សាច់ញាតិមន្ត្រីគណបក្សភ្លើងទៀនក្រុងប៉ោយប៉ែត ខេត្តបន្ទាយមានជ័យស្នើឱ្យសាលាឧទ្ធរណ៍បាត់ដំបងដោះលែងលោកចៅ វាសនា នៅក្រៅឃុំបណ្ដោះអាសន្នតាមការស្នើសុំរបស់មេធាវី។ សំណើនេះធ្វើឡើងស្របពេល ដែលសាលាឧទ្ធរណ៍គ្រោងបើកសវនាការលើបណ្ដឹងសាទុក្ខរបស់លោក ចៅ វាសនា នៅថ្ងៃទី២២ កញ្ញាចុងសប្ដាហ៍នេះ។
សាច់ញាតិមន្ត្រីគណបក្សប្រឆាំងរំពឹងថា សាលាឧទ្ធរណ៍បាត់ដំបងនឹងដោះលែងលោក ចៅ វាសនាឱ្យមានសេរីភាពវិញតាមការស្នើសុំរបស់មេធាវី។
កូនស្រីរបស់លោក ចៅ វាសនា គឺអ្នកស្រី ចៅ រតនៈ ប្រាប់វិទ្យុអាស៊ីសេរីនៅថ្ងៃទី១៩ កញ្ញាថា ឪពុករបស់អ្នកស្រីជាមនុស្សស្លូតត្រង់ ដែលតែងចូលរួមសហការជាមួយតុលាការពុំដែលខកខានឡើយ ដូច្នេះ សាលាឧទ្ធរណ៍គួរតែអនុញ្ញាតឱ្យលោក ចៅ វាសនា បាននៅក្រៅឃុំតាមការស្នើសុំរបស់មេធាវី។ អ្នកស្រីបន្តថា លោក ចៅ វាសនា មានវ័យកាន់តែចាស់ និងមានសុខភាពទ្រុឌទ្រោម ហើយប្រសិនបើតុលាការបន្តឃុំខ្លួនលោកនៅពន្ធនាគារនឹងធ្វើឱ្យប៉ះពាល់ដល់សុខភាពកាន់តែខ្លាំង។
អ្នកស្រី ចៅ រតនៈ៖ «នៅក្នុងពន្ធនាគារ ធម្មតាបងប្អូនជាទូទៅគាត់វាមិនដូចជាយើងនៅខាងក្រៅមានសេរីភាព វាប៉ះពាល់ដល់ផ្លូវអារម្មណ៍ផង វាប៉ះពាល់ដល់ផ្លូវកាយផង ការគេងការស្នាក់នៅការហូបចុកអីចឹង។ ចិត្តគាត់ចង់និយាយតែម្យ៉ាងទេ សង្ឃឹមថា តុលាការនឹងដោះលែងឱ្យគាត់នៅក្រៅឃុំ ព្រោះអីគាត់មិនមែនជាឧក្រិដ្ឋជន ដែលចាំបាច់ត្រូវតែនៅក្នុងមន្ទីរឃុំឃាំងទេ។ គាត់ថា បើតុលាការទាមទារឱ្យគាត់ឡើងបំភ្លឺរឿងក្ដី ក៏គាត់នៅតែមានវត្តមានក្នុងស្រុកដើម្បីបំភ្លឺជូន»។
សំណើសុំនេះបន្ទាប់ពីតំណាងមហាអយ្យការអមសាលាឧទ្ធរណ៍បាត់ដំបង លោក អ៊ិត សុធាបានអញ្ជើញមេធាវីការពារក្ដីឱ្យលោក ចៅ វាសនា គឺ លោក សំ សុគង់ ចូលរួមសវនាការក្នុងបណ្ដឹងសុំនៅក្រៅឃុំបណ្ដោះអាសន្ននៅថ្ងៃទី២២ កញ្ញាខាងមុខ។ សវនាការនេះធ្វើឡើងតបតាមសំណើរបស់មេធាវី លោក ចៅ វាសនា ដែលបានប្ដឹងទាស់នឹងការសម្រេចរបស់តុលាការថ្នាក់ក្រោមដែលមិនឱ្យលោក ចៅ វាសនា នៅក្រៅឃុំបណ្ដោះអាសន្នតាមការស្នើសុំ។
ជុំវិញរឿងនេះ អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា យល់ឃើញថា សាលាឧទ្ធរណ៍គួរតែដោះលែងមន្ត្រីបក្សប្រឆាំងរូបនេះតាមការស្នើសុំ ដោយសារកន្លងមកលោក ចៅ វាសនា ធ្លាប់ជាប់ឃុំម្ដងរួចមកហើយ ដោយលោកមិនដែលគេចវេះក្នុងការសហការជាមួយតុលាការនោះទេ។
លោក ស៊ឹង សែនករុណា៖ «កន្លងមក លោកក៏ធ្លាប់ទទួលរកនូវការផ្ដន្ទាទោសនៅក្នុងកិច្ចការងាររបស់លោកក្នុងនាមជាសកម្មជននយោបាយមួយរូប នៅសង្កាត់ប៉ោយប៉ែត ដែលកន្លងមក គាត់ទទួលបានការគាំទ្រពីប្រជាពលរដ្ឋបោះឆ្នោតទុកចិត្តឱ្យរហូតដល់ក្លាយទៅជាចៅសង្កាត់។ ដូច្នេះហើយ សម្រាប់ខ្ញុំឃើញថានៅក្នុងនីតិវិធីក៏ពិតមែនអាចតុលាការមានសិទ្ធិក្នុងការឃុំខ្លួនបណ្ដោះអាសន្នក្នុងសំណុំរឿងណាមួយក្ដីតែក៏មានសិទ្ធិក្នុងការសម្រេចឱ្យមានសេរីភាពក្រៅឃុំផងដែរ » ។
ប្រធានប្រតិបត្តិគណបក្សភ្លើងទៀនក្រុងប៉ោយប៉ែត លោក ចៅ វាសនា មានដើមកំណើតខ្មែរក្រោម ត្រូវបានអាជ្ញាធរខេត្តបន្ទាយមានជ័យចាប់បញ្ជូនទៅឃុំខ្លួននៅពន្ធនាគារខេត្តនេះ កាលពីថ្ងៃទី២៥ ខែកក្កដា ដោយចោទប្រកាន់ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងញុះញង់ឱ្យមានការរើសអើង ពាក់ព័ន្ធនឹងការចោទប្រកាន់ថា ចូលរួមធ្វើយុទ្ធនាការអំពាវនាវឱ្យពលរដ្ឋគូសខ្វែងសន្លឹកឆ្នោត តាមបណ្ដាញសង្គមតេឡេក្រាម (Telegram) ក្នុងពេលបោះឆ្នោតជាតិ កាលពីខែកក្កដាកន្លងទៅ។ ប៉ុន្តែ លោក ចៅ វាសនា បានច្រាលចោលការចោទប្រកាន់នេះ។
លោក ចៅ វាសនា ធ្លាប់ត្រូវបានតុលាការខេត្តបន្ទាយមានជ័យកាត់ទោសជាប់ពន្ធនាគារម្តងរួចមកហើយពីបទញុះញង់ និងបានចេញពីពន្ធនាគារវិញកាលពីដើមឆ្នាំ២០២២ ក្រោយលោកបានអនុវត្តទោសគ្រប់ចំនួនរយៈពេល ៥ឆ្នាំពេញនៅក្នុងពន្ធនាគារ។
នៅមុនការចាប់ខ្លួនជាថ្មីទៀតនៅលើកនេះ លោក ចៅ វាសនា តែងតែអះអាងថា មានមន្ត្រីរដ្ឋាភិបាលម្នាក់អូសទាញលោកឱ្យចុះចូលជាមួយគណបក្សប្រជាជនកម្ពុជា ប៉ុន្តែលោកមិនព្រម ហើយថា មន្ត្រីនោះបានគំរាមលោកថា អាចនឹងមានគ្រោះថ្នាក់ដល់អាយុ ជីវិត ឬជាប់ពន្ធនាគារបើសិនជាលោកនៅតែមិនចុះចូលជាមួយបក្សកាន់អំណាច។
មន្ត្រីសង្គមស៊ីវិលនៅតែចាត់ទុកក្ដីក្ដាំនេះថា ជាការធ្វើទុក្ខបុកម្នេញផ្នែកនយោបាយ និងស្នើដល់តុលាការដោះលែងលោក ចៅ វាសនា ឱ្យមានសេរីភាពវិញដោយឥតលក្ខខណ្ឌ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។