១ . គណបក្សខ្មែររួបរួមជាតិនិងគណបក្សកម្ពុជានិយមគ្រោងរួមគ្នាជាបក្សតែមួយសម្រាប់ការបោះឆ្នោតឆ្នាំ២០២៣
គណបក្សខ្មែររួបរួមជាតិ និងគណបក្សកម្ពុជានិយមគ្រោងរួមគ្នាជាបក្សតែមួយសម្រាប់ការបោះឆ្នោតឆ្នាំ២០២៣។ អ្នកតំណាងគណបក្សទាំង ២ នេះរំពឹងថា ការរួបរួមនេះនឹងបង្កើតបានជាប៉ូលនយោបាយប្រជាធិបតេយ្យសេរីថ្មីមួយ ដើម្បីបុព្វហេតុជាតិ ប្រជាធិបតេយ្យសេរី សិទ្ធិមនុស្ស យុត្តិធម៌សង្គម និងផលប្រយោជន៍ខ្មែរ។ អ្នកតាមដានកិច្ចការបោះឆ្នោតស្វាគមន៍ការរួបរួមរបស់គណបក្សនយោបាយទាំងឡាយ ព្រោះមានតែការរួមគ្នាទេទើបអាចឱ្យគណបក្សនយោបាយក្រៅពីគណបក្សកាន់អំណាចមានឱកាសបង្កើនកម្លាំងប្រដំប្រសងគ្នា ដើម្បីទៅប្រកួតប្រជែង។
[ អានព័ត៌មានពិស្តារ ... Opens in new window ]
២ . ស្ត្រីជនជាតិបរទេសម្នាក់ត្រូវក្រុមឧក្រិដ្ឋជនប្រដាប់អាវុធជនជាតិចិនចាប់បង្ខាំងនៅភ្នំពេញជំរិតទារប្រាក់អស់ជាង ១០ម៉ឺនដុល្លារ
មន្ត្រីអង្គការស៊ីវិលព្រួយបារម្ភចំពោះវត្តមានក្រុមឧក្រិដ្ឋជនជនជាតិចិនមួយចំនួនដែលនៅបន្តមានអាវុធប្រើប្រាស់ និងចាត់ទុកកម្ពុជាជាកន្លែងបង្ខាំងមនុស្សដើម្បីជំរិតទារប្រាក់។ ក្ដីបារម្ភនេះរបស់សង្គមស៊ីវិលបែបនេះ ធ្វើឡើងក្រោយពីកម្លាំងកងរាជអាវុធហត្ថម្នាក់ត្រូវបានឧក្រិដ្ឋជនបើកឡានបុកបណ្ដាលឱ្យបាក់ជើង ក្នុងហេតុការណ៍ចុះបង្ក្រាបក្រុមប្រដាប់អាវុធជនជាតិចិនដែលបានចាប់ជំរិតស្ត្រីជនបរទេសម្នាក់នៅរាជធានីភ្នំពេញកាលពីពេលថ្មីៗនេះ។
[ អានព័ត៌មានពិស្តារ ... Opens in new window ]
៣ . រដ្ឋាភិបាលឥណ្ឌាថា ពលករខ្លួនជាង១៣០នាក់ ត្រូវបានសង្គ្រោះពីការងារឆរបោកនៅកម្ពុជា ឡាវ និងមីយ៉ាន់ម៉ា
រដ្ឋាភិបាលឥណ្ឌាប្រកាសថា ពលករខ្លួនសរុបជាង ១៣០នាក់ ត្រូវបានសង្គ្រោះចេញពីការងារឆរបោកនៅក្នុងប្រទេសកម្ពុជា ឡាវ (Laos) និងប្រទេសមីយ៉ាន់ម៉ា (Myanmar) ក្រោយពីពួកគេបានចាញ់បោកភ្នាក់ងារផ្តល់ឱកាសការងារក្លែងក្លាយក្នុងវិស័យបច្ចេកវិទ្យាព័ត៌មានវិទ្យានៅក្នុងប្រទេសថៃ។ នេះបើយោងតាមការផ្សាយរបស់ទីភ្នាក់ងារសារព័ត៌មាន អេ.ភី (AP) របស់អាមេរិក កាលពីថ្ងៃទី០៨ ខែតុលា។
[ អានព័ត៌មានពិស្តារ ... Opens in new window ]
៤ . ទឹកជំនន់បណ្ដាលឱ្យមនុស្សយ៉ាងហោចណាស់ជិត២០នាក់ស្លាប់ និងលិចផលដំណាំកសិកររាប់ម៉ឺនហិកតារនៅទូទាំងប្រទេស
គ្រោះទឹកជំនន់ឆ្នាំនេះបានធ្វើឱ្យដំណាំកសិកររាប់ម៉ឺនហិកតា និងហេដ្ឋារចនាសម្ព័ន្ធជាច្រើនកន្លែងនៅតាមបណ្តាខេត្តមួយចំនួនរងការខូចខាត ហើយយ៉ាងហោចណាស់មនុស្សជិត២០នាក់បានស្លាប់។ ទាក់ទងបញ្ហានេះ រដ្ឋាភិបាល បានប្រកាសពីផែនការដោយផ្តល់អាទិភាពដោះស្រាយផលប៉ះពាល់លើដំណំារបស់កសិករតាមរយៈការចុះវាយតម្លៃ និងផ្តល់ពូជដាំដុះ។ ប៉ុន្តែ កសិករស្នើដល់រដ្ឋាភិបាលជួយស្បៀងអាហារ ដើមទុន និងពូជ ជាពិសេសជួយសម្របសម្រួលជាមួយធនាគារឱ្យពន្យាពេលបង់ប្រាក់ ដើម្បីឱ្យពួកគាត់មានលទ្ធភាពអាចបង្កបង្កើនផលឡើងវិញ។
៥ . អាជ្ញាធរខេត្តបាត់ដំបងរៀបចំពិធីប្រណាំងទូកចំនួន២ថ្ងៃនៅដងស្ទឹងសង្កែ
អាជ្ញាធរខេត្តបាត់ដំបងរៀបចំពិធីប្រណាំងទូកចំនួន២ថ្ងៃនៅដងស្ទឹងសង្កែក្រុងបាត់ដំបងដោយមានមនុស្សចូលទស្សនារាប់ម៉ឺននាក់នៅថ្ងៃទី០៩ និងទី១០ តុលា។ អាជ្ញាធរខេត្តបាត់ដំបងលើកឡើងថាការប្រារព្វពីធីនេះឡើងគឺដើម្បីបង្កើតភាពសប្បាយរីករាយដល់ពលរដ្ឋដោយអភិរក្សវប្បធម៌ប្រពៃណីជាតិ។មន្ត្រីរដ្ឋបាលខេត្តនេះបញ្ជាក់ថា ពិធីនេះ មានទូកចំនួន ៣៥ទូក មកពីតាមបណ្ដាស្រុកក្នុងខេត្តនិងក្រៅខេត្តហើយមានកីឡាករកីឡាការិនីជាង១ពាន់២រយនាក់ (១,២០៣) ចូលរួមប្រណាំងទូក។
មន្ត្រីរដ្ឋបាលខេត្តបាត់ដំបងទទួលបន្ទុករៀបចំប្រណាំងទូក លោក ហុង ឆេត ប្រាប់វិទ្យុអាស៊ីសេរីថ្ងៃ ៩ តុលា ថា ពលរដ្ឋមកចូលរួមទស្សនាការប្រណាំងទូក មានប្រមាណ ៤ម៉ឺននាក់ (៤០,០០០) នៅ ថ្ងៃ៩តុលា។ លោកបន្តថា ឆ្នាំនេះ ចំនួនអ្នកទស្សនាច្រើនជាងឆ្នាំមុនដោយសារតែអាក់ខានប្រណាំងទូកនៅខេត្តបាត់ដំបងអស់រយៈពេល២ឆ្នាំកន្លងទៅបណ្ដាលមកពីវិបត្តិជំងឺកូវីដ១៩។
៦ . ពលករធ្វើការនៅប្រទេសថៃថាអាជ្ញាធរច្រកអន្តរជាតិដូងនៅខេត្តបាត់ដំបងជំរិតទារប្រាក់ពេលឆ្លងដែន
ពលករចំណាកស្រុកខ្មែរធ្វើការនៅប្រទេសថៃចោទប្រកាន់អាជ្ញាធរច្រកព្រំដែនអន្តរជាតិដូងនៅខេត្តបាត់ដំបង ថា ជំរិតទារប្រាក់ពួកគាត់ពេលឆ្លងដែន។ មន្ត្រីសង្គមស៊ីវិលយល់ថានេះជាបញ្ហាកើតឡើងដដែលៗ ដោយសារតែ រដ្ឋាភិបាលគ្មានចំណាត់ការជាក់លាក់ក្នុងការបង្ក្រាបអំពើពុករលួយដែលចាក់ឬសយ៉ាងរឹងមាំនៅតាមច្រកព្រំដែន។
៧ . ប្រជាសហគមន៍ព្រៃមេត្តាធមុ្មជាតិអស់ជំនឿចិត្តលើអភិបាលខេត្តកំពង់ស្ពឺក្នុងការការពារព្រៃសហគមន៍
តំណាងប្រជាសហគមន៍ព្រៃមេត្តាធម្មជាតិលើកឡើងថា ពួកគេអស់ជំនឿលើអភិបាលខេត្តកំពង់ស្ពឺក្នុងការដោះស្រាយបញ្ហាកំពុងកើតមាននៅព្រៃសហគមន៍មេត្តាធម្មជាតិទៀតហើយ។ មន្ត្រីអង្គការសង្គមស៊ីវិលលើកឡើងថាអភិបាលខេត្តកំពង់ស្ពឺគួរដោះស្រាយបញ្ហាដែលនៅសេសសល់កំពុងកើតមាននៅព្រៃសហគមន៍នេះឱ្យបានឆាប់ដើម្បីឱ្យប្រជាពលរដ្ឋនៅក្នុងសហគមន៍ផ្ដល់តម្លៃដល់លោកឡើងវិញនិងជៀសវៀងទទួលបានការស្ដីបន្ទោសពីថ្នាក់លើ។
៨ . ស្ត្រីខ្មែរក្រោមដែលជនជាតិវៀតណាមបាញ់ឲ្យរបួសថាអាជ្ញាធរវៀតណាមមិនទាន់ចាប់ជនដៃដល់មកដាក់ទោសនៅឡើយ
ស្ត្រីខ្មែរក្រោមម្នាក់ដែលក្រុមអន្ធពាលវៀតណាមបាញ់ឲ្យរបួសធ្ងន់ត្រង់កំភ្លៅថាអាជ្ញាធរវៀតណាមមិនទាន់ចាប់ជនដៃដល់មកផ្ដន្ទាទោសនៅឡើយទេ។ កាលពីថ្ងៃទី២៧ ខែកញ្ញា ក្រុមអ្នកលេងជនជាតិវៀតណាមប្រមាណ២០នាក់ប្រដាប់ដោយដំបងនិងកាំភ្លើងបានមកហ៊ុំព័ទ្ធយកដីរបស់ខ្មែរក្រោមហើយបានបាញ់ស្ត្រីម្នាក់របួសធ្ងន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។