ប៉ូលិស​បញ្ជូន​សកម្មជន​បក្ស​ភ្លើង​ទៀន ៦នាក់ ទៅ​សាលាដំបូង​ខេត្ត​បន្ទាយមានជ័យ​រឿង​ផ្ដិត​មេដៃ​បង្កើត​បក្ស​ថ្មី

0:00 / 0:00

ប៉ូលិស​បញ្ជូន​មន្ត្រី​គណបក្ស​ភ្លើង​ទៀន ៦នាក់ ទៅ​សាលាដំបូង​ខេត្ត​បន្ទាយមានជ័យ នៅ​ព្រឹក​ថ្ងៃ​ទី១២ កញ្ញា ដើម្បី​សាកសួរ​បន្ត​ពាក់ព័ន្ធ​នឹង​ការ​ប្រមូល​ស្នាម​មេដៃ​ប្រជាពលរដ្ឋ​បង្កើត​គណបក្ស​ថ្មី។ សាច់ញាតិ​ចាត់​ទុក​រឿង​នេះ​ថា ជា​ការ​ធ្វើ​ទុក្ខ​បុក​ម្នេញ​ផ្នែក​នយោបាយ។

សាច់ញាតិ​មន្ត្រី​គណបក្ស​ភ្លើង​ទៀន​​ដែល​សមត្ថកិច្ច​ចាប់​ខ្លួន​នៅ​ខេត្ត​បន្ទាយមានជ័យ​​លើក​ឡើង​ថា ​មន្ត្រី​បក្ស​ប្រឆាំង​ទាំង​៦​នាក់​នោះ​មិន​បាន​ប្រព្រឹត្ត​ខុស​ច្បាប់​​អ្វី​ឡើយ ដូច្នេះ​តុលាការ​គួរតែ​ដោះលែង​ពួកគេ​ឱ្យ​មាន​សេរីភាព​វិញ។

ប្រពន្ធ​លោក ស៊ិន វត្ថា ប្រធាន​ប្រតិបត្តិ​គណបក្ស​ភ្លើង​ទៀន​ខេត្ត​បន្ទាយមានជ័យ គឺ​លោក​ស្រី ​​​សួន សោមាលី ប្រាប់​វិទ្យុ​អាស៊ី​សេរី​នៅ​ថ្ងៃ​ទី១២ កញ្ញា​ថា ប៉ូលិស​បាន​បញ្ជូន​ប្ដី​របស់​លោក​ស្រី​និង​សកម្មជន​បក្ស​ភ្លើង​ទៀន​៥​នាក់​​ទៀត​ទៅ​​​សាលាដំបូង​ខេត្ត​បន្ទាយមានជ័យ​ហើយ ដើម្បី​សាកសួរ​បន្ត​​ពាក់ព័ន្ធ​នឹង​​ការ​ប្រមូល​ស្នាម​មេ​ដៃ​ប្រជាពលរដ្ឋ​​បង្កើត​គណបក្ស​ថ្មី​។ ​លោក​ស្រី​ចាត់​ទុក​ការ​បន្ត​ឃុំ​ខ្លួន​ប្ដី​លោក​ស្រី​នេះ​ថា ​ជា​​​រឿង​អយុត្តិធម៌​និង​ជា​ការ​ធ្វើ​ទុក្ខបុកម្នេញ​ផ្នែក​នយោបាយ។

លោក​ស្រី ​​​សួន សោមាលី៖ «ចុះ​ចង់​និយាយ​ថា​អត់​​បាន​ធ្វើ​អី​ខុស​ផង​ដល់​ពេល​ចាប់​ខ្លួន​គាត់​ទៅ​អីចឹង​។​ព្រោះ​ស្នាម​មេ​ដៃ​​ការ​បង្កើត​គណបក្ស​នឹង​ខាង​ថ្នាក់​លើ​គេ​​ឱ្យ​យើង​បង្កើត​ហើយ គេ​អោយ​យើង​បង្កើត​ហើយ​អី​ហើយ​យើង​ស្មាន​តែ​វា​ស្រប​ហើយ​ ខ្ញុំ​ឆ្ងល់​ដែរ ម៉េច​បាន​ខុស​ច្បាប់​រឿង​អី ? ។ ​ខ្ញុំ​សុំ​ឱ្យ​រដ្ឋាភិបាល​ឬ​ក៏​អ្នក​​ខាង​លើ​មាន​អំណាច​អី​សូម​ឱ្យ​ដោះលែង​គាត់​ទាំង​៦​នាក់​នឹង​វិញ​មក​ព្រោះ​ពួកគាត់​មិន​បាន​ទៅ​ធ្វើ​អ្វី​ខុស​នោះ​ទេ​ »

មន្ត្រី​គណបក្ស​ប្រឆាំង ដែល​តុលាការ​បន្ត​សាកសួរ​នេះ​ភាគ​ច្រើន​ជា​ថ្នាក់​ដឹក​នាំ​បក្ស​ភ្លើង​ទៀន​ខេត្ត​បន្ទាយមានជ័យ រួម​មាន លោក ស៊ិន វត្ថា លោក ទេព សម្បត្តិ វឌ្ឍនោ លោក ឡុង ឡាវី លោក ទួត វាសនា ​និង​មនុស្ស​មួយ​ចំនួន​ទៀត។ ពួក​គេ​ត្រូវ​បាន​អាជ្ញាធរ​ចាប់​ខ្លួន កាល​ពី​ថ្ងៃ​ទី៨ និង​ទី៩ ខែ​កញ្ញា ​ហើយ​មក​ដល់​រសៀល​ថ្ងៃ​ទី១២ កញ្ញា មិន​ទាន់​ដោះលែង​នៅ​ឡើយ។

វិទ្យុ​អាស៊ី​សេរី​មិន​អាច​ទាក់​អ្នក​នាំ​ពាក្យ​សាលាដំបូង​ខេត្ត​បន្ទាយមានជ័យ​ លោក​រឿន លីណា ដើម្បី​សុំ​អត្ថាធិប្បាយ​ជុំ​វិញ​បញ្ហា​នេះ​បាន​ទេ​នៅ​ថ្ងៃ​ទី​១២​កញ្ញា។

ទោះ​ជា​យ៉ាង​ណា​ក្ដី អតីត​រដ្ឋមន្ត្រី​ក្រសួង​មហាផ្ទៃ លោក ស ខេង បាន​អនុញ្ញាត​ឱ្យ​បង្កើត​គណបក្ស​បញ្ញា​ទំនើប តប​តាម​ការ​ស្នើ​សុំ​របស់​តំណាង​ស្ថាបនិក​គណបក្ស​នេះ​គឺ លោក អ៊ឹម សូនិត ដែល​ជា​អតីត​ប្រធាន​ក្រុម​ការងារ​គណបក្ស​ភ្លើង​ទៀន​ ខេត្ត​ព្រះសីហនុ​។លិខិត​របស់​ក្រសួង​មហាផ្ទៃ​ចុះ​ថ្ងៃ​ទី១៨ ខែសីហា ឆ្នាំ២០២៣ ថា ដូច្នេះ ដើម្បី​ទទួល​បាន​សុពលភាព និង​អាច​ធ្វើ​សកម្មភាព​ដោយ​ស្របច្បាប់ ក្នុង​ឋានៈ​ជា​នីតិបុគ្គល ក្នុង​រយៈ​ពេល ១៨០ថ្ងៃ បន្ទាប់​ពី​បាន​បង្កើត​រួច​ហើយ។ គណបក្ស​បញ្ញា​ទំនើប​ត្រូវ​រៀបចំ និង​បំពេញ​លក្ខខណ្ឌ​ស្នើសុំ​ចុះ​បញ្ជី​នៅ​ក្រសួង​មហាផ្ទៃ ស្រប​តាម​កថាខណ្ឌ​ទី២ មាត្រា៩ មាត្រា១៨ ថ្មី មាត្រា១៩ ថ្មី និង​មាត្រា២០ នៃ​ច្បាប់​ស្ដី​ពី​គណបក្ស​នយោបាយ។

ជុំវិញ​រឿង​នេះ នាយក​ទទួលបន្ទុក​កិច្ចការ​ទូទៅ​នៃ​អង្គការ​ឃ្លាំមើល​សិទ្ធិមនុស្ស លីកាដូ (LICADHO) លោក អំ សំអាត មាន​ប្រសាសន៍​ថា​ ប្រសិន​បើ​ការ​ចាប់​ខ្លួន​នេះ​ដោយសារ​តែ​មន្ត្រី​បក្ស​ប្រឆាំង​ទាំង​នោះ​ចុះ​ប្រមូល​ស្នាម​មេដៃ​ពី​ប្រជាពលរដ្ឋ ដើម្បី​បង្កើត​គណបក្ស​ថ្មី គឺ​ជា​រឿង​មិន​ត្រឹម​ត្រូវ​ឡើយ។ លោក​បញ្ជាក់​ថា ការ​ចូល​រួម​ក្នុង​ជីវភាព​នយោបាយ គឺ​ជា​សិទ្ធ​សេរីភាព​របស់​ពលរដ្ឋ​ស្រប​តាម​រដ្ឋធម្មនុញ្ញ។

លោក អំ សំអាត៖ «ហើយ​ត្រូវ​ចោទ​ប្រកាន់​ជា​បទ​ល្មើស​អា​ហ្នឹង​វា​ជា​រឿង​មួយ​មិន​សមស្រប​ហើយ​វា​ទៅ​ជា​គេ​ចោទ​ប្រកាន់​ទៅ​ជា​រឿង​នយោបាយ​អី​ទៅ​វិញ​។ ហើយ​មួយ​ទៀត​យើង​ឃើញ​ថា ​បញ្ហា​ស្ថានភាព​នយោបាយ​នៅ​ក្នុង​ប្រទេស​កម្ពុជា​យើង​​តាំង​ពី​មុន​បោះ​ឆ្នោត​មក​ក៏​មាន​ស្ថានភាព​មួយ​មិន​សូវ​ល្អ​ដែរ ជា​ពិសេស​ដែល​គេ​មើល​ទៅ​លើ​លំហ​សេរីភាព​នយោបាយ​ ហើយ​សហគមន៍​អន្តរជាតិ​មាន​ការ​រិះគន់ ហើយ​ក៏​មាន​ការ​ស្នើ​សុំ​ឱ្យ​បើក​ទូលាយ​ទាក់ទង​ទៅ​នឹង​លំហ​សេរីភាព ​ លទ្ធិប្រជាធិបតេយ្យ​និង​ការ​គោរព​សិទ្ធិមនុស្ស​ហ្នឹង »

រដ្ឋធម្មនុញ្ញ​មាត្រា៣៥ ចែង​ថា ប្រជាពលរដ្ឋ​ខ្មែរ​ទាំង​ពីរ​ភេទ មាន​សិទ្ធិ​ចូលរួម​យ៉ាង​សកម្មជន​ក្នុង​ជីវភាព​នយោបាយ សេដ្ឋកិច្ច សង្គមកិច្ច និង​វប្បធម៌​របស់​ប្រទេស​ជាតិ។ សេចក្ដី​ស្នើ​ទាំង​ឡាយ​ណា​ពី​ប្រជាពលរដ្ឋ​ត្រូវ​បាន​ទទួល​ការ​ពិនិត្យ និង​ដោះស្រាយ​យ៉ាង​ហ្មត់ចត់​ពី​អង្គការ​រដ្ឋ។

ចំណែក​ច្បាប់​ស្ដីពី​គណបក្ស​នយោបាយ​មាត្រា៩ ចែង​ថា ប្រជាពលរដ្ឋ​ខ្មែរ​យ៉ាងតិច ៨០នាក់ ដែល​មាន​អាយុ​ចាប់​ពី ១៨ឆ្នាំ​ឡើង​ទៅ និង​មាន​ទីលំនៅ​អចិន្ត្រៃយ៍​នៅ​កម្ពុជា​មាន​សិទ្ធ​បង្កើត​គណបក្ស​នយោបាយ​មួយ​បាន ដោយ​គ្រាន់តែ​ជូនដំណឹង​ជាលាយលក្ខណ៍អក្សរ​ទៅ​ក្រសួង​មហាផ្ទៃ។ ដោយ​ឡែក មាត្រា១៩ នៃ​ច្បាប់​ដដែល​នេះ​ចែង​ថា ដើម្បី​ទទួល​បាន​សុពលភាព គណបក្ស​នយោបាយ​ត្រូវ​សុំ​ចុះ​បញ្ជី​គណបក្ស​នយោបាយ ដោយ​ត្រូវ​មាន​សមាជិក​យ៉ាងតិច ៤ពាន់ (៤.០០០) នាក់ មក​ពី​តាម​បណ្ដា​ខេត្ត​ក្រុង​មួយ​ចំនួន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។