នៅសល់ប៉ុន្មានថ្ងៃទៀតទេ នឹងត្រូវឆ្លងចូលឆ្នាំថ្មីឆ្នាំ២០២១ ប៉ុន្តែវិបត្តិនយោបាយរវាងគណបក្សកាន់អំណាច និងគណបក្សប្រឆាំង ដែលអូសបន្លាយជាង៣ឆ្នាំមកហើយនោះនៅតែមិនទាន់ដល់ទីបញ្ចប់នៅឡើយ។ មេបក្សប្រឆាំង ដែលនៅក្នុងប្រទេស លោក កឹម សុខា បង្ហោះសារថ្វាយព្រះពរព្រះមហាក្សត្រ ចំណែកមេបក្សប្រឆាំងមួយរូបទៀត ដែលកំពុងនៅក្រៅប្រទេសវិញ បានផ្ញើសាររិះគន់ព្រះមហាក្សត្រថាមិនបានបំពេញព្រះរាជតួនាទីដោះស្រាយវិបត្តិនយោបាយ។
មេដឹកនាំគណបក្សគណបក្សសង្គ្រោះជាតិនៅតែចោទប្រកាន់ថា គណបក្សកាន់អំណាចជាអ្នកបង្កឱ្យមានវិបត្តិនយោបាយ ប៉ុន្តែមន្រ្តីរដ្ឋាភិបាល នៅតែប្រកាន់ថា កម្ពុជាគ្មានវិបត្តិនយោបាយទេ គឺមានតែអ្នកនយោបាយមានទោស។
ប្រធានគណបក្សសង្គ្រោះជាតិ លោក កឹម សុខា នៅថ្ងៃទី២៨ ខែធ្នូ បានបង្ហោះសារលិខិតថ្វាយព្រះពរជូនព្រះមហាក្សត្រព្រះបាទបរមនាថ នរោត្តម សីហមុនី ក្នុងឱកាសឆ្លងឆ្នាំថ្មី។ លោក កឹម សុខា បានបួងសួងសូមព្រះមហាក្សត្រមានព្រះបញ្ញាញាណ ព្រះរាជសុខភាពល្អបរិបូណ៍ ព្រះកាយពលរឹងមាំខ្លាំងក្លា ព្រះជន្មាយុយឺនយូរ និងទ្រង់គង់ប្រថាប់នៅជាម្លប់ដ៏ត្រជាក់ត្រជុំដល់ប្រជានុរាស្ត្រ។
សារលិខិតថ្វាយព្រះពរ ព្រះករុណាព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា...
Posted by Kem Sokha on Sunday, December 27, 2020
ទោះយ៉ាងណា លោក កឹម សុខា ដែលកំពុងរងការចោទប្រកាន់ពីតុលាការ និងមិនទាន់មានសិទ្ធិធ្វើនយោបាយឡើងវិញ មិនបានស្នើទៅព្រះមហាក្សត្រព្រះរាជអន្តរាគមន៍លើ វិបត្តិនយោបាយឡើយ។
ការផ្ញើសារលិខិតថ្វាយព្រះពរដល់ព្រះមហាក្សត្រនៅពេលនេះ គឺបន្ទាប់ពី ប្រធានស្ដីទីគណបក្សសង្រ្គោះជាតិ លោក សម រង្ស៊ី បានប្រើសាររិះគន់ធ្ងន់ៗដល់អង្គព្រះមហាក្សត្រ ហើយត្រូវបានរបបក្រុងភ្នំពេញឆក់ឱកាសប្រើប្រព័ន្ធតុលាការ ចោទប្រកាន់លោកពីបទប្រមាថព្រះមហាក្សត្រមួយករណីថ្មីទៀត។
មេដឹកនាំគណបក្សប្រឆាំងដែលកំពុងនិរទេ្ទសខ្លួននៅប្រទេសបារាំងរូបនេះថា លោក ហ៊ុន សែន យកព្រះមហាក្សត្រដើម្បីធ្វើជាខែលសម្រាប់ការពាររបបក្បត់ជាតិសព្វថ្ងៃហើយដើម្បីផ្តល់ភាពស្របច្បាប់ឲ្យរបបនេះដែលប្រជារាស្ត្រខ្មែរស្អប់ខ្ពើមជាទីបំផុត។
២០ ធ្នូ ២០២០ / 20 December 2020 - Hun Sen is cheating the Cambodian people with his plan to buy COVID-19 vaccines...
Posted by Sam Rainsy on Sunday, December 20, 2020
រីឯមេដឹកនាំកំពូលៗនៃគណបក្សកាន់អំណាចរួមមានលោកនាយករដ្ឋមន្រ្តី ហ៊ុន សែន និងលោក ស ខេង ជាដើមនោះ នៅមិនទាន់បង្ហាញសារជូនពរ ឬសារនយោបាយក្នុងឱកាសចូលឆ្នាំថ្មី ឆ្នាំសកល២០២១ ដែលកាន់តែខិតជិតមកដល់នេះនៅឡើយទេ។
ទោះយ៉ាងណា អ្នកនាំពាក្យរដ្ឋាភិបាល លោក ផៃ ស៊ីផាន នៅតែអះអាងថា កម្ពុជាគ្មានវិបត្តិនយោបាយនោះទេ ដោយលោកនិយាយថាករណីគណបក្សប្រឆាំងគឺជាសមត្ថកិច្ចរបស់តុលាការ។ លោកថា សព្វថ្ងៃរដ្ឋាភិបាលនៅតែដំណើរការធម្មតាហើយពលរដ្ឋនៅតែរស់នៅធម្មតា។ លោកចោទប្រកាន់ថា គណបក្សប្រឆាំងតែងយកលេសករណីផ្លូវច្បាប់ដែលខ្លួនប្រព្រឹត្តិខុសទៅធ្វើជារឿងនយោបាយ៖«ក្រុមហ្នឹងតែងយកនយោបាយទៅដាក់ឥទ្ធិពលទៅតុលាការហើយចោទមកគណបក្សប្រជាជន ឬរដ្ឋាភិបាលថា មានឥទ្ធិពលលើតុលាការមិនដឹងថាម៉េច គាត់ត្រូវតែទៅដោះស្រាយជាមួយតុលាការមិនមែនជាវិបត្តិទេ។»
ចាប់តាំងពីចុងឆ្នាំ២០១៧ រដ្ឋាភិបាលលោក ហ៊ុន សែន បានរម្លាយគណបក្សប្រឆាំង និងចាប់លោក កឹម សុខា ប្រធានគណបក្ស និងសកម្មជនបក្សនេះដាក់ពន្ធនាគារ និងធ្វើទុក្ខបុកម្នេញលើអ្នកកាសែត និងសកម្មជនសិទ្ធិមនុស្សជាដើម។ សហគមន៍ជាតិ និងអន្តរជាតិ ថ្កោលទោសជុំទិសពីការរំលោភសិទ្ធិធ្ងន់ធ្ងរ និងការបំផ្លាញគោលការណ៍ប្រជាធិបតេយ្យ និងថែមទាំងបានដាក់សម្ពាធផ្នែកសេដ្ឋកិច្ច និងដាក់ទណ្ឌកម្មបុគ្គលមេដឹកនាំកំពូលៗនៃរបបក្រុងភ្នំពេញផងដែរ។
អ្នកសិក្សាការអភិវឌ្ឍនសង្គម លោក បណ្ឌិត សេង សារី សង្កេតឃើញថា មហាជនទូទៅកំពុងស្រេកឃ្លានចង់ឃើញអ្នកនយោបាយត្រូវរ៉ូវគ្នាឡើងវិញ។ លោកថា វិបត្តិនយោបាយបានជះឥទ្ធិពលទៅលើស្ទើរគ្រប់វិស័យ ធ្វើឱ្យប៉ះពាល់ដល់ការរស់នៅ និងប្រកបរបរបស់មហាជនទូទៅ ខណៈសហគមន៍អន្តរជាតិបានដាក់ទណ្ឌកម្មជាបន្តបន្ទាប់មកលើរដ្ឋាភិបាល៖«បាទកាដូឆ្នាំថ្មីឆ្នាំសកលសម្រាប់ខ្ញុំអ្នកវិភាគគ្មានអីខុសពីមហាជនទទូចចង់ឃើញស្ថានភាពនយោបាយធូរស្រាល។»
ជុំវិញវិបត្តិនយោបាយនេះ គណបក្សសង្គ្រោះជាតិសម្រេចយកដើមឆ្នាំ២០២១ខាងមុខវិលចូលស្រុកវិញដើម្បីតតាំងក្ដីនៅតុលាការ និងរកដំណោះស្រាយនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។