សមត្ថកិច្ចចម្រុះដាក់កងកម្លាំងជាច្រើននាក់ព័ទ្ធស្នាក់ការគណបក្សកម្លាំងជាតិនៅភូមិព្រែកតាឡុង១ សង្កាត់ចាក់អង្រែក្រោមរាជធានីភ្នំពេញ នៅព្រឹកថ្ងៃ២៥ ខែសីហា ដោយមិនបញ្ជាក់មូលហេតុអ្វីឡើយ។ មន្រ្តីបក្សកម្លាំងជាតិ និងមន្រ្តីសិទ្ធិមនុស្សចាត់ទុកករណីនេះថាជាការគំរាមកំហែងបំបាក់ស្មារតីដែលធ្វើឱ្យលំហសេរីភាពនយោបាយនៅកម្ពុជាកាន់តែរួមតូច។
ទីប្រឹក្សាគណបក្សកម្លាំងជាតិ លោក រ៉ុង ឈុន ប្រាប់វិទ្យុអាស៊ីសេរីថា ថ្នាក់ដឹកនាំបក្សបានប្រជុំសម្រេច និងប្រកាសលើកពេលសមាជវិសាមញ្ញ ពីថ្ងៃទី២៥ ខែសីហាទៅរៀបចំនៅពេលក្រោយរួចហើយ តាមស្មារតីអង្គប្រជុំពីភាគីសាលារាជធានីភ្នំពេញកន្លងមក ក្នុងគោលបំណងបន្ធូរបន្ថយបរិយាកាសនយោបាយ និងជៀសវាងការប៉ះទង្គិចជាមួយអាជ្ញាធរ។ ប៉ុន្តែលោកភ្ញាក់ផ្អើលនៅពេលសមត្ថកិច្ចយកនៅថ្ងៃទី២៥ ខែសីហា មកដាក់កម្លាំងពង្រាយច្រូងច្រាង នៅតាមផ្លូវមុខទីស្នាក់ការបក្ស ស្ថិតនៅសង្កាត់ចាក់អង្រែក្រោម បើទោះបីជាមន្រ្តីរបស់គណបក្សបានលើកពេលធ្វើសមាជហើយយ៉ាងណាក្តី។
លោក រ៉ុង ឈុន ថាការដាក់កងកម្លាំងមានសមត្ថកិច្ចនៅបរិវេណជុំវិញស្នាក់ការបក្សនេះ ហាក់ជារូបភាពនៃការបំភិតបំភ័យដល់សកម្មជន និងប្រជាពលរដ្ឋ ព្រមទាំងរឹតត្បិតលើសកម្មភាពរបស់គណបក្សប្រឆាំងដែលធ្វើសកម្មភាពស្របតាមច្បាប់។
លោក រ៉ុង ឈុន៖«គណបក្សបានប្រកាសព័ត៌មានហើយថាយើងមិនរៀបចំសមាជនៅថ្ងៃទី២៥ ខែសីហា នោះទេ តែព្រឹកឡើងមានការដាក់កម្លាំងដាក់ពង្រាយអ៊ីចឹង ខ្ញុំមានការភ្ញាក់ផ្អើលមែនទែន ហើយជារូបភាពមួយមិនល្អសម្រាប់សង្គមយើងដែរ រូបភាពអ៊ីចឹងៗ។ បើយើងពិនិត្យមើលស្ថានភាពដូចជាមិនមានអីទេ ហើយថាអ្នកដែលមានបំណងចង់ផ្តួលរំលំរដ្ឋាភិបាលអី បើខ្ញុំមើលទៅគ្មាននរណាចង់ផ្តួលរំលំរដ្ឋាភិបាលអីទេ គឺពលរដ្ឋខ្មែរគ្រាន់តែប្រើប្រាស់សិទ្ធិ»។
វិទ្យុអាស៊ីសេរីមិនអាចទាក់ទងអ្នកនាំពាក្យស្នងការដ្ឋាននគរបាលរាជធានីភ្នំពេញលោក សំ វិច្ឆិកា ដើម្បីសុំការបកស្រាយជុំវិញរឿងនេះបានទេ នៅថ្ងៃទី២៥ ខែសីហា។
ការដាក់កងកម្លាំងព័ទ្ធស្នាក់ការបក្សកម្លាំងជាតិនេះ បន្ទាប់ពីសាលារាជធានីភ្នំពេញ កាលពីថ្ងៃទី ២០ ខែសីហា បានដាក់កំហិតឱ្យគណបក្សកម្លាំងជាតិពន្យារពេលធ្វើសមាជ នៅថ្ងៃទី ២៥ ខែសីហាឲ្យធ្វើនៅក្រោយថ្ងៃទី៣០ ខែសីហាវិញ។ បើទោះបីជាច្បាប់ធានាចំពោះសេរីភាពនៃជួបជុំរបស់អង្គការសមាគម និងគណក្សនយោបាយយ៉ាងណា សាលារាជធានីភ្នំពេញបានព្រមានបង្ក្រាបគណបក្សកម្លាំងជាតិបើនៅតែបន្តធ្វើសមាជរបស់ខ្លួន។
ជុំវិញរឿងនេះ មន្រ្តីជាន់ខ្ពស់នៃសមាគមការពារសិទ្ធិមនុស្សអាដហុកលោក យី សុខសាន្ត លើកឡើងថា គណបក្សនយោបាយមានសិទ្ធិសេរីភាពក្នុងការជួបជុំ ឬធ្វើសកម្មភាពរបស់ខ្លួនដោយគ្មានការរារាំង ឬដាក់កំហិតអ្វីឡើយ ពីព្រោះសិទ្ធិទាំងនោះធានាដោយរដ្ឋធម្មនុញ្ញ។ លោកយល់ថាការពង្រាយកងកម្លាំងមានសមត្ថកិច្ចនៅទីស្នាក់ការគណបក្សកម្លាំងជាតិ គឺអាជ្ញាធរហាក់បារម្ភហួសហេតុ ដែលបញ្ហានេះមជ្ឈដ្ឋានជាតិនិងអន្តរជាតិមើលឃើញថា លំហសេរីភាពនៅកម្ពុជាកំពុងដើរថយក្រោយគួរឱ្យព្រួយបារម្ភ ហើយជំរុញដល់ដ្ឋាភិបាលឱ្យបើកលំហសិទ្ធិពលរដ្ឋ និងនយោបាយឡើងវិញ។
លោក យី សុខសាន្ត៖«វាជាការរំលោភសិទ្ធិធ្ងន់ធ្ងរណាស់ពាក់ព័ន្ធនឹងសេរីភាពរបស់គណបក្សនយោបាយដែលមានចែងនៅក្នុងរដ្ឋធម្មនុញ្ញ មួយទៀតខ្ញុំយល់ថារដ្ឋាភិបាលគួរតែបើកលំហសេរីភាពទាំងអង្គការសង្គមស៊ីវិស ក៏ដូចគណបក្សនយោបាយ បើមិនអ៊ីចឹងទេកម្ពុជាយើងនឹងក្លាយទៅជាប្រទេសស្ងាត់ជ្រងំដែលគ្មានអ្នកណាមិនហ៊ានមក សូម្បីតែអ្នករកស៊ីមិនហ៊ានមកស្រុកយើងដែរ ដោយសារអី យើងមើលជាក់ស្តែងហ្នឹង»។
អាជ្ញាធររដ្ឋាភិបាលលោក ហ៊ុន ម៉ាណែត ធ្វើទុក្ខបុកម្នេញលើគណបក្សកម្លាំងជាតិមិនមែនជាលើកទីមួយនោះទេ។ ជាក់ស្តែងមន្រ្តីគណបក្សនេះមួយចំនួនត្រូវចាប់ខ្លួនដាក់ពន្ធនាគារជាបន្តបន្ទាប់ រួមមានប្រធានគណបក្សលោក ស៊ុន ចន្ធី សមាជិកបក្សលោក អ៊ុំ វីរៈរដ្ឋ និងលោក គា វិសាស ជាដើម។ ចំណែកមន្រ្តីសំខាន់ផ្សេងទៀតត្រូវរងការគំរាមកំហែង តាមដានពីដំណាក់អាជ្ញាធរនៅរយៈពេលចុងក្រោយនេះ។
កាលពីថ្ងៃទី១២ ខែសីហា គណបក្សកម្លាំងជាតិ បានដាក់លិខិតជូនដំណឹង ទៅសាលារាជធានីភ្នំពេញ អំពីការជួបជុំគ្នាចំនួន១ពាន់៥រយនាក់ ដើម្បីធ្វើសមាជវិសាមញ្ញនៅទីលានប្រជាធិបតេយ្យនៅថ្ងៃទី២៥ សីហាតែត្រូវរដ្ឋបាលរាជធានីភ្នំពេញ បដិសេធដោយតម្រូវឲ្យគណបក្សកម្លាំងជាតិរៀបចំធ្វើសមាជនៅទីស្នាក់ការរបស់ខ្លួន។
លោក រ៉ុង ឈុន បញ្ជាក់ថាគណបក្សកម្លាំងជាតិ រក្សាជំហរជួបជុំគ្នាធ្វើសមាជដដែល ដើម្បីបោះឆ្នោតផ្តល់សេចក្តីទុកចិត្តចំពោះក្បាលម៉ាស៊ីដឹកនាំសំខាន់ៗរបស់គណបក្សតាមលក្ខន្តិកៈ និងបទបញ្ជាផ្ទៃក្នុងរបស់គណបក្សដែលបានទទួលស្គាល់ដោយក្រសួងមហាផ្ទៃ។ ចំណែកពេលវេលា និងទីតាំងថ្នាក់ដឹកនាំបក្សនឹងប្រជុំសម្រេចនៅដើមខែកញ្ញាខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។