ពលរដ្ឋខ្មែរស្នាក់នៅប្រទេសថៃ ដាក់ញត្តិតាមបណ្ដាស្ថានទូតបរទេស នៅទីក្រុងបាងកក (Bangkok) ឱ្យជំរុញរដ្ឋាភិបាលកម្ពុជា ឱ្យគោរពកិច្ចព្រមព្រៀងសន្តិភាពទីក្រុងប៉ារីស ២៣ តុលា ឆ្នាំ១៩៩១។ មន្ត្រីសង្គមស៊ីវិលលើកឡើងថា បណ្ដាប្រទេសជាម្ចាស់ហត្ថលេខីក្នុងកិច្ចព្រមព្រៀង សន្តិភាពទីក្រុងប៉ារីស នៅតែមានតួនាទីសំខាន់ ក្នុងការធានាស្ថិរភាពនយោបាយ និងការគោរពសិទ្ធិមនុស្សនៅកម្ពុជា។
សកម្មជននយោបាយគណបក្សប្រឆាំង ពលករខ្មែរ និងសកម្មជនសិទ្ធិមនុស្សជិត ២០នាក់ បានយកញត្តិទៅដាក់តាមបណ្ដាស្ថានទូតនៃប្រទេសជាម្ចាស់ហត្ថលេខី នៃកិច្ចព្រមព្រៀងសន្តិភាពទីក្រុងប៉ារីស ២៣ តុលា ឆ្នាំ១៩៩១ នៅក្នុងទីក្រុងបាងកក (Bangkok) ចំនួន ៦ប្រទេស កាលពីថ្ងៃទី២៣ ខែតុលា ដើម្បីស្នើឱ្យប្រទេសទាំងនោះ ឱ្យជំរុញរដ្ឋាភិបាលលោក ហ៊ុន ម៉ាណែត លើកកម្ពស់លទ្ធិប្រជាធិបតេយ្យ និងដើម្បីផ្សះផ្សាជាតិ ។
សមាជិកគណៈកម្មការប្រតិបត្តិខេត្តកោះកុង គណបក្សភ្លើងទៀន ដែលកំពុងស្នាក់នៅប្រទេសថៃ (Thailand) លោក ឆន សុខឃឿន ប្រាប់វិទ្យុអាស៊ីសេរី នៅថ្ងៃទី២៤ ខែតុលាថា មន្ត្រីស្ថានទូតចំនួន៦ប្រទេស ដែលរួមមានប្រទេសឥណ្ឌូនេស៊ី (Indonesia) សឹង្ហបុរី (Singapore) ជប៉ុន (Japan) អូស្ត្រាលី (Australia) ជាដើម បានចេញមកទទួលញត្តិរបស់ប្រជាពលរដ្ឋ កាលពីថ្ងៃទី២៣ ខែតុលា។ លោកបន្ថែមថា គោលបំណងសំខាន់ក្នុងការដាក់ញត្តិនៅតាមបណ្ដាស្ថានទូត នៃប្រទេសម្ចាស់ហត្ថលេខី នៃកិច្ចព្រមព្រៀងសន្តិភាពប៉ារីសនេះ គឺស្នើឱ្យបណ្ដាប្រទេសទាំងនេះជំរុញឱ្យរដ្ឋាភិបាល លោក ហ៊ុន ម៉ាណែត លើកកម្ពស់ស្មារតីនៃកិច្ចព្រមព្រៀង តាមរយៈការបើកលំហប្រជាធិបតេយ្យ និងបញ្ឈប់ការគំរាមកំហែងលើសកម្មជននយោបាយសិទ្ធិមនុស្ស។
លោក ឆន សុខឃឿន៖«ពេលដែលរដ្ឋាភិបាលគោរពសិទ្ធិមនុស្ស គោរពតាមរដ្ឋធម្មនុញ្ញ និងកិច្ចព្រមព្រៀងសន្ធិសញ្ញាកិច្ចព្រមព្រៀងទីក្រុងប៉ារីសនេះ ប្រាកដណាស់ គឺមិនមានពលករចំណាកស្រុក ក៏ដូចជាអំពើអយុត្តិធម៌នៅក្នុងប្រទេសកម្ពុជាទេ សកម្មជននយោបាយភៀសខ្លួនចូលប្រទេសថៃ ក៏ដូចប្រទេសនានាហ្នឹង គឺប្រាកដជាមានឱកាសក្នុងការត្រឡប់ ទៅចូលរួមចាប់ដៃ ជាមួយរដ្ឋាភិបាល និងដឹកនាំ កសាងប្រទេសជាមួយគ្នា»។
វិទ្យុអាស៊ីសេរីមិនអាចទាក់ទង ប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា និងអ្នកនាំពាក្យគណបក្សប្រជាជនកម្ពុជា លោក សុខ ឥសាន ដើម្បីសួរអំពីបញ្ហានេះបានទេ នៅថ្ងៃទី២៤ ខែតុលា។
ជុំវិញរឿងនេះ នាយកប្រតិបត្តិអង្គការ សម្ព័ន្ធភាពដៃគូដើម្បីការអភិវឌ្ឍតាមបែបលទ្ធិប្រជាធិបតេយ្យ (CPDD) លោក សុន ពេញ យល់ឃើញថា បណ្ដាប្រទេសដែលបានចូលរួមចុះហត្ថាលេខាលើកិច្ចព្រមព្រៀងសន្តិភាពទីក្រុងប៉ារីស នៅតែមានតួនាទីសំខាន់ក្នុងការតាមដាន និងជំរុញឱ្យរដ្ឋាភិបាលកម្ពុជាលើកកម្ពស់លំហប្រជាធិបតេយ្យ ការប្រកួតប្រជែងនយោបាយដោយស្មើភាព និងការគោរពសិទ្ធិមនុស្ស។ លោកបន្ថែមថា ការលើកកម្ពស់ស្មារតីនៃកិច្ចព្រមព្រៀងសន្តិភាពទីក្រុងប៉ារីស មិនត្រឹមតែអាចនាំមកនូវស្ថិរភាពនយោបាយនៅកម្ពុជាតែប៉ុណ្ណោះទេ គឺថែមទាំងអាចធ្វើឱ្យសេដ្ឋកិច្ចជាតិ និងជីវភាពប្រជាពលរដ្ឋកាន់តែល្អប្រសើរផងដែរ។
លោក សុន ពេញ៖«យើងអំពាវនាវ ជាពិសេសប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសហ្នឹងគឺ មេត្តាយកចិត្តទុកដាក់អំពីការឃ្លាំមើល និងការអនុវត្តអំពីប្រសិទ្ធភាពកិច្ចព្រមព្រៀងហ្នឹង។ ពិតណាស់កម្ពុជាបានបញ្ចូលស្មារតីនៃកិច្ចព្រមព្រៀងទីក្រុងប៉ារីសនៅក្នុងរដ្ឋធម្មនុញ្ញរបស់យើង ប៉ុន្តែមិនបានបញ្ជាក់ពីការអស់សុពលភាព នៃកិច្ចព្រមព្រៀងសន្តិភាពទីក្រុងប៉ារីសនោះទេ ហើយកិច្ចព្រមព្រៀងទីក្រុងប៉ារីស វានៅជានិរន្ត បើទោះបីជាយ៉ាងម៉េចក៏ដោយ វាជាផលប្រយោជន៍របស់កម្ពុជា ដែលអាចមានកិច្ចព្រមព្រៀង ដើម្បីធានានូវស្ថិរភាពនយោបាយ ក៏ដូចជា ការធានាបាននូវគ្រឹះនៃការអនុវត្តប្រជាធិបតេយ្យនៅកម្ពុជាផងដែរ»។
អ្នកវិភាគនយោបាយលើកឡើងថា ស្មារតីនៃកិច្ចព្រមព្រៀងសន្តិភាពទីក្រុងប៉ារីស ត្រូវបានរដ្ឋាភិបាលរបស់អតីតនាយករដ្ឋមន្ត្រីលោក ហ៊ុន សែន បំផ្លាញស្ទើរតែស្រុង តាមរយៈការដឹកនាំតាមបែបផ្ដាច់ការ និងបក្ខពួកនិយម។ ជាមួយគ្នានេះ លោក ហ៊ុន សែន ក៏បានធ្វើឱ្យប្រទេសកម្ពុជាបាត់បង់ទឹកដីឱ្យទៅប្រទេសជិតខាងផងដែរ តាមរយៈការចុះហត្ថលេខាលើសន្ធិសញ្ញាព្រំដែនបំពេញបន្ថែម ក្នុងការបោះបង្គោលព្រំដែនគោក និងទឹក ជាមួយប្រទេសវៀតណាម ដែលផ្ទុយពីកិច្ចព្រមព្រៀងសន្តិភាពទីក្រុងប៉ារីស។
សកម្មជនគណបក្សប្រឆាំងនៅថៃបញ្ជាក់ថា ក្រុមប្រជាពលរដ្ឋដែលរស់នៅក្នុងទឹកដីថៃ គ្រោងនឹងដាក់ញត្តិទៅកាន់ស្ថានទូតចំនួន ៥ផ្សេងទៀត តាមពេលវេលាដែលបានកំណត់ជាមួយមន្ត្រីស្ថានទូតក្នុងពេលឆាប់ៗ ខាងមុខ។ ស្ថានទូតទាំងនោះរួមមាន ស្ថានទូតប្រទេសបារាំង (France) សហរដ្ឋអាមេរិក (United States) និងអាល្លឺម៉ង់ (Germany) ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។