មន្ត្រីគណបក្សប្រឆាំងលើកឡើងថា អតីតនាយករដ្ឋមន្ត្រីលោក ហ៊ុន សែន កំពុងកៀរគរពលរដ្ឋខ្មែរនៅក្រៅស្រុកឱ្យគាំទ្រកូនរបស់លោកគឺលោកនាយករដ្ឋមន្ត្រី ហ៊ុន ម៉ាណែត ដើម្បីបន្លំភ្នែកពលរដ្ឋនិងសហគមន៍អន្តរជាតិ។ ប្រតិកម្មរបស់មន្ត្រីបក្សប្រឆាំងនេះ ធ្វើឡើងបន្ទាប់ពីលោក ហ៊ុន សែន បានបង្ហោះវីដេអូឃ្លីបពលរដ្ឋខ្មែរជាច្រើននាក់នៅក្រៅប្រទេសប្រកាសរង់ចាំស្វាគមន៍លោក ហ៊ុន ម៉ាណែត ទៅចូលរួមប្រជុំនៅសហរដ្ឋអាមេរិកនៅចុងសប្ដាហ៍នេះ។
មន្ត្រីគណបក្សប្រឆាំងលើកឡើងថា លោក ហ៊ុន សែន កំពុងធ្វើប្រជាភិថុតិបោកប្រាស់សហគមន៍អន្តរជាតិ ដើម្បីបិទបាំងអំពើអាក្រក់របស់គ្រួសារខ្លួននៅលើឆាកអន្តរជាតិ។
មន្ត្រីគណបក្សសង្គ្រោះជាតិដែលកំពុងភៀសខ្លួននៅប្រទេសថៃ លោក ម៉េង សុធារ៉ា ប្រាប់វិទ្យុអាស៊ីសេរី នៅថ្ងៃទី២០ កញ្ញា ថា ពលរដ្ឋខ្មែរនៅក្រៅស្រុកដែលរង់ចាំទទួល លោក ហ៊ុន ម៉ាណែត ពុំមែនកើតចេញពីចិត្តរបស់ខ្លួននោះទេ។ លោកចាត់ទុកការដែលលោក ហ៊ុន សែន បង្ហោះវីដេអូឃ្លិបពលរដ្ឋខ្មែរនៅក្រៅប្រទេសប្រកាសរង់ចាំស្វាគមន៍លោក ហ៊ុន ម៉ាណែត គឺជាការសម្ដែងដើម្បីបន្លំភ្នែកពលរដ្ឋ និងសហគមន៍អន្តរជាតិឱ្យមើលឃើញថា ពលរដ្ឋខ្មែរភាគច្រើនគាំទ្រកូនប្រុសរបស់លោក។
លោក ម៉េង សុធារ៉ា៖ «យើងដឹងស្រាប់ហើយគណបក្សប្រជាជនជាគណបក្សមួយដែលប្រព្រឹត្តអំពើពុករលួយដុះស្លែអីចឹង គាត់មានលទ្ធភាពក្នុងការជួលមនុស្ស ឬក៏ជួលយន្តហោះដឹកអ្នកដែលគាំទ្រលោក ហ៊ុន ម៉ាណែត នឹងឱ្យមកចូលរួមគាំទ្រនៅមុខអង្គការសហប្រជាជាតិ ដើម្បីបង្ហាញអន្តរជាតិថា លោក ហ៊ុន ម៉ាណែត មានអ្នកគាំទ្រច្រើន។ អីចឹងអ្វីដែលយើងមើលឃើញជាក់ស្ដែងគឺប្រទេសទាំងអស់នឹងអត់មានខ្វល់រឿងលោក ហ៊ុន ម៉ាណែត ឬលោក ហ៊ុន សែន កៀរគរមនុស្សទេ។គេគ្រាន់តែលើកអំពីបញ្ហាលទ្ធិប្រជាធិបតេយ្យសិទ្ធិមនុស្សសិទ្ធសេរីភាពសារព័ត៌មាន និងដោះលែងសកម្មជននយោបាយ»។
ប្រតិកម្មរបស់មន្ត្រីបក្សប្រឆាំងនេះ បន្ទាប់ពីប៉ុន្មានថ្ងៃចុងក្រោយនេះ លោក ហ៊ុន សែន បានបង្ហោះវីដេអូឃ្លិបលើបណ្ដាញសង្គមតេឡេក្រាម(Telegram)របស់លោកដោយមានពលរដ្ឋខ្មែរនៅប្រទេសកាណាដា (CANADA) និងសហរដ្ឋអាមេរិក(USA)ជាច្រើននាក់ប្រកាសរង់ចាំស្វាគមន៍ លោក ហ៊ុន ណែត នៅសហរដ្ឋអាមេរិកនាចុងសប្ដាហ៍នេះ។ ក្នុងវីដេអូឃ្លីបបង្ហាញថា ពលរដ្ឋខ្លះមានមតិជាក្រុមនិងខ្លះទៀតមានមតិជាលក្ខណៈគ្រួសារថាពួកគេស្រលាញ់និងគាំទ្រលោក ហ៊ុន ម៉ាណែត និងរង់ចាំស្វាគមន៍លោកចូលរួមមហាសន្និបាតរបស់អង្គការសហប្រជាជាតិនៅបុរីញូវយ៉ក (New York) សហរដ្ឋអាមេរិក នៅថ្ងៃទី២២ ខែកញ្ញា។ ជាមួយគ្នានេះពលរដ្ឋខ្មែរនៅសហរដ្ឋអាមេរិក និងកាណាដាមួយចំនួនក៏បានត្រៀមធ្វើបាតុកម្មប្រឆាំងនឹងវត្តមានលោក ហ៊ុន ម៉ាណែត នៅលើទឹកដីអាមេរិកនេះដែរ។
វិទ្យុអាស៊ីសេរីមិនអាចទាក់ទងអ្នកនាំពាក្យរដ្ឋាភិបាលលោក ប៉ែន បូណា ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី២០ កញ្ញា។
ចំណែកអ្នកនាំពាក្យគណបក្សប្រជាជនកម្ពុជា លោក ឈឹម ផលវរុណ សុំមិនអត្ថាធិប្បាយជុំវិញបញ្ហានេះទេ ដោយលោករុញឱ្យសួរទៅអ្នកនាំពាក្យរដ្ឋាភិបាលវិញ។
កន្លងទៅលោក ហ៊ុន សែន ត្រូវបានគេមើលឃើញថា បានដើរកៀរគរមនុស្សគ្រប់ទិសទីទាំងអ្នកសិក្សាមន្ត្រីការទូត ពលរដ្ឋខ្មែរមួយចំនួនដែលវិនិយោគទុននៅកម្ពុជានិងអ្នកដែលទទួលបានផលប្រយោជន៍ពីរដ្ឋាភិបាលឱ្យទៅស្វាគមន៍លោក ហ៊ុន សែន ក្នុងពេលចេញទៅប្រជុំនៅក្រៅស្រុកម្ដងៗ។ កាលពីឆ្នាំ២០២២ ក្នុងពេលទៅចូលរួមកិច្ចប្រជុំមហាសន្និបាតអង្គការសហប្រជាជាតិ ពលរដ្ឋខ្មែរអាមេរិកកាំងម្នាក់បានយកស្បែកជើងគប់សំដៅទៅកាន់លោក ហ៊ុន សែន នៅលើទឹកដីអាមេរិក ដោយសារខឹងលោក ហ៊ុន សែន ដឹកនាំប្រទេសបែបផ្ដាច់ការ។
ជុំវិញរឿងនេះអ្នកសិក្សាផ្នែកច្បាប់ និងជាអ្នកតាមដានស្ថានការណ៍សង្គម លោក លី ចាត់ដារ៉ាវុត យល់ឃើញថា ការចេញវីដេអូឃ្លីបនេះ ជារឿងដដែលៗរបស់មេដឹកនាំរដ្ឋាភិបាលឯកបក្សដែលតែងបង្កើតឡើង ដើម្បីឱ្យសាធារណជនមើលឃើញថា ខ្លួនជាមនុស្សល្អដាច់គេ។ យ៉ាងណាលោកថា ការធ្វើបែបនេះនឹងមិនផ្ដល់ផលប្រយោជន៍អ្វីដល់កម្ពុជាឡើយ។
លោក លី ចាត់ដារ៉ាវុត៖ «មេដឹកនាំយើងគួរតែឈប់ផ្ដោតទៅលើការបង្កើតវប្បធម៌ដែលមន្ត្រីឬសកម្មជនគណបក្សអីត្រូវចេញសារគាំទ្រលើកជើងហែហមអីចឹងទេ។ យើងផ្ដោតទៅលើការដោះស្រាយបញ្ហាសង្គម បញ្ហាការយកគយទៅលើប្រជាពលរដ្ឋដែលកំពុងជួបវិបត្តិសេដ្ឋកិច្ច បញ្ហាកម្មករអត់មានការងារធ្វើ ហើយបញ្ហាសង្គមជាច្រើនទៀតដែលត្រូវការដោះស្រាយ។ យើងទាមទារឱ្យមេដឹកនាំហ្នឹងមានយុទ្ធសាស្ត្រច្បាប់លាស់មានការអនុវត្តគោលនយោបាយឱ្យបានត្រឹមត្រូវ ឱ្យថ្នាក់ក្រោមនឹងគាំទ្រមេដឹកនាំតាមរយៈការអនុវត្តគោលនយោបាយឱ្យបានត្រឹមត្រូវជួយលើកកម្ពស់សុខមាលភាពប្រជាពលរដ្ឋ ជីវភាពពលរដ្ឋហ្នឹងឱ្យរស់នៅបានល្អប្រសើរ នោះប្រជាពលរដ្ឋនឹងគាំទ្រយើងដោយឯកឯងហើយ»។
កន្លងទៅរបាយការណ៍គម្រោងយុត្តិធម៌ពិភពលោក (WJP) បានរកឃើញថា កម្ពុជាពូកែខាងរំលោភច្បាប់។ ប្រទេសកម្ពុជាជាប់ចំណាត់ថ្នាក់ផ្នែកនីតិរដ្ឋ ឬគោរពច្បាប់ស្ទើរតែនៅបាតតារាងគឺនៅលេខ ១៣៩ ក្នុងចំណោម១៤០ប្រទេស ក្នុងឆ្នាំ២០២២។ របាយការណ៍នេះបានបង្ហាញកត្តាចម្បងៗចំនួន៨ សម្រាប់ដំណើរការដាក់សន្ទស្សន៍នីតិរដ្ឋ ក្នុងនោះមានដូចជា ដែនកំណត់អំណាចរដ្ឋាភិបាល ការលុបបំបាត់អំពើពុករលួយ រដ្ឋាភិបាលបើកទូលាយ សិទ្ធិជាមូលដ្ឋាន សណ្ដាប់ធ្នាប់ និងសន្តិសុខសង្គម ការពង្រឹងការអនុវត្តច្បាប់ យុត្តិធម៌ផ្នែករដ្ឋប្បវេណី និងយុត្តិធម៌ផ្នែកព្រហ្មទណ្ឌ ដែលកម្ពុជាសុទ្ធតែទទួលបានពិន្ទុទាបទាំងអស់។
អ្នកតាមដានស្ថានការណ៍សង្គមលើកឡើងថា បញ្ហានេះហើយដែលធ្វើឱ្យលោក ហ៊ុន សែន បារម្ភខ្លាចលោក ហ៊ុន ម៉ាណែត រងភាពអាម៉ាស់ដូចលោកដែរនៅលើទឹកដីអាមេរិកនៅពេលខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។