អ្នកនាំពាក្យអយ្យការអមសាលាដំបូងខេត្តពោធិ៍សាត់ នៅថ្ងៃទី១៦ ខែសីហា បានចោទប្រកាន់យុវជនម្នាក់ ឈ្មោះ «ធា ធីវ» អាយុ ២២ឆ្នាំ អំពីបទរួមគំនិតក្បត់ និងញុះញង់បង្កឲ្យមានភាពចលាចលសង្គម ក្រោយពេលយុវជនរូបនេះ បានចេញវីដេអូអំពាវនាវដល់មហាជនឱ្យចូលរួមធ្វើបាតុកម្ម ប្រឆាំងគម្រោងអភិវឌ្ឍន៍ នៅតំបន់ត្រីកោណ រវាងកម្ពុជា ឡាវ និងវៀតណាម CLV។ យុវជនរូបនេះ ជាកសិករ មានកម្រិតវប្បធម៌ថ្នាក់ទី៩ ថ្មី រស់នៅក្នុងឃុំបឹងខ្នារ ស្រុកបាកាន ខេត្តពោធិ៍សាត់។
ក្រៅពីយុវជន «ធា ធីវ» ដែលត្រូវបានចាប់ខ្លួន សមត្ថកិច្ចខេត្តពោធិ៍សាត់ ក៏បានឃាត់ខ្លួនយុវជន ២នាក់ផ្សេងទៀត នៅស្រុកវាលវែង តែមិនបានបញ្ជាក់ឈ្មោះ ពាក់ព័ន្ធនឹងការចោទប្រកាន់អំពីបទរួមគំនិតប្រព្រឹត្តអំពើក្បត់ជាតិ និងញុះញង់បង្កចលាចលសង្គម ចង់ផ្តួលរំលំរាជរដ្ឋាភិបាល។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្ស លីកាដូ (LICADHO) លោក អំ សំអាត មានប្រសាសន៍ប្រាប់វិទ្យុអាស៊ីសេរីថា លោកអំពាវនាវឲ្យបញ្ឈប់ការចាប់ខ្លួនពលរដ្ឋ និងទទូចដល់រដ្ឋាភិបាល ឲ្យគិតគូរដល់ប្រយោជន៍ជាតិ និងប្រយោជន៍ពលរដ្ឋជាធំ។
លោក អំ សំអាត៖«ជាតួលេខ យើងឃើញមានប្រមាណជាង១០នាក់ហើយដែលត្រូវបានចាប់ខ្លួន។ អ៊ីចឹង យើងជាអង្គការសង្គមស៊ីវិល ដែលធ្វើការផ្នែកសិទ្ធិមនុស្ស មានការព្រួយបារម្ភណាស់ ចំពោះការចាប់ខ្លួនចុងក្រោយនេះ។ យើងទទូចដល់អ្នកនយោបាយទាំងអស់ តម្កល់ឧត្ដមប្រយោជន៍ជាតិ និងពលរដ្ឋជាធំ ហើយយើងមើលឃើញថា រាល់បញ្ហាកើតឡើង គឺពលរដ្ឋទេ ជាជនរងគ្រោះ។ ហេតុនេះ រដ្ឋាភិបាលត្រូវគិតគូរពីផលប្រយោជន៍ប្រទេសជាតិ និងប្រជាពលរដ្ឋជាធំ»។
ក្រោយពីមានក្រុមតេឡេក្រាមមួយឈ្មោះ «រួបរួមដើម្បីជាតិ» ប្រកាសគ្រោងប្រមូលគ្នាធ្វើបាតុកម្ម នៅថ្ងៃទី១៨ ខែសីហា ក្នុងរាជធានីភ្នំពេញ ដើម្បីទាមទារឱ្យរដ្ឋាភិបាលដកខ្លួនចេញពីកិច្ចសហប្រតិបត្តិការតំបន់ត្រីកោណអភិវឌ្ឍន៍ (CLV) មក លោកនាយករដ្ឋមន្ត្រី ហ៊ុន ម៉ាណែត និងឪពុករបស់លោក គឺលោក ហ៊ុន សែន បានចេញបញ្ជាឱ្យកងកម្លាំងប្រដាប់អាវុធ និងអាជ្ញាធរគ្រប់រាជធានីខេត្តទាំងអស់ ត្រូវទប់ស្កាត់មិនឱ្យមានការជួបជុំ ឬការធ្វើដំណើរជាក្រុមៗ មករាជធានីភ្នំពេញនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។