សាច់ញាតិថា ពលករខ្មែរកញ្ញា នួន តឿន ដែលអាជ្ញាធរម៉ាឡេស៊ីចាប់បញ្ជូនពីប្រទេសម៉ាឡេស៊ីយកទៅដាក់ពន្ធនាគារនៅស្រុកខ្មែររក្សាជំហរស្មារតីរឹងមាំក្នុងការទាមទារឱ្យរដ្ឋាភិបាលទម្លាក់ចោលការចោទប្រកាន់ និងដោះលែងឱ្យមានសេរីភាពវិញ។ មន្រ្តីសិទ្ធិមនុស្សលើកឡើងថា រឿងនេះជាការធ្វើទុក្ខបុកម្នេញផ្នែកនយោបាយ ហើយស្នើឱ្យរដ្ឋាភិបាលបើកលំហសេរីភាពពលរដ្ឋឡើងវិញ។
កញ្ញា នួន តឿន ដែលអាជ្ញាធរនិរទេសពីប្រទេសម៉ាឡេស៊ីទៅកម្ពុជាដោយបង្ខំពាក់ព័ន្ធការបញ្ចេញមតិរិះគន់មេដឹកនាំក្រុងភ្នំពេញគឺលោក ហ៊ុន សែន កន្លងមក លើកឡើងថាការចោទប្រកាន់ពីបទល្មើសញុះញង់ និងការឃុំខ្លួននាងដាក់ពន្ធនាគារជារឿងមិនត្រឹមត្រូវ និងមិនអាចទទួលយកបានឡើយ។
ម្តាយមីងរបស់កញ្ញា នួន តឿន គឺលោកស្រី ឆេង ថុល ប្រាប់វិទ្យុអាស៊ីសេរីនៅថ្ងៃទី១៥ ខែតុលា ក្រោយចូលសួរសុខទុក្ខក្មួយនៅពន្ធនាគារព្រៃសថា លោកស្រីយំអាណិតពេលឃើញក្មួយស្រីជាមនុស្សស្លូតត្រង់ និងជាបង្គោលគ្រួសារបែរជាស្លៀកខោអាវអ្នកទោស ត្រូវជាប់គុកទាំងអយុត្តិធម៌។ លោកស្រីឱ្យដឹងថាកញ្ញា នួន តឿន ខកចិត្តចំពោះប៉ូលិសម៉ាឡេស៊ី និងកម្ពុជាដែលឆ្មក់ចូលចាប់វាយខ្នោះនាងដល់ផ្ទះថៅកែស្ងាត់ៗ ដោយគ្មានបញ្ជាក់ពីមូលហេតុ ឬបង្ហោញលិខិតស្នាមណាមួយនោះទេ។ លោកស្រីបញ្ជាក់ថា ទោះជាពេលនេះក្មួយរបស់លោកស្រីកំពុងឈឺ រងទុក្ខលំបាក និងហូបចុកមិនគ្រប់គ្រាន់នៅក្នុងពន្ធនាគារក្តី ក៏នាងនៅតែមានជំហរនិងស្មារតីរឹងមាំ ហើយទាមទារឱ្យតុលាការដោះលែងនាងវិញ។
លោកស្រី ឆេង ថុល៖ «វានៅខាងក្នុងគ្រាន់តែពិបាកអត់លុយចាយអ៊ីចឹង ខ្ញុំអាណិតវាដែរហ្នឹង ខ្ញុំនិងវាយំដូចតែគ្នាពេលក្មួយនិយាយមកថា អត់មានលុយចាយ ខោអាវអត់មានស្លៀក ខ្ញុំទៅពីនេះទៅអត់បានទិញអាវទេ ពីព្រោះខ្ញុំអត់លុយដែរ អាណិតលើសពីអ្វីទៅទៀត វាមិនគួរដល់ថ្នាក់ហ្នឹង យើងមិនដឹងធ្វើអ្វីគេកើតទៅ។ ខ្ញុំស្នើឱ្យសម្តេចដោះលែងកូនរបស់ខ្ញុំមកវិញមក វាស្លូតត្រង់ ហើយអ្នកនៅក្រៅប្រទេសជួយឱ្យយោបល់ដល់សម្តេចដោះលែងកូនរបស់ខ្ញុំមកវិញមក ពីព្រោះវាអត់ដឹងអ្វីទេ វាស្លូត ស្មោះត្រង់ គ្នាអត់ចេះលួចប្លន់ឆក់អ្នកណាទេ គ្នាស្លូតណាស់»។
វិទ្យុអាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាលលោក ប៉ែន បូណា ដើម្បីបកស្រាយជុំវិញរឿងនេះបានទេ នៅថ្ងៃទី១៥ ខែតុលា។ ចំណែកអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ ក៏ពុំអាចទាក់ទងបានដែរ។
កាលពីល្ងាចថ្ងៃទី៣០ ខែកញ្ញាប៉ូលិសម៉ាឡេស៊ីបានចាប់បញ្ជូនពលករខ្មែរនិងជាសមាជិកបណ្តាញយុវជនកម្ពុជាសកល ប្រចាំប្រទេសម៉ាឡេស៊ី គឺកញ្ញា នួន តឿន ទៅកម្ពុជាតាមសំណើរបស់អាជ្ញាធរក្រុងភ្នំពេញ។ តុលាការបានចោទប្រកាន់កញ្ញា នួន តឿន ពីបទ« ញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់ឱ្យមានការរើសអើង» និងបញ្ជូនទៅឃុំខ្លួននៅពន្ធនាគារម២ រាជធានីភ្នំពេញ កាលពីថ្ងៃទី១ ខែតុលា។
ជុំវិញចោទប្រកាន់ និងឃុំខ្លួនពលករខ្មែររូបនេះ មេធាវីរបស់សមាគមអាដហុក (Adhoc) នឹងដាក់ពាក្យការពារក្តីទៅតុលាការក្រុងភ្នំពេញនៅថ្ងៃទី១៦ ខែតុលា បន្ទាប់មកមេធាវីគ្រោងទៅជួបពិភាក្សាផ្លូវច្បាប់ជាមួយកញ្ញា នួន តឿន ដែលកំពុងជាប់ឃុំក្នុងពន្ធនាគារ។
អនុប្រធានផ្នែកសិទ្ធិមនុស្ស ដីធ្លី និងធនធានធម្មជាតិនៃសមាគមការពារសិទ្ធិមនុស្សអាដហុក លោក យិន ម៉េងលី មានប្រសាសន៍ថាការចាប់ខ្លួនកញ្ញា នួន តឿន ពីប្រទេសម៉ាឡេស៊ីមកដាក់ពន្ធនាគារនៅកម្ពុជាដោយសារនាងនិយាយរិះគន់មេដឹកនាំកម្ពុជាកន្លងមក ត្រូវបានអង្គការសិទ្ធិមនុស្សថ្កោលទោស និងចាត់ទុកក្តីក្តាំនេះថាជាការធ្វើទុក្ខបុកម្នេញទៅលើអ្នកដែលមាននិន្នាការផ្ទុយពីរដ្ឋាភិបាលនៅក្រៅប្រទេស។ លោកមើលឃើញថា បញ្ហានេះមិនបានផលចំណេញអ្វីដល់រដ្ឋាភិបាលនោះទេ ផ្ទុយទៅវិញធ្វើឱ្យគ្រួសារព្រមទាំងកញ្ញា នួន តឿន មានការឈឺចាប់កាន់តែខ្លាំង ចំណែករដ្ឋាភិបាលបន្តរងភាពអាម៉ាស់លើឆាកអន្តរជាតិថែមទៀត។
លោក យិន ម៉េងលី៖ «សូមឱ្យរដ្ឋាភិបាលបើកលំហសេរីភាពបញ្ចេញមតិទៅ ដើម្បីស្តារមុខមាត់របស់ប្រទេសជាតិយើង ក៏ដូចជាមុខមាត់របស់រដ្ឋាភិបាលនៅលើឆាកអន្តរជាតិ ដើម្បីឱ្យស្ថានភាពនយោបាយមានភាពធូរស្រាលហើយអ្នកនយោបាយងាកមកជួបជុំពិភាក្សារកដំណោះស្រាយដើម្បីប្រទេសជាតិប្រជាពលរដ្ឋរបស់យើងបាទ»។
កញ្ញា នួន តឿន មានស្រុកកំណើតនៅស្រុកបសេដ្ឋ នៅខេត្តកំពង់ស្ពឺ និងជាកូនកំព្រាឪពុកម្តាយ។ នាងគឺជាពលករខ្មែរធ្វើការស្របច្បាប់ជាង ១៦ឆ្នាំនៅប្រទេសម៉េឡេស៊ីដែលចេញមុខគាំទ្រគណបក្សប្រឆាំង។ កញ្ញាតែងប្រើប្រាស់បណ្តាញសង្គមនិយាយរឿងអយុត្តិធម៌នានា ដូចជាបញ្ហាពលរដ្ឋរងគ្រោះដីធ្លី បញ្ហាព្រំដែនជាមួយប្រទេសវៀតណាម ជាពិសេសរិះគន់ខ្លាំងៗជុំវិញការដឹកនាំរបស់លោក ហ៊ុន សែន ប្រធានព្រឹទ្ធសភា និងលោកនាយករដ្ឋមន្រ្តី ហ៊ុន ម៉ាណែត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។