ព្រះសពរបស់សម្តេចក្រុមព្រះ នរោត្តម រណឫទ្ធិ ត្រូវបានយាងដង្ហែពីប្រទេសបារាំង(France) មកដល់កម្ពុជាហើយនៅព្រឹកថ្ងៃទី៥ ខែធ្នូ។ រដ្ឋមន្ត្រីក្រសួងព្រះបរមរាជវាំងលោក គង់ សំអុល ព្រះរាជវង្សានុវង្ស និងមន្រ្តីគណបក្សហ្វុនស៊ីនប៉ិចប្រមាណ ១០០នាក់ បានទៅទទួលព្រះសពនៅវាលយន្តហោះអន្តរជាតិភ្នំពេញ។ ព្រះសពរបស់ព្រះអង្គ កំពុងតម្កល់ធ្វើបុណ្យតាមព្រះរាជបវេណីនិងព្រះពុទ្ធសាសនារយៈពេល ៤ថ្ងៃ ស្ថិតនៅអតីតព្រះរាជដំណាក់របស់ព្រះអង្គនៅផ្លូវសម្តេចប៉ាន ក្រោយព្រះបរមរាជវាំង។
រដ្ឋាភិបាលកម្ពុជា បានកំណត់យកថ្ងៃទី៨ ខែធ្នូខាងជាថ្ងៃកាន់ព្រះមរណទុក្ខផ្លូវការទូទាំងប្រទេស។ រដ្ឋាភិបាល ណែនាំឱ្យគ្រប់ក្រសួង ស្ថាប័ន សាលារៀន មន្ទីរពេទ្យរបស់រដ្ឋ ឯកជនទាំងអស់ និងមន្ត្រីរាជការ កងកម្លាំងប្រដាប់អាវុធគ្រប់ប្រភេទ គ្រប់ទីវត្តអារាម ព្រមទាំងប្រជាជនទូទាំងប្រទេស ត្រូវបង្ហូតទង់ជាតិត្រឹមពាក់កណ្តាលដង នៅថ្ងៃកាន់ព្រះមរណទុក្ខផ្លូវការ គឺថ្ងៃទី៨ ខែធ្នូ។ បន្ថែមលើនេះ គ្រប់ស្ថានីយ៍វិទ្យុ និងទូរទស្សន៍ជាតិ និងឯកជនទាំងអស់ ត្រូវផ្អាកការសម្តែង និងចាក់ផ្សាយនូវទស្សនីយភាពផ្សេងៗដែលមានលក្ខណៈសប្បាយគគ្រឹកគគ្រេងផងដែរ។រដ្ឋាភិបាលកម្ពុជា លើកឡើងថា សម្តេចក្រុមព្រះ នរោត្តម រណឫទ្ធិ ដែលជាអតីតនាយករដ្ឋមន្ត្រីទី១ និងជាអតីតប្រធានរដ្ឋសភាជាតិ មានគុណបំណាច់ដ៏ធំធេងចំពោះជាតិ សាសនា និងព្រះមហាក្សត្រ។
សម្តេចក្រុមព្រះ នរោត្តមរណឫទ្ធិបានសោយទីវង្គត់ក្នុងព្រះជន្ម ៧៧ព្រះវស្សា នៅប្រទេសបារាំង នៅថ្ងៃទី២៨ ខែវិច្ឆិកា។ ទ្រង់ជាបុត្រាច្បងរបស់ព្រះបាទ នរោត្តម សីហនុ និងអ្នកម្នាង ផាត់ កាញ៉ុល ហើយត្រូវជាព្រះជេដ្ឋា (ឬបងប្រុស) របស់ព្រះមហាក្សត្របច្ចុប្បន្ន គឺព្រះករុណាព្រះបាទសម្ដេច ព្រះបរមនាថ នរោត្ដម សីហមុនី ប៉ុន្តែព្រះមាតាទីទៃ បិតាតែមួយ។ ព្រះអង្គ គឺជាព្រះប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងជាប្រធានគណបក្សហ៊្វុនស៊ិនប៉ិច។ លើសពីនេះ ទ្រង់ក៏ធ្លាប់ឈ្នះឆ្នោតឡើងធ្វើជានាយករដ្ឋមន្រ្តីនៃប្រទេសកម្ពុជាដែរ ប៉ុន្តែត្រូវបានលោក ហ៊ុន សែន ធ្វើរដ្ឋប្រហារដណ្តើមយកអំណាចវិញ នៅខែកក្កដា ឆ្នាំ១៩៩៧។
នៅមុនការយាងសោយទីវង្គត់នេះ សម្តេចក្រុមព្រះ បានបាត់ព្រះភ័ក្ត្រជាងបីឆ្នាំមកហើយក្រោយពីទ្រង់យាងទៅព្យាបាលព្រះរោគនៅប្រទេសបារាំងបន្ទាប់ពីមានគ្រោះថ្នាក់ចរាចរណ៍មួយនៅស្រុកព្រៃនប់ ខេត្តព្រះសីហនុ កាលពីថ្ងៃទី១៧ ខែមិថុនា ឆ្នាំ២០១៨។ ក្នុងគ្រោះថ្នាក់នោះទ្រង់បានរងរបួសធ្ងន់ និងអ្នកម្នាង អ៊ុក ផល្លា ទទួលមរណភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។