ប្រជាពលរដ្ឋ និងអ្នកវិភាគ រិះគន់ថា ដោយសារតែកងទ័ពរបស់រុស្ស៊ីកំពុងបាក់ស្រុតកម្លាំងក្នុងការច្បាំងលុកលុយប្រទេសអ៊ុយក្រែន (Ukraine) ទើបធ្វើឱ្យលោកនាយករដ្ឋមន្ត្រី ហ៊ុន សែន មិនហ៊ានប្រកាសឱ្យពលរដ្ឋទៅជួយប្រទេសមួយនេះ។ ប្រតិកម្មនេះ ធ្វើឡើងក្រោយពីលោក ហ៊ុន សែន ប្រកាសហាមប្រាមជាថ្មីទៀតលើពលរដ្ឋខ្មែរ ដែលមានបំណងទៅធ្វើទាហានជួយច្បាំងអ៊ុយក្រែនប្រឆាំងនឹងការឈ្លានពានរុស្ស៊ី (Russia)។
ប្រជាពលរដ្ឋ និងអ្នកវិភាគ លើកឡើងថា លោកនាយករដ្ឋមន្ត្រី ហ៊ុន សែន កំពុងភ័យខ្លាចពីទំនាក់ទំនងកាន់តែល្អក់កករជាមួយអតីតចៅហ្វាយនាយរបស់ខ្លួន គឺប្រធានាធិបតីរុស្សី គឺលោក វ្ល៉ាឌីមៀរ ពូទីន (Vladimir Putin) ទើបលោកមិនហ៊ាននិយាយលើកទឹកចិត្តឱ្យប្រជាពលរដ្ឋខ្មែរនាំគ្នាទៅធ្វើទាហានជួយច្បាំងប្រទេសអ៊ុយក្រែន។
អតីតអ្នកទោសមនសិការម្នាក់ លោក កើត សារ៉ាយ ប្រាប់វិទ្យុអាស៊ីសេរីនៅថ្ងៃទី២៨ មីនាថា បើទោះជាកម្ពុជាបានចូលរួមបោះឆ្នោតថ្កោលទោស ចំពោះការឈ្លានពានរបស់រុស្ស៊ីយ៉ាងណាក្ដី ក៏លោក ហ៊ុន សែន នៅតែមានចិត្តខ្លាចរអា ខ្លាចប៉ះពាល់ដល់ទំនាក់ទំនងការទូតជាមួយមេដឹកនាំផ្ដាច់ការលោក វ្ល៉ាឌីមៀរ ពូទីន (Vladimir Putin)ដែរ។ លោកបន្តថា បើរដ្ឋាភិបាលហាមប្រាមពលរដ្ឋខ្មែរ មិនឲ្យទៅជួយពលរដ្ឋអ៊ុនក្រែន កម្ពុជាគួរបង្កើតច្បាប់ស្ដីពីការហាមឃាត់ប្រជាពលរដ្ឋកុំឱ្យទៅជួយច្បាំងជាមួយបរទេសនេះ៖ «ដូច្នេះសបញ្ជាក់ឱ្យឃើញថា ក្នុងស្រុកខ្មែរហ្នឹងច្បាប់នៅនឹងមាត់ ចាប់ផ្ដើមយើងដូចរស់នៅសម័យអតីតកាល។ ឥឡូវដូចគ្នា នាយករដ្ឋមន្ត្រីទៅស្រែកវ៉ាស ! ទើបមានមន្ត្រីប្រឹងអនុវត្តច្បាប់។ បញ្ហានេះកាន់តែឆ្លុះបញ្ចាំងធ្វើឱ្យប្រទេសយើងថា អត់មានប្រសិទ្ធភាពធ្វើឱ្យប្រព័ន្ធនីតិរដ្ឋក្នុងប្រទេស។ ជាពិសេសប្រព័ន្ធយុត្តិធម៌សឹងតែធ្លាក់សូន្យតែម្ដង »។
ពលរដ្ឋម្នាក់ទៀតរស់នៅខេត្ត កោះកុង លោកស្រី ផាវ ញ៉ើង ថ្លែងថា បើពលរដ្ឋណាមានឆន្ទៈចង់ជួយប្រទេសអ៊ុយក្រែន គឺជាសិទ្ធិពួកគាត់ ហើយក៏មិនទាន់មានច្បាប់ណាមួយហាមឃាត់បែបនេះដែរ។ លោកស្រី យល់ថា ការណ៍ដែលមានពលរដ្ឋ ហ៊ានប្រឈមជីវិត ក្នុងការទៅជួយប្រជាជនអ៊ុនក្រែន ច្បាំងការឈ្លានពានរុស្ស៊ី នោះ គឺជាចរន្តលទ្ធិប្រជាធិបតេយ្យ ក្នុងការប្រមូលផ្ដុំកម្លាំងតទល់នឹងការឈ្លានពានរបស់មេដឹកនាំផ្ដាច់ការរបស់ប្រទេសរុស្ស៊ីតែប៉ុណ្ណោះ៖ «នេះជាជីវិតផ្ទាល់ខ្លួនរបស់បុគ្គល ហើយពលរដ្ឋគួរតែមានសេរីភាព។ ចំពោះខ្ញុំស្រឡាញ់លទ្ធិប្រជាធិបតេយ្យ មិនចង់ឃើញអ៊ុយក្រែនរងការបាញ់សម្លាប់ពីរុស្សីអ៊ីចឹងទេ។ ខ្ញុំចង់ឃើញលទ្ធិប្រជាធិបតេយ្យនៅអ៊ុយក្រែន ហើយចង់ឃើញប្រទេសធំ ដើម្បីជួយអ៊ុយក្រែន »។
ប្រតិកម្មរបស់ប្រជាពលរដ្ឋនេះ ធ្វើឡើងក្រោយពីលោកនាយករដ្ឋមន្ត្រី ហ៊ុន សែន ប្រកាសជាថ្មីទៀត ដោយហាមមិនឱ្យពលរដ្ឋណា ស្ម័គ្រចិត្តទៅជួយច្បាំងប្រជាជនអ៊ុយក្រែនឡើយ៖ « យើងជាប្រទេសដែលធ្លាប់គេឈ្លានពាន អ៊ីចឹងយើងក៏នឹកគិតដល់ប្រទេស ដែលត្រូវគេឈ្លានពាន។ ប៉ុន្តែខ្ញុំនៅតែនិយាយដដែល។ យើងមិនអនុញ្ញាតឱ្យពលរដ្ឋកម្ពុជាណាមួយ ទៅធ្វើជាទាហានស្ម័គ្រចិត្តនៅជួយប្រទេសអ៊ុយក្រែន ដូចប្រទេសមួយចំនួនបណ្ដោយពលរដ្ឋរបស់ខ្លួនទៅប្រទេសអ៊ុយក្រែនអ៊ីចឹងទេ។ យើងជាប្រទេសក្រីក្រមួយ នៅឆ្ងាយណាស់។ ប៉ុន្តែ យើងបានបង្ហាញសន្តានចិត្តជាមួយប្រជាពលរដ្ឋអ៊ុយក្រែន ដែលកំពុងភៀសខ្លួនរាប់លាននាក់នៅក្រៅ និងកំពុងភៀសខ្លួនធ្វើសឹករាប់លាននាក់នៅខាងក្នុងប្រទេស » ។
លោក ហ៊ុន សែន ថ្លែងបែបនេះក្នុងពិធីសម្ពោធមន្ទីរពេទ្យអង្គ ឌួង នៅថ្ងៃទី២៨ មីនា ក្នុងរាជធានីភ្នំពេញ។
នេះមិនមែនជាលើកទីមួយទេ ដែលលោក ហ៊ុន សែន ថ្លែងសារបែបនេះ។ ក្រោយពីមានសង្គ្រាមរុស្សីឈ្លានពានប្រទេសអ៊ុនក្រែនមក លោក ហ៊ុន សែន តែងតែប្រកាសជាបន្តបន្ទាប់ដល់ប្រជាពលរដ្ឋ មិនឱ្យជួយច្បាំងអ៊ុយក្រែនឡើយ ដោយលោកលើកហេតុផលថា ជីវភាពប្រជាជនកម្ពុជានៅមានកម្រិត។ លើសពីនេះ លោក ហ៊ុន សែន ក៏ធ្លាប់ចំអកថា អ្នកដែលចង់ទៅអ៊ុយក្រែនក្នុងអំឡុងពេលមានសង្គ្រាមនេះគឺគ្រាន់តែចង់បានសញ្ជាតិអ៊ុយក្រែនតែប៉ុណ្ណោះ និងថា បើគេបាញ់នឹងនាំគ្នារត់ប្រាសអាយុ។
ប៉ុន្តែ ការឡើងរបស់មេដឹកនាំរដ្ឋាភិបាលឯកបក្សរូបនេះ បានរងការរិះគន់ថា លោក ហ៊ុន សែន កំពុងមើលងាយប្រជាជនខ្លួន ដែលធ្លាប់មានបទពិសោធន៍ ហែលឆ្លងកាត់ភ្នក់ភ្លើងសង្គ្រាមនាពេលកន្លងមក។ មតិរិះគន់ភាគច្រើនថា ពលរដ្ឋអាចមានសិទ្ធិចាប់កាន់អាវុធជួយសង្គ្រោះមនុស្សជាតិ ពេលមានអាសន្នពីការបាញ់ប្រហារពីកងទ័ពរុស្ស៊ី។
ផ្ទុយពីការហាមប្រាមរបស់មេដឹកនាំកម្ពុជា មានអតីតកងទ័ព ទាហានចូលនិវត្តន៍ និងប្រជាពលរដ្ឋស៊ីវិលពីបណ្ដាប្រទេសនៅតំបន់អាស៊ីអាគ្នេយ៍ និងប្រទេសលោកសេរីធំៗ ដូចជា សហរដ្ឋអាមេរិក និងកាណាដា ជាដើម បានចេញមុខចូលធ្វើទាហានប្រឆាំងនឹងរុស្សី។ មកដល់ពេលនេះ អ៊ុយក្រែនទទួលបានពលរដ្ឋបរទេសស្ម័គ្រចិត្តជាង ២ម៉ឺននាក់ ដើម្បីជួយច្បាំងបណ្ដេញទ័ពរុស្ស៊ី ដែលចូលឈ្លានពានទឹកដីអ៊ុយក្រែន។
ចំណែកឯអ្នកវិភាគនយោបាយកំពុងរស់នៅប្រទេសហ្វាំងឡង់ (Finland) លោក គឹម សុខ លោកមានប្រសាសន៍ថា បើលោក ហ៊ុន សែន ហ៊ានលើកទឹកចិត្តឱ្យពលរដ្ឋស្ម័គ្រចិត្តទៅជួយច្បាំងអ៊ុយក្រែន នោះអតីតចៅហ្វាយនាយរបស់លោក ហ៊ុន សែន គឺលោក វ្ល៉ាឌីមៀរ ពូទីន (Vladimir Putin) នឹងខឹងសម្បារកាន់តែខ្លាំង។ លោកបន្តថា ក្រោយពីកម្ពុជាចូលរួមបោះឆ្នោតជាមួយប្រទេស១៤០ នៅអង្គការសហប្រជាជាតិថ្កោលទោសរុស្ស៊ីមកដល់ពេលនេះ លោក ហ៊ុន សែន ក៏ទំនងនៅតែមានភាពតានតឹងជាដៃគូយុទ្ធសាស្ត្ររុស្ស៊ី និងជាមិត្តដែកថែបរបស់លោកគឺ ប្រទេសចិននៅឡើយ៖ «ពូទីន គឺជាចៅហ្វាយចាស់ក្រុមលោក ហ៊ុន សែន ហើយជាមិត្តយល់ចិត្តបំផុតក្នុងសម័យថ្មីនេះ។ ដូច្នេះ ក្នុងពេលដែលកងទ័ពរុស្សីកំពុងបាក់ស្រុតកម្លាំងយ៉ាងខ្លាំង ហើយក៏កំពុងរៀបដកថយក្នុងសញ្ញាចាញ់សង្គ្រាម។ លោក ហ៊ុន សែន មិនហ៊ានលើកទឹកចិត្តអ្នកទាំងឡាយណាទៅជួយអ៊ុយក្រែន ហើយប្រឆាំងនឹងពូទីនទេ »។
ស្របពេលដែលលោក ហ៊ុន សែន រារាំងមិនឱ្យពលរដ្ឋខ្មែរស្ម័គ្រចិត្តទៅជួយច្បាំងនៅអ៊ុយក្រែននេះ ពលរដ្ឋខ្មែរនៅក្រៅប្រទេស បន្តចូលរួមសកម្មភាពតវ៉ាឱ្យរុស្ស៊ីដកទ័ពចេញពីអ៊ុយក្រែន និងរៃអង្គៀសថវិកាតាមលទ្ធភាព ដើម្បីជួយដល់ពលរដ្ឋអ៊ុយក្រែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។