ចៅក្រមសាលាដំបូងរាជធានីភ្នំពេញ សម្រេចឃុំខ្លួន សមាជិកគណៈកម្មការប្រតិបត្តិគណបក្សសង្គ្រោះជាតិប្រចាំខេត្តបាត់ដំបង ២នាក់ ពីបទប្រមាថព្រះមហាក្សត្រ នៅថ្ងៃទី២០ តុលា ក្រោយពេលប៉ូលិស ចាប់បញ្ជូន និងសាកសួរអស់រយៈពេល ២ថ្ងៃ។
ស្របពេលចៅក្រមសម្រេចឃុំខ្លួន សមាជិកបក្សប្រឆាំង២នាក់នេះ សមាជិកបក្សប្រឆាំងម្នាក់ទៀត ដែលត្រូវជនមិនស្គាល់មុខ លបវាយនៅភ្នំពេញ កាលពីថ្ងៃទី១៩ តុលា ត្រូវគ្រូពេទ្យតម្រូវឲ្យវះកាត់លលាដ៍ក្បាល ដើម្បីសម្រួលឈាមកក ពីក្នុងខួរក្បាល។
អនុប្រធានគណៈកម្មការប្រតិបត្តិខេត្ត និងសមាជិកក្រុមប្រឹក្សាជាប់ឆ្នោតខេត្តបាត់ដំបង លោក ឌឹម សារឿន សោកស្ដាយ ចំពោះចៅក្រមតុលាការក្រុងភ្នំពេញ ដែលសម្រេចឃុំខ្លួន សមាជិកគណៈកម្មការប្រតិបត្តិខេត្ត ទាំង ២នាក់ គឺលោក គង់ ប៊ុនហ៊ាង និងលោក ហង្ស សេង ខណៈអ្នកទាំងពីរមានវ័យចំណាស់ និង កំពុងមានជំងឺប្រចាំខ្លួន។ លោក គង់ ប៊ុនហ៊ាង អាយុ ៦៦ឆ្នាំ មានជំងឺស្លាប់មួយចំហៀងខ្លួន និងងាប់សរសៃជើងខាងស្ដាំ។ ចំណែកលោក ហង្ស សេង អាយុ ៦៩ឆ្នាំ មានជំងឺទឹកនោមផ្អែម។
លោក ឌឹម សារឿន អះអាងថា សមាជិកប្រតិបត្តិខេត្តទាំង២នាក់ ជាមនុស្សគោរពព្រះមហាក្សត្រ មិនដែលមានបំណងប្រមាថ ម្ដងណាឡើយ។ ម្យ៉ាងទៀត លោក គង់ ប៊ុនហ៊ាង ជាអតីតអ្នករាជានិយម នៅគណបក្ស ហ៊្វុនស៊ីនប៉ិច ហើយទើបមកចូលរួមជាមួយគណបក្សសង្គ្រោះជាតិ។
លោក ឌឹម សារឿន ចង់ឲ្យតុលាការ ដោះលែងសមាជិកប្រតិបត្តិខេត្តទាំងពីរនាក់វិញ ដើម្បីកុំឲ្យសមាជិកបក្សប្រឆាំងផ្សេងទៀត ភិតភ័យ ព្រោះមានសមាជិកបក្សប្រហែល៥០នាក់ បានទៅចូលរួមធ្វើបុណ្យ ជាមួយ លោក កឹម សុខា ប្រធានគណបក្សសង្គ្រោះជាតិ កាលពេលភ្ជុំបិណ្ឌ៖ « ខ្ញុំថា អត់ត្រឹមត្រូវទេ អត់យុត្តិធម៌សោះ ពីព្រោះពួកគាត់ សុទ្ធតែជាអ្នកសុភាពរាបសា មនុស្សត្រឹមត្រូវ បើតាមយើងមើលភាពជាក់ស្ដែងរបស់គាត់។ វាគួរតែតុលាការ សម្រេចដោះលែងគាត់ ជាបន្ទាន់ផង ពីព្រោះអ្វី គាត់ពិការស្លាប់មួយចំហៀងខ្លួន ទឹកនោមផ្អែម លោកពូ គង់ ប៊ុនហ៊ាង ហើយ លោកពូ ហង្ស សេង គាត់ទឹកនោមផ្អែមដែរ។ លោកពូ គង់ ប៊ុនហ៊ាង គាត់ជាអតីតរាជានិយមផង»។
ចៅក្រមស៊ើបសួរសាលាដំបូងរាជធានីភ្នំពេញ លោក កេត សុជាតិ នៅព្រឹកថ្ងៃទី២០ តុលា បានសម្រេចបង្គាប់នគរបាលឱ្យនាំខ្លួនជនត្រូវចោទ លោក គង់ ប៊ុនហ៊ាង និង លោក ហង្ស សេង ទៅដាក់ពន្ធនាគារព្រៃស (ម១) បណ្ដោះអាសន្ន ដើម្បីរង់ចាំវិនិច្ឆ័យទោស តាមកំណត់របស់នីតិវិធីបន្ត។
អ្នកនាំពាក្យអយ្យការអមសាលាដំបូងរាជធានីភ្នំពេញ ប្រាប់ប្រព័ន្ធឃោសនាស្និទ្ធរបបក្រុងភ្នំពេញ (freshnews) ថា ព្រះរាជអាជ្ញារង លោក សេង ហៀង បានចោទប្រកាន់សមាជិកប្រតិបត្តិខេត្តបាត់ដំបងទាំងពីរនាក់ ពីបទ ប្រមាថចំពោះអង្គព្រះមហាក្សត្រ យោងតាមមាត្រា ៤៣៧ (ស្ទួន) នៃក្រមព្រហ្មទណ្ឌ។ បទចោទនេះ ប្រឈមការផ្ដន្ទាទោសពន្ធនាគារ ពី១ឆ្នាំ ទៅ៥ឆ្នាំ និងពិន័យជាប្រាក់ចំនួន ២លានរៀល ទៅ ១០ លានរៀល។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន សុំមិនបញ្ជាក់ក្នុងការចោទប្រកាន់លើសកម្មជនទាំងពីរនាក់នេះទេ តែលោកថា សមត្ថកិច្ចមានភស្តុតាងគ្រប់គ្រាន់ក្នុងការចោទប្រកាន់៖ « ចង់ដឹងច្បាស់រង់ចាំសវនាការសិន។ ឥឡូវនេះតុលាការចេញដីកាចោទប្រកាន់ហើយ ខ្ញុំអត់មានអីនិយាយទៀតទេ » ។
ទោះជាយ៉ាងណាប្រពន្ធ របស់ លោក គង់ ប៊ុនហ៊ាង គឺ លោកស្រី សេន ស៊ី អះអាងថា ប្ដីរបស់លោកស្រី ជាមនុស្សចាស់ទុំ មានជំងឺស្លាប់មួយចំហៀងខ្លួន និងមិនដែលហ៊ានជេរប្រមាថឡើយ។
ពាក់ព័ន្ធនឹងរឿងនេះដែរ នាយករង ទទួលបន្ទុកផ្នែកសិទ្ធិមនុស្ស នៃអង្គការលីកាដូ លោក អំ សំអាត សង្កេតឃើញថា មួយរយៈចុងក្រោយនេះ នគរបាល បានចាប់ខ្លួន សមាជិកបក្សប្រឆាំងថ្មីៗ បន្ថែមទៀត ខណៈតុលាការ ក៏ចាប់ផ្ដើមកោះហៅសកម្មជនបក្សប្រឆាំង ក្នុងសំណុំរឿងចាស់ៗ មកជម្រះសារឡើងវិញ។ ចំណែក សកម្មជនបក្សប្រឆាំង ក៏រងការលបវាយ ជាបន្តបន្ទាប់។
លោក អំ សំអាត មានប្រសាសន៍ថា ការកម្រើកឡើង នូវសកម្មភាពទាំងនោះ បណ្ដាលឲ្យតំណាងប្រទេសមួយចំនួន ព្រួយបារម្ភ ដោយយល់ថា ពាក់ព័ន្ធនឹងរឿងនយោបាយ។ លោកបន្តថា តំណាងអង្គការជាតិ អន្តរជាតិ និងតំណាងអង្គការសហប្រជាជាតិ ក៏បង្ហាញព្រួយបារម្ភដែរ ដោយសារការបង្ក្រាបកន្លងមក គឺការរំលោភសិទ្ធិមនុស្ស និងសិទ្ធិនយោបាយ របស់ពលរដ្ឋ៖ «( ការបង្ក្រាប ) អតីតនៃសកម្មជនគណបក្សប្រឆាំងជាដើមហ្នឹង គេចាត់ទុកថា វាជាការរំលោភបំពានសិទ្ធិមនុស្ស។ អ៊ីចឹង អាការចាប់លើកក្រោយហ្នឹង ដោយមិនមានការបង្ហាញអ្វី ជាមូលដ្ឋានច្បាស់លាស់ទេ គេនឹងរិះគន់បន្តទៀត ទាក់ទងនឹងការរំលោភជាមូលដ្ឋាន ទៅលើសិទ្ធិមនុស្ស។ ជាពិសេសចុងក្រោយ គេនិយាយពីការរំលោភសិទ្ធិមនុស្ស សិទ្ធិពលរដ្ឋ និងសិទ្ធិនយោបាយ»។
ដោយឡែក ចំពោះសកម្មជនបក្សប្រឆាំងម្នាក់ទៀត ដែលត្រូវជនមិនស្គាល់មុខ ២នាក់ ជិះម៉ូតូលបវាយ ពេលលោក កំពុងដើរលើផ្លូវ ម្ដុំផ្សារចាក់អង្រែក្រោម ខណ្ឌមានជ័យ កាលពីថ្ងៃទី១៩ តុលា គឺ លោក ឌិន វ៉ារិន ត្រូវគ្រូពេទ្យ នៅមន្ទីរពេទ្យព្រះកេតុមាលា តម្រូវឲ្យវះកាត់លលាដ៍ក្បាល ដើម្បីសម្រួលឈាមកកពីក្នុងខួរក្បាល។
ប្រពន្ធរបស់ លោក ឌិន វ៉ារិន គឺ លោកស្រី ចាន់ សុភ័គ ហៅ ចាន់ អ៊ីន ឲ្យដឹងថា ស្ថានភាពជំងឺរបស់ លោក ឌិន វ៉ារិន បានធូរស្រាលខ្លះហើយ ក្រោយការវះកាត់លលាដ៍ក្បាល កាលពីយប់ថ្ងៃទី១៩ តុលា ដើម្បីបង្ហូរឈាមចេញ កុំឲ្យកកក្នុងខួរក្បាល។ លោកស្រីប្រាប់ថា លោក ឌិន វ៉ារិន លែងក្អួតឈាមលោកដឹងខ្លួនដោយពេល អាចនិយាយបានខ្លះៗ និងហូបបបរបានបន្តិចបន្តួច។
លោក អំ សំអាត ជំរុញឲ្យនគរបាលស្រាវជ្រាវចាប់ជនដៃដល់ យកទៅផ្ដន្ទាទោសតាមច្បាប់ ព្រោះ ករណីហិង្សាធ្ងន់ធ្ងរនេះ បន្តកើតមានជាហូរហែ បណ្ដាលឲ្យកើតមានអំពើនិទ្ទណ្ឌភាព និងភាពភ័យខ្លាចដល់ពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។