ព្រះសង្ឃ និងតំណាងសហគមន៍ខ្មែរនៅអូស្ត្រាលី ប្រតិកម្មចំពោះរដ្ឋលេខាធិការក្រសួងយុត្តិធម៌ លោក គឹម សន្តិភាព ដែលពួកគាត់ចោទថា បន្តផ្ញើសារបែបគំរាមកំហែង និងបំបែកបំបាក់សហគមន៍ខ្មែរ។ ប្រតិកម្មបែបនេះ គឺបន្ទាប់ពីមនុស្សជំនិតរបស់លោក ហ៊ុន ម៉ាណែត រូបនេះ បង្ហោះសារឲ្យតំណាងសហគមន៍ខ្មែរ ឈប់ប្រើប្រាស់វត្តអារាមនៅក្រៅប្រទេស ជាទីជម្រកនយោបាយ ខណៈតំណាងសហគមន៍ខ្មែរ ប្រកាសជួបជុំពិគ្រោះយោបល់គ្នា នៅក្នុងវត្តខ្មែរម៉ែលប៊ន នៅថ្ងៃអាទិត្យសប្ដាហ៍នេះ អំពីគម្រោងធ្វើបាតុកម្មប្រឆាំងដំណើរទស្សនកិច្ចរបស់លោក ហ៊ុន ម៉ាណែត។
ស្របពេលតំណាងសហគមន៍ខ្មែរ ត្រៀមជួបពិគ្រោះយោបល់គ្នានៅក្នុងវត្តខ្មែរម៉ែលប៊ន នៅថ្ងៃទី២៨ ខែមករាខាងមុខអំពីគម្រោងធ្វើបាតុកម្មប្រឆាំងវត្តមាន លោក ហ៊ុន ម៉ាណែត នោះ រដ្ឋលេខាធិការក្រសួងយុត្តិធម៌ លោក គឹម សន្តិភាព ដែលតែងជិះយន្តហោះមកជ្រៀតជ្រែក និងបំបែកបំបាក់សហគមន៍ខ្មែរនៅប្រទេសអូស្ត្រាលីជាប្រចាំ ក៏នៅមិនសុខស្រណុកខ្លួនឡើយ។ លោក បានចាប់ផ្តើមបើកឆាកវាយប្រហារ និងលាបពណ៌តំណាងសហគមន៍ខ្មែរល្បីៗ នៅអូស្ត្រាលីជាថ្មីម្ដងទៀត។
ព្រះសង្ឃ និងតំណាងសហគមន៍ខ្មែរ លើកឡើងថា សាររបស់លោក គឹម សន្តិភាព ដែលហាមមិនឲ្យតំណាងសហគមន៍ខ្មែរ យកវត្តអារាមជាទីជួបជុំ ដើម្បីតស៊ូមតិ សម្រាប់ផលប្រយោជន៍ជាតិ និងលើកតម្កើងលទ្ធិប្រជាធិបតេយ្យនោះ គឺជាសារបែបគំរាមកំហែង និងបំបែកសហគមន៍ខ្មែរ។
អតីតតំណាងរាស្ត្រអូស្ត្រាលីដើមកំណើតខ្មែរ និងជាប្រធានសហព័ន្ធខ្មែរអូស្ត្រាលីសាជីវកម្ម លោក ហុង លីម ថ្លែងថា លោកក៏ជាមនុស្សម្នាក់បានចូលរួមដឹកនាំកសាងវត្តខ្មែរនៅអូស្ត្រាលីដំបូងគេ ដើម្បីទុកជាកន្លែងប្រតិបត្តិព្រះពុទ្ធសាសនា និងថែរក្សាប្រពៃណីវប្បធម៌ខ្មែរនៅលើទឹកដី នៃប្រទេសពហុវប្បធម៌ចម្រុះជាតិសាសន៍មួយនេះ។លោក ហុង លីម បន្តថា ការណ៍ដែលប្រជាពលរដ្ឋខ្មែរ ជួបជុំគ្នាក្នុងវត្តអារាម ដើម្បីបណ្ដុះគំនិតស្នេហាជាតិ និងការតស៊ូមតិនយោបាយ ដើម្បីឲ្យប្រទេសកម្ពុជា មានការគោរពសិទ្ធិមនុស្ស និងលទ្ធិប្រជាធិបតេយ្យ គឺជារឿងត្រឹមត្រូវ ដែលមានជាយូរមកហើយនៅក្នុងប្រវត្តិសាស្ត្រនៃប្រទេសកម្ពុជា។ ផ្ទុយទៅវិញ លោក ហុង លីម យល់ថា ក្រុមលោក គឹម សន្តិភាព និងលោក ហ៊ុន ម៉ាណែត ទៅវិញទេ ដែលជាអ្នកជាន់ឈ្លីព្រះពុទ្ធសាសនា និងតែងតែធ្វើទុក្ខបុកម្នេញលើព្រះសង្ឃ ដែលឈឺឆ្អាលរឿងសង្គមជាតិ។
លោក ហុង លីម៖«មុខរបរ និងតួនាទីភារកិច្ចរបស់លោក គឹម សន្តិភាព ដែលស៊ីប្រាក់ខែ អត់មានធ្វើអីនៅស្រុកខ្មែរ មកតែអូស្ត្រាលី ដើម្បីបំផ្លិចបំផ្លាញសង្គមខ្មែរនៅនេះ ដើម្បីបំបែកបំបាក់ ដើម្បីបន្ទាបបន្ថោក ដើម្បីគំរាមកំហែង ដើម្បីធ្វើឲ្យគេភ័យខ្លាច។ យើងកំពុងរកមធ្យោបាយ ដើម្បីធ្វើយ៉ាងម៉េចកុំឲ្យលោក គឹម សន្តិភាព មកទីនេះ។ ពួកនេះ បានបំពាននឹងច្បាប់ជ្រៀតជ្រែកពីរដ្ឋបរទេស(Foreign interference)»។
ប្រតិកម្មរបស់លោក ហុង លីម នេះ គឺបន្ទាប់ពីលោក គឹម សន្តិភាព ប្រធានអង្គការក្រុមការងាររៀបចំអង្គការចាត់តាំងយុវជនគណបក្សប្រជាជនកម្ពុជាប្រចាំប្រទេសអូស្ត្រាលី (Australia) និងនូវែលហ្សេឡង់ (New Zealand) នៅថ្ងៃទី២៤ មករា បានបង្ហោះសារលើគណនីហ្វេសប៊ុក (FB) ដោយភ្ជាប់រូបថតលោក ហុង លីម និងប្រធានសមាគមខ្មែរ លោក ជា យូហ៊ន អមជាមួយសំណេរថា តើវត្តខ្មែរនៅក្រៅប្រទេសជាកន្លែងសម្រាប់ពុទ្ធសាសនិកគោរពប្រតិបត្តិសាសនា ឬនៅតែជាកន្លែងសម្រាប់មនុស្សមួយក្រុមប្រើប្រាស់ជាទីស្នាក់ការគណបក្សនយោបាយ? មន្ត្រីជំនិតរបស់លោក ហ៊ុន ម៉ាណែត ដែលពូកែខាងគំរាមកំហែងប្រជាពលរដ្ឋ អ្នកនយោបាយបក្សប្រឆាំង និងអ្នករិះគន់អំពីរឿងគុកច្រវាក់ជាសាធារណៈរូបនេះ ក៏តាំងខ្លួនជាអ្នកអប់រំគេថា គួរណាស់រក្សាទុកទីអារាមនានា ជាកន្លែងគោរព និងប្រតិបត្តិព្រះពុទ្ធសាសនា ជាមជ្ឈមណ្ឌលវប្បធម៌ អរិយធម៌ខ្មែរ ជាកន្លែងអប់រំ បង្កើតមិត្តភាព សាមគ្គីភាពរបស់ពុទ្ធសាសនិកគ្រប់រូបក្នុងនាមជាពលរដ្ឋខ្មែរតែមួយ។ លោក គឹម សន្តិភាព ដែលកំពុងរងការចោទថា ចូលមកជ្រៀតជ្រែក បំបែកបំបាក់សហគមន៍ខ្មែរ និងវត្តអារាម ព្រមទាំងបង្កើតអង្គការសមាគមក្លែងក្លាយនៅទ្វីបអូសេអានី ក៏បានផ្ដាំតំណាងសហគមន៍ខ្មែរថា កុំបន្តយកទីអារាមធ្វើជាទីជម្រកគណបក្សនយោបាយ ព្រោះជារឿងមិនត្រឹមត្រូវ និងអាក្រក់មើល។
ផ្ទុយពីការលើកឡើងរបស់លោក គឹម សន្តិភាព នេះ តំណាងសហគមន៍ខ្មែរ កត់សម្គាល់ថា ក្រុមលោក គឹម សន្តិភាព ទៅវិញ ដែលគ្មានចិត្តបរិសុទ្ធគោរពព្រះពុទ្ធសាសនា ហើយតែងតែមានមហិច្ឆតាក្នុងការបំបែកបាក់ និងត្រួតត្រាវត្តអារាម និងព្រះសង្ឃនៅក្រៅប្រទេស ឲ្យបម្រើផលប្រយោជន៍នយោបាយដល់ក្រុមអ្នកកាន់អំណាចសព្វថ្ងៃ។ ជាក់ស្តែង ដូចជា វត្តខេមរារង្សី នៅរដ្ឋធានីកងបេរ៉ា នៃប្រទេសអូស្ត្រាលី ដែលក្រុមលោក គឹម សន្តិភាព តែងតែចេញចូលជាញឹកញាប់នោះ នៅទីបំផុត អតីតព្រះចៅអធិការវត្ត មួយនេះ គឺលោក វិន សាវឿន បានក្លាយជាអ្នកបម្រើនយោបាយឲ្យក្រុមលោក គឹម សន្តិភាព មកដល់សព្វថ្ងៃ។នេះមិនទាន់និយាយដល់គណបក្សកាន់អំណាច ដែលបានប្រើបណ្តាញត្រួតត្រាតាមវត្តអារាម និងដាក់សម្ពាធព្រះសង្ឃ និងមន្ត្រីសង្ឃនៅក្នុងស្រុក ឲ្យទេសនាអរគុណសន្តិភាព និងប្រកាសគាំទ្រគណបក្សកាន់អំណាច និងក្រុមគ្រួសារលោក ហ៊ុន សែន។
វិទ្យុអាស៊ីសេរីមិនទាន់អាចសុំការឆ្លើយតបពីលោក គឹម សន្តិភាព បានទេ នៅថ្ងៃទី២៤ មករា ដោយសារលេខទូរស័ព្ទរបស់លោក មិនអាចទាក់ទងបាន។
ការបង្ហោះសាររបស់លោក គឹម សន្តិភាព នៅពេលនេះ គឺស្របពេលដែលតំណាងសហគមន៍ខ្មែរ តំណាងអង្គការនានា និងមន្ត្រីគណបក្សប្រឆាំងប្រចាំប្រទេសអូស្ត្រាលី បានប្រកាសគ្រោងជួបជជែកគ្នានៅក្នុងវត្តខ្មែរម៉ែលប៊ន នៅថ្ងៃទី២៨ ខែមករា ដើម្បីផ្លាស់ប្ដូរយោបល់គ្នាសម្រាប់ត្រៀមធ្វើបាតុកម្មប្រឆាំងវត្តមានលោក ហ៊ុន ម៉ាណែត ដែលគ្រោងមកចូលរួមកិច្ចប្រជុំកំពូលអាស៊ាន-អូស្ត្រាលី នៅទីក្រុងម៉ែលប៊ន (Melbourne) ចាប់ពីថ្ងៃទី៤ ដល់ថ្ងៃទី៦ ខែមីនា។
ព្រះសង្ឃគង់នៅវត្តខ្មែរម៉ែលប៊ន គឺព្រះតេជព្រះគុណ ហ៊ុន ប៊ុនយ៉ុង មានថេរដីកាថា លោក គឹម សន្តិភាព មិនបានគោរពព្រះពុទ្ធសាសនាពិតប្រាកដឡើយ។ ព្រះតេជព្រះគុណបន្តថា ប្រសិនបើលោក គឹម សន្តិភាព គោរពព្រះពុទ្ធសាសនាពិតប្រាកដនោះ គួរតែដឹកនាំប្រទេសតាមបែបប្រជាធិបតេយ្យ ហើយឲ្យព្រះសង្ឃ និងប្រជាពលរដ្ឋខ្មែរ មានសិទ្ធិសេរីភាពបញ្ចេញមតិឲ្យបានពេញលេញ។
ព្រះតេជព្រះគុណ ហ៊ុន ប៊ុនយ៉ុង៖«គាត់(លោក គឹម សន្តិភាព)ធ្វើបាបព្រះសង្ឃសឹងអី។ បំបិទសិទ្ធិពលរដ្ឋ ទាំងព្រះសង្ឃនៅស្រុកខ្មែរ អង្គណាហ៊ានថា អង្គណាហ៊ាននិយាយ ដឹងតែចោទប្រកាន់ និងចាប់ផ្សឹកអីហូរហែ។ ញោម គឹម សន្តិភាព និយាយអត់ត្រូវទេ ចំណុចហ្នឹង»។
តំណាងសហគមន៍ខ្មែរ ឲ្យដឹងថា បើទោះបីជាមានការជ្រៀតជ្រែក និងការគំរាមកំហែងពីរដ្ឋាភិបាលកម្ពុជាក្តី ក៏ពួកគាត់ នឹងបន្តជួបជុំពិគ្រោះយោបល់គ្នាជាបន្តបន្ទាប់ និងបន្តគម្រោងធ្វើបាតុកម្មទ្រង់ទ្រាយធំនៅមុខរដ្ឋសភារដ្ឋវិចតូរីយ៉ា នៅថ្ងៃទី២ មីនាខាងមុខ។ ពួកគាត់ បញ្ជាក់ថា ការធ្វើបាតុកម្មនេះ ដើម្បីស្នើសុំឲ្យរដ្ឋាភិបាលអូស្ត្រាលីដាក់សម្ពាធទៅលោក ហ៊ុន ម៉ាណែត ឲ្យដោះលែងអ្នកទោសនយោបាយ និងអនុវត្តតាមកិច្ចព្រមព្រៀងសន្តិភាពទីក្រុងប៉ារីស ដើម្បីបំពេញបំណងប្រាថ្នារបស់ប្រជាពលរដ្ឋខ្មែរ ដែលចង់បានប្រជាធិបតេយ្យ ការគោរពសិទ្ធិមនុស្ស និងសុខសន្តិភាពពិតប្រាកដ។
តំណាងរាស្ត្រអូស្ត្រាលីដើមកំណើតខ្មែរ លោក តាក់ ម៉េងហ៊ាង លើកឡើងថា សាររបស់លោក គឹម សន្តិភាព នេះ ទំនងជាលោកភ្លេចថា ទីនេះ នៅក្រៅកម្ពុជា។ ដូច្នេះ លោក និងគណបក្សកាន់អំណាច មិនអាចប្រើអំណាចបញ្ជាឲ្យបិទការជួបជុំណាមួយ ទាំងនៅក្នុងទីវត្តអារាម ដូចនៅក្នុងប្រទេសកម្ពុជាឡើយ។
លោក តាក់ ម៉េងហ៊ាង៖«សហគមន៍ខ្មែរយើងមានទំនាក់ទំនងយ៉ាងស្អិតល្មួត ជាមួយទីវត្តអារាម គឺជាទីកន្លែង ដែលសហគមន៍ខ្មែរ តែងតែជួបជុំគ្នាក្នុងន័យថែរក្សាវប្បធម៌ អរិយធម៌ផង ហើយនឹងពិភាក្សាអំពីកិច្ចការនៅក្នុងសហគមន៍ផងដែរ រួមទាំងការលើកតម្កើងប្រជាធិបតេយ្យ ។ការណ៍ដែលមន្ត្រីបក្សជនជាន់ខ្ពស់ ពីក្រៅប្រទេសលើកឡើងអំពីការជួបជុំគ្នារបស់សហគមន៍នៅទីវត្តអារាមនេះ គឺ ជារូបភាពមួយ នៃការគំរាមកំហែងពីបរទេស ចូលមកសហគមន៍ខ្មែរនៅប្រទេសអូស្ត្រាលីនេះ។ សហគមន៍ខ្មែរយើងមិនអាចទទួលយកបានអំពីការជ្រៀតជ្រែក និងការគំរាមកំហែង ការយាយី បំបែកបំបាក់សហគមន៍នៅទីក្រុងម៉ែលប៊ន ក៏ដូចជា ប្រទេសអូស្ត្រាលីនេះ»។
កន្លងមក លោក ហុង លីម និងតំណាងសហគមន៍ខ្មែរផ្សេងទៀត ក៏ទទួលរងការវាយប្រហារតាមបណ្ដាញសង្គមពីលោក គឹម សន្តិភាព និងដៃជើងរបស់លោក ជាញឹកញាប់ផងដែរ។ធ្ងន់ធ្ងរជាងនេះ លោក ហុង លីម លោក ជា យូហ៊ន និងតំណាងរាស្ត្រអូស្ត្រាលីដើមកំណើតខ្មែរ លោក តាក់ ម៉េងហ៊ាង ក៏ទទួលបានលិខិតគំរាមសម្លាប់ចំនួនពីរលើកពីជនមិនស្គាល់មុខ ដែលតាំងខ្លួនជាអ្នកការពារគ្រួសារលោក ហ៊ុន សែន។រដ្ឋាភិបាលអូស្ត្រាលី ក៏មិនបានព្រងើយកន្តើយចំពោះ ករណីទាំងនេះដែរ។ កាលពីឆ្នាំ២០២៣ រដ្ឋមន្ត្រីក្រសួងមហាផ្ទៃ និងជារដ្ឋមន្ត្រីក្រសួងសន្តិសុខអ៊ីនធឹណិតរបស់ប្រទេសអូស្ត្រាលីអ្នកស្រី ក្លៀ អូនៀល (Clare O'Neil) បានប្រកាសថា រដ្ឋាភិបាលអូស្ត្រាលី និងភ្នាក់ងារសន្តិសុខអូស្ត្រាលី កំពុងឃ្លាំមើលយ៉ាងយកចិត្តទុកដាក់ ចំពោះសកម្មភាពក្រុមមន្ត្រីរដ្ឋាភិបាលកម្ពុជា ដែលបានដាក់គោលដៅតាមធ្វើទុក្ខបុកម្នេញ យាយី និងបំភិតបំភ័យដល់ពលរដ្ឋខ្លួននៅលើទឹកដីអូស្ត្រាលី។ ក្រៅពីនេះ ក្រុមតំណាងរាស្ត្រសហព័ន្ធអូស្ត្រាលី ក៏តែងតែទាមទារជារឿយៗ ឲ្យរដ្ឋាភិបាលអូស្ត្រាលី បិទទិដ្ឋាការ ឬវីសា (Visa) មិនឲ្យមន្ត្រីជាន់ខ្ពស់រដ្ឋាភិបាល លោក គឹម សន្តិភាព និងក្មួយប្រុសលោក ហ៊ុន សែន គឺលោក ហ៊ុន តូ ចូលប្រទេសអូស្ត្រាលីតទៅទៀត៕