អាជ្ញាធរនឹងរឹតបន្តឹងសន្តិសុខក្នុងរាជធានីភ្នំពេញ ជាពិសេសនៅម្ដុំវិមានឯករាជ្យ អំឡុងពេលប្រារព្ធពិធីបុណ្យឯករាជ្យជាតិ នៅថ្ងៃទី៩ វិច្ឆិកាខាងមុខ។ អាជ្ញាធរថា ការធ្វើបែបនេះ គឺដើម្បីការពារសុវត្ថិភាពជូនថ្នាក់ដឹកនាំ ប៉ុន្តែមន្ត្រីបក្សប្រឆាំងយល់ថា ការរឹតបន្តឹងសន្តិសុខនេះ ក៏អាចជាប់ពាក់ព័ន្ធនឹងហេតុផលនយោបាយខ្លះដែរ ព្រោះលោក ហ៊ុន សែន នឹងអវត្តមានក្នុងកម្មវិធីនេះ ដោយជាប់រវល់ធ្វើចត្តាឡីស័ក។
អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន ប្រាប់អាស៊ីសេរីនៅថ្ងៃទី៥ វិច្ឆិកាថា គោលដៅសំខាន់ ដែលអាជ្ញាធរពង្រឹងសន្តិសុខនោះ គឺនៅម្តុំវិមានឯករាជ្យ ដែលជាទីតាំងប្រារព្ធពិធី។ លោកថា កងកម្លាំងរក្សាសន្តិសុខ ត្រូវបានបែងចែកទៅតាមប្រភេទ រួមមាន កម្លាំងគ្រប់គ្រងសភាពការណ៍ កម្លាំងរៀបចំសណ្ដាប់ធ្នាប់ និងកម្លាំងបង្ការហានិភ័យកើតឡើង។
លោកបញ្ជាក់ថា ទោះជាលោកនាយករដ្ឋមន្ត្រី ហ៊ុន សែន និងឥស្សរជននយោបាយជាន់ខ្ពស់មួយចំនួន ត្រូវអវត្តមានក្នុងកម្មវិធីនេះក៏ដោយ ក៏ការពង្រឹងសន្តិសុខនៅតែជាអាទិភាពដដែល ដើម្បីការពារសុវត្ថិភាពជូនថ្នាក់ដឹកនាំដទៃទៀត ដែលនឹងបង្ហាញវត្តមាន។ មេប៉ូលិសជាន់ខ្ពស់រូបនេះបន្ថែមថា អាជ្ញាធរនឹងមិនអនុញ្ញាតឱ្យមានការប្រមូលផ្តុំតវ៉ាណាមួយនៅជិតទីតាំងប្រារព្ធពិធីបុណ្យឯករាជ្យនោះទេ៖ « នេះអាចនិយាយបានថា ជាអាជ្ញាសឹកក៏បានដែរ បានន័យថា ជាអាទិភាពខ្ពស់សម្រាប់ការរៀបចំប្រារព្ធពិធីរបស់ជាតិ ហើយជាពិសេស មានព្រះរាជវត្តមានរបស់ព្រះករុណា ( ព្រះមហាក្សត្រ ) ទៀត អ៊ីចឹងគាត់អត់មកឆាឆៅ ធ្វើឱ្យប៉ះពាល់សណ្ដាប់ធ្នាប់គេបានទេ។ អត់មានមកតវ៉ាកន្លែងគេប្រារព្ធពិធីបានទេ អាហ្នឹងវាខុសក្បួនខុសខ្នាតហើយ » ។
លោកនាយករដ្ឋមន្ត្រី ហ៊ុន សែន នឹងអវត្តមានក្នុងពិធីបុណ្យឯករាជ្យជាតិនៅថ្ងៃទី០៩ វិច្ឆិកា ដើមសប្ដាហ៍ក្រោយនេះ ព្រោះលោកត្រូវដាក់ឱ្យនៅដាច់ដោយឡែករយៈពេល១៤ ថ្ងៃ បន្ទាប់ពីលោកបានប្រាស្រ័យទាក់ទងដោយផ្ទាល់ ដោយមិនបានពាក់ម៉ាស់ ជាមួយប្រមុខការទូតហុងគ្រី លោក ភីតធ័រ ស្ស៊ីចាតូ (Peter Szijjarto) ដែលកើតជំងឺកូវីដ-១៩។ ចំណែកមន្ត្រីគ្រាក់ៗ របស់លោកជាច្រើននាក់ទៀត ក៏នឹងអវត្តមានក្នុងពិធីបុណ្យជាតិនេះដូចគ្នា ព្រោះត្រូវអនុវត្តវិធានការសុខាភិបាលដូចលោក ហ៊ុន សែន ដែរ។
តំណាងរាស្ត្រជាប់ឆ្នោតគណបក្សសង្គ្រោះជាតិ លោក អ៊ុំ សំអាន ជឿថា ការពង្រឹងសន្តិសុខអំឡុងពិធីបុណ្យឯករាជ្យនេះ ក៏អាចជាប់ពាក់ព័ន្ធនឹងហេតុផលនយោបាយខ្លះដែរ។ លោកថា របបក្រុងភ្នំពេញភ័យខ្លាចប្រជាពលរដ្ឋក្រោកឡើងតវ៉ាប្រឆាំងនឹងភាពអយុត្តិធម៌ក្នុងសង្គម និងការដឹកនាំបែបផ្ដាច់ការរបស់លោក ហ៊ុន សែន។ ម្យ៉ាងវិញទៀត លោកថា លោក ហ៊ុន សែន កំពុងប្រឈមកើតជំងឺកូវីដ-១៩ ដោយសារបានប៉ះពាល់ផ្ទាល់ជាមួយប្រមុខការទូតហុងគ្រី ដូច្នេះអាជ្ញាធររបបក្រុងភ្នំពេញរឹតបន្តឹងសន្តិសុខ ដើម្បីកុំឱ្យមានការរំជើបរំជួលប៉ះពាល់ដល់អំណាចលោក ហ៊ុន សែន៖ « ទីមួយ ប្រជាពលរដ្ឋគាត់កំពុងតែចង់តវ៉ាឱ្យមានការផ្លាស់ប្ដូរមេដឹកនាំផ្ដាច់ការនៅកម្ពុជា គឺលោក ហ៊ុន សែន ផង ហើយទីពីរ ចរន្តផ្ទៃក្នុងរបស់គាត់កំពុងរំជើបរំជួលផង ប្រសិនបើគាត់ផ្ទុកជំងឺហ្នឹង ( កូវីដ - ១៩ ) ហើយសុខភាពគាត់ធ្លាក់ខ្សោយមែនទែន គឺថាផ្ទៃក្នុងក៏បះបោរ ប្រជាពលរដ្ឋក៏ងើបតវ៉ា។ អ៊ីចឹងបានជាគេត្រូវបង្ការមុន ទាំងផ្ទៃក្នុង ទាំងអ្នកគាំទ្រគណបក្សសង្គ្រោះជាតិ ឬក៏ប្រជាពលរដ្ឋ » ។
ទោះជាយ៉ាងណា អ្នកនាំពាក្យប៉ូលិសជាតិ លោក ឆាយ គឹមខឿន បដិសេធថា នេះគ្រាន់តែជាការយល់ឃើញផ្ទាល់ខ្លួន ក្នុងបំណងមិនល្អប៉ុណ្ណោះ៖ « ទាញហេតុផលអ៊ីចេះអ៊ីចុះ អាហ្នឹងសុទ្ធតែជាទស្សនៈមួយអត្តនោម័តិ ទស្សនៈមានចេតនាមិនល្អហើយ បំពុលបរិយាកាសសង្គមហើយ។ បញ្ចេញទស្សនៈអ៊ីចឹង កុំនិយាយសិទ្ធិសេរីភាពណា អត់ត្រូវទេ ព្រោះអាហ្នឹងជាចេតនា។ កាលណាមានចេតនាធ្វើឱ្យប៉ះពាល់ដល់ស្ថានភាពទូទៅរបស់សង្គមហើយ គេអនុវត្តតាមវិធានច្បាប់ហើយ » ។
ទាក់ទងនឹងរឿងសន្តិសុខក្នុងពិធីបុណ្យឯករាជ្យជាតិនេះដែរ អភិបាលរាជធានីភ្នំពេញ លោក ឃួង ស្រេង បានអះអាងនៅក្នុងកិច្ចប្រជុំជាមួយមន្ត្រីថ្នាក់ក្រោមរបស់លោកនៅថ្ងៃទី៥ វិច្ឆិកាថា អាជ្ញាធរបានគិតគូរ និងវាយតម្លៃរួចហើយថា នឹងមិនមានបញ្ហាអ្វីកើតឡើងនោះទេ។ ទោះជាយ៉ាងនេះក្តី លោកអះអាងថា អាជ្ញាធរនៅតែបង្ការទប់ស្កាត់ឧបាយកលរបស់ក្រុមដែលលោកហៅថាជា ជនអគតិចង់បំផ្លាញពិធីបុណ្យឯករាជ្យជាតិនេះ។
អាស៊ីសេរីបានព្យាយាមទាក់ទងទៅលោក ឃួង ស្រេង ដើម្បីសុំការបញ្ជាក់បន្ថែមថា តើក្រុមជនអគតិនោះជាអ្នកណាឱ្យពិតប្រាកដ ប៉ុន្តែលោកបានចុចផ្ដាច់ទូរស័ព្ទ។ ចំណែក អ្នកនាំពាក្យសាលាក្រុងភ្នំពេញ លោក ម៉េត មាសភក្តី វិញ មិនលើកទូរស័ព្ទទេ នៅថ្ងៃទី៥ វិច្ឆិកា។
អ្នកនាំពាក្យសមាគមអាដហុក (ADHOC) លោក ស៊ឹង សែនករុណា សង្កេតឃើញថា អាជ្ញាធរច្រើនតែវិនិច្ឆ័យទុកជាមុន ចំពោះការប្រមូលផ្តុំដោយសន្តិវិធី និងការសម្ដែងមតិរបស់ពលរដ្ឋថា ជាបទល្មើស ឬជាសកម្មភាពដែលត្រូវទប់ស្កាត់ឱ្យខាងតែបាន។ លោកថា ការវិនិច្ឆ័យទុកជាមុនទាំងនោះ ជារឿងមិនសមហេតុផល និងមិនត្រឹមត្រូវឡើយ ហើយបណ្ដាលឱ្យមានការរំលោភសិទ្ធិពលរដ្ឋទៅវិញ៖ « រឿងទាំងអស់នេះ វាមិនមែនជារឿងវិនិច្ឆ័យមួយមានភាពត្រឹមត្រូវអ្វីទេ គឺវាជាការវិនិច្ឆ័យមួយ ដែលភ្ជាប់ទៅដោយនិន្នាការនយោបាយ ហើយចេះតែធ្វើការសម្រេច ឬក៏ធ្វើការគិតទុកជាមុនដោយមិនឈរលើមូលដ្ឋានច្បាប់ជាតិ និងអន្តរជាតិឱ្យបានត្រឹមត្រូវ » ។
អាជ្ញាធររបបក្រុងភ្នំពេញតែងបង្ក្រាបជាញឹកញាប់ទៅលើពលរដ្ឋដែលប្រមូលផ្តុំគ្នាតវ៉ាដោយសន្តិវិធី ទាមទារឱ្យមានយុត្តិធម៌សង្គម។ ករណីថ្មីចុងក្រោយ គឺបង្ក្រាបដោយហិង្សា និងចាប់ខ្លួនពលរដ្ឋជាច្រើននាក់ ដាក់ពន្ធនាគារ អំឡុងខួប ២៩ឆ្នាំនៃកិច្ចព្រមព្រៀងសន្តិភាពទីក្រុងប៉ារីស ២៣ តុលា។
ការបង្ក្រាបរបស់អាជ្ញាធរជាហូរហែមកនោះ ច្រើនតែធ្វើឱ្យពលរដ្ឋ ជាពិសេស ក្រុមស្ត្រី រងរបួសធ្ងន់ស្រាល ហើយអាជ្ញាធរ ឬកងកម្លាំងសន្តិសុខសាលារាជធានីភ្នំពេញ មិនត្រូវបាននាំខ្លួនមកកាត់ទោសតាមច្បាប់នោះទេ។ ក្រុមអង្គការសង្គមស៊ីវិលជាតិ និងអន្តរជាតិ រួមទាំងទីភ្នាក់ងាររបស់អង្គការសហប្រជាជាតិផង សុទ្ធតែទាមទារយ៉ាងទទូចឱ្យរបបលោក ហ៊ុន សែន បញ្ឈប់ការបង្ក្រាបលើក្រុមពលរដ្ឋជាបន្ទាន់ ព្រោះការជួបជុំសម្ដែងមតិ មិនមែនជាបទល្មើសនោះទេ តែជាសិទ្ធិដែលធានាដោយច្បាប់ជាតិ និងអន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។