សវនាការជំនុំជម្រះក្ដីលោក កឹម សុខា នៅថ្ងៃទី១៦ ខែមីនានេះ មានភាពចម្រូងចម្រាស់ រវាងតំណាងអយ្យការ និងមេធាវីការពារក្ដីលោក កឹម សុខា។ តំណាងអយ្យការបានបដិសេធការដាក់ភស្តុតាងមួយចំនួនរបស់មេធាវីលោក កឹម សុខា ចំណែកមេធាវីក៏ប្រឆាំងទៅនឹងការដាក់ភស្តុតាងបន្ថែមរបស់តំណាងអយ្យការវិញដែរ។ មន្ត្រីសិទ្ធិមនុស្សដែលឃ្លាំមើលតុលាការលើកឡើងថា ការដាក់បន្ថែមភស្តុតាងរបស់តំណាងអយ្យការពេលនេះ ជាការបញ្ជាក់ថា តុលាការគ្មានភស្តុតាងគ្រប់គ្រាន់ក្នុងការចោទប្រកាន់លោក កឹម សុខា។
តំណាងអយ្យការមិនទទួលស្គាល់ភស្តុតាងដោះបន្ទុកមួយចំនួនរបស់មេធាវីការពារក្ដីលោក កឹម សុខា ដោយចោទប្រកាន់ថា ភស្តុតាងទាំងនោះ គ្មានកាលបរិច្ឆេទច្បាស់លាស់។ ចំណែកមេធាវីការពារក្ដីលោក កឹម សុខា ក៏ចោទប្រកាន់តំណាងអយ្យការថា ការដាក់បន្ថែមភស្តុតាងដាក់បន្ទុកនៅពេលនេះ គឺខុសទៅនឹងនីតិវិធី។
សហមេធាវីការពារក្ដីឱ្យលោក កឹម សុខា គឺលោក អាង ឧត្តម ថ្លែងប្រាប់ក្រុមអ្នកសារព័ត៌មានក្រោយចេញពីបន្ទប់សវនាការថា មុនឈានដល់ការដេញដោល ក្រុមមេធាវីលោក កឹម សុខា ចោទសួរតុលាការពីករណីផ្អាកសវនាការញឹកញាប់ ហើយក្រុមមេធាវីក៏ស្នើតុលាការថា សវនាការនេះមិនគួរផ្អាកព្រោះតែបញ្ហាសុខភាពមន្ត្រីកាត់ក្ដីឡើយ។ ក្រុមមេធាវីជំរុញទៅតុលាការថា គួរចាត់ចែងរកមន្ត្រីតុលាការមកកាត់ក្ដីជំនួសព្រោះការបន្តអូសបន្លាយនេះប៉ះពាល់សិទ្ធិ និងផលប្រយោជន៍របស់លោក កឹម សុខា។ លោកបន្តទៀតថា ក្រុមមេធាវីដាក់ភស្តុតាងដោះបន្ទុកបន្ថែមចំនួន២៨ ប៉ុន្តែត្រូវបានតំណាងអយ្យការច្រានចោលនូវភស្តុតាងមួយចំនួន។ លោកថា តំណាងអយ្យការ បានដាក់ភស្តុតាងដាក់បន្ទុកថ្មីចំនួន៧ទំព័រ ប៉ុន្តែក្រុមមេធាវី លោក កឹម សុខា ជំទាស់ដោយចោទប្រកាន់ថា ខុសនីតិវិធី៖ «តំណាងអយ្យការបញ្ជាក់ច្បាស់ហើយ ថាមានភស្តុតាងដាក់បន្ទុកគ្រប់គ្រាន់ មានពិរុទ្ធភាពគ្រប់គ្រាន់ហើយ រឿងអីមកដាក់ពេលនេះទៀត ហើយសរុបសេចក្ដីមកតំណាងអយ្យការទំនងទទួលស្គាល់ថាគាត់អត់បានដាក់ភស្តុតាងថ្មីទេ គាត់ដាក់ភស្តុតាងដើម្បីបញ្ជាក់ពីភស្តុតាងរបស់យើងទេ ចំណុចនេះមួយយើងអត់បាននិយាយដោយសារពេលវាខើចពេកយើងចង់បង្ហាញថា ភស្តុតាងដែលគ្រប់គ្រាន់ម៉េចមិនបើដោះបន្ទុកលើភស្តុតាងយើងទៅ»។
លោកបន្តទៀតថា ក្រុមមេធាវីរដ្ឋាភិបាល ក៏ស្នើច្រានចោលភស្តុតាងរបស់មេធាវីលោក កឹម សុខា ដែលបានដកស្រងចេញពីគេហទំព័ររបស់អង្គការខុមហ្វ្រែល អង្គការលីកាដូ និងអង្គការតម្លាភាព។
ទាក់ទងចំណុចនេះ នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព ដែលតាមដានសវនាការនេះលើកឡើងថា ជារឿងគួរឲ្យសោកស្ដាយដែលមេធាវីរដ្ឋាភិបាល វាយតម្លៃ និងបន្តុះបង្អាប់អង្គការសង្គមស៊ីវិលទាំងនេះ។ អ្នកស្រីបន្តថា អង្គការទាំងនេះធ្វើការស្របច្បាប់ និងមានការទទួលស្គាល់ពីក្រសួងមហាផ្ទៃ ហើយភស្តុតាងទាំងនេះជាការស្រាវជ្រាវរបស់មេធាវី មិនមែនផ្តល់ដោយអង្គការទាំងនោះឡើយ។ មន្រ្តីសង្គមស៊ីវិលរូបនេះ លើកឡើងទៀតថា ជាថ្មីម្តងទៀត លោក កឹម សុខា និងសមាជិកបក្សប្រឆាំងដទៃទៀត មិនគួរត្រូវប្រឈមបទចោទប្រកាន់ដោយសារតែសកម្មភាពខាងនយោបាយ និងគណបក្សខ្លួនឡើយ។ អ្នកស្រីថា ការបន្តចោទប្រកាន់និងអូសបន្លាយលើសំណុំរឿងក្តីនេះ ជាការបំពានដល់សិទ្ធិសេរីភាពខាងនយោបាយដែលកម្ពុជាបានទទួលស្គាល់ក្នុងរដ្ឋធម្មនុញ្ញនិងបទដ្ឋានសិទ្ធិមនុស្សអន្តរជាតិ។
ចំណែកអ្នកនាំពាក្យសមាគមការពារសិទ្ធិមនុស្ស អាដហុក លោក ស៊ឹង សែនករុណា ដែលតាមដានដំណើរការសវនាការនេះដែរ លើកឡើងថា ការបន្ថែមភស្តុតាងដាក់បន្ទុករបស់តំណាងអយ្យការពេលនេះ ជាការបញ្ជាក់ថា ការចោទប្រកាន់លើលោក កឹម សុខា កន្លងមកតុលាការគ្មានភស្តុតាងគ្រប់គ្រាន់។ លោកបន្តថា ករណីនេះបើផ្អែកតាមផ្លូវច្បាប់ ផលប្រយោជន៍ត្រូវបានទៅលោក កឹម សុខា ដែលន័យថា តុលាការគួរពិចារណាទម្លាក់ចោលការចោទប្រកាន់លើលោក កឹម សុខា៖ «ផ្ដោតទៅលើច្បាប់បើយើងនិយាយការចោទប្រកាន់លើជនណាមួយដែលជាជនប្រព្រឹត្តបទល្មើសលុះត្រាតែយើងមានភស្តុតាងដាក់បន្ទុកគ្រប់គ្រាន់ ពេញលេញហើយបើសិនការដាក់ភស្តុតាងមិនច្បាស់លាស់គ្រប់គ្រាន់ទេច្បាប់មានចែងវិមតិសង្ស័យបានជាប្រយោជន៍លើជនជាប់ចោទ ករណីទាំងអស់នេះព្រះរាជអាជ្ញាឬតំណាងអយ្យការត្រូវពិនិត្យឡើងវិញដែរ មិនមែនថា មិនគ្រប់ត្រូវរកឲ្យគ្រប់ដោយសារអ្នកហ្នឹងយើងមិនពេញចិត្ត ឬហេតុផលនយោបាយណាមួយ»។
សមត្ថកិច្ចបានចាប់លោក កឹម សុខា ដាក់គុកកាលពីខែវិច្ឆិកា ឆ្នាំ២០១៧ ដោយចោទប្រកាន់ថា ប្រធានបក្សប្រឆាំងរូបនេះ ឃុបឃិតជាមួយរដ្ឋបរទេសដើម្បីផ្ដួលរំលំរដ្ឋាភិបាល។ ទោះយ៉ាងណា រយៈពេលជាង ៤ឆ្នាំមកនេះ តុលាការមិនទាន់សម្រេចថា លោក កឹម សុខា មានទោសឬគ្មានទោសនៅឡើយទេ ហើយតុលាការក៏មិនបង្ហាញរដ្ឋបរទេសមួយណា ឃុបឃិតជាមួយលោក កឹម សុខា នោះដែរ។ តែកន្លងមក រដ្ឋាភិបាល និងគណបក្សកាន់អំណាចធ្លាប់ចោទប្រកាន់ថា សហរដ្ឋអាមេរិកជាអ្នកនៅពីក្រោយសំណុំរឿងក្បត់ជាតិរបស់លោក កឹម សុខា។
ដូចរាល់ដងដែរ សវនាការលោក កឹម សុខា សប្ដាហ៍នេះមានការចូលរួមតាមដានពីតំណាងស្ថានទូតប្រទេសសេរី តំណាងអង្គការសិទ្ធិមនុស្ស ក្រុមអ្នកសារព័ត៌មាន និងអ្នកគាំទ្រលោក កឹម សុខា នៅក្រៅរបងតុលាការប្រមាណ ៣០នាក់។ ចំណែកសមត្ថកិច្ចប្រមាណ ៤០នាក់បានដាក់យាមកាមយ៉ាងតឹងរ៉ឹងជុំវិញបរិវេណតុលាការផងដែរ។
តុលាការនឹងចេញដីកាសន្និដ្ឋានបញ្ជាក់ថា តុលាការនឹងទទួលស្គាល់ភស្តុតាងណាខ្លះ និងច្រានចោលភស្តុតាងណាខ្លះ ក្នុងសវនាការលើកទី៣៤ នៅសប្ដាហ៍ក្រោយថ្ងៃទី២៣ ខែមីនាខាងមុខ ដែលរួមមានភស្តុតាងដាក់បន្ថែមរបស់តំណាងអយ្យការនិងសំណុំភស្តុតាងរបស់មេធាវីការពារក្តីលោក កឹម សុខា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។