបក្សសង្គ្រោះជាតិ កាលពីដើមខែមករា ឆ្នាំ២០២១។
ចំណែកលោក វឿន វាសនា ហៅ ក្រញូងព្រៃឡង់វិញ តុលាការបានផ្ដន្ទាទោសលោកពីបទ «ញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម»។ ប៉ុន្តែក្រោយមកលោកបានសុំទោសលោក ហ៊ុន សែន រួចលោក ហ៊ុន សែន ក៏បានអន្តរាគមន៍ឱ្យព្រះមហាក្សត្រលើកលែងទោសដល់រូបលោក។ បច្ចុប្បន្ន លោក វឿន វាសនា បានសម្រេចរត់ភៀសខ្លួនទៅក្រៅប្រទេសជាថ្មីម្ដងទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។