សំណុំរឿងក្បត់ជាតិរបស់ប្រធានបក្សប្រឆាំង លោក កឹម សុខា ឈានដល់ការជំនុំជម្រះសប្ដាហ៍ទី៣៦ ហើយ នៅព្រឹកថ្ងៃទី៦ ខែមេសានេះ។ តំណាងអយ្យការបានសួរលោក កឹម សុខា ទាក់ទងបច្ចេកទេស និងបញ្ហានៃកិច្ចការបោះឆ្នោត ទោះលោក កឹម សុខា ព្យាយាមមិនឆ្លើយប៉ុន្តែ តំណាងអយ្យការជំរិតសួរចង់បានចម្លើយ។ មេធាវីលោក កឹម សុខា ស្នើតុលាការសួរកូនក្ដីរបស់ខ្លួនឲ្យត្រូវបទចោទ ហើយបើចង់ដឹងពីបច្ចេកទេសបោះឆ្នោតគួរកោះហៅប្រធានគណៈកម្មាធិការជាតិរៀបចំការបោះឆ្នោត ឬមន្ត្រី គ.ជ.ប មកបំភ្លឺ។
សវនាការលោក កឹម សុខា លើកនេះ តំណាងអយ្យការហាក់សួរសំនួរចាកឆ្ងាយពីប្រធានបទ និងឬបទចោទលើលោក កឹម សុខា។ សវនាការសួរដេញដោលនេះផ្ដោតសំខាន់លើព្រឹត្តិការពីឆ្នាំ២០១២ ដល់ឆ្នាំ២០១៧ និងពីថ្ងៃបង្កើតគណបក្សសង្គ្រោះជាតិ និងថ្ងៃចាប់ខ្លួនលោក កឹម សុខា និងជុំវិញបញ្ហានៃការបោះឆ្នោត។
អ្នកឃ្លាំមើលសវនាការយល់ថា នេះជាចេតនារបស់តុលាការ ដែលព្យាយាមអូសបន្លាយពេលសវនាការនេះឲ្យកាន់តែយូរថែមទៀត ខណៈលោក កឹម សុខា បានរងការចោទប្រកាន់ជិត ៥ឆ្នាំមកហើយ ប៉ុន្តែ តុលាការមិនទាន់រកឃើញថា មេប្រឆាំងរូបនេះមានទោស ឬគ្មានទោសនោះទេ។ សហមេធាវីការពារសិទ្ធិលោក កឹម សុខា គឺលោក ផែង ហេង ថ្លែងប្រាប់អ្នកសារព័ត៌មានក្រោយចប់សវនាការថា តំណាងអយ្យការបានព្យាយាមលើកយកបច្ចេកទេសនៃការបោះឆ្នោត រួមមានមុនពេលបោះឆ្នោត ក្នុងដំណើរការបោះឆ្នោត និងក្រោយពេលបោះឆ្នោតមកសួរកូនក្ដីរបស់លោក។ លោកបន្តទៀតថា ការតាំងសំនួររបស់តំណាងអយ្យការបែបនេះ គួរកោះហៅអ្នកជំនាញ គ.ជ.ប មកសួរ ឬយកកំណត់ហេតុរបស់ គ.ជ.ប មកពិនិត្យ ត្បិតលោក កឹម សុខា មិនអាចបកស្រាយលម្អិតលើបញ្ហាទាំងអស់នេះទេ៖ « ឯកឧត្ដម កឹម សុខា ជាប្រធានគណបក្សគាត់មិនអាចទៅលម្អិតរឿងទាំងនេះលើកលែងតែការងារខ្លះថ្នាក់ដឹកនាំចេញមុខដូចជាការចរចាគ្នាដូចជាការបង្កើតគណ កម្មការចម្រុះរវាង ស៊ីភីភី ( គណបក្សប្រជាជនកម្ពុជា ) និងសង្គ្រោះជាតិទើបជាកិច្ចការថ្នាក់ដឹកនាំដឹង » ។
សវនាការលោក កឹម សុខា នេះដែរ មានការឃ្លាំមើលពីតំណាងស្ថានទូតសហរដ្ឋអាមេរិក តំណាងសហភាពអឺរ៉ុប និងតំណាងអង្គការសហប្រជាជាតិប្រចាំកម្ពុជា ក្រៅពីនេះក៏មានតំណាងអង្គការសង្គមស៊ីវិលក្នុងស្រុក និងអ្នកសារព័ត៌មានចូលស្ដាប់ផងដែរ។ នៅក្រៅតុលាការឯណេះវិញ សមត្ថកិច្ចបានរឹតបន្តឹងសន្តិសុខយ៉ាងតឹងរ៉ឹង និងបានបណ្ដេញអ្នកគាំទ្រលោក កឹម សុខា ជាង ២០នាក់មិនឲ្យឈរមុខតុលាការនោះទេ។
អ្នកនាំពាក្យសមាគមអាដហុក លោក ស៊ឹង សែនករុណា ដែលមានក្រុមការងាររបស់លោកចូលឃ្លាំមើលសវនាការនេះ លើកឡើងថា រដ្ឋាភិបាលបានចោទប្រកាន់លោក កឹម សុខា ថា បានឃុបឃិតជាមួយរដ្ឋបរទេសដើម្បីផ្ដួលរំលំរដ្ឋាភិបាល ដូច្នេះ លោកយល់ថា តុលាការគួរព្យាយាមរកឲ្យឃើញថា លោក កឹម សុខា បានធ្វើអីខ្លះជាមួយរដ្ឋបរទេស ហើយរដ្ឋបរទេសណាខ្លះបានរួមគ្នាជាមួយលោក កឹម សុខា ធ្វើឲ្យមហន្តរាយដល់ប្រទេសកម្ពុជា។ លោកព្រួយបារម្ភថា ការតាំងសំនួររបស់តំណាងអយ្យការដែលឆ្ងាយពីបទចោទដូចនេះ នឹងអូសបន្លាយសវនាការនេះឲ្យស៊ីពេលកាន់តែយូរថែមទៀត៖ « អ៊ីចឹង ទៅធ្វើឲ្យពេលវេលា ក៏ត្រូវចំណាយពេលច្រើនទៅទៀតដែរ។ អ៊ីចឹងខ្ញុំគិតថា នីតិវិធីនេះគួរមានការកែសម្រួលធ្វើម៉េច ឲ្យមានដំណើរការបានឆាប់រហ័ស ហើយឲ្យពាក់ព័ន្ធទៅនឹងអង្គហេតុ សំណុំរឿង និងការចោទប្រកាន់ឲ្យប្រទាក់គ្នាដើម្បីឈានទៅការបញ្ចប់នូវនីតិវិធី ឬក៏សវនាការបានឆាប់រហ័សជាងហ្នឹងបាទ » ។
លោក កឹម សុខា ត្រូវសមត្ថកិច្ចសម្រុកចូលចាប់ខ្លួនកាលពីឆ្នាំ២០១៧ ដោយចោទប្រកាន់ពីបទក្បត់ជាតិ ឬសន្ទិដ្ឋភាពជាមួយបរទេស និងបានហាមឃាត់មិនឲ្យធ្វើនយោបាយ និងចេញក្រៅប្រទេស។ មេធាវីតំណាងរដ្ឋាភិបាលដែលជាដើមបណ្ដឹង គឺ លោក គី តិច ចោទប្រកាន់ថា មានប្រទេសចំនួន៩ ដែលពាក់ព័ន្ធ នឹងលោក កឹម សុខា ក្នុងនោះ រួមមាន ឥណ្ឌូណេស៊ី (Indonesia) យូហ្គោស្លាវី (Yugoslavia) ស៊ែប៊ី (Serbia) អូស្ត្រាលី (Australia) អាមេរិក (USA) កាណាដា (Canada) សហភាពអឺរ៉ុប (EU) តៃវ៉ាន់ (Taiwan) និងឥណ្ឌា (India)។
មេធាវីលោក កឹម សុខា លោក ផែង ហេង អះអាងដែរថា នៅពេលសវនាការដំណើរការដល់ការសួរដេញដោលសាក្សី និងអ្នកពាក់ព័ន្ធ ក្រុមមេធាវីការពារក្ដីលោក កឹម សុខា នឹងពិចារណាស្នើទៅតុលាការឲ្យតំណាងរដ្ឋបរទេស ដែលពាក់ព័ន្ធនឹងសំណុំរឿងនេះមកបំភ្លឺនៅតុលាការ។ តុលាការនឹងបន្តសវនាការលោក កឹម សុខា នៅក្រោយពិធីបុណ្យចូលឆ្នាំខ្មែរ ថ្ងៃទី២០ ខែមេសាខាងមុខបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។