លោកនាយករដ្ឋមន្ត្រី ហ៊ុន សែន បន្តការពារកូនប្រុសច្បងរបស់លោកថា មិនបានទៅពឹងវៀតណាមឲ្យជ្រោមជ្រែង លោក ហ៊ុន ម៉ាណែត ក្នុងការឈានទៅដឹកនាំប្រទេសនាពេលខាងមុខនោះទេ។ លោកក៏ព្រមានដែរថា នឹងផ្ទុះសង្គ្រាមជាថ្មី បើបក្សកាន់អំណាចចាញ់ឆ្នោត។ ទោះយ៉ាងណាក្ដី អ្នកវិភាគយល់ថា សាររបស់លោក ហ៊ុន សែន បែបនេះ ទំនងលោកចង់គំរាមផ្ទៃក្នុងគណបក្សរបស់លោកថា នឹងមានការបង្ហូរឈាម បើមានអ្នកណានៅតែមិនគាំទ្រ ហ៊ុន ម៉ាណែត ជាបេក្ខភាពនាយករដ្ឋមន្ត្រីបន្តពីលោក។
លោកនាយករដ្ឋមន្ត្រី ហ៊ុន សែន ថ្លែងការពារកូនប្រុសច្បងរបស់លោកថា ការបំពេញទស្សនកិច្ចរបស់ លោក ហ៊ុន ម៉ាណែត នៅប្រទេសវៀតណាម កាលពីពេលថ្មីៗ នេះ មិនមែនជាការស្នើទៅវៀតណាម ឲ្យគាំទ្របេក្ខភាព លោក ហ៊ុន ម៉ាណែត ជានាយករដ្ឋមន្ត្រីនោះទេ។ នៅតែលោកអះអាងថា កូនប្រុសរបស់លោកអាចដឹកនាំប្រទេសបាន ឬមិនបាន គឺតាមរយៈការបោះឆ្នោតពីពលរដ្ឋ។ លោកក៏ព្រមានដែរថា បើគ្មានគណបក្សប្រជាជនកម្ពុជា ដឹកនាំប្រទេសទេនោះ អាចនឹងផ្ទុះសង្គ្រាមជាថ្មី៖ « គឺសង្គ្រាមនឹងផ្ទុះខ្ញុំមានហ៊ានអ៊ីចឹង មូលហេតុអី មានកត្តាពីរសំខាន់ ប្រើពាក្យរឹបអូសទ្រព្យពីអ្នកមានឲ្យអ្នកក្រ អ៊ីចឹងសង្គ្រាមផ្ទៃក្នុងនឹងផ្ទុះ ម៉ែអាណាឲ្យឯងរឹប ទី២ ត្រៀមវាយយកទឹកដី ដែលបាត់បង់។ អ៊ីចឹង សង្គ្រាមនៅកម្ពុជាជាមួយវៀតណាម ឬជាមួយថៃជៀសមិនរួច » ។
ទោះយ៉ាងណាក្ដី ខណៈលោក ហ៊ុន សែន ព្យាយាមការពារទាយាទរបស់លោកបែបនេះ លោកក៏បង្ហាញសារកម្ររបស់លោកផ្ដាំទៅកូនប្រុសរបស់លោកថា បើលោក ហ៊ុន ម៉ាណែត មិនដើរតាមគន្លងរបស់លោកទេ នឹងត្រូវគណបក្សប្រជាជនទាត់ចេញពីមុខតំណែង៖ « បើធ្វើខុសពីឪមានតែន័យថា ធ្វើខុសពីគោលការណ៍គណបក្សអ៊ីចឹងមានតែបណ្ដេញ ហ៊ុន ម៉ាណែត ចេញពីគណបក្សតែប៉ុណ្ណឹង តែខុសពីឪពុក ឪពុកមិនព្រម ឥឡូវ គណបក្សប្រជាជនគេអនុម័តឲ្យធ្វើ ហើយបើឯងធ្វើខុស មិនខុសគោលការណ៍គណបក្ស ព្រោះពេលបោះឆ្នោត គណបក្សមួយៗ ប្រកាសកម្មវិធីគោលនយោបាយរបស់ខ្លួន » ។
លោក ហ៊ុន សែន ថ្លែងដូច្នេះក្នុងពិធីប្រគល់សញ្ញាប័ត្រនិស្សិតនៃសាកលវិទ្យាល័យអាស៊ី-អឺរ៉ុបនៅរាជធានីភ្នំពេញនៅព្រឹកថ្ងៃទី២៣ ខែសីហា។
ទោះលោក ហ៊ុន សែន និយាយដដែលៗ ថា លោកមិនពឹងវៀតណាម ឲ្យជួយជ្រោមជ្រែង ឲ្យលោក ហ៊ុន ម៉ាណែត បន្តដំណែងពីលោកក្ដី ប៉ុន្តែ នៅរយៈពេលចុងក្រោយនេះ រដ្ឋាភិបាល ហ៊ុន សែន ហាក់កំពុងបំពេញចិត្តវៀតណាម ដូចជា ផ្ដល់ដីរាប់សិបហិកតារឲ្យជនជាតិវៀតណាម សង់ផ្ទះនៅខេត្តកំពង់ឆ្នាំង អនុញ្ញាតឲ្យមានបង្រៀនភាសាវៀតណាមនៅសកលវិទ្យាល័យ នៅភ្នំពេញ និងការបោះបង្គោលព្រំដែនកម្ពុជា វៀតណាម ដែលគេមើលឃើញថា វៀតណាមទទួលបានផលចំណេញពីកម្ពុជាលើការបោះបង្គោលនេះ។
ឆ្លើយតបនឹងការលើកឡើងរបស់លោក ហ៊ុន សែន នេះ អនុប្រធានគណបក្សសង្គ្រោះជាតិ លោក អេង ឆៃអ៊ាង បញ្ជាក់ថា សម្ដីរបស់លោក ហ៊ុន សែន បង្ហាញពីនយោបាយប្រជាភិថុតិ ដែលមិនបានឆ្លុះបញ្ចាំងការពិតពីគោលនយោបាយរបស់គណបក្សសង្គ្រោះជាតិ ឬគណបក្សប្រឆាំងឡើយ។ លោកថា គណបក្សសង្គ្រោះជាតិ មានគោលការណ៍ប្រកាន់ភ្ជាប់នូវនីតិរដ្ឋ ឯករាជ្យ អព្យាក្រឹត្យ និងអធិបតេយ្យភាពជាតិ៖ « បើជាមួយប្រទេសជិតខាងយើងមានភារកិច្ច កាតព្វកិច្ចការពារបូរណភាពទឹកដី កុំឱ្យតែបរទេសចេះតែរុញបង្គោលព្រំដែន គឺត្រូវការពារ តែយើងគ្មានមហិច្ឆតា គ្មានគំនិតណាទៅវាយប្រទេសជិតខាង ដើម្បីយកដីទេ យើងត្រូវតែការពារដីខ្មែរ ដែលសល់ ប៉ុន្តែយើងអត់មានទៅឃុបឃិតជាមួយបរទេសធ្វើព្រំដែនបោះបង្គោលឱ្យរំលោភបំពានមកលើទឹកដីខ្មែរទេ គឺបង្គោលព្រំដែនណា ដែលបោះចូលទឹកដីខ្មែរ យើងមានសិទ្ធិក្នុងការពិនិត្យ សើរើឡើងវិញ ព្រោះយើងមានកិច្ចព្រមព្រៀងសន្តិភាពទីក្រុងប៉ារីស ដែលចែងអំពីអធិបតេយ្យភាព និងបូរណភាពទឹកដីខ្មែរ។ ដោយឡែក សម្រាប់រឿងរ៉ាវ បញ្ហា ដែលមានការរំលោភដីធ្លី ការឆក់ប្លន់ដីរាស្ត្រទៅឱ្យជនខិលខូច យើងនឹងពិនិត្យឡើងវិញទៅតាមច្បាប់»។
មុននៃការបោះឆ្នោតថ្នាក់ជាតិ ឆ្នាំ២០២៣ ខាងមុខ លោក ហ៊ុន សែន បានរៀបចំផែនការផ្ទេរអំណាចតពូជ ដោយបានគំរាមសម្លុតផ្ទៃក្នុងបក្សរបស់លោក រហូតមានការបោះឆ្នោត ផ្ទៃក្នុងបក្សសម្រេចលើក លោក ហ៊ុន ម៉ាណែត ធ្វើជាបេក្ខភាពនាយករដ្ឋមន្ត្រីបន្ទាប់ពីលោក ហ៊ុន សែន កាលពីថ្ងៃទី២៤ ខែធ្នូ ឆ្នាំ២០២១។
អ្នកវិភាគនយោបាយ លោក គឹម សុខ យល់ថា មកដល់ពេលនេះទំនងផ្ទៃក្នុងបក្សប្រជាជនកម្ពុជា មិនទាន់មានឯកភាពទាំងស្រុងក្នុងការគាំទ្រលោក ហ៊ុន ម៉ាណែត ធ្វើជាបេក្ខជននាយករដ្ឋមន្ត្រីនៅឡើយ។ លោកបន្តថា ការព្រមានផ្ទុះសង្គ្រាមជាថ្មីរបស់លោក ហ៊ុន សែន ពេលនេះ គឺលោក ហ៊ុន សែន ព្រមានបង្ក្រាបលើមន្ត្រីជាន់ខ្ពស់គណបក្សប្រជាជនរូបណា ដែលមិនគាំទ្រលោក ហ៊ុន ម៉ាណែត៖ « អាចនឹងមានការផ្ទុះសង្គ្រាម ហើយសង្គ្រាមនោះយើងដឹងហើយ គឺទំនាស់ផ្ទៃក្នុងគណបក្សប្រជាជនកម្ពុជា ដែលមានអាវុធភ្ជង់គ្នាក្នុងពេលបច្ចុប្បន្ននេះ ចាំតែពេលផ្ទុះទេ ប្រសិនបើ និយាយមិនត្រូវគ្នាណា » ។
ក្រុមអ្នកឃ្លាំមើលព្យាករណ៍ថា លោក ហ៊ុន សែន អាចនឹងផ្ទេរអំណាចទៅកូនប្រុសច្បងរបស់លោកក្រោយការបោះឆ្នោតឆ្នាំ២០២៣ ខាងមុខ។ លោក ហ៊ុន សែន ទើបបញ្ជាឲ្យកែរដ្ឋធម្មនុញ្ញលើកទី១០ កាលពីពេលថ្មី អនុញ្ញាតឲ្យលោក ឬបក្សកាន់អំណាច ស្នើតែងតាំងបេក្ខជននាយកមន្ត្រីទៅព្រះមហាក្សត្រ ដោយមិនចាំបាច់ឆ្លងការព្រមព្រៀងពីក្បាលម៉ាស៊ីនរដ្ឋសភា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។