លោកនាយករដ្ឋមន្ត្រីហ៊ុន សែន និងមន្ត្រីរដ្ឋាភិបាល ដែលប៉ះពាល់ដោយផ្ទាល់ និងប្រយោល ជាមួយគណៈប្រតិភូប្រទេសហុងគ្រី ធ្វើតេស្តជំងឺកូវីដ១៩ (Covid-19) លើកទី២ នៅតាមផ្ទះរៀងៗខ្លួន និងអ្នកពាក់ព័ន្ធខ្លះ ធ្វើតេស្តនៅក្នុងសណ្ឋាគាររ៉េស៊ីដង់សុខាភ្នំពេញ។ ជាមួយគ្នានេះ មន្ត្រីនៅស្ថានទូតខ្មែរប្រចាំប្រទេសបារាំង ចំនួន ៤នាក់ មានផ្ទុកជំងឺកូវីដ១៩។ ពលរដ្ឋខ្លះសោកស្ដាយចំពោះការធ្វេសប្រហែលរបស់មន្ត្រីរដ្ឋាភិបាល ដែលបណ្ដាលឲ្យពលរដ្ឋជួបវិបត្តិសេដ្ឋកិច្ច ដោយសារជំងឺកូវីដ១៩ សាជាថ្មី។
លោកនាយករដ្ឋមន្ត្រី ហ៊ុន សែន និងមន្ត្រីរដ្ឋាភិបាល ព្រមទាំងមនុស្សសរុប ៨៩២នាក់ ដល់ថ្ងៃកំណត់ធ្វើតេស្តរកជំងឺកូវីដ១៩ ជាលើកទី២ នៅថ្ងៃទី៩ វិច្ឆិកា ប៉ុន្តែក្រសួងសុខាភិបាលមិនទាន់បង្ហាញលទ្ធផលធ្វើតេស្តនៅឡើយទេ ដោយអាចរង់ចាំនៅថ្ងៃទី១០ វិច្ឆិកា។ នៅថ្ងៃដដែលនេះ ក្រសួងសុខាភិបាល ក៏បានប្រកាសរកឃើញអ្នកប៉ះពាល់ជាមួយគណៈប្រតិភូប្រទេសហុងគ្រីចំនួន ៥២នាក់បន្ថែមទៀត ដែលធ្វើឲ្យចំនួនអ្នកសង្ស័យសរុបកើនដល់ ៩៤៤នាក់។
ចំពោះលទ្ធផលធ្វើតេស្តអ្នកសង្ស័យថ្មីទាំង ៥២នាក់នោះ គឺមិនមានផ្ទុកជំងឺកូវីដ១៩ ទេ ក្រៅពីអង្គរក្សខ្មែរម្នាក់ ដែលការពារគណៈប្រតិភូហុងគ្រីដោយផ្ទាល់ ដែលបានរកឃើញមានជំងឺកូវីដ១៩ កាលពីថ្ងៃទី៦ វិច្ឆិកា។ ទោះជាយ៉ាងណាក្ដី ក្រសួងសុខាភិបាលនៅតែបន្តក្រើនរំលឹកឲ្យអ្នកពាក់ព័ន្ធនឹងគណៈប្រតិភូប្រទេសហុងគ្រី ធ្វើចត្តាឡឺស័កតាមផ្ទះ ឬនៅក្នុងសណ្ឋាគាររ៉េស៊ីដង់សុខាភ្នំពេញ និងត្រូវទៅពិនិត្យ ធ្វើតេស្តឲ្យបានគ្រប់ចំនួន ៤ដង តាមកាលបរិច្ឆេទ និងការរៀបចំរបស់ក្រសួង។
ករណីដាច់ដោយឡែកមួយទៀត គឺក្រសួងសុខាភិបាលធ្វើតេស្តរកឃើញជនជាតិខ្មែរចំនួន ២នាក់ផ្សេងទៀត គឺជាអ្នកដំណើរមកពីប្រទេសជប៉ុនមានផ្ទុកជំងឺកូវីដ១៩ ក្រោយលទ្ធផលធ្វើតេស្តលើកទី២។ រីឯអ្នករួមដំណើរជាមួយចំនួន ៣៥នាក់ផ្សេងទៀត កំពុងដាក់ឱ្យនៅដាច់ដោយឡែក នៅក្នុងសណ្ឋាគារ ២កន្លែង និងនៅវិទ្យាល័យពោធិចិនតុង។
ពាក់ព័ន្ធនឹងជំងឺកូវីដ១៩ នេះដែរ ក្រសួងការបរទេសកម្ពុជា ក៏បានចេញសេចក្ដីប្រកាសថា មន្ត្រីស្ថានទូតខ្មែរ នៅប្រទេសបារាំងចំនួន ៤នាក់ មានផ្ទុកជំងឺកូវីដ១៩ ហើយមន្ត្រីស្ថានទូតម្នាក់ទៀត កំពុងរង់ចាំលទ្ធផលធ្វើតេស្ត។
ជុំវិញស្ថានភាពជំងឺកូវីដ១៩ នេះ អាស៊ីសេរីមិនអាចសុំការបញ្ជាក់ពីអ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន និងអ្នកនាំពាក្យក្រសួងការបរទេស និងសហប្រតិបត្តិការអន្តរជាតិ លោក កុង គួង បានទេ នៅថ្ងៃទី៩ វិច្ឆិកា។
ប៉ុន្តែសម្រាប់ពលរដ្ឋវិញសម្ដែងការសោកស្ដាយ ចំពោះការធ្វេសប្រហែលរបស់ក្រុមមន្ត្រីរដ្ឋាភិបាលក្នុងការបង្កើតឱកាសឲ្យមានការឆ្លងរីករាលដាលជំងឺកូវីដ១៩ ជាថ្មីនៅកម្ពុជា។
ពលរដ្ឋរស់នៅក្នុងសហគមន៍ក្រីក្រមួយ ក្នុងរាជធានីភ្នំពេញ លោកស្រី ស៊ិន ស៊ីនួន ប្រាប់ថា ផលប៉ះពាល់ពីការធ្វេសប្រហែលនេះបានធ្លាក់មកលើពលរដ្ឋជាបណ្ដើរហើយ ដោយសារអាជ្ញាធរបានចាប់ផ្ដើមបិទហាងខារ៉ាអូខេ រង្គសាល និងសាលារៀនឡើងវិញ បណ្ដាលឲ្យអ្នករស់នៅក្នុងសហគមន៍បាត់បង់ការងារធ្វើ និងបាត់បង់មុខរបរលក់ដូរតាមកញ្ច្រែងរទេះ លែងដាច់ដូចមុន។
លោកស្រី ស៊ិន ស៊ីនួន និយាយថា អ្នកក្រីក្រក្នុងសហគមន៍ខ្លាចការប៉ះពាល់ជីវភាពប្រចាំថ្ងៃ ជាជាងខ្លាចជំងឺកូវីដ១៩។ លោកស្រីបញ្ជាក់ថា សម្រាប់មន្ត្រីរដ្ឋាភិបាលមិនបារម្ភជីវភាពទេ ព្រោះពួកគេមានទ្រព្យធនហូរហៀរ មិនបាច់ខ្វល់ពីម្ហូបអាហារកូនចៅក្នុងបន្ទុក និងមានទីកន្លែងសម្រាក ឬចត្តាឡឺស័ក ល្អៗ។ ប៉ុន្តែសម្រាប់អ្នកក្រីក្រវិញ គឺជាកង្វល់ និងជាបន្ទុកធ្ងន់ធ្ងរ៖ « សោកស្ដាយមែនទែន។ សោកស្ដាយទី១ គាត់ជាកំពូលមេដឹកនាំហើយបែរជាគាត់ធ្វើការធ្វេសប្រហែសនោះណា មិនប្រយ័ត្នមិនការពារ។ អ៊ីចឹង យើងសោកស្ដាយមែនទេ។ តែការនិយាយរបស់យើង គឺមានព្រំដែនរបស់យើងណាមិនអាចនិយាយទូលំទូលាយបាន។ ការសោកស្ដាយសោកស្ដាយបំផុត គឺមានការសោកស្ដាយមែនទែន»។
ប្រធានសមាគមឯករាជ្យនៃសេដ្ឋកិច្ចក្រៅប្រព័ន្ធលោក វ៉ន ពៅ មានប្រសាសន៍ថា អ្នកក្រីក្រចាប់ផ្ដើមរងផលប៉ះពាល់ពិតមែន ពីព្រោះការបិទក្លឹបហាងជាដើម បណ្ដាលឲ្យអ្នកធ្វើការអ្នករត់រ៉ឺម៉កកម្មករលាងសំអាតជាដើម អត់ការងារធ្វើ។
មន្ត្រីសង្គមស៊ីវិលរូបនេះ សម្ដែងការសោកស្ដាយចំពោះការធ្វេសប្រហែលរបស់មន្ត្រីជាន់ខ្ពស់រដ្ឋាភិបាលទាំងអស់ ព្រោះអាជ្ញាធរតែងតែហាមឃាត់ និងរឹតបន្តឹងការជួបជុំរបស់ពលរដ្ឋ តែបែរជារដ្ឋាភិបាលធ្វេសប្រហែសទៅវិញ៖ « វាប៉ះពាល់ ព្រោះពួកយើងក្លឹបកម្សាន្តក្លឹបអ្វី ដូចអ្នករត់រ៉ឺម៉ករត់អ្វីគាត់រកថ្ងៃមិនបាន។ តែឥឡូវ គាត់រត់យប់អត់មានអ្វីដឹង គឺសេរ៉ូតែម្ដង។ យើងរកស៊ីថ្ងៃមិនបានខំរកស៊ីយប់ ហើយឥឡូវ គេបិទក្លឹបកម្សាន្តក្លឹបអ្វី»។
កាលពីល្ងាចថ្ងៃទី៨ វិច្ឆិកា ក្រសួងពាក់ព័ន្ធមួយចំនួនបានប្រកាសចាត់វិធានការបន្ទាន់ជាថ្មីទៀត ដោយបិទសាលារៀន សាលាបណ្ដុះបណ្ដាលវិជ្ជាជីវៈ ពហុកីឡាដ្ឋានជាតិអូឡាំពិក កន្លែងហាត់កីឡា និងក្លឹបកម្សាន្តមួយចំនួន ដើម្បីទប់ស្កាត់ការឆ្លងរាលដាលជំងឺកូវីដ-១៩។
គិតត្រឹមថ្ងៃទី៩ វិច្ឆិកា កម្ពុជារកឃើញអ្នកមានជំងឺកូវីដ-១៩ សរុប ២៩៧នាក់។ ព្យាបាលជាសះស្បើយចំនួន ២៨៨នាក់ ខណៈអ្នកកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀតចំនួន ៩នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។