សវនាការលើកទី៥០នៃសំណុំរឿងក្បត់ជាតិមេបក្សប្រឆាំង តំណាងអយ្យការបន្តលើកយកវីដេអូចាស់ៗ នៃការធ្វើបាតុកម្មទាមទារប្រាក់ឈ្នួលកម្មករកាលពីឆ្នាំ២០១៣ មកចោទសួរលោក កឹម សុខា។ អ្នកឃ្លាំមើលសវនាការរិះគន់ថា ការយកអង្គហេតុចាស់ទាំងនេះ និងការសួរសំនួរដដែលៗ របស់តុលាការពេលនេះ ធ្វើឲ្យសវនាការនេះគ្មានភាពជឿនលឿនទៅមុខ ដែលធ្វើឲ្យប៉ះពាល់សិទ្ធិ និងប្រយោជន៍លោក កឹម សុខា។
សវនាការលោក កឹម សុខា សប្ដាហ៍នេះ ហាក់គ្មានភាពខុសប្លែកពីសវនាការលើកមុនៗ ទេ ដោយតំណាងអយ្យការមិនទាន់បង្ហាញអង្គហេតុថ្មី ទាក់ទងបទចោទប្រកាន់ នៃទំនាក់ទំនងសម្ងាត់រវាងលោក កឹម សុខា និងរដ្ឋបរទេសណាមួយ មកបង្ហាញក្នុងសវនាការនោះឡើយ។ ផ្ទុយទៅវិញតំណាងអយ្យការបន្តយកវីដេអូចាស់នៃការធ្វើបាតុកម្មរបស់កម្មកររោងចក្រទាមទារដំឡើងប្រាក់ឈ្នួលកាលពីឆ្នាំ២០១៣ នៅស្ពានស្ទឹងមានជ័យ ទាមទារឲ្យលោក កឹម សុខា ទទួលខុសត្រូវ។
មន្ត្រីជាន់ខ្ពស់នៃសមាគមការពារសិទ្ធិមនុស្ស អាដហុក ដែលឃ្លាំមើលសវនាការនេះ លោក យី សុខសាន្ត កត់សម្គាល់ឃើញថា សំនួររបស់តំណាងអយ្យការភាគច្រើនជាសំនួរគ្មានប្រយោជន៍សម្រាប់សវនាការ និងហាក់ដូចជាតុលាការមានចេតនាពន្យារពេលសវនាការនេះ។ លោកបន្តថា តំណាងអយ្យការបានព្យាយាមពង្រីកបញ្ហា ដោយច្បិចយកវីដេអូនៃការធ្វើបាតុកម្មនានា កាលពីជាង ៩ឆ្នាំមុន ឲ្យលោក កឹម សុខា ទទួលខុសត្រូវ បើទោះលោក កឹម សុខា អះអាងដដែលៗ ថា លោកទទួលខុសត្រូវតែបាតុកម្មរបស់គណបក្សសង្គ្រោះជាតិ ដែលធ្វើនៅទីលានប្រជាធិបតេយ្យក៏ដោយចុះ៖ « ទាញមកចេះភ្ជាប់ណា ចំណុចហ្នឹងហើយ ដែលហាក់ដូចជា យើងមិនបង្រួមបញ្ហា ដើម្បីដោះស្រាយសុខសាន្ត បែរជាពង្រីកបញ្ហា។ ចំណុចហ្នឹងហើយ ហើយការពង្រីកបញ្ហា ធ្វើឲ្យភាគីទាំងសងខាងគាត់អត់ព្រមរហូត ចេះតែមានការអូសបន្លាយរហូតដល់សវនាការទី៥០ ដោយសារតែរឿងពង្រីកបញ្ហានេះឯង » ។
សវនាការលើកនេះ ក្រុមមេធាវីលោក កឹម សុខា មិនបានផ្ដល់សម្ភាសឲ្យអ្នកសារព័ត៌មាននោះទេ។ វិទ្យុអាស៊ីសេរីមិនអាចសុំការបញ្ជាក់បន្ថែមពីក្រុមមេធាវីការពារក្ដីលោក កឹម សុខា បានទេ នៅថ្ងៃទី២៧ ខែកក្កដា។ ចំណែកអ្នកគាំទ្រលោក កឹម សុខា ប្រមាណ ១០០នាក់ នៅតែបន្តឃ្លាំមើលសវនាការនេះនៅមុខតុលាការ។ ក្រៅពីនេះ ក៏មានតំណាងស្ថានទូតបរទេស និងតំណាងអង្គការសហប្រជាជាតិប្រចាំកម្ពុជា តំណាងអង្គការសង្គមស៊ីវិលក្នុងស្រុក និងអ្នកសារព័ត៌មានផងដែរ។ ដោយឡែកសមត្ថកិច្ចបានរឹតបន្តឹងសន្តិសុខដូចរាល់ដងដែរ។
អ្នកគាំទ្រលោក កឹម សុខា ម្នាក់លោក ហ៊ុន កុសល រិះគន់ថា តុលាការបានព្យាយាមសួរជាន់លោក កឹម សុខា ដើម្បីចង់បានចម្លើយ។ លោកយល់ថា សំណុំរឿងនេះ បើគ្មានដំណោះស្រាយនយោបាយទេ មិនដឹងថា សវនាការនឹងបញ្ចប់នៅពេលណានោះទេ៖ « លោក កឹម សុខា គាត់បានឆ្លើយសំណួរហ្នឹងទៅកាន់តុលាការយ៉ាងក្បោះក្បាយរួចហើយ ប៉ុន្តែ នេះជាតាក់ទិច (Tactic) ដែលគេព្យាយាមជាន់លោកប្រធាន កឹម សុខា ដើម្បីយកចម្លើយណា តែយ៉ាងណាក៏ដោយ ភាពស្មោះត្រង់ សុចរិតភាព មិនអាចលុបបំបាត់បានទេ » ។
ទាក់ទងការលើកឡើងនេះវិទ្យុអាស៊ីសេរីមិនអាចសុំឆ្លើយតបពីប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន និងអ្នកនាំពាក្យគណបក្សប្រជាជនកម្ពុជា លោក សុខ ឥសាន បានទេនៅថ្ងៃទី២៧ ខែកក្កដា។ ទោះយ៉ាងណា លោក សុខ ឥសាន តែងនិយាយដដែលៗ ថា ករណីលោក កឹម សុខា កំពុងស្ថិតក្នុងដែនសមត្ថកិច្ចតុលាការ ហើយក៏គ្មានការចរចាណាមួយរំលោភកិច្ចការតុលាការបានដែរ។ គិតមកដល់ពេលនេះ លោក កឹម សុខា បានបាត់បង់សិទ្ធិសេរីភាពជិត ៥ឆ្នាំហើយ ក្រោយរដ្ឋាភិបាលលោក ហ៊ុន សែន បានចោទប្រកាន់ថា មេបក្សប្រឆាំងរូបនេះថា ឃុបឃិតជាមួយរដ្ឋបរទេស ដើម្បីផ្តួលរំលំរដ្ឋាភិបាល។
អ្នកវិភាគនយោបាយ លោក គឹម សុខ យល់ថា រដ្ឋាភិបាល ហ៊ុន សែន កំពុងប្រើប្រាស់តុលាការពន្យារពេលការធ្វើនយោបាយរបស់លោក កឹម សុខា ព្រោះខ្លាចពេលលោក កឹម សុខា មានសិទ្ធិធ្វើនយោបាយ នឹងធ្វើឲ្យប៉ះពាល់ផែនការផ្ទេរអំណាចពីលោក ហ៊ុន សែន ទៅលោក ហ៊ុន ម៉ាណែត។ លោកយល់ថា ប្រសិននៅពេលខាងមុខ មានការរិះគន់លើការកាត់ក្ដីរបស់តុលាការក្រុងភ្នំពេញខ្លាំងពីមហាជន លោក ហ៊ុន សែន អាចនឹងប្ដូរចៅក្រម ឬព្រះរាជអាជ្ញា ប៉ុន្តែសវនាការនៅតែអូសបន្លាយដដែល៖ «គេចង់ឲ្យលោក កឹម សុខា ទ្រាំលែងបាននឹងសវនាការហ្នឹង ហើយងាកទៅពិចារណា នូវអ្វីដែលលោក ហ៊ុន សែន សង្កត់លោក កឹម សុខា ធ្វើតាមលោក ហ៊ុន សែន ជំរុញឲ្យលោក កឹម សុខា សារភាពនូវអ្វី ដែលគាត់មិនបានធ្វើទាល់តែសោះ ប៉ុន្តែទទួលនូវកំហុសតាមគេចង់បាន»។
សវនាការលោក កឹម សុខា ប៉ុន្មានសប្ដាហ៍ចុងក្រោយនេះ តំណាងអយ្យការបានចោទប្រកាន់ថា មេបក្សប្រឆាំងរូបនេះជាប់ទាក់ទងនឹង ការធ្វើបាតុកម្មទាមទារប្រាក់ឈ្មួលរបស់កម្មកររោងចក្រនៅផ្លូវ វេង ស្រេង បាតុកម្មហិង្សាបណ្ដាលឲ្យបាតុករស្លាប់នៅស្ពានក្បាលថ្នល់ និងបាតុកម្មនៅគល់ស្ពានស្ទឹងមានជ័យ។ តុលាការនឹងបន្តសវនាការនេះ នៅថ្ងៃទី៣ ខែសីហាសប្ដាហ៍ក្រោយទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។