រដ្ឋមន្ត្រីក្រសួងមហាផ្ទៃ លោក ស ខេង ថ្លែងកោតសរសើរចំពោះកងកម្លាំងនគរបាលជាតិ ដែលលោកអះអាងថា បានចូលរួមយ៉ាងសកម្មក្នុងការថែរក្សាសណ្ដាប់ធ្នាប់សាធារណៈ កាលពីពេលក្រោយការបោះឆ្នោតជ្រើសតាំងតំណាងរាស្ត្រខែកក្កដា ឆ្នាំ២០១៣។ ការថ្លែងរបស់ លោក ស ខេង ដូចនេះ ធ្វើឡើងនៅក្នុងខួបអនុស្សាវរីយ៍លើកទី៧០ ថ្ងៃកំណើតនគរបាលជាតិកម្ពុជា នាក្រសួងមហាផ្ទៃ នៅថ្ងៃទី១៦ ឧសភា។
ជោគជ័យនៃការថែរក្សាសណ្ដាប់ធ្នាប់សាធារណៈ និងស្ថិរភាពសង្គមនៅក្រោយព្រឹត្តិការណ៍បោះឆ្នោតឆ្នាំ២០១៣ និងការគ្រប់គ្រងសន្តិសុខនៅឆ្នាំ២០១៤ គឺជាសមិទ្ធផលសំខាន់បំផុតមួយដែលរដ្ឋមន្ត្រីក្រសួងមហាផ្ទៃ លោក ស ខេង លើកឡើងនៅក្នុងខួបអនុស្សាវរីយ៍លើកទី៧០ ថ្ងៃកំណើតនគរបាលជាតិកម្ពុជា។
ថ្លែងទៅកាន់អ្នកចូលរួមប្រមាណ ៥០០នាក់ ដែលភាគច្រើនជាមន្ត្រីនគរបាលជាតិជាន់ខ្ពស់ មន្ត្រីកងរាជអាវុធហត្ថលើផ្ទៃប្រទេស មន្ត្រីនៃកងយោធពលខេមរភូមិន្ទ និងអភិបាលខេត្តនានា លោក ស ខេង បានសម្ដែងការលើកទឹកចិត្ត និងកោតសរសើរចំពោះកងកម្លាំងនគរបាលជាតិ ដែលលោកអះអាងថា ពួកគេបានកសាងគុណសម្បត្តិយ៉ាងធំធេង ក្នុងការដោះស្រាយសភាពការណ៍ទប់ស្កាត់ និងបញ្ចៀសបាននូវសកម្មភាពបង្កមហន្តរាយដល់សង្គម ដែលបង្កឡើងដោយក្រុមជ្រុលនិយមក្នុងបំណងធ្វើបដិវត្តន៍ពណ៌ ដើម្បីផ្ដួលរំលំរដ្ឋាភិបាលស្របច្បាប់នៅក្រោយការបោះឆ្នោតឆ្នាំ២០១៣។
ការថ្លែងរបស់ លោក ស ខេង ដូចនេះ គឺនៅបន្ទាប់ពីអគ្គស្នងការនគរបាលជាតិ លោក នេត សាវឿន បានឡើងថ្លែងប្រាប់អ្នកចូលរួមអំពីសមិទ្ធផលនានាដែលកងកម្លាំងនគរបាលជាតិ សម្រេចបានក្នុងឆ្នាំ២០១៤ ក្នុងនោះរួមមាន ការរក្សាសណ្ដាប់ធ្នាប់នៅក្រោយព្រឹត្តិការណ៍បោះឆ្នោតជ្រើសតាំងតំណាងរាស្ត្រឆ្នាំ២០១៣ និងការបង្ក្រាបទៅលើបទល្មើសជាច្រើនផ្សេងទៀត ដូចជាការជួញដូរគ្រឿងញៀន ការជួញដូរមនុស្ស និងផ្លូវភេទ ការគ្រប់គ្រងអាវុធជាតិផ្ទុះ និងបញ្ហាក្មេងទំនើង ជាដើម។
លោក ស ខេង ក៏បានបញ្ជាក់ប្រាប់អ្នកចូលរួមដែរថា ការរក្សាសន្តិសុខជាតិ គឺត្រូវបានរដ្ឋាភិបាលកម្ពុជា កំណត់ថាជាវិស័យអាទិភាពដ៏សំខាន់មួយ និងជាស្នូលនៃយុទ្ធសាស្ត្រចតុកោណរបស់រដ្ឋាភិបាល។ លោក ស ខេង ណែនាំឲ្យកងកម្លាំងនគរបាលជាតិគ្រប់លំដាប់ថ្នាក់ ឲ្យបន្តចូលរួមថែរក្សាសណ្ដាប់ធ្នាប់ឲ្យកាន់តែប្រសើរថែមទៀត៖ «សមត្ថកិច្ចពាក់ព័ន្ធទាំងអស់ត្រូវបន្តពង្រឹងសន្តិភាព ស្ថិរភាពនយោបាយ សន្តិសុខ និងសណ្ដាប់ធ្នាប់សង្គមឲ្យបានល្អប្រសើរ ដើម្បីរក្សាបានរឹងមាំនូវខឿនសន្តិសុខជាតិ បង្កើតបាននូវលក្ខខណ្ឌអនុគ្រោះសម្រាប់ការអភិវឌ្ឍប្រទេសជាតិប្រកបដោយចីរភាព»។
បច្ចុប្បន្ន កម្ពុជា មានកងកម្លាំងនគរបាលជាតិទូទាំងប្រទេសប្រមាណជាង ៥ម៉ឺន ៨ពាន់នាក់ ហើយឆ្នាំនេះ គឺជាឆ្នាំទី៨ហើយដែលរដ្ឋាភិបាលកម្ពុជា បានប្រារព្ធទិវារំឭកខួបអនុស្សាវរីយ៍នៃការបង្កើតកងកម្លាំងនគរបាលជាតិកម្ពុជា។
ក្នុងខួបអនុស្សាវរីយ៍លើកទី៧០ ថ្ងៃកំណើតនគរបាលជាតិកម្ពុជា នេះដែរ លោកនាយករដ្ឋមន្ត្រី ហ៊ុន សែន តាមរយៈលិខិតជូនពរទៅកាន់កងកម្លាំងនគរបាលជាតិ បានថ្លែងថា នៅក្រោយការបោះឆ្នោតឆ្នាំ២០១៣ និងអំឡុងពេលពេញមួយឆ្នាំ២០១៤ កងកម្លាំងនគរបាលជាតិបានប្រឈមមុខរែកពុនភារកិច្ចជាច្រើន ក្នុងការគ្រប់គ្រងសភាពការណ៍សង្គម ដើម្បីបញ្ចៀសនូវមហន្តរាយដល់សន្តិសុខជាតិ ការពាររដ្ឋធម្មនុញ្ញ ការពាររដ្ឋាភិបាលស្របច្បាប់ និងធានាប្រក្រតីភាពជីវភាពសង្គម។
ទោះជាយ៉ាងណា ការអនុវត្តការងាររបស់កងកម្លាំងនគរបាលជាតិកន្លងមក ជាពិសេសការបង្ក្រាបរបស់នគរបាលទៅលើអ្នកគាំទ្របក្សប្រឆាំងនៅទីលានប្រជាធិបតេយ្យ ការបង្ក្រាបលើកម្មករទាមទារប្រាក់ខែលើកំណាត់ផ្លូវវ៉េងស្រេង និងការរំលោភបំពានលើអ្នកការពារសិទ្ធិមនុស្សមួយចំនួនទៀត នៅក្រោយការបោះឆ្នោតឆ្នាំ២០១៣ ត្រូវបានអង្គការសិទ្ធិមនុស្សជាតិ អន្តរជាតិ សម្ដែងការរិះគន់ និងថ្កោលទោសយ៉ាងខ្លាំង។
យ៉ាងណាក៏ដោយ នៅក្នុងខួបអនុស្សាវរីយ៍ទី៧០ នៃការបង្កើតកងកម្លាំងនគរបាលជាតិនោះ ក្រៅតែពីថ្លែងលើកទឹកចិត្ត និងកោតសរសើរចំពោះការអនុវត្តការងាររបស់កងកម្លាំងនគរបាលជាតិ លោក ស ខេង និងលោក នេត សាវឿន មិនបានលើកឡើងពីកំហុសឆ្គងរបស់កងកម្លាំងនគរបាលជាតិ ក្នុងការអនុវត្តការងារនាពេលកន្លងមកនោះឡើយ។
អ្នកគ្រប់គ្រងបច្ចេកទេសការិយាល័យស៊ើបអង្កេតនៃអង្គការសិទ្ធិមនុស្សលីកាដូ (Licadho) លោក អំ សំអាត កត់សម្គាល់ថា ក្រៅតែពីលើកឡើងអំពីសមិទ្ធផលនានាដែលកងកម្លាំងនគរបាលសម្រេចបាន រដ្ឋាភិបាលក៏គួរលើកឡើងអំពីកំហុសឆ្គង និងចំណុចអវិជ្ជមានដែលបានអនុវត្តកន្លងមក ដើម្បីយកមកសិក្សាកែលំអកុំឲ្យកំហុសឆ្គងកើតឡើងជាថ្មីទៀតក្នុងពេលខាងមុខ៖ «សង្គមស៊ីវិលយើងតែងតែលើកឡើងជាហូរហែហើយថា នៅដើមឆ្នាំ២០១៤ យើងឃើញថាមានការប្រើប្រាស់កងកម្លាំងយ៉ាងច្រើនហួសហេតុ ក្នុងការបង្ក្រាបលើកម្មករកម្មការិនី ឬក៏បង្ក្រាបទៅលើក្រុមបាតុកម្មដោយសន្តិវិធី ធ្វើឲ្យមានមនុស្សស្លាប់ច្រើននាក់ និងមានការចាប់ចងជាបន្តបន្ទាប់ អាហ្នឹងក៏ជាចំណុចអវិជ្ជមានមួយដែលគេមើលឃើញថា កងកម្លាំងនគរបាលជាតិវាហាក់បីដូចជាមានភាពលម្អៀងទៅរកគណបក្សដែលកាន់អំណាច»។
លោក អំ សំអាត ថ្លែងដែរថា ការមិនលើកឡើងនូវកំហុសឆ្គង និងចំណុចអវិជ្ជមានការងាររបស់កងកម្លាំងនគរបាលជាតិ អាចជាគ្រោះថ្នាក់មួយសម្រាប់ការអនុវត្តការងាររបស់ពួកគេក្នុងពេលខាងមុខ។ លើសពីនេះ លោកថា វាក៏អាចជាការលើកទឹកចិត្តធ្វើឲ្យមាននិទ្ទណ្ឌភាព ឬភាពគ្មានទោសពៃរ៍ចំពោះកម្លាំងនគរបាលនៅកម្ពុជា ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។