គណបក្សកាន់អំណាច មិនអនុញ្ញាតឱ្យគណបក្សសម្ព័ន្ធមិត្តជិត២០ ដែលសុំចងសម្ពន្ធភាពនយោបាយជាមួយខ្លួននោះជ្រកក្រោមដំបូលរបស់គណបក្សនេះទេ។ អ្នកឃ្លាំមើលមើលនយោបាយ យល់ថា សម្ពន្ធភាពរបស់គណបក្សកាន់អំណាចជាមួយគណបក្សក្រៅរដ្ឋាភិបាលទាំងនោះ ដើម្បីបម្រើប្រយោជន៍គណបក្សកាន់អំណាចប៉ុណ្ណោះ។
ថ្វីដ្បិតគណបក្សកាន់អំណាចយល់ព្រមឱ្យគណបក្សនយោបាយជិត២០ ដែលសុទ្ធសឹងជាគណបក្សមិនសូវធ្វើសកម្មភាពនយោបាយ ក្លាយជាសម្ពន្ធមិត្តរបស់ខ្លួនក្ដី ប៉ុន្តែ គណបក្សទាំងនោះ មិនអាចរស់ក្រោមឆត្ររបស់គណបក្សប្រជាជនកម្ពុជាឡើយ។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ឱ្យដឹងថា ការចងសម្ព័ន្ធរបស់គណបក្សកាន់អំណាចជាមួយគណបក្សនយោបាយទាំងនោះគឺជាការរក្សាឯកភាព និងអធិបតេយ្យភាពរបស់គណបក្សទាំងនោះទៅវិញទៅមក ប៉ុន្តែមិនមែនជាការជ្រកស្លាកគណបក្សប្រជាជនកម្ពុជាឡើយ។ លោកលើកឡើងថា ទៀតសម្ពន្ធភាពរបស់គណបក្សកាន់អំណាចជាមួយគណបក្សទាំងនោះ កើតឡើងព្រោះគណបក្សទាំងនោះមានគោលនយោបាយដូចគ្នាជាមួយគណបក្សកាន់អំណាច។ លោក សុខ ឥសាន អះអាងទៀតថា បើទោះជាគណបក្សប្រជាជនកម្ពុជា ជាគណបក្សដឹកនាំរដ្ឋាភិបាលក្ដី ប៉ុន្តែ គណបក្សរបស់លោកមិនប្រើប្រាស់សិទ្ធិអំណាចទៅគ្រប់គ្រងឬបង្គាប់បញ្ជាទៅលើគណបក្សសម្ព័ន្ធមិត្តរបស់ខ្លួននោះទេ។
លោក សុខ ឥសាន៖«មិនមែនដូចអ្នកដែលប្រឆាំងថា កាលណាមកចូលជាមួយគណបក្សប្រជាជនគេថា មកចូលក្រោមស្លាកគណបក្សប្រជាជន ក្រោមដំបូលគណបក្សប្រជាជន ហើយបានសេចក្ដីបានថា ចុះចូល ហើយគណបក្សប្រជាជនមិនដែលប្រើពាក្យថា ចុះចូលទេ គឺគណបក្សណាដែលចងសម្ពន្ធភាពគឺយើងគោរពជាគណបក្សដូចគ្នាស្មើភាពគ្នាចំពោះមុខច្បាប់»។
លោក សុខ ឥសាន ឱ្យដឹងទៀតថា មកដល់ពេលនេះ មានគណបក្សនយោបាយជិត២០ហើយបានសុំចងសម្ពន្ធភាពជាមួយគណបក្សប្រជាជនកម្ពុជា។ ទោះយ៉ាណាក្ដី លោកថា គិតមកដល់ពេលនេះ គណបក្សប្រជាជនកម្ពុជា មិនទាន់រៀបចំរបៀបរបបការងារដែលគណបក្សប្រជាជនកម្ពុជា ត្រូវធ្វើការជាមួយគណបក្សសម្ព័ន្ធមិត្តរបស់ខ្លួននៅឡើយ។ គណបក្សទាំងនោះរួមមាន គណបក្សខ្មែរអង្គរ គណបក្សចលនាប្រជាធិបតេយ្យ គណបក្សកម្លាំងប្រជាធិបតេយ្យ គណបក្សមហាសាមគ្គីខ្មែរ គណបក្សអំណាចពលរដ្ឋ គណបក្សរស្មីខេមរា គណបក្សខ្មែរសាធារណរដ្ឋ និងគណបក្សខ្មែរអភិវឌ្ឍន៍សេដ្ឋកិច្ច ជាដើម។
ទាក់ទងរឿងនេះដែរ ប្រធានអង្គការសម្ពន្ធភាពការពារសិទ្ធិមនុស្សកម្ពុជា ហៅកាត់ថា ច្រាក់ (CHRAC) លោក រស់ សុដ្ឋា យល់ថា គណបក្សកាន់អំណាច មានការប្រុងប្រយ័ត្នជាងមុន ដោយយល់ព្រមឱ្យគណបក្សនយោបាយក្រៅរដ្ឋាភិបាលធ្វើជាសម្ព័ន្ធរបស់ខ្លួន។ លោកយល់ឃើញទៀតថា នៅពេលដែលគណបក្សទាំងនោះក្លាយជាសម្ព័ន្ធមិត្តរបស់គណបក្សកាន់អំណាច គឺគណបក្សប្រជាជនកម្ពុជា នឹងមានឥទ្ធិពលលើគណបក្សទាំងនោះ ដែលគណបក្សកាន់អំណាចអាចធ្វើឱ្យគណបក្សទាំងនោះធ្វើសកម្មភាពអ្វីមួយតាមការចង់បានរបស់ខ្លួន។ អ្នកឃ្លាំមើលនយោបាយ រូបនេះ ទន្ទឹមគ្នានោះដែរ គណបក្សសម្ព័ន្ធមិត្តទាំងនោះក៏នឹងទទួលផលប្រយោជន៍ពីគណបក្សកាន់អំណាចវិញដែរ ដូចជាតួនាទី ឬទ្រព្យសម្បត្តិជាដើម។
លោក រស់ សុដ្ឋា៖«មានពីរទី១ ការប្រកួតប្រជែងទៅលើសង្វៀនដោយសេរីនិងយុត្តិធម៌ ទី២ ក្នុងករណីដែលការតវ៉ា ឬបាតុកម្មអីៗ គឺថា កម្លាំងតូចៗ ក៏ជាកម្លាំងមួយដែរ ក្នុងការជួយជ្រោមជ្រែងណា ឧបមាថា គណបក្សមួយមានតែ៥ម៉ឺននាក់ឧបមាថា ២០គណបក្សឡើងប៉ុន្មាន?»។
ប្រធានគណបក្សប្រជាជនកម្ពុជា លោក ហ៊ុន សែន បានប្រកាសទទួលយកការសុំចងសម្ពន្ធភាពពីគណបក្សក្រៅរដ្ឋាភិបាលជិត២០ កាលថ្ងៃទី១១ ខែតុលា បើទោះជាគណបក្សមានតែឈ្មោះតែហាក់មិនឃើញធ្វើសកម្មភាពនយោបាយក្ដី ហើយគណបក្សខ្លះមានត្រឹមតែឈ្មោះ តែមិនបានចូលរួមការបោះឆ្នោតក៏មាន។ ជំហរ របស់គណបក្សកាន់អំណាចបែបនេះ ក្រោយពេលបក្សភ្លើងទៀន ដែលជាគណបក្សប្រឆាំងចុងក្រោយនៅកម្ពុជា បានប្រកាសជាផ្លូវការចងសម្ពន្ធភាពជាមួយគណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន និងគណបក្សកែទម្រង់កម្ពុជា។
អ្នកវិភាគនយោបាយ លោក គឹម សុខ យល់ថា ការចង់បានរបស់លោក ហ៊ុន សែន ពីសម្ពន្ធភាពនយោបាយនៅពេលនេះ ព្រោះប្រធានគណបក្សកាន់អំណាចរូបនេះចង់បំបែកបំបាក់កម្លាំងអ្នកប្រជាធិបតេយ្យ និងជាផែនការទប់ស្កាត់មិនឱ្យគណបក្សផ្សេងៗ ទៀតទៅចូលរួមចលនានយោបាយជាមួយគណបក្សភ្លើងទៀន។ លោកបន្តទៀតទេ បើទោះជាគណបក្សសម្ព័ន្ធរបស់គណបក្សប្រជាជនកម្ពុជា អាចទទួលលាភសក្ការៈពីគណបក្សកាន់អំណាចក្ដី ប៉ុន្តែគណបក្សទាំងនោះនឹងត្រូវបាត់បង់សិទ្ធិនយោបាយ ឬការសម្រេចចិត្តផ្នែកនយោបាយផងដែរ។
លោក គឹម សុខ៖«កាលណាចុះហត្ថលេខាជាមួយលោក ហ៊ុន សែន ពួកគេនឹងដើរជាអ្នកបំបែកកម្លាំងអ្នកប្រជាធិបតេយ្យ ទី២ពួកគេនឹងដើរតួអុកឡុកសម្ព័ន្ធអ្នកដែលចង់បានប្រជាធិបតេយ្យពួកគេដើរតួនាទីសំខាន់ត្រង់ហ្នឹង ហើយគណបក្សប្រជាជនកម្ពុជា ទំនងជាដកឃ្លានៅពីក្រោយពួកហ្នឹង ហើយពួកហ្នឹងធ្វើសកម្មភាពអុកឡុកអ្នកដែលមាននិន្នាការប្រជាធិបតេយ្យ»។
នៅពេលគណបក្សនយោបាយនានា ចាប់ផ្ដើមចង់មិត្តជាពីរប៉ូលដូច្នេះ អ្នកឃ្លាំមើលនយោបាយថា រូបភាពនេះក៏ផ្ដល់ផលល្អ ដល់ពលរដ្ឋម្ចាស់ដែរ ដែលធ្វើឱ្យពួកគាត់អាចដឹងថា ក្រុមគណបក្សនយោបាយណាខ្លះជាគណបក្សប្រឆាំង ហើយគណបក្សណាខ្លះជាគណបក្សគាំទ្រគណបក្សកាន់អំណាច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។